| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. যুগনদ্ধসুত্তৰণ্ণনা
10. Yuganaddhasuttavaṇṇanā
১৭০. দসমে সমথপুব্বঙ্গমন্তি সমথং পুব্বঙ্গমং পুরেচারিকং কত্ৰা। মগ্গো সঞ্জাযতীতি পঠমো লোকুত্তরমগ্গো নিব্বত্ততি। সো তং মগ্গন্তি একচিত্তক্খণিকমগ্গস্স আসেৰনাদীনি নাম নত্থি, দুতিযমগ্গাদযো পন উপ্পাদেন্তো তমেৰ আসেৰতি ভাৰেতি বহুলীকরোতীতি ৰুচ্চতি। ৰিপস্সনাপুব্বঙ্গমন্তি ৰিপস্সনং পুব্বঙ্গমং পুরেচারিকং কত্ৰা সমথং ভাৰেতি, পকতিযা ৰিপস্সনালাভী ৰিপস্সনায ঠত্ৰা সমাধিং উপ্পাদেতীতি অত্থো।
170. Dasame samathapubbaṅgamanti samathaṃ pubbaṅgamaṃ purecārikaṃ katvā. Maggo sañjāyatīti paṭhamo lokuttaramaggo nibbattati. Sotaṃ magganti ekacittakkhaṇikamaggassa āsevanādīni nāma natthi, dutiyamaggādayo pana uppādento tameva āsevati bhāveti bahulīkarotīti vuccati. Vipassanāpubbaṅgamanti vipassanaṃ pubbaṅgamaṃ purecārikaṃ katvā samathaṃ bhāveti, pakatiyā vipassanālābhī vipassanāya ṭhatvā samādhiṃ uppādetīti attho.
যুগনদ্ধং ভাৰেতীতি যুগনদ্ধং কত্ৰা ভাৰেতি। তত্থ তেনেৰ চিত্তেন সমাপত্তিং সমাপজ্জিত্ৰা তেনেৰ সঙ্খারে সম্মসিতুং ন সক্কা। অযং পন যাৰতা সমাপত্তিযো সমাপজ্জতি, তাৰতা সঙ্খারে সম্মসতি। যাৰতা সঙ্খারে সম্মসতি, তাৰতা সমাপত্তিযো সমাপজ্জতি। কথং? পঠমজ্ঝানং সমাপজ্জতি, ততো ৰুট্ঠায সঙ্খারে সম্মসতি, সঙ্খারে সম্মসিত্ৰা দুতিযজ্ঝানং সমাপজ্জতি। ততো ৰুট্ঠায পুন সঙ্খারে সম্মসতি। সঙ্খারে সম্মসিত্ৰা ততিযজ্ঝানং…পে॰… নেৰসঞ্ঞানাসঞ্ঞাযতনসমাপত্তিং সমাপজ্জতি, ততো ৰুট্ঠায সঙ্খারে সম্মসতি। এৰমযং সমথৰিপস্সনং যুগনদ্ধং ভাৰেতি নাম।
Yuganaddhaṃ bhāvetīti yuganaddhaṃ katvā bhāveti. Tattha teneva cittena samāpattiṃ samāpajjitvā teneva saṅkhāre sammasituṃ na sakkā. Ayaṃ pana yāvatā samāpattiyo samāpajjati, tāvatā saṅkhāre sammasati. Yāvatā saṅkhāre sammasati, tāvatā samāpattiyo samāpajjati. Kathaṃ? Paṭhamajjhānaṃ samāpajjati, tato vuṭṭhāya saṅkhāre sammasati, saṅkhāre sammasitvā dutiyajjhānaṃ samāpajjati. Tato vuṭṭhāya puna saṅkhāre sammasati. Saṅkhāre sammasitvā tatiyajjhānaṃ…pe… nevasaññānāsaññāyatanasamāpattiṃ samāpajjati, tato vuṭṭhāya saṅkhāre sammasati. Evamayaṃ samathavipassanaṃ yuganaddhaṃ bhāveti nāma.
ধম্মুদ্ধচ্চৰিগ্গহিতন্তি সমথৰিপস্সনাধম্মেসু দসৰিপস্সনুপক্কিলেসসঙ্খাতেন উদ্ধচ্চেন ৰিগ্গহিতং, সুগ্গহিতন্তি অত্থো। সো, আৰুসো, সমযোতি ইমিনা সত্তন্নং সপ্পাযানং পটিলাভকালো কথিতো। যং তং চিত্তন্তি যস্মিং সমযে তং ৰিপস্সনাৰীথিং ওক্কমিত্ৰা পৰত্তং চিত্তং। অজ্ঝত্তমেৰ সন্তিট্ঠতীতি ৰিপস্সনাৰীথিং পচ্চোত্থরিত্ৰা তস্মিংযেৰ গোচরজ্ঝত্তসঙ্খাতে আরম্মণে সন্তিট্ঠতি। সন্নিসীদতীতি আরম্মণৰসেন সম্মা নিসীদতি। একোদি হোতীতি একগ্গং হোতি। সমাধিযতীতি সম্মা আধিযতি সুট্ঠপিতং হোতি। সেসমেত্থ উত্তানত্থমেৰ।
Dhammuddhaccaviggahitanti samathavipassanādhammesu dasavipassanupakkilesasaṅkhātena uddhaccena viggahitaṃ, suggahitanti attho. So, āvuso, samayoti iminā sattannaṃ sappāyānaṃ paṭilābhakālo kathito. Yaṃ taṃ cittanti yasmiṃ samaye taṃ vipassanāvīthiṃ okkamitvā pavattaṃ cittaṃ. Ajjhattamevasantiṭṭhatīti vipassanāvīthiṃ paccottharitvā tasmiṃyeva gocarajjhattasaṅkhāte ārammaṇe santiṭṭhati. Sannisīdatīti ārammaṇavasena sammā nisīdati. Ekodi hotīti ekaggaṃ hoti. Samādhiyatīti sammā ādhiyati suṭṭhapitaṃ hoti. Sesamettha uttānatthameva.
পটিপদাৰগ্গো দুতিযো।
Paṭipadāvaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. যুগনদ্ধসুত্তং • 10. Yuganaddhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. যুগনদ্ধসুত্তৰণ্ণনা • 10. Yuganaddhasuttavaṇṇanā
