| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. යුගනද්‌ධසුත්‌තවණ්‌ණනා
10. Yuganaddhasuttavaṇṇanā
170. දසමෙ සමථපුබ්‌බඞ්‌ගමන්‌ති සමථං පුබ්‌බඞ්‌ගමං පුරෙචාරිකං කත්‌වා. මග්‌ගො සඤ්‌ජායතීති පඨමො ලොකුත්‌තරමග්‌ගො නිබ්‌බත්‌තති. සො තං මග්‌ගන්‌ති එකචිත්‌තක්‌ඛණිකමග්‌ගස්‌ස ආසෙවනාදීනි නාම නත්‌ථි, දුතියමග්‌ගාදයො පන උප්‌පාදෙන්‌තො තමෙව ආසෙවති භාවෙති බහුලීකරොතීති වුච්‌චති. විපස්‌සනාපුබ්‌බඞ්‌ගමන්‌ති විපස්‌සනං පුබ්‌බඞ්‌ගමං පුරෙචාරිකං කත්‌වා සමථං භාවෙති, පකතියා විපස්‌සනාලාභී විපස්‌සනාය ඨත්‌වා සමාධිං උප්‌පාදෙතීති අත්‌ථො.
170. Dasame samathapubbaṅgamanti samathaṃ pubbaṅgamaṃ purecārikaṃ katvā. Maggo sañjāyatīti paṭhamo lokuttaramaggo nibbattati. Sotaṃ magganti ekacittakkhaṇikamaggassa āsevanādīni nāma natthi, dutiyamaggādayo pana uppādento tameva āsevati bhāveti bahulīkarotīti vuccati. Vipassanāpubbaṅgamanti vipassanaṃ pubbaṅgamaṃ purecārikaṃ katvā samathaṃ bhāveti, pakatiyā vipassanālābhī vipassanāya ṭhatvā samādhiṃ uppādetīti attho.
යුගනද්‌ධං භාවෙතීති යුගනද්‌ධං කත්‌වා භාවෙති. තත්‌ථ තෙනෙව චිත්‌තෙන සමාපත්‌තිං සමාපජ්‌ජිත්‌වා තෙනෙව සඞ්‌ඛාරෙ සම්‌මසිතුං න සක්‌කා. අයං පන යාවතා සමාපත්‌තියො සමාපජ්‌ජති, තාවතා සඞ්‌ඛාරෙ සම්‌මසති. යාවතා සඞ්‌ඛාරෙ සම්‌මසති, තාවතා සමාපත්‌තියො සමාපජ්‌ජති. කථං? පඨමජ්‌ඣානං සමාපජ්‌ජති, තතො වුට්‌ඨාය සඞ්‌ඛාරෙ සම්‌මසති, සඞ්‌ඛාරෙ සම්‌මසිත්‌වා දුතියජ්‌ඣානං සමාපජ්‌ජති. තතො වුට්‌ඨාය පුන සඞ්‌ඛාරෙ සම්‌මසති. සඞ්‌ඛාරෙ සම්‌මසිත්‌වා තතියජ්‌ඣානං…පෙ.… නෙවසඤ්‌ඤානාසඤ්‌ඤායතනසමාපත්‌තිං සමාපජ්‌ජති, තතො වුට්‌ඨාය සඞ්‌ඛාරෙ සම්‌මසති. එවමයං සමථවිපස්‌සනං යුගනද්‌ධං භාවෙති නාම.
Yuganaddhaṃ bhāvetīti yuganaddhaṃ katvā bhāveti. Tattha teneva cittena samāpattiṃ samāpajjitvā teneva saṅkhāre sammasituṃ na sakkā. Ayaṃ pana yāvatā samāpattiyo samāpajjati, tāvatā saṅkhāre sammasati. Yāvatā saṅkhāre sammasati, tāvatā samāpattiyo samāpajjati. Kathaṃ? Paṭhamajjhānaṃ samāpajjati, tato vuṭṭhāya saṅkhāre sammasati, saṅkhāre sammasitvā dutiyajjhānaṃ samāpajjati. Tato vuṭṭhāya puna saṅkhāre sammasati. Saṅkhāre sammasitvā tatiyajjhānaṃ…pe… nevasaññānāsaññāyatanasamāpattiṃ samāpajjati, tato vuṭṭhāya saṅkhāre sammasati. Evamayaṃ samathavipassanaṃ yuganaddhaṃ bhāveti nāma.
ධම්‌මුද්‌ධච්‌චවිග්‌ගහිතන්‌ති සමථවිපස්‌සනාධම්‌මෙසු දසවිපස්‌සනුපක්‌කිලෙසසඞ්‌ඛාතෙන උද්‌ධච්‌චෙන විග්‌ගහිතං, සුග්‌ගහිතන්‌ති අත්‌ථො. සො, ආවුසො, සමයොති ඉමිනා සත්‌තන්‌නං සප්‌පායානං පටිලාභකාලො කථිතො. යං තං චිත්‌තන්‌ති යස්‌මිං සමයෙ තං විපස්‌සනාවීථිං ඔක්‌කමිත්‌වා පවත්‌තං චිත්‌තං. අජ්‌ඣත්‌තමෙව සන්‌තිට්‌ඨතීති විපස්‌සනාවීථිං පච්‌චොත්‌ථරිත්‌වා තස්‌මිංයෙව ගොචරජ්‌ඣත්‌තසඞ්‌ඛාතෙ ආරම්‌මණෙ සන්‌තිට්‌ඨති. සන්‌නිසීදතීති ආරම්‌මණවසෙන සම්‌මා නිසීදති. එකොදි හොතීති එකග්‌ගං හොති. සමාධියතීති සම්‌මා ආධියති සුට්‌ඨපිතං හොති. සෙසමෙත්‌ථ උත්‌තානත්‌ථමෙව.
Dhammuddhaccaviggahitanti samathavipassanādhammesu dasavipassanupakkilesasaṅkhātena uddhaccena viggahitaṃ, suggahitanti attho. So, āvuso, samayoti iminā sattannaṃ sappāyānaṃ paṭilābhakālo kathito. Yaṃ taṃ cittanti yasmiṃ samaye taṃ vipassanāvīthiṃ okkamitvā pavattaṃ cittaṃ. Ajjhattamevasantiṭṭhatīti vipassanāvīthiṃ paccottharitvā tasmiṃyeva gocarajjhattasaṅkhāte ārammaṇe santiṭṭhati. Sannisīdatīti ārammaṇavasena sammā nisīdati. Ekodi hotīti ekaggaṃ hoti. Samādhiyatīti sammā ādhiyati suṭṭhapitaṃ hoti. Sesamettha uttānatthameva.
පටිපදාවග්‌ගො දුතියො.
Paṭipadāvaggo dutiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. යුගනද්‌ධසුත්‌තං • 10. Yuganaddhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. යුගනද්‌ධසුත්‌තවණ්‌ණනා • 10. Yuganaddhasuttavaṇṇanā
