| Library / Tipiṭaka / తిపిటక • Tipiṭaka / అపదాన-అట్ఠకథా • Apadāna-aṭṭhakathā |
౭. యూథికాపుప్ఫియత్థేరఅపదానవణ్ణనా
7. Yūthikāpupphiyattheraapadānavaṇṇanā
చన్దభాగానదీతీరేతిఆదికం ఆయస్మతో యూథికాపుప్ఫియత్థేరస్స అపదానం. అయమ్పి ఆయస్మా పురిమమునిన్దేసు కతాధికారో అనేకేసు చ జాతిసతేసు వివట్టూపనిస్సయాని పుఞ్ఞాని ఉపచినన్తో ఫుస్సస్సేవ భగవతో కాలే సుద్దకులే నిబ్బత్తో వుద్ధిప్పత్తో చన్దభాగాయ నదియా తీరే కేనచిదేవ కరణీయేన అనుసోతం చరమానో ఫుస్సం భగవన్తం న్హాయితుకామం అగ్గిక్ఖన్ధం వియ జలమానం దిస్వా సోమనస్సజాతో తత్థ జాతం యూథికాపుప్ఫం ఓచినిత్వా భగవన్తం పూజేసి. భగవా తస్స అనుమోదనమకాసి.
Candabhāgānadītīretiādikaṃ āyasmato yūthikāpupphiyattherassa apadānaṃ. Ayampi āyasmā purimamunindesu katādhikāro anekesu ca jātisatesu vivaṭṭūpanissayāni puññāni upacinanto phussasseva bhagavato kāle suddakule nibbatto vuddhippatto candabhāgāya nadiyā tīre kenacideva karaṇīyena anusotaṃ caramāno phussaṃ bhagavantaṃ nhāyitukāmaṃ aggikkhandhaṃ viya jalamānaṃ disvā somanassajāto tattha jātaṃ yūthikāpupphaṃ ocinitvā bhagavantaṃ pūjesi. Bhagavā tassa anumodanamakāsi.
౩౩. సో తత్థ తేన పుఞ్ఞకోట్ఠాసేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో భగవతో ధమ్మదేసనం సుత్వా పసన్నమానసో పబ్బజిత్వా వత్తపటిపత్తియా సాసనం సోభేన్తో నచిరస్సేవ అరహా హుత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో చన్దభాగానదీతీరేతిఆదిమాహ. తం సబ్బం ఉత్తానత్థమేవాతి.
33. So tattha tena puññakoṭṭhāsena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhippatto bhagavato dhammadesanaṃ sutvā pasannamānaso pabbajitvā vattapaṭipattiyā sāsanaṃ sobhento nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Taṃ sabbaṃ uttānatthamevāti.
యూథికాపుప్ఫియత్థేరఅపదానవణ్ణనా సమత్తా.
Yūthikāpupphiyattheraapadānavaṇṇanā samattā.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / ఖుద్దకనికాయ • Khuddakanikāya / అపదానపాళి • Apadānapāḷi / ౭. యూథికపుప్ఫియత్థేరఅపదానం • 7. Yūthikapupphiyattheraapadānaṃ
