| Library / Tipiṭaka / တိပိဋက • Tipiṭaka / နေတ္တိပ္ပကရဏ-အဋ္ဌကထာ • Nettippakaraṇa-aṭṭhakathā |
၃. ယုတ္တိဟာရသမ္ပာတဝဏ္ဏနာ
3. Yuttihārasampātavaṇṇanā
၆၅. ဧဝံ နာနာနယေဟိ ဝိစယဟာရသမ္ပာတံ ဝိတ္ထာရေတ္ဝာ ဣဒာနိ ယုတ္တိဟာရသမ္ပာတာဒီနိ ဒသ္သေတုံ ‘‘တတ္ထ ကတမော ယုတ္တိဟာရသမ္ပာတော’’တိအာဒိ အာရဒ္ဓံ။ တတ္ထ ‘‘တသ္မာ ရက္ခိတစိတ္တသ္သာ’’တိ ဂာထာယ ပဒတ္ထော ဝိတ္ထာရိတောယေဝ။ ရက္ခိတစိတ္တသ္သ သမ္မာသင္ကပ္ပဂောစရော ဘဝိသ္သတီတိ ယုဇ္ဇတီတိ မနစ္ဆဋ္ဌာနိ ဒ္ဝာရာနိ သတိကဝာဋေန ပိဒဟိတ္ဝာ ဝိဟရန္တသ္သ ကာမဝိတက္ကာဒီနံ မိစ္ဆာသင္ကပ္ပာနံ အဝသရော ဧဝ နတ္ထီတိ နေက္ခမ္မဝိတက္ကာဒိကော သမ္မာသင္ကပ္ပော ဧဝ တသ္သ ဂောစရော ပဝတ္တိဋ္ဌာနံ ဘဝိသ္သတီတိ အယမတ္ထော ယုဇ္ဇတိ။ ယုတ္တိယာ ဃဋေတိ သံသန္ဒတိ သမေတီတိ အတ္ထော။ သမ္မာသင္ကပ္ပဂောစရော သမ္မာဒိဋ္ဌိ ဘဝိသ္သတီတိ ဝုတ္တနယေန သမ္မာသင္ကပ္ပဂောစရော ပုဂ္ဂလော အဝိပရီတမေဝ ဝိတက္ကတော သမ္မာဒိဋ္ဌိ ဘဝိသ္သတိ။ သမ္မာဒိဋ္ဌိသင္ခာတံ ဝိပသ္သနာဉာဏံ ပုရက္ခတ္ဝာ ဝိဟရန္တော မဂ္ဂဉာဏေန ပဉ္စန္နံ ခန္ဓာနံ ဥဒယဗ္ဗယံ အသမ္မောဟတော ပဋိဝိဇ္ဈိသ္သတိ။ တထာ ပဋိဝိဇ္ဈန္တော စ ဒုက္ခသဘာဝတ္တာ ဒုဂ္ဂတိသင္ခာတာ သဗ္ဗာ ဘဝဂတိယော ဇဟိသ္သတိ, တတော ဧဝ သဗ္ဗံ ဝိနိပာတဘယံ သံသာရဘယဉ္စ သမတိက္ကမိသ္သတီတိ သဗ္ဗောပိ စာယမတ္ထော ယုတ္တော ဧဝာတိ။
65. Evaṃ nānānayehi vicayahārasampātaṃ vitthāretvā idāni yuttihārasampātādīni dassetuṃ ‘‘tattha katamo yuttihārasampāto’’tiādi āraddhaṃ. Tattha ‘‘tasmā rakkhitacittassā’’ti gāthāya padattho vitthāritoyeva. Rakkhitacittassa sammāsaṅkappagocaro bhavissatīti yujjatīti manacchaṭṭhāni dvārāni satikavāṭena pidahitvā viharantassa kāmavitakkādīnaṃ micchāsaṅkappānaṃ avasaro eva natthīti nekkhammavitakkādiko sammāsaṅkappo eva tassa gocaro pavattiṭṭhānaṃ bhavissatīti ayamattho yujjati. Yuttiyā ghaṭeti saṃsandati sametīti attho. Sammāsaṅkappagocaro sammādiṭṭhi bhavissatīti vuttanayena sammāsaṅkappagocaro puggalo aviparītameva vitakkato sammādiṭṭhi bhavissati. Sammādiṭṭhisaṅkhātaṃ vipassanāñāṇaṃ purakkhatvā viharanto maggañāṇena pañcannaṃ khandhānaṃ udayabbayaṃ asammohato paṭivijjhissati. Tathā paṭivijjhanto ca dukkhasabhāvattā duggatisaṅkhātā sabbā bhavagatiyo jahissati, tato eva sabbaṃ vinipātabhayaṃ saṃsārabhayañca samatikkamissatīti sabbopi cāyamattho yutto evāti.
ယုတ္တိဟာရသမ္ပာတဝဏ္ဏနာ နိဋ္ဌိတာ။
Yuttihārasampātavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / နေတ္တိပ္ပကရဏပာဠိ • Nettippakaraṇapāḷi / ၃. ယုတ္တိဟာရသမ္ပာတော • 3. Yuttihārasampāto
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိပ္ပကရဏ-ဋီကာ • Nettippakaraṇa-ṭīkā / ၃. ယုတ္တိဟာရသမ္ပာတဝဏ္ဏနာ • 3. Yuttihārasampātavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိဝိဘာဝိနီ • Nettivibhāvinī / ၃. ယုတ္တိဟာရသမ္ပာတဝိဘာဝနာ • 3. Yuttihārasampātavibhāvanā
