| Library / Tipiṭaka / തിപിടക • Tipiṭaka / നേത്തിപ്പകരണ-അട്ഠകഥാ • Nettippakaraṇa-aṭṭhakathā |
൩. യുത്തിഹാരസമ്പാതവണ്ണനാ
3. Yuttihārasampātavaṇṇanā
൬൫. ഏവം നാനാനയേഹി വിചയഹാരസമ്പാതം വിത്ഥാരേത്വാ ഇദാനി യുത്തിഹാരസമ്പാതാദീനി ദസ്സേതും ‘‘തത്ഥ കതമോ യുത്തിഹാരസമ്പാതോ’’തിആദി ആരദ്ധം. തത്ഥ ‘‘തസ്മാ രക്ഖിതചിത്തസ്സാ’’തി ഗാഥായ പദത്ഥോ വിത്ഥാരിതോയേവ. രക്ഖിതചിത്തസ്സ സമ്മാസങ്കപ്പഗോചരോ ഭവിസ്സതീതി യുജ്ജതീതി മനച്ഛട്ഠാനി ദ്വാരാനി സതികവാടേന പിദഹിത്വാ വിഹരന്തസ്സ കാമവിതക്കാദീനം മിച്ഛാസങ്കപ്പാനം അവസരോ ഏവ നത്ഥീതി നേക്ഖമ്മവിതക്കാദികോ സമ്മാസങ്കപ്പോ ഏവ തസ്സ ഗോചരോ പവത്തിട്ഠാനം ഭവിസ്സതീതി അയമത്ഥോ യുജ്ജതി. യുത്തിയാ ഘടേതി സംസന്ദതി സമേതീതി അത്ഥോ. സമ്മാസങ്കപ്പഗോചരോ സമ്മാദിട്ഠി ഭവിസ്സതീതി വുത്തനയേന സമ്മാസങ്കപ്പഗോചരോ പുഗ്ഗലോ അവിപരീതമേവ വിതക്കതോ സമ്മാദിട്ഠി ഭവിസ്സതി. സമ്മാദിട്ഠിസങ്ഖാതം വിപസ്സനാഞാണം പുരക്ഖത്വാ വിഹരന്തോ മഗ്ഗഞാണേന പഞ്ചന്നം ഖന്ധാനം ഉദയബ്ബയം അസമ്മോഹതോ പടിവിജ്ഝിസ്സതി. തഥാ പടിവിജ്ഝന്തോ ച ദുക്ഖസഭാവത്താ ദുഗ്ഗതിസങ്ഖാതാ സബ്ബാ ഭവഗതിയോ ജഹിസ്സതി, തതോ ഏവ സബ്ബം വിനിപാതഭയം സംസാരഭയഞ്ച സമതിക്കമിസ്സതീതി സബ്ബോപി ചായമത്ഥോ യുത്തോ ഏവാതി.
65. Evaṃ nānānayehi vicayahārasampātaṃ vitthāretvā idāni yuttihārasampātādīni dassetuṃ ‘‘tattha katamo yuttihārasampāto’’tiādi āraddhaṃ. Tattha ‘‘tasmā rakkhitacittassā’’ti gāthāya padattho vitthāritoyeva. Rakkhitacittassa sammāsaṅkappagocaro bhavissatīti yujjatīti manacchaṭṭhāni dvārāni satikavāṭena pidahitvā viharantassa kāmavitakkādīnaṃ micchāsaṅkappānaṃ avasaro eva natthīti nekkhammavitakkādiko sammāsaṅkappo eva tassa gocaro pavattiṭṭhānaṃ bhavissatīti ayamattho yujjati. Yuttiyā ghaṭeti saṃsandati sametīti attho. Sammāsaṅkappagocaro sammādiṭṭhi bhavissatīti vuttanayena sammāsaṅkappagocaro puggalo aviparītameva vitakkato sammādiṭṭhi bhavissati. Sammādiṭṭhisaṅkhātaṃ vipassanāñāṇaṃ purakkhatvā viharanto maggañāṇena pañcannaṃ khandhānaṃ udayabbayaṃ asammohato paṭivijjhissati. Tathā paṭivijjhanto ca dukkhasabhāvattā duggatisaṅkhātā sabbā bhavagatiyo jahissati, tato eva sabbaṃ vinipātabhayaṃ saṃsārabhayañca samatikkamissatīti sabbopi cāyamattho yutto evāti.
യുത്തിഹാരസമ്പാതവണ്ണനാ നിട്ഠിതാ.
Yuttihārasampātavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / നേത്തിപ്പകരണപാളി • Nettippakaraṇapāḷi / ൩. യുത്തിഹാരസമ്പാതോ • 3. Yuttihārasampāto
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / ഖുദ്ദകനികായ (ടീകാ) • Khuddakanikāya (ṭīkā) / നേത്തിപ്പകരണ-ടീകാ • Nettippakaraṇa-ṭīkā / ൩. യുത്തിഹാരസമ്പാതവണ്ണനാ • 3. Yuttihārasampātavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / ഖുദ്ദകനികായ (ടീകാ) • Khuddakanikāya (ṭīkā) / നേത്തിവിഭാവിനീ • Nettivibhāvinī / ൩. യുത്തിഹാരസമ്പാതവിഭാവനാ • 3. Yuttihārasampātavibhāvanā
