| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
৩. যুত্তিহারসম্পাতৰিভাৰনা
3. Yuttihārasampātavibhāvanā
৬৫. যেন যেন ৰিচযহারসম্পাতেন সুত্তপ্পদেসত্থা আচরিযেন ৰিচযিতব্বা, অম্হেহি চ ঞাতা, সো ৰিচযহারসম্পাতো পরিপুণ্ণো, ‘‘কতমো যুত্তিহারসম্পাতো’’তি পুচ্ছিতব্বত্তা ‘‘তত্থ কতমো যুত্তিহারসম্পাতো’’তিআদি ৰুত্তং। অট্ঠকথাযং পন – ‘‘এৰং নানানযেহি ৰিচযহারসম্পাতং ৰিত্থারেত্ৰা ইদানি যুত্তিহারসম্পাতাদীনি দস্সেতুং ‘তত্থ কতমো যুত্তিহারসম্পাতো’তিআদি আরদ্ধ’’ন্তি (নেত্তি॰ অট্ঠ॰ ৬৫) ৰুত্তং। তত্থাতি তেসু দেসনাহারসম্পাতাদীসু সোল়সসু হারসম্পাতেসু কতমো সংৰণ্ণনাৰিসেসো যুত্তিহারসম্পাতো নামাতি পুচ্ছতি, পুচ্ছিত্ৰা যস্মিং সুত্তপ্পদেসে ৰুত্তানং অত্থানং যুত্তিভাৰো ৰিচারেতব্বো, তং সুত্তপ্পদেসং নীহরিতুং –
65. Yena yena vicayahārasampātena suttappadesatthā ācariyena vicayitabbā, amhehi ca ñātā, so vicayahārasampāto paripuṇṇo, ‘‘katamo yuttihārasampāto’’ti pucchitabbattā ‘‘tattha katamo yuttihārasampāto’’tiādi vuttaṃ. Aṭṭhakathāyaṃ pana – ‘‘evaṃ nānānayehi vicayahārasampātaṃ vitthāretvā idāni yuttihārasampātādīni dassetuṃ ‘tattha katamo yuttihārasampāto’tiādi āraddha’’nti (netti. aṭṭha. 65) vuttaṃ. Tatthāti tesu desanāhārasampātādīsu soḷasasu hārasampātesu katamo saṃvaṇṇanāviseso yuttihārasampāto nāmāti pucchati, pucchitvā yasmiṃ suttappadese vuttānaṃ atthānaṃ yuttibhāvo vicāretabbo, taṃ suttappadesaṃ nīharituṃ –
‘‘তস্মা রক্খিতচিত্তস্স, সম্মাসঙ্কপ্পগোচরো।
‘‘Tasmā rakkhitacittassa, sammāsaṅkappagocaro;
সম্মাদিট্ঠিপুরেক্খারো, ঞত্ৰান উদযব্বযং।
Sammādiṭṭhipurekkhāro, ñatvāna udayabbayaṃ;
থিনমিদ্ধাভিভূ ভিক্খু, সব্বা দুগ্গতিযো জহে’’তি॥ (উদা॰ ৩২; নেত্তি॰ ৩১, ৭৮) –
Thinamiddhābhibhū bhikkhu, sabbā duggatiyo jahe’’ti. (udā. 32; netti. 31, 78) –
ৰুত্তং। তস্সং গাথাযং তস্মা অরক্খিতচিত্তস্স মারৰসানুগতত্তা সতিসংৰরইন্দ্রিযসংৰরাদিৰসেন ভিক্খু রক্খিতচিত্তো অস্স ভৰেয্য, তস্মা কামৰিতক্কাদিমিচ্ছাসঙ্কপ্পগোচরস্স মারৰসানুগতত্তা নেক্খম্মসঙ্কপ্পাদিৰসেন ভিক্খু সম্মাসঙ্কপ্পগোচরো অস্স ভৰেয্য, তস্মা মিচ্ছাদিট্ঠিহতচিত্তস্স মারৰসানুগতত্তা যোনিসোমনসিকারেন ভিক্খু উদযব্বযং ঞত্ৰান সম্মাদিট্ঠিপুরেক্খারো অস্স ভৰেয্য, তস্মা থিনমিদ্ধেন হতচিত্তস্স মারৰসানুগতত্তা ৰীরিযৰসেন ভিক্খু থিনমিদ্ধাভিভূ অস্স ভৰেয্য, তাদিসো ভিক্খু সব্বা দুগ্গতিযো জহে জহিস্সতীতি অত্থো ৰেদিতব্বো।
Vuttaṃ. Tassaṃ gāthāyaṃ tasmā arakkhitacittassa māravasānugatattā satisaṃvaraindriyasaṃvarādivasena bhikkhu rakkhitacitto assa bhaveyya, tasmā kāmavitakkādimicchāsaṅkappagocarassa māravasānugatattā nekkhammasaṅkappādivasena bhikkhu sammāsaṅkappagocaro assa bhaveyya, tasmā micchādiṭṭhihatacittassa māravasānugatattā yonisomanasikārena bhikkhu udayabbayaṃ ñatvāna sammādiṭṭhipurekkhāro assa bhaveyya, tasmā thinamiddhena hatacittassa māravasānugatattā vīriyavasena bhikkhu thinamiddhābhibhū assa bhaveyya, tādiso bhikkhu sabbā duggatiyo jahe jahissatīti attho veditabbo.
‘‘তস্সং গাথাযং কথং যুত্তিভাৰো ৰিচারেতব্বো’’তি ৰত্তব্বত্তা ‘‘তস্মা রক্খিতচিত্তস্সা’’তিআদি ৰুত্তং। রক্খিতচিত্তস্স সম্মাসঙ্কপ্পগোচরো ভৰিস্সতীতি অত্থো যুজ্জতি এৰ, নো ন যুজ্জতি। মিচ্ছাসঙ্কপ্পানম্পি জহিতত্তা সম্মাদিট্ঠিপুরেক্খারো হুত্ৰা ৰিহরন্তো উদযব্বযং পটিৰিজ্ঝিস্সতীতি অত্থো যুজ্জতি সম্মাদিট্ঠিপুরেক্খারস্স উদযব্বযানুপস্সনাসম্ভৰতো। উদযব্বযং পটিৰিজ্ঝন্তো সব্বা দুগ্গতিযো জহিস্সতীতি অত্থো যুজ্জতি উদযব্বযানুপস্সনানুক্কমেন অরিযমগ্গসম্ভৰতো। সব্বা দুগ্গতিযো জহন্তো সব্বানি দুগ্গতিৰিনিপাতভযানি সমতিক্কমিস্সতীতি অত্থো যুজ্জতি সব্বেসং দুগ্গতিৰিনিপাতভযানং অনুপ্পজ্জনতো।
‘‘Tassaṃ gāthāyaṃ kathaṃ yuttibhāvo vicāretabbo’’ti vattabbattā ‘‘tasmā rakkhitacittassā’’tiādi vuttaṃ. Rakkhitacittassa sammāsaṅkappagocaro bhavissatīti attho yujjati eva, no na yujjati. Micchāsaṅkappānampi jahitattā sammādiṭṭhipurekkhāro hutvā viharanto udayabbayaṃ paṭivijjhissatīti attho yujjati sammādiṭṭhipurekkhārassa udayabbayānupassanāsambhavato. Udayabbayaṃ paṭivijjhanto sabbā duggatiyo jahissatīti attho yujjati udayabbayānupassanānukkamena ariyamaggasambhavato. Sabbā duggatiyo jahanto sabbāni duggativinipātabhayāni samatikkamissatīti attho yujjati sabbesaṃ duggativinipātabhayānaṃ anuppajjanato.
‘‘এত্তকোৰ যুত্তিহারসম্পাতো পরিপুণ্ণো’’তি ৰত্তব্বত্তা ‘‘নিযুত্তো যুত্তিহারসম্পাতো’’তি ৰুত্তং। যেন যেন সংৰণ্ণনাৰিসেসভূতেন যুত্তিহারসম্পাতেন সুত্তপ্পদেসত্থানং যুত্তিভাৰো ৰিচারেতব্বো , সো সো সংৰণ্ণনাৰিসেসভূতো যুত্তিহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি।
‘‘Ettakova yuttihārasampāto paripuṇṇo’’ti vattabbattā ‘‘niyutto yuttihārasampāto’’ti vuttaṃ. Yena yena saṃvaṇṇanāvisesabhūtena yuttihārasampātena suttappadesatthānaṃ yuttibhāvo vicāretabbo , so so saṃvaṇṇanāvisesabhūto yuttihārasampāto niyutto yathārahaṃ niddhāretvā yujjitabboti attho gahetabboti.
ইতি যুত্তিহারসম্পাতে সত্তিবলানুরূপা রচিতা
Iti yuttihārasampāte sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন…পে॰… গহেতব্বোতি।
Paṇḍitehi pana…pe… gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৩. যুত্তিহারসম্পাতো • 3. Yuttihārasampāto
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৩. যুত্তিহারসম্পাতৰণ্ণনা • 3. Yuttihārasampātavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৩. যুত্তিহারসম্পাতৰণ্ণনা • 3. Yuttihārasampātavaṇṇanā
