| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
3. யுத்திஹாரவிப⁴ங்க³வண்ணனா
3. Yuttihāravibhaṅgavaṇṇanā
18. ஏவமேதஸ்ஸ ஸுத்தஸ்ஸ அத்தோ² ந க³ஹேதப்³போ³, ஏவங் பன க³ஹேதப்³போ³தி அக்³க³ஹேதப்³ப³க³ஹேதப்³பா³னங் அத்தா²னங் விஜஹனக்³க³ஹணத்தா²ய யுத்தாயுத்திவிசாரணாயங் வஜ்ஜேதப்³பே³ஸு தாவ பட²மங் படிபத்தீதி த³ஸ்ஸெந்தோ ஆஹ ‘‘அததா²காரேன க³ய்ஹமானா ஸுத்தத்தா² விஸயோ’’தி யதா² ‘‘வாமங் முஞ்ச, த³க்கி²ணங் க³ண்ஹா’’தி (த⁴॰ ஸ॰ அட்ட²॰ 498; விஸுத்³தி⁴॰ மஹாடீ॰ 1.14; ஸங்॰ நி॰ டீ॰ 1.1.213). வஜ்ஜேதப்³ப³பா⁴வதோ ஹி ஸுத்தபதே³ஹி ஸுத்தத்தே² விவேசிதே க³ஹேதப்³ப³பா⁴வோ ச அவஸிட்டோ² ஹோதி. ததா² ஹி வக்க²தி ‘‘மெத்தாவிஹாரஸ்ஸ ஸதோ ப்³யாபாதோ³ சித்தங் பரியாதா³ய ட²ஸ்ஸதீ’தி ந யுஜ்ஜதி தே³ஸனா, ‘ப்³யாபாதோ³ பஹானங் அப்³ப⁴த்த²ங் க³ச்ச²தீ’தி யுஜ்ஜதி தே³ஸனா’’தி (நெத்தி॰ 21).
18. Evametassa suttassa attho na gahetabbo, evaṃ pana gahetabboti aggahetabbagahetabbānaṃ atthānaṃ vijahanaggahaṇatthāya yuttāyuttivicāraṇāyaṃ vajjetabbesu tāva paṭhamaṃ paṭipattīti dassento āha ‘‘atathākārena gayhamānā suttatthā visayo’’ti yathā ‘‘vāmaṃ muñca, dakkhiṇaṃ gaṇhā’’ti (dha. sa. aṭṭha. 498; visuddhi. mahāṭī. 1.14; saṃ. ni. ṭī. 1.1.213). Vajjetabbabhāvato hi suttapadehi suttatthe vivecite gahetabbabhāvo ca avasiṭṭho hoti. Tathā hi vakkhati ‘‘mettāvihārassa sato byāpādo cittaṃ pariyādāya ṭhassatī’ti na yujjati desanā, ‘byāpādo pahānaṃ abbhatthaṃ gacchatī’ti yujjati desanā’’ti (netti. 21).
யுத்தினித்³தா⁴ரணேன அயதா²ஸபா⁴வதோ விவேசித்வா யதா²ஸபா⁴வதோ த⁴ம்மஸ்ஸ க³ஹணகாரணானி கதெ²ந்தோ ‘‘மஹந்தா அபதி³ஸிதப்³பா³ ஏதேஸந்தி மஹாபதே³ஸா’’தி இமமத்த²மாஹ ‘‘பு³த்³தா⁴த³யோ’’திஆதி³னா. பதிட்டா²னானீதி பதிட்டா²னஸாத⁴னானி. ஸேஸேஸூதி ஸங்கா⁴பதே³ஸாதீ³ஸு. பட²மத்தோ² ஏவ ஹி இத⁴ பாளி ஆக³தோ, வினிச்ச²யனே காரணங் மஹாபதே³ஸோதி அதி⁴ப்பாயோ. ஸுத்தோதரணாதீ³தி ஆதி³ஸத்³தே³ன ஸுத்தானோதரணாதி³பி ஸங்க³ய்ஹதி. ஸுத்தோதரணவினயஸந்த³ஸ்ஸனானி ஹி கேனசி யதா²ப⁴தஸ்ஸ க³ந்த²ஸ்ஸ ‘‘த⁴ம்மோ’’தி வினிச்ச²யனே காரணங். ஸுத்தானோதரணவினயாஸந்த³ஸ்ஸனானி ‘‘அத⁴ம்மோ’’தி. யதி³ ஏவந்தி யதி³ யதா²ப⁴தஸ்ஸ க³ந்த²ஸ்ஸ ஸுத்தவினயேஹி ஸங்ஸந்த³னங் ‘‘த⁴ம்மோ’’தி, அஸங்ஸந்த³னங் ‘‘அத⁴ம்மோ’’தி வினிச்ச²யகாரணங், ஏவங் ஸந்தேதி அத்தோ². ஸம்பதீ³யதி ஞாபீயதி த⁴ம்மோ ஏதேஹீதி ஸம்பதா³யா, அக்கா²தாரோ.
Yuttiniddhāraṇena ayathāsabhāvato vivecitvā yathāsabhāvato dhammassa gahaṇakāraṇāni kathento ‘‘mahantā apadisitabbā etesanti mahāpadesā’’ti imamatthamāha ‘‘buddhādayo’’tiādinā. Patiṭṭhānānīti patiṭṭhānasādhanāni. Sesesūti saṅghāpadesādīsu. Paṭhamattho eva hi idha pāḷi āgato, vinicchayane kāraṇaṃ mahāpadesoti adhippāyo. Suttotaraṇādīti ādisaddena suttānotaraṇādipi saṅgayhati. Suttotaraṇavinayasandassanāni hi kenaci yathābhatassa ganthassa ‘‘dhammo’’ti vinicchayane kāraṇaṃ. Suttānotaraṇavinayāsandassanāni ‘‘adhammo’’ti. Yadi evanti yadi yathābhatassa ganthassa suttavinayehi saṃsandanaṃ ‘‘dhammo’’ti, asaṃsandanaṃ ‘‘adhammo’’ti vinicchayakāraṇaṃ, evaṃ santeti attho. Sampadīyati ñāpīyati dhammo etehīti sampadāyā, akkhātāro.
வினீயந்தி ராகா³த³யோ ஏதேனாதி வினயோ, காரணங். தேனாஹ ‘‘ராகா³தி³வூபஸமனிமித்த’’ந்தி. கிங் பன தங்? ஸாதி⁴ட்டா²னஸமத²விபஸ்ஸனாதி³த⁴ம்மா. யே பரதோ ‘‘தேசத்தாலீஸங் போ³த⁴ங்க³மா த⁴ம்மா’’தி (நெத்தி॰ 24) வக்க²தி.
Vinīyanti rāgādayo etenāti vinayo, kāraṇaṃ. Tenāha ‘‘rāgādivūpasamanimitta’’nti. Kiṃ pana taṃ? Sādhiṭṭhānasamathavipassanādidhammā. Ye parato ‘‘tecattālīsaṃ bodhaṅgamā dhammā’’ti (netti. 24) vakkhati.
வினயமஹாபதே³ஸா கப்பியானுலோமதோ அனுலோமகப்பியங் நாம, தங்ஸதி³ஸதாய ஸுத்தந்தமஹாபதே³ஸாபி அனுலோமகப்பியந்தி அட்ட²கதா²வோஹாரோ. தேன வுத்தங் ‘‘யங் அனுலோமகப்பியந்தி வுச்சதீ’’தி.
Vinayamahāpadesā kappiyānulomato anulomakappiyaṃ nāma, taṃsadisatāya suttantamahāpadesāpi anulomakappiyanti aṭṭhakathāvohāro. Tena vuttaṃ ‘‘yaṃ anulomakappiyanti vuccatī’’ti.
யதி³பி தத்த² தத்த² பவத்தா ப⁴க³வதோ பகிண்ணகதே³ஸனா அட்ட²கதா², ஸா பன த⁴ம்மஸங்கா³ஹகேஹி தேபிடகங் பு³த்³த⁴வசனங் ஸங்கா³யித்வா தஸ்ஸ அத்த²ஸங்வண்ணனானுரூபேன வாசனாமக்³க³ங் ஆரோபிதத்தா ஆசரியவாதோ³ நாம. தேன வுத்தங் ‘‘ஆசரியவாதோ³ நாம அட்ட²கதா²’’தி. திஸ்ஸோபி ஸங்கீ³தியோ ஆருள்ஹோ ஏவ ஹி பு³த்³த⁴வசனஸ்ஸ அத்த²ஸங்வண்ணனாபூ⁴தோ கதா²மக்³கோ³ பச்சா² தம்ப³பண்ணியேஹி மஹாதே²ரேஹி ஸீஹளபா⁴ஸாய ட²பிதோ. அத்தனோமதி தே²ரவாதோ³. ஸமெந்தமேவ க³ஹேதப்³ப³ந்தி யதா² பாளியா ஸங்ஸந்த³தி , ஏவங் மஹாபதே³ஸதோ அத்தா² உத்³த⁴ரிதப்³பா³தி த³ஸ்ஸேதி. பமாத³பாட²வஸேன ஆசரியவாத³ஸ்ஸ கதா³சி பாளியா அஸங்ஸந்த³னாபி ஸியா, ஸோ ந க³ஹேதப்³போ³தி த³ஸ்ஸெந்தோ ஆஹ – ‘‘ஸுத்தேன ஸமெந்தோ ஏவ க³ஹேதப்³போ³’’தி.
Yadipi tattha tattha pavattā bhagavato pakiṇṇakadesanā aṭṭhakathā, sā pana dhammasaṅgāhakehi tepiṭakaṃ buddhavacanaṃ saṅgāyitvā tassa atthasaṃvaṇṇanānurūpena vācanāmaggaṃ āropitattā ācariyavādo nāma. Tena vuttaṃ ‘‘ācariyavādo nāma aṭṭhakathā’’ti. Tissopi saṅgītiyo āruḷho eva hi buddhavacanassa atthasaṃvaṇṇanābhūto kathāmaggo pacchā tambapaṇṇiyehi mahātherehi sīhaḷabhāsāya ṭhapito. Attanomati theravādo. Samentameva gahetabbanti yathā pāḷiyā saṃsandati , evaṃ mahāpadesato atthā uddharitabbāti dasseti. Pamādapāṭhavasena ācariyavādassa kadāci pāḷiyā asaṃsandanāpi siyā, so na gahetabboti dassento āha – ‘‘suttena samento eva gahetabbo’’ti.
சதூஹி மஹாபதே³ஸேஹி யுஜ்ஜதீதி சதூஹி மஹாபதே³ஸேஹி ந விருஜ்ஜ²தி. இதா³னி தங் அவிருஜ்ஜ²னாகாரங் த³ஸ்ஸெந்தோ ‘‘யேன யேனா’’திஆதி³ வுத்தங். ஸுத்தோதரணாதி³ ஏவ ஹெத்த² காரணங். தஸ்ஸ ச அனேகாகாரதாய ‘‘பகாரேனா’’தி வுத்தோ. ஸங்வண்ணியமானே ஸுத்தே ஸங்வண்ணனாவஸேன க³ஹேதப்³ப³ந்தி ஸம்ப³ந்தோ⁴. ஆப⁴தேனாதி ஆனீதேன. ஸுத்ததோதி ஸுத்தந்தரதோ. அயஞ்ஹெத்த² அத்தோ² – கேனசி பஸங்கே³ன ஸுத்தந்தரதோ உத்³த⁴ரித்வா ஆனீதேன ஸுத்தபதே³ன ஸுத்தோதரணாதி³னா, காரணப்பகாரேன ச சதுமஹாபதே³ஸாவிரோதே⁴ன ஸங்வண்ணியமானே ஸுத்தே ஸங்வண்ணனாவஸேன அத்த²ஜாதங் க³ஹேதப்³ப³ந்தி. தேனாஹ ‘‘தேன…பே॰… காதப்³பா³’’தி. தத்த² யுத்திஹாரயோஜனா காதப்³பா³தி யுத்தினித்³தா⁴ரணவஸேன அயங் யுத்திஹாரோ யோஜேதப்³போ³. அத² வா யுத்திஹாரயோஜனா காதப்³பா³தி இமினா ஹாரேன வக்க²மானநயேன யுத்திக³வேஸனங் கத்வா தாய யுத்தியா ஸப்³ப³ஹாரயோஜனா காதப்³பா³தி அத்தோ². லக்க²ணஞ்ஹேதங் யுத்திக³வேஸனாய, யதி³த³ங் யுத்திஹாரோ. தேனாஹ ‘‘ஸப்³பே³ஸங் ஹாரானங், யா பூ⁴மீ, யோ ச கோ³சரோ தேஸங். ‘‘யுத்தாயுத்தபரிக்கா²’’தி (நெத்தி॰ 4), ‘‘இமாய யுத்தியா அஞ்ஞமஞ்ஞேஹி காரணேஹி க³வேஸிதப்³ப³’’ந்தி (நெத்தி॰ 20) ச.
Catūhi mahāpadesehi yujjatīti catūhi mahāpadesehi na virujjhati. Idāni taṃ avirujjhanākāraṃ dassento ‘‘yena yenā’’tiādi vuttaṃ. Suttotaraṇādi eva hettha kāraṇaṃ. Tassa ca anekākāratāya ‘‘pakārenā’’ti vutto. Saṃvaṇṇiyamāne sutte saṃvaṇṇanāvasena gahetabbanti sambandho. Ābhatenāti ānītena. Suttatoti suttantarato. Ayañhettha attho – kenaci pasaṅgena suttantarato uddharitvā ānītena suttapadena suttotaraṇādinā, kāraṇappakārena ca catumahāpadesāvirodhena saṃvaṇṇiyamāne sutte saṃvaṇṇanāvasena atthajātaṃ gahetabbanti. Tenāha ‘‘tena…pe… kātabbā’’ti. Tattha yuttihārayojanā kātabbāti yuttiniddhāraṇavasena ayaṃ yuttihāro yojetabbo. Atha vā yuttihārayojanā kātabbāti iminā hārena vakkhamānanayena yuttigavesanaṃ katvā tāya yuttiyā sabbahārayojanā kātabbāti attho. Lakkhaṇañhetaṃ yuttigavesanāya, yadidaṃ yuttihāro. Tenāha ‘‘sabbesaṃ hārānaṃ, yā bhūmī, yo ca gocaro tesaṃ. ‘‘Yuttāyuttaparikkhā’’ti (netti. 4), ‘‘imāya yuttiyā aññamaññehi kāraṇehi gavesitabba’’nti (netti. 20) ca.
19. யதி³ வா ஸப்³பா³னி பதா³னி ஏகங் அத்த²ங் அபி⁴வத³ந்தீதி யோஜனா.
19. Yadi vā sabbāni padāni ekaṃ atthaṃ abhivadantīti yojanā.
20. ஜராயங் டி²தஸ்ஸ அஞ்ஞத²த்தந்தி டி²தஸ்ஸ யங் அஞ்ஞத²த்தங் அஞ்ஞதா²பா⁴வோ, அயங் ஜரா நாம. க²ணிகமரணங் க²ணிகனிரோதோ⁴. ஸமுச்சே²த³மரணங் கீ²ணாஸவானங் க²ந்த⁴பரினிப்³பா³னங்.
20.Jarāyaṃ ṭhitassa aññathattanti ṭhitassa yaṃ aññathattaṃ aññathābhāvo, ayaṃ jarā nāma. Khaṇikamaraṇaṃ khaṇikanirodho. Samucchedamaraṇaṃ khīṇāsavānaṃ khandhaparinibbānaṃ.
கேவலஸ்ஸாதி ஜராய அமிஸ்ஸஸ்ஸ. அஞ்ஞாவ ஜரா, அஞ்ஞங் மரணந்தி ‘‘படிஞ்ஞாதஸ்ஸ கேவலஸ்ஸ மரணஸ்ஸ தி³ட்ட²த்தா’’தி ஹேது. யதா² தங் தே³வானந்தி ஸதி³ஸூதா³ஹரணங், விஸதி³ஸூதா³ஹரணங் பன இத்³தி⁴பாதா³த³யோ, அன்வயப்³யதிரேகா க³ஹெத்வா யோஜேதப்³பா³.
Kevalassāti jarāya amissassa. Aññāva jarā, aññaṃ maraṇanti ‘‘paṭiññātassa kevalassa maraṇassa diṭṭhattā’’ti hetu. Yathā taṃ devānanti sadisūdāharaṇaṃ, visadisūdāharaṇaṃ pana iddhipādādayo, anvayabyatirekā gahetvā yojetabbā.
தேஹீதி ஜராமரணேஹி.
Tehīti jarāmaraṇehi.
‘‘ஜீரணபி⁴ஜ்ஜனஸபா⁴வா’’தி இமினா லேஸேன தண்ஹாஜராமரணானங் அனஞ்ஞத்தங் யோஜேதி. யதி³பி ‘‘அஞ்ஞா தண்ஹா, அஞ்ஞா ஜரா, அஞ்ஞங் மரண’’ந்தி ஸித்³தோ⁴வாயமத்தோ², யங் ஸந்தா⁴ய வுத்தங் ‘‘ந இத³’’ந்திஆதி³, ததா²பி ஸக்குணெய்யபரிஹாராயங் சோத³னாதி அஜ்ஜா²ருள்ஹங் தத்த² தோ³ஸங் த³ஸ்ஸேதுங் ‘‘யதி³ ச யதா² ஜராமரண’’ந்தி பாளிபவத்தானி த³ஸ்ஸெந்தோ ‘‘யதி³…பே॰… த³ஸ்ஸேதீ’’தி ஆஹ. பா⁴வோதி அதி⁴ப்பாயோ. ஏதேஸந்தி தண்ஹாஜராமரணானங்.
‘‘Jīraṇabhijjanasabhāvā’’ti iminā lesena taṇhājarāmaraṇānaṃ anaññattaṃ yojeti. Yadipi ‘‘aññā taṇhā, aññā jarā, aññaṃ maraṇa’’nti siddhovāyamattho, yaṃ sandhāya vuttaṃ ‘‘na ida’’ntiādi, tathāpi sakkuṇeyyaparihārāyaṃ codanāti ajjhāruḷhaṃ tattha dosaṃ dassetuṃ ‘‘yadi ca yathā jarāmaraṇa’’nti pāḷipavattāni dassento ‘‘yadi…pe… dassetī’’ti āha. Bhāvoti adhippāyo. Etesanti taṇhājarāmaraṇānaṃ.
‘‘இமாய யுத்தியா அஞ்ஞமஞ்ஞேஹி காரணேஹி க³வேஸிதப்³ப³’’ந்தி ச கேசி பட²ந்தி, ப்³யஞ்ஜனதோபி க³வேஸிதப்³ப³ங், அஞ்ஞத்த² அத்த²தோ அஞ்ஞத்த²ம்பீதி அதி⁴ப்பாயோ. தமேவ ப்³யஞ்ஜனதோ அஞ்ஞத்த²ங் த³ஸ்ஸேதுங் பாளியங் ‘‘ஸல்லோதி வா’’திஆதி³ வுத்தங். இமேஸந்தி ஸல்லதூ⁴பாயனானங். இச்சா²விபரியாயேதி இச்சி²தாலாபே⁴, அப்பச்சயஸமவாயே வா. இத³ம்பி ஸமத்த²னங் ஹோதி யதா²தி⁴ப்பேதஸ்ஸ அஞ்ஞத்த²ஸ்ஸ ப்³யதிரேகத³ஸ்ஸனபா⁴வதோ. ஜராமரணவிபரியாயேதி ஜராமரணே அஸதி. ந ஹி யதா²தி⁴ப்பேதஜராமரணாபா⁴வே தண்ஹா ந ஹோதீதி.
‘‘Imāya yuttiyā aññamaññehi kāraṇehi gavesitabba’’nti ca keci paṭhanti, byañjanatopi gavesitabbaṃ, aññattha atthato aññatthampīti adhippāyo. Tameva byañjanato aññatthaṃ dassetuṃ pāḷiyaṃ ‘‘salloti vā’’tiādi vuttaṃ. Imesanti salladhūpāyanānaṃ. Icchāvipariyāyeti icchitālābhe, appaccayasamavāye vā. Idampi samatthanaṃ hoti yathādhippetassa aññatthassa byatirekadassanabhāvato. Jarāmaraṇavipariyāyeti jarāmaraṇe asati. Na hi yathādhippetajarāmaraṇābhāve taṇhā na hotīti.
த்³விதா⁴ வுத்தாதி த்³விப்பகாரேன வுத்தா, த்³விக்க²த்துங் வா வுத்தா. யங் இத³ங்…பே॰… ஆரம்மணகரணவஸேன வா அபி⁴லபனந்தி ஏவங் கிரியாபராமஸனங் யோஜேதப்³ப³ந்தி வேதி³தப்³ப³ங். விஸேஸோதி அயங் ஏதாஸங் இச்சா²தண்ஹானங் பகதிஸங்கா²தோ விஸேஸோ. ‘‘த்³வீஹி நாமேஹீ’’திபி பாளி. யதி³பி ஏவந்தி காமங் விஸயவிஸேஸேஸு ஏவங் யதா²வுத்தஅவத்தா²விஸேஸேன இச்சா²தண்ஹானங் அத்தி² காசி பே⁴த³மத்தாதி அத்தோ². ஸபா⁴வதோ பன பே⁴தோ³ நத்தீ²தி த³ஸ்ஸெந்தோ ‘‘ததா²பீ’’தி ஆஹ.
Dvidhā vuttāti dvippakārena vuttā, dvikkhattuṃ vā vuttā. Yaṃ idaṃ…pe… ārammaṇakaraṇavasena vā abhilapananti evaṃ kiriyāparāmasanaṃ yojetabbanti veditabbaṃ. Visesoti ayaṃ etāsaṃ icchātaṇhānaṃ pakatisaṅkhāto viseso. ‘‘Dvīhi nāmehī’’tipi pāḷi. Yadipi evanti kāmaṃ visayavisesesu evaṃ yathāvuttaavatthāvisesena icchātaṇhānaṃ atthi kāci bhedamattāti attho. Sabhāvato pana bhedo natthīti dassento ‘‘tathāpī’’ti āha.
இச்ச²ந்தீதி காமெந்தி. தண்ஹாயனா பாதுகாமதா. ஸந்தாபனட்டே²னாதி பரித³ஹனபா⁴வேன. ஆகட்³ட⁴னட்டே²னாதி அவஹரணட்டே²ன. ஸரிதானீதி ராக³வஸேன அல்லானி. தங்ஸம்பயுத்தபீதிவஸேன ஸினித்³தா⁴னி ஸினேஹிதானி. விஸத்திகாதி வித்த²தா ரூபாதீ³ஸு தேபூ⁴மகத⁴ம்மேஸு ப்³யாபனவஸேன. விஸடாதி புரிமவேவசனமேவ த-காரஸ்ஸ ட-காரங் கத்வா வுத்தங். விஸாலாதி விபுலா. விஸக்கதீதி பரிஸக்கதி ஸஹதி. ரத்தோ ஹி ராக³வத்து²னா பாதே³ன தாளியமானோபி ஸஹதி. ‘‘ஓஸக்கனங், விப்ப²ந்த³னங் வா விஸக்கன’’ந்தி வத³ந்தி. அனிச்சாதி³கங் நிச்சாதி³தோ க³ண்ஹந்தீ விஸங்வாதி³கா ஹோதி. விஸங்ஹரதீதி ததா² ததா² காமேஸு ஆனிஸங்ஸங் த³ஸ்ஸெந்தீ விவிதே⁴ஹி ஆகாரேஹி நெக்க²ம்மாபி⁴முக²ப்பவத்திதோ சித்தங் ஸங்ஹரதி ஸங்கி²பதி. விஸங் வா து³க்க²ங், தங் ஹரதி, வஹதீதி அத்தோ². து³க்க²னிப்³ப³த்தகஸ்ஸ கம்மஸ்ஸ ஹேதுபா⁴வதோ விஸமூலா, விஸங் வா து³க்கா²தி³பே⁴தா³ வேத³னா மூலங் ஏதாயாதி விஸமூலா, து³க்க²ஸமுத³யத்தா விஸங் ப²லங் ஏதிஸ்ஸாதி விஸப²லா. ரூபாதி³து³க்க²ஸ்ஸேவ பரிபோ⁴கோ³ ஏதாய, ந அமதஸ்ஸாதி விஸபரிபோ⁴கா³. ஸப்³ப³த்த² நிருத்திவஸேன பத³ஸித்³தி⁴ வேதி³தப்³பா³. யோ பனெத்த² பதா⁴னோ அத்தோ², தங் த³ஸ்ஸேதுங் புன ‘‘விஸதா வா பனா’’திஆதி³ வுத்தங்.
Icchantīti kāmenti. Taṇhāyanā pātukāmatā. Santāpanaṭṭhenāti paridahanabhāvena. Ākaḍḍhanaṭṭhenāti avaharaṇaṭṭhena. Saritānīti rāgavasena allāni. Taṃsampayuttapītivasena siniddhāni sinehitāni. Visattikāti vitthatā rūpādīsu tebhūmakadhammesu byāpanavasena. Visaṭāti purimavevacanameva ta-kārassa ṭa-kāraṃ katvā vuttaṃ. Visālāti vipulā. Visakkatīti parisakkati sahati. Ratto hi rāgavatthunā pādena tāḷiyamānopi sahati. ‘‘Osakkanaṃ, vipphandanaṃ vā visakkana’’nti vadanti. Aniccādikaṃ niccādito gaṇhantī visaṃvādikā hoti. Visaṃharatīti tathā tathā kāmesu ānisaṃsaṃ dassentī vividhehi ākārehi nekkhammābhimukhappavattito cittaṃ saṃharati saṃkhipati. Visaṃ vā dukkhaṃ, taṃ harati, vahatīti attho. Dukkhanibbattakassa kammassa hetubhāvato visamūlā, visaṃ vā dukkhādibhedā vedanā mūlaṃ etāyāti visamūlā, dukkhasamudayattā visaṃ phalaṃ etissāti visaphalā. Rūpādidukkhasseva paribhogo etāya, na amatassāti visaparibhogā. Sabbattha niruttivasena padasiddhi veditabbā. Yo panettha padhāno attho, taṃ dassetuṃ puna ‘‘visatā vā panā’’tiādi vuttaṃ.
ஸினேஹனங் பேமகரணங். ப³ந்த⁴னட்டே²னாதி ஸங்யோஜனட்டே²ன. ஆஸீஸனட்டே²னாதி இச்ச²னட்டே²ன. அபி⁴னந்த³னட்டே²னாதி அஸ்ஸாத³னட்டே²ன, ஸம்படிச்ச²னட்டே²ன வா.
Sinehanaṃ pemakaraṇaṃ. Bandhanaṭṭhenāti saṃyojanaṭṭhena. Āsīsanaṭṭhenāti icchanaṭṭhena. Abhinandanaṭṭhenāti assādanaṭṭhena, sampaṭicchanaṭṭhena vā.
21. அனபி⁴ரதீதி உக்கண்டா². ஞாணனிப்³பி³தா³தி நிப்³பி³தா³னுபஸ்ஸனா. யதா² ச து³க்கூ²…பே॰… சாரேஸு யுத்தி வுத்தாதி யோஜனா.
21.Anabhiratīti ukkaṇṭhā. Ñāṇanibbidāti nibbidānupassanā. Yathā ca dukkhū…pe… cāresu yutti vuttāti yojanā.
ஸுகா²படிபதா³த³ந்தா⁴பி⁴ஞ்ஞா ஸுகா²படிபதா³கி²ப்பாபி⁴ஞ்ஞா ஸுகா²படிபதா³த³யோ. யோ து³க்கா²ய படிபதா³ய விஸேஸங் அதி⁴க³ந்துங் ப⁴ப்³போ³, தஸ்ஸ ஸுகா²படிபதா³யொக்³யஸ்ஸ விய கரியமானா த⁴ம்மதே³ஸனா விஸேஸாவஹா ந ஹோதி, தஸ்மா ஸா ந யுத்தாதி இமமத்த²ங் த³ஸ்ஸேதி ‘‘ராக³சரிதோ’’திஆதி³னா. ராக³சரிதஸ்ஸ ததா² ததா² காமானங் ஆதீ³னவங், ஓகாரங், ஸங்கிலேஸங், நெக்க²ம்மே ஆனிஸங்ஸஞ்ச அவிபா⁴வெத்வா ஆதி³தோ விபஸ்ஸனாகதா²வ கரியமானா ந விஸேஸாவஹா ஹோதி ஆஸயஸ்ஸ அஸோதி⁴தத்தாதி ஏதமத்த²ங் த³ஸ்ஸெந்தோ பாளியங் ‘‘விபஸ்ஸனா…பே॰… தே³ஸனா’’தி ஆஹாதி வேதி³தப்³ப³ங். ஸேஸபதே³ஸுபீதி யதா² ‘‘ராக³சரிதஸ்ஸா’’திஆதி³னா ராக³சரிதகொட்டா²ஸவஸேன பாளியங் தே³ஸனாய அயுத்தி வுத்தா, இமினா நயேன ஸேஸபதே³ஸுபி தோ³ஸசரிதகொட்டா²ஸாதீ³ஸுபி ‘‘தோ³ஸசரிதஸ்ஸ புக்³க³லஸ்ஸ அஸுப⁴ங் தே³ஸெய்யா’’திஆதி³னா பாளியங் அவுத்தோபி யதா²ஸம்ப⁴வமத்தோ² நித்³தா⁴ரெத்வா வத்தப்³போ³. கஸ்மா பன யுத்திஹாரே அயுத்தினித்³தா⁴ரணா கதாதி சோத³னங் மனஸி கத்வா ஆஹ ‘‘எத்த² சா’’திஆதி³. ஸேஸேஸுபி ஏஸேவ நயோதி ஸேஸேஸுபி தோ³ஸசரிதாதி³வஸேன நித்³தா⁴ரிதேஸு அயுத்திக³வேஸனேஸு அயமேவ உபாயோ. அனுலோமப்பஹான’’ந்திபி பாளி, ஸோ ஏவத்தோ².
Sukhāpaṭipadādandhābhiññā sukhāpaṭipadākhippābhiññā sukhāpaṭipadādayo. Yo dukkhāya paṭipadāya visesaṃ adhigantuṃ bhabbo, tassa sukhāpaṭipadāyogyassa viya kariyamānā dhammadesanā visesāvahā na hoti, tasmā sā na yuttāti imamatthaṃ dasseti ‘‘rāgacarito’’tiādinā. Rāgacaritassa tathā tathā kāmānaṃ ādīnavaṃ, okāraṃ, saṃkilesaṃ, nekkhamme ānisaṃsañca avibhāvetvā ādito vipassanākathāva kariyamānā na visesāvahā hoti āsayassa asodhitattāti etamatthaṃ dassento pāḷiyaṃ ‘‘vipassanā…pe… desanā’’ti āhāti veditabbaṃ. Sesapadesupīti yathā ‘‘rāgacaritassā’’tiādinā rāgacaritakoṭṭhāsavasena pāḷiyaṃ desanāya ayutti vuttā, iminā nayena sesapadesupi dosacaritakoṭṭhāsādīsupi ‘‘dosacaritassa puggalassa asubhaṃ deseyyā’’tiādinā pāḷiyaṃ avuttopi yathāsambhavamattho niddhāretvā vattabbo. Kasmā pana yuttihāre ayuttiniddhāraṇā katāti codanaṃ manasi katvā āha ‘‘ettha cā’’tiādi. Sesesupi eseva nayoti sesesupi dosacaritādivasena niddhāritesu ayuttigavesanesu ayameva upāyo. Anulomappahāna’’ntipi pāḷi, so evattho.
‘‘யாவதிகா ஞாணஸ்ஸ பூ⁴மீ’’தி ஏதேன யுத்திஹாரஸ்ஸ மஹாவிஸயதங் த³ஸ்ஸேதி. கஸ்மா பனாயங் மஹாவிஸயோதி? யுத்திவிசாரபா⁴வதோ, ஸங்வண்ணேதப்³ப³ஸ்ஸ ச த⁴ம்மஸ்ஸ நானானயனிபுணாதி³கு³ணவிஸேஸயோக³தோதி த³ஸ்ஸெந்தோ ‘‘தங் கிஸ்ஸ ஹேதூ’’தி ஆஹ.
‘‘Yāvatikāñāṇassa bhūmī’’ti etena yuttihārassa mahāvisayataṃ dasseti. Kasmā panāyaṃ mahāvisayoti? Yuttivicārabhāvato, saṃvaṇṇetabbassa ca dhammassa nānānayanipuṇādiguṇavisesayogatoti dassento ‘‘taṃ kissa hetū’’ti āha.
அபரபா⁴கே³தி பச்சா²பா⁴கே³. மெத்தாவிஹாரிபா⁴க³ஸ்ஸ அபரிஹீனதாவசனதோ அயோகோ³ வுத்தோ. தேனாஹ ‘‘ஸதோ’’தி. யதா²வுத்தகாரணதோ ஏவாதி படிபக்க²த்தா ஏவ.
Aparabhāgeti pacchābhāge. Mettāvihāribhāgassa aparihīnatāvacanato ayogo vutto. Tenāha ‘‘sato’’ti. Yathāvuttakāraṇato evāti paṭipakkhattā eva.
பஹானேகட்ட²பா⁴வதோ தி³ட்டி²மஞ்ஞிதஸ்ஸ. ஆதீ³னவத³ஸ்ஸனேன விதக்கங் ஜிகு³ச்ச²ந்தா து³தியஜ்ஜா²னஸ்ஸ ஆஸன்னஉபசாரஜ்ஜா²னத⁴ம்மாபி விதக்காரம்மணா ந ஹொந்தி, பகே³வ து³தியஜ்ஜா²னத⁴ம்மாதி அதி⁴ப்பாயேனாஹ ‘‘ஆரம்மணகரணத்தோ² ஹெத்த² ஸஹக³தஸத்³தோ³’’தி.
Pahānekaṭṭhabhāvato diṭṭhimaññitassa. Ādīnavadassanena vitakkaṃ jigucchantā dutiyajjhānassa āsannaupacārajjhānadhammāpi vitakkārammaṇā na honti, pageva dutiyajjhānadhammāti adhippāyenāha ‘‘ārammaṇakaraṇattho hettha sahagatasaddo’’ti.
ஏவங் யுத்திஹாரலக்க²ணங் ஆக³மதோ யுத்தாயுத்தவிசாரங் த³ஸ்ஸெத்வா இதா³னி ஆக³மானுக³தாய யுத்தியாபி தங் த³ஸ்ஸேதுங் கு³ணமுகே²ன தோ³ஸவிப⁴ஜனங் விப⁴ஜந்தோ ‘‘அபிசெத்தா²’’திஆதி³மாஹ. தங் உத்தானத்த²மேவ.
Evaṃ yuttihāralakkhaṇaṃ āgamato yuttāyuttavicāraṃ dassetvā idāni āgamānugatāya yuttiyāpi taṃ dassetuṃ guṇamukhena dosavibhajanaṃ vibhajanto ‘‘apicetthā’’tiādimāha. Taṃ uttānatthameva.
யுத்திஹாரவிப⁴ங்க³வண்ணனா நிட்டி²தா.
Yuttihāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 3. யுத்திஹாரவிப⁴ங்கோ³ • 3. Yuttihāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 3. யுத்திஹாரவிப⁴ங்க³வண்ணனா • 3. Yuttihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 3. யுத்திஹாரவிப⁴ங்க³விபா⁴வனா • 3. Yuttihāravibhaṅgavibhāvanā
