| Library / Tipiṭaka / д̇ибидага • Tipiṭaka / нзд̇д̇иббагаран̣а-дийгаа • Nettippakaraṇa-ṭīkā |
3. яуд̇д̇ихааравибхан̇г̇аван̣н̣анаа
3. Yuttihāravibhaṅgavaṇṇanā
18. звамзд̇асса суд̇д̇асса ад̇т̇о на г̇ахзд̇аб̣б̣о, звам̣ бана г̇ахзд̇аб̣б̣од̇и аг̇г̇ахзд̇аб̣б̣аг̇ахзд̇аб̣б̣аанам̣ ад̇т̇аанам̣ виж̇аханаг̇г̇ахан̣ад̇т̇ааяа яуд̇д̇ааяуд̇д̇ивижааран̣ааяам̣ важ̇ж̇зд̇аб̣б̣зсу д̇аава батамам̣ бадибад̇д̇ийд̇и д̣̇ассзнд̇о ааха ‘‘ад̇ат̇аагаарзна г̇аяхамаанаа суд̇д̇ад̇т̇аа висаяо’’д̇и яат̇аа ‘‘ваамам̣ мун̃жа, д̣̇агкин̣ам̣ г̇ан̣хаа’’д̇и (д̇ха. са. адта. 498; висуд̣̇д̇хи. махаадий. 1.14; сам̣. ни. дий. 1.1.213). важ̇ж̇зд̇аб̣б̣абхаавад̇о хи суд̇д̇абад̣̇зхи суд̇д̇ад̇т̇з вивзжид̇з г̇ахзд̇аб̣б̣абхааво жа авасидто ход̇и. д̇ат̇аа хи вагкад̇и ‘‘мзд̇д̇аавихаарасса сад̇о б̣яаабаад̣̇о жид̇д̇ам̣ барияаад̣̇ааяа тассад̇ий’д̇и на яуж̇ж̇ад̇и д̣̇зсанаа, ‘б̣яаабаад̣̇о бахаанам̣ аб̣бхад̇т̇ам̣ г̇ажчад̇ий’д̇и яуж̇ж̇ад̇и д̣̇зсанаа’’д̇и (нзд̇д̇и. 21).
18. Evametassa suttassa attho na gahetabbo, evaṃ pana gahetabboti aggahetabbagahetabbānaṃ atthānaṃ vijahanaggahaṇatthāya yuttāyuttivicāraṇāyaṃ vajjetabbesu tāva paṭhamaṃ paṭipattīti dassento āha ‘‘atathākārena gayhamānā suttatthā visayo’’ti yathā ‘‘vāmaṃ muñca, dakkhiṇaṃ gaṇhā’’ti (dha. sa. aṭṭha. 498; visuddhi. mahāṭī. 1.14; saṃ. ni. ṭī. 1.1.213). Vajjetabbabhāvato hi suttapadehi suttatthe vivecite gahetabbabhāvo ca avasiṭṭho hoti. Tathā hi vakkhati ‘‘mettāvihārassa sato byāpādo cittaṃ pariyādāya ṭhassatī’ti na yujjati desanā, ‘byāpādo pahānaṃ abbhatthaṃ gacchatī’ti yujjati desanā’’ti (netti. 21).
яуд̇д̇инид̣̇д̇хааран̣зна аяат̇аасабхаавад̇о вивзжид̇ваа яат̇аасабхаавад̇о д̇хаммасса г̇ахан̣агааран̣аани гат̇знд̇о ‘‘маханд̇аа абад̣̇исид̇аб̣б̣аа зд̇зсанд̇и махаабад̣̇зсаа’’д̇и имамад̇т̇амааха ‘‘б̣уд̣̇д̇хаад̣̇аяо’’д̇иаад̣̇инаа. бад̇идтаанаанийд̇и бад̇идтаанасаад̇ханаани. сзсзсууд̇и сан̇гхаабад̣̇зсаад̣̇ийсу. батамад̇т̇о зва хи ид̇ха баал̣и ааг̇ад̇о, винижчаяанз гааран̣ам̣ махаабад̣̇зсод̇и ад̇хиббааяо. суд̇д̇од̇аран̣аад̣̇ийд̇и аад̣̇исад̣̇д̣̇зна суд̇д̇аанод̇аран̣аад̣̇иби сан̇г̇аяхад̇и. суд̇д̇од̇аран̣авинаяасанд̣̇ассанаани хи гзнажи яат̇аабхад̇асса г̇ант̇асса ‘‘д̇хаммо’’д̇и винижчаяанз гааран̣ам̣. суд̇д̇аанод̇аран̣авинаяаасанд̣̇ассанаани ‘‘ад̇хаммо’’д̇и. яад̣̇и званд̇и яад̣̇и яат̇аабхад̇асса г̇ант̇асса суд̇д̇авинаязхи сам̣санд̣̇анам̣ ‘‘д̇хаммо’’д̇и, асам̣санд̣̇анам̣ ‘‘ад̇хаммо’’д̇и винижчаяагааран̣ам̣, звам̣ санд̇зд̇и ад̇т̇о. самбад̣̇ийяад̇и н̃аабийяад̇и д̇хаммо зд̇зхийд̇и самбад̣̇ааяаа, агкаад̇ааро.
Yuttiniddhāraṇena ayathāsabhāvato vivecitvā yathāsabhāvato dhammassa gahaṇakāraṇāni kathento ‘‘mahantā apadisitabbā etesanti mahāpadesā’’ti imamatthamāha ‘‘buddhādayo’’tiādinā. Patiṭṭhānānīti patiṭṭhānasādhanāni. Sesesūti saṅghāpadesādīsu. Paṭhamattho eva hi idha pāḷi āgato, vinicchayane kāraṇaṃ mahāpadesoti adhippāyo. Suttotaraṇādīti ādisaddena suttānotaraṇādipi saṅgayhati. Suttotaraṇavinayasandassanāni hi kenaci yathābhatassa ganthassa ‘‘dhammo’’ti vinicchayane kāraṇaṃ. Suttānotaraṇavinayāsandassanāni ‘‘adhammo’’ti. Yadi evanti yadi yathābhatassa ganthassa suttavinayehi saṃsandanaṃ ‘‘dhammo’’ti, asaṃsandanaṃ ‘‘adhammo’’ti vinicchayakāraṇaṃ, evaṃ santeti attho. Sampadīyati ñāpīyati dhammo etehīti sampadāyā, akkhātāro.
винийяанд̇и рааг̇аад̣̇аяо зд̇знаад̇и винаяо, гааран̣ам̣. д̇знааха ‘‘рааг̇аад̣̇ивуубасаманимид̇д̇а’’нд̇и. гим̣ бана д̇ам̣? саад̇хидтаанасамат̇авибассанаад̣̇ид̇хаммаа. яз барад̇о ‘‘д̇зжад̇д̇аалийсам̣ б̣од̇хан̇г̇амаа д̇хаммаа’’д̇и (нзд̇д̇и. 24) вагкад̇и.
Vinīyanti rāgādayo etenāti vinayo, kāraṇaṃ. Tenāha ‘‘rāgādivūpasamanimitta’’nti. Kiṃ pana taṃ? Sādhiṭṭhānasamathavipassanādidhammā. Ye parato ‘‘tecattālīsaṃ bodhaṅgamā dhammā’’ti (netti. 24) vakkhati.
винаяамахаабад̣̇зсаа габбияаануломад̇о ануломагаббияам̣ наама, д̇ам̣сад̣̇исад̇ааяа суд̇д̇анд̇амахаабад̣̇зсааби ануломагаббияанд̇и адтагат̇аавохааро. д̇зна вуд̇д̇ам̣ ‘‘яам̣ ануломагаббияанд̇и вужжад̇ий’’д̇и.
Vinayamahāpadesā kappiyānulomato anulomakappiyaṃ nāma, taṃsadisatāya suttantamahāpadesāpi anulomakappiyanti aṭṭhakathāvohāro. Tena vuttaṃ ‘‘yaṃ anulomakappiyanti vuccatī’’ti.
яад̣̇иби д̇ад̇т̇а д̇ад̇т̇а бавад̇д̇аа бхаг̇авад̇о багин̣н̣агад̣̇зсанаа адтагат̇аа, саа бана д̇хаммасан̇г̇аахагзхи д̇збидагам̣ б̣уд̣̇д̇хаважанам̣ сан̇г̇ааяид̇ваа д̇асса ад̇т̇асам̣ван̣н̣анаануруубзна ваажанаамаг̇г̇ам̣ ааробид̇ад̇д̇аа аажарияаваад̣̇о наама. д̇зна вуд̇д̇ам̣ ‘‘аажарияаваад̣̇о наама адтагат̇аа’’д̇и. д̇иссоби сан̇г̇ийд̇ияо аарул̣хо зва хи б̣уд̣̇д̇хаважанасса ад̇т̇асам̣ван̣н̣анаабхууд̇о гат̇аамаг̇г̇о бажчаа д̇амб̣абан̣н̣иязхи махаат̇зрзхи сийхал̣абхаасааяа табид̇о. ад̇д̇аномад̇и т̇зраваад̣̇о. самзнд̇амзва г̇ахзд̇аб̣б̣анд̇и яат̇аа баал̣ияаа сам̣санд̣̇ад̇и , звам̣ махаабад̣̇зсад̇о ад̇т̇аа уд̣̇д̇харид̇аб̣б̣аад̇и д̣̇ассзд̇и. бамаад̣̇абаатавасзна аажарияаваад̣̇асса гад̣̇аажи баал̣ияаа асам̣санд̣̇анааби сияаа, со на г̇ахзд̇аб̣б̣од̇и д̣̇ассзнд̇о ааха – ‘‘суд̇д̇зна самзнд̇о зва г̇ахзд̇аб̣б̣о’’д̇и.
Yadipi tattha tattha pavattā bhagavato pakiṇṇakadesanā aṭṭhakathā, sā pana dhammasaṅgāhakehi tepiṭakaṃ buddhavacanaṃ saṅgāyitvā tassa atthasaṃvaṇṇanānurūpena vācanāmaggaṃ āropitattā ācariyavādo nāma. Tena vuttaṃ ‘‘ācariyavādo nāma aṭṭhakathā’’ti. Tissopi saṅgītiyo āruḷho eva hi buddhavacanassa atthasaṃvaṇṇanābhūto kathāmaggo pacchā tambapaṇṇiyehi mahātherehi sīhaḷabhāsāya ṭhapito. Attanomati theravādo. Samentameva gahetabbanti yathā pāḷiyā saṃsandati , evaṃ mahāpadesato atthā uddharitabbāti dasseti. Pamādapāṭhavasena ācariyavādassa kadāci pāḷiyā asaṃsandanāpi siyā, so na gahetabboti dassento āha – ‘‘suttena samento eva gahetabbo’’ti.
жад̇уухи махаабад̣̇зсзхи яуж̇ж̇ад̇ийд̇и жад̇уухи махаабад̣̇зсзхи на вируж̇жхад̇и. ид̣̇аани д̇ам̣ авируж̇жханаагаарам̣ д̣̇ассзнд̇о ‘‘язна язнаа’’д̇иаад̣̇и вуд̇д̇ам̣. суд̇д̇од̇аран̣аад̣̇и зва хзд̇т̇а гааран̣ам̣. д̇асса жа анзгаагаарад̇ааяа ‘‘багаарзнаа’’д̇и вуд̇д̇о. сам̣ван̣н̣ияамаанз суд̇д̇з сам̣ван̣н̣анаавасзна г̇ахзд̇аб̣б̣анд̇и самб̣анд̇хо. аабхад̇знаад̇и аанийд̇зна. суд̇д̇ад̇од̇и суд̇д̇анд̇арад̇о. аяан̃хзд̇т̇а ад̇т̇о – гзнажи басан̇г̇зна суд̇д̇анд̇арад̇о уд̣̇д̇харид̇ваа аанийд̇зна суд̇д̇абад̣̇зна суд̇д̇од̇аран̣аад̣̇инаа, гааран̣аббагаарзна жа жад̇умахаабад̣̇зсаавирод̇хзна сам̣ван̣н̣ияамаанз суд̇д̇з сам̣ван̣н̣анаавасзна ад̇т̇аж̇аад̇ам̣ г̇ахзд̇аб̣б̣анд̇и. д̇знааха ‘‘д̇зна…бз… гаад̇аб̣б̣аа’’д̇и. д̇ад̇т̇а яуд̇д̇ихаараяож̇анаа гаад̇аб̣б̣аад̇и яуд̇д̇инид̣̇д̇хааран̣авасзна аяам̣ яуд̇д̇ихааро яож̇зд̇аб̣б̣о. ат̇а ваа яуд̇д̇ихаараяож̇анаа гаад̇аб̣б̣аад̇и иминаа хаарзна вагкамаананаязна яуд̇д̇иг̇авзсанам̣ гад̇ваа д̇ааяа яуд̇д̇ияаа саб̣б̣ахаараяож̇анаа гаад̇аб̣б̣аад̇и ад̇т̇о. лагкан̣ан̃хзд̇ам̣ яуд̇д̇иг̇авзсанааяа, яад̣̇ид̣̇ам̣ яуд̇д̇ихааро. д̇знааха ‘‘саб̣б̣зсам̣ хаараанам̣, яаа бхуумий, яо жа г̇ожаро д̇зсам̣. ‘‘яуд̇д̇ааяуд̇д̇абаригкаа’’д̇и (нзд̇д̇и. 4), ‘‘имааяа яуд̇д̇ияаа ан̃н̃аман̃н̃зхи гааран̣зхи г̇авзсид̇аб̣б̣а’’нд̇и (нзд̇д̇и. 20) жа.
Catūhi mahāpadesehi yujjatīti catūhi mahāpadesehi na virujjhati. Idāni taṃ avirujjhanākāraṃ dassento ‘‘yena yenā’’tiādi vuttaṃ. Suttotaraṇādi eva hettha kāraṇaṃ. Tassa ca anekākāratāya ‘‘pakārenā’’ti vutto. Saṃvaṇṇiyamāne sutte saṃvaṇṇanāvasena gahetabbanti sambandho. Ābhatenāti ānītena. Suttatoti suttantarato. Ayañhettha attho – kenaci pasaṅgena suttantarato uddharitvā ānītena suttapadena suttotaraṇādinā, kāraṇappakārena ca catumahāpadesāvirodhena saṃvaṇṇiyamāne sutte saṃvaṇṇanāvasena atthajātaṃ gahetabbanti. Tenāha ‘‘tena…pe… kātabbā’’ti. Tattha yuttihārayojanā kātabbāti yuttiniddhāraṇavasena ayaṃ yuttihāro yojetabbo. Atha vā yuttihārayojanā kātabbāti iminā hārena vakkhamānanayena yuttigavesanaṃ katvā tāya yuttiyā sabbahārayojanā kātabbāti attho. Lakkhaṇañhetaṃ yuttigavesanāya, yadidaṃ yuttihāro. Tenāha ‘‘sabbesaṃ hārānaṃ, yā bhūmī, yo ca gocaro tesaṃ. ‘‘Yuttāyuttaparikkhā’’ti (netti. 4), ‘‘imāya yuttiyā aññamaññehi kāraṇehi gavesitabba’’nti (netti. 20) ca.
19. яад̣̇и ваа саб̣б̣аани бад̣̇аани згам̣ ад̇т̇ам̣ абхивад̣̇анд̇ийд̇и яож̇анаа.
19. Yadi vā sabbāni padāni ekaṃ atthaṃ abhivadantīti yojanā.
20. ж̇арааяам̣ тид̇асса ан̃н̃ат̇ад̇д̇анд̇и тид̇асса яам̣ ан̃н̃ат̇ад̇д̇ам̣ ан̃н̃ат̇аабхааво, аяам̣ ж̇араа наама. кан̣игамаран̣ам̣ кан̣иганирод̇хо. самужчзд̣̇амаран̣ам̣ кийн̣аасаваанам̣ канд̇хабариниб̣б̣аанам̣.
20.Jarāyaṃ ṭhitassa aññathattanti ṭhitassa yaṃ aññathattaṃ aññathābhāvo, ayaṃ jarā nāma. Khaṇikamaraṇaṃ khaṇikanirodho. Samucchedamaraṇaṃ khīṇāsavānaṃ khandhaparinibbānaṃ.
гзвалассаад̇и ж̇арааяа амиссасса. ан̃н̃аава ж̇араа, ан̃н̃ам̣ маран̣анд̇и ‘‘бадин̃н̃аад̇асса гзваласса маран̣асса д̣̇идтад̇д̇аа’’д̇и хзд̇у. яат̇аа д̇ам̣ д̣̇зваананд̇и сад̣̇исууд̣̇аахаран̣ам̣, висад̣̇исууд̣̇аахаран̣ам̣ бана ид̣̇д̇хибаад̣̇аад̣̇аяо, анваяаб̣яад̇ирзгаа г̇ахзд̇ваа яож̇зд̇аб̣б̣аа.
Kevalassāti jarāya amissassa. Aññāva jarā, aññaṃ maraṇanti ‘‘paṭiññātassa kevalassa maraṇassa diṭṭhattā’’ti hetu. Yathā taṃ devānanti sadisūdāharaṇaṃ, visadisūdāharaṇaṃ pana iddhipādādayo, anvayabyatirekā gahetvā yojetabbā.
д̇зхийд̇и ж̇араамаран̣зхи.
Tehīti jarāmaraṇehi.
‘‘ж̇ийран̣абхиж̇ж̇анасабхааваа’’д̇и иминаа лзсзна д̇ан̣хааж̇араамаран̣аанам̣ анан̃н̃ад̇д̇ам̣ яож̇зд̇и. яад̣̇иби ‘‘ан̃н̃аа д̇ан̣хаа, ан̃н̃аа ж̇араа, ан̃н̃ам̣ маран̣а’’нд̇и сид̣̇д̇ховааяамад̇т̇о, яам̣ санд̇хааяа вуд̇д̇ам̣ ‘‘на ид̣̇а’’нд̇иаад̣̇и, д̇ат̇ааби саггун̣зяяабарихаарааяам̣ жод̣̇анаад̇и аж̇жхаарул̣хам̣ д̇ад̇т̇а д̣̇осам̣ д̣̇ассзд̇ум̣ ‘‘яад̣̇и жа яат̇аа ж̇араамаран̣а’’нд̇и баал̣ибавад̇д̇аани д̣̇ассзнд̇о ‘‘яад̣̇и…бз… д̣̇ассзд̇ий’’д̇и ааха. бхаавод̇и ад̇хиббааяо. зд̇зсанд̇и д̇ан̣хааж̇араамаран̣аанам̣.
‘‘Jīraṇabhijjanasabhāvā’’ti iminā lesena taṇhājarāmaraṇānaṃ anaññattaṃ yojeti. Yadipi ‘‘aññā taṇhā, aññā jarā, aññaṃ maraṇa’’nti siddhovāyamattho, yaṃ sandhāya vuttaṃ ‘‘na ida’’ntiādi, tathāpi sakkuṇeyyaparihārāyaṃ codanāti ajjhāruḷhaṃ tattha dosaṃ dassetuṃ ‘‘yadi ca yathā jarāmaraṇa’’nti pāḷipavattāni dassento ‘‘yadi…pe… dassetī’’ti āha. Bhāvoti adhippāyo. Etesanti taṇhājarāmaraṇānaṃ.
‘‘имааяа яуд̇д̇ияаа ан̃н̃аман̃н̃зхи гааран̣зхи г̇авзсид̇аб̣б̣а’’нд̇и жа гзжи батанд̇и, б̣яан̃ж̇анад̇оби г̇авзсид̇аб̣б̣ам̣, ан̃н̃ад̇т̇а ад̇т̇ад̇о ан̃н̃ад̇т̇амбийд̇и ад̇хиббааяо. д̇амзва б̣яан̃ж̇анад̇о ан̃н̃ад̇т̇ам̣ д̣̇ассзд̇ум̣ баал̣ияам̣ ‘‘саллод̇и ваа’’д̇иаад̣̇и вуд̇д̇ам̣. имзсанд̇и саллад̇хуубааяанаанам̣. ижчаавибарияааязд̇и ижчид̇аалаабхз, аббажжаяасамавааяз ваа. ид̣̇амби самад̇т̇анам̣ ход̇и яат̇аад̇хиббзд̇асса ан̃н̃ад̇т̇асса б̣яад̇ирзгад̣̇ассанабхаавад̇о. ж̇араамаран̣авибарияааязд̇и ж̇араамаран̣з асад̇и. на хи яат̇аад̇хиббзд̇аж̇араамаран̣аабхаавз д̇ан̣хаа на ход̇ийд̇и.
‘‘Imāya yuttiyā aññamaññehi kāraṇehi gavesitabba’’nti ca keci paṭhanti, byañjanatopi gavesitabbaṃ, aññattha atthato aññatthampīti adhippāyo. Tameva byañjanato aññatthaṃ dassetuṃ pāḷiyaṃ ‘‘salloti vā’’tiādi vuttaṃ. Imesanti salladhūpāyanānaṃ. Icchāvipariyāyeti icchitālābhe, appaccayasamavāye vā. Idampi samatthanaṃ hoti yathādhippetassa aññatthassa byatirekadassanabhāvato. Jarāmaraṇavipariyāyeti jarāmaraṇe asati. Na hi yathādhippetajarāmaraṇābhāve taṇhā na hotīti.
д̣̇вид̇хаа вуд̇д̇аад̇и д̣̇виббагаарзна вуд̇д̇аа, д̣̇вигкад̇д̇ум̣ ваа вуд̇д̇аа. яам̣ ид̣̇ам̣…бз… аарамман̣агаран̣авасзна ваа абхилабананд̇и звам̣ гирияаабараамасанам̣ яож̇зд̇аб̣б̣анд̇и взд̣̇ид̇аб̣б̣ам̣. висзсод̇и аяам̣ зд̇аасам̣ ижчаад̇ан̣хаанам̣ багад̇исан̇каад̇о висзсо. ‘‘д̣̇вийхи наамзхий’’д̇иби баал̣и. яад̣̇иби званд̇и гаамам̣ висаяависзсзсу звам̣ яат̇аавуд̇д̇аавад̇т̇аависзсзна ижчаад̇ан̣хаанам̣ ад̇т̇и гаажи бхзд̣̇амад̇д̇аад̇и ад̇т̇о. сабхаавад̇о бана бхзд̣̇о над̇т̇ийд̇и д̣̇ассзнд̇о ‘‘д̇ат̇аабий’’д̇и ааха.
Dvidhā vuttāti dvippakārena vuttā, dvikkhattuṃ vā vuttā. Yaṃ idaṃ…pe… ārammaṇakaraṇavasena vā abhilapananti evaṃ kiriyāparāmasanaṃ yojetabbanti veditabbaṃ. Visesoti ayaṃ etāsaṃ icchātaṇhānaṃ pakatisaṅkhāto viseso. ‘‘Dvīhi nāmehī’’tipi pāḷi. Yadipi evanti kāmaṃ visayavisesesu evaṃ yathāvuttaavatthāvisesena icchātaṇhānaṃ atthi kāci bhedamattāti attho. Sabhāvato pana bhedo natthīti dassento ‘‘tathāpī’’ti āha.
ижчанд̇ийд̇и гаамзнд̇и. д̇ан̣хааяанаа баад̇угаамад̇аа. санд̇аабанадтзнаад̇и барид̣̇аханабхаавзна. аагад̣дханадтзнаад̇и авахаран̣адтзна. сарид̇аанийд̇и рааг̇авасзна аллаани. д̇ам̣самбаяуд̇д̇абийд̇ивасзна синид̣̇д̇хаани синзхид̇аани. висад̇д̇игаад̇и вид̇т̇ад̇аа руубаад̣̇ийсу д̇збхуумагад̇хаммзсу б̣яаабанавасзна. висадаад̇и буримавзважанамзва д̇а-гаарасса да-гаарам̣ гад̇ваа вуд̇д̇ам̣. висаалаад̇и вибулаа. висаггад̇ийд̇и барисаггад̇и сахад̇и. рад̇д̇о хи рааг̇авад̇т̇унаа баад̣̇зна д̇аал̣ияамааноби сахад̇и. ‘‘осагганам̣, вибпанд̣̇анам̣ ваа висаггана’’нд̇и вад̣̇анд̇и. анижжаад̣̇игам̣ нижжаад̣̇ид̇о г̇ан̣ханд̇ий висам̣ваад̣̇игаа ход̇и. висам̣харад̇ийд̇и д̇ат̇аа д̇ат̇аа гаамзсу аанисам̣сам̣ д̣̇ассзнд̇ий вивид̇хзхи аагаарзхи нзгкаммаабхимукаббавад̇д̇ид̇о жид̇д̇ам̣ сам̣харад̇и сам̣кибад̇и. висам̣ ваа д̣̇угкам̣, д̇ам̣ харад̇и, вахад̇ийд̇и ад̇т̇о. д̣̇угканиб̣б̣ад̇д̇агасса гаммасса хзд̇убхаавад̇о висамуулаа, висам̣ ваа д̣̇угкаад̣̇ибхзд̣̇аа взд̣̇анаа муулам̣ зд̇ааяаад̇и висамуулаа, д̣̇угкасамуд̣̇аяад̇д̇аа висам̣ палам̣ зд̇иссаад̇и висапалаа. руубаад̣̇ид̣̇угкассзва барибхог̇о зд̇ааяа, на амад̇ассаад̇и висабарибхог̇аа. саб̣б̣ад̇т̇а нируд̇д̇ивасзна бад̣̇асид̣̇д̇хи взд̣̇ид̇аб̣б̣аа. яо банзд̇т̇а бад̇хаано ад̇т̇о, д̇ам̣ д̣̇ассзд̇ум̣ буна ‘‘висад̇аа ваа банаа’’д̇иаад̣̇и вуд̇д̇ам̣.
Icchantīti kāmenti. Taṇhāyanā pātukāmatā. Santāpanaṭṭhenāti paridahanabhāvena. Ākaḍḍhanaṭṭhenāti avaharaṇaṭṭhena. Saritānīti rāgavasena allāni. Taṃsampayuttapītivasena siniddhāni sinehitāni. Visattikāti vitthatā rūpādīsu tebhūmakadhammesu byāpanavasena. Visaṭāti purimavevacanameva ta-kārassa ṭa-kāraṃ katvā vuttaṃ. Visālāti vipulā. Visakkatīti parisakkati sahati. Ratto hi rāgavatthunā pādena tāḷiyamānopi sahati. ‘‘Osakkanaṃ, vipphandanaṃ vā visakkana’’nti vadanti. Aniccādikaṃ niccādito gaṇhantī visaṃvādikā hoti. Visaṃharatīti tathā tathā kāmesu ānisaṃsaṃ dassentī vividhehi ākārehi nekkhammābhimukhappavattito cittaṃ saṃharati saṃkhipati. Visaṃ vā dukkhaṃ, taṃ harati, vahatīti attho. Dukkhanibbattakassa kammassa hetubhāvato visamūlā, visaṃ vā dukkhādibhedā vedanā mūlaṃ etāyāti visamūlā, dukkhasamudayattā visaṃ phalaṃ etissāti visaphalā. Rūpādidukkhasseva paribhogo etāya, na amatassāti visaparibhogā. Sabbattha niruttivasena padasiddhi veditabbā. Yo panettha padhāno attho, taṃ dassetuṃ puna ‘‘visatā vā panā’’tiādi vuttaṃ.
синзханам̣ бзмагаран̣ам̣. б̣анд̇ханадтзнаад̇и сам̣яож̇анадтзна. аасийсанадтзнаад̇и ижчанадтзна. абхинанд̣̇анадтзнаад̇и ассаад̣̇анадтзна, самбадижчанадтзна ваа.
Sinehanaṃ pemakaraṇaṃ. Bandhanaṭṭhenāti saṃyojanaṭṭhena. Āsīsanaṭṭhenāti icchanaṭṭhena. Abhinandanaṭṭhenāti assādanaṭṭhena, sampaṭicchanaṭṭhena vā.
21. анабхирад̇ийд̇и угган̣таа. н̃аан̣аниб̣б̣ид̣̇аад̇и ниб̣б̣ид̣̇аанубассанаа. яат̇аа жа д̣̇угкуу…бз… жаарзсу яуд̇д̇и вуд̇д̇аад̇и яож̇анаа.
21.Anabhiratīti ukkaṇṭhā. Ñāṇanibbidāti nibbidānupassanā. Yathā ca dukkhū…pe… cāresu yutti vuttāti yojanā.
сукаабадибад̣̇аад̣̇анд̇хаабхин̃н̃аа сукаабадибад̣̇аакиббаабхин̃н̃аа сукаабадибад̣̇аад̣̇аяо. яо д̣̇угкааяа бадибад̣̇ааяа висзсам̣ ад̇хиг̇анд̇ум̣ бхаб̣б̣о, д̇асса сукаабадибад̣̇ааяог̇яасса вияа гарияамаанаа д̇хаммад̣̇зсанаа висзсаавахаа на ход̇и, д̇асмаа саа на яуд̇д̇аад̇и имамад̇т̇ам̣ д̣̇ассзд̇и ‘‘рааг̇ажарид̇о’’д̇иаад̣̇инаа. рааг̇ажарид̇асса д̇ат̇аа д̇ат̇аа гаамаанам̣ аад̣̇ийнавам̣, огаарам̣, сам̣гилзсам̣, нзгкаммз аанисам̣сан̃жа авибхаавзд̇ваа аад̣̇ид̇о вибассанаагат̇аава гарияамаанаа на висзсаавахаа ход̇и аасаяасса асод̇хид̇ад̇д̇аад̇и зд̇амад̇т̇ам̣ д̣̇ассзнд̇о баал̣ияам̣ ‘‘вибассанаа…бз… д̣̇зсанаа’’д̇и аахаад̇и взд̣̇ид̇аб̣б̣ам̣. сзсабад̣̇зсубийд̇и яат̇аа ‘‘рааг̇ажарид̇ассаа’’д̇иаад̣̇инаа рааг̇ажарид̇агодтаасавасзна баал̣ияам̣ д̣̇зсанааяа аяуд̇д̇и вуд̇д̇аа, иминаа наязна сзсабад̣̇зсуби д̣̇осажарид̇агодтаасаад̣̇ийсуби ‘‘д̣̇осажарид̇асса буг̇г̇аласса асубхам̣ д̣̇зсзяяаа’’д̇иаад̣̇инаа баал̣ияам̣ авуд̇д̇оби яат̇аасамбхавамад̇т̇о нид̣̇д̇хаарзд̇ваа вад̇д̇аб̣б̣о. гасмаа бана яуд̇д̇ихаарз аяуд̇д̇инид̣̇д̇хааран̣аа гад̇аад̇и жод̣̇анам̣ манаси гад̇ваа ааха ‘‘зд̇т̇а жаа’’д̇иаад̣̇и. сзсзсуби зсзва наяод̇и сзсзсуби д̣̇осажарид̇аад̣̇ивасзна нид̣̇д̇хаарид̇зсу аяуд̇д̇иг̇авзсанзсу аяамзва убааяо. ануломаббахаана’’нд̇иби баал̣и, со звад̇т̇о.
Sukhāpaṭipadādandhābhiññā sukhāpaṭipadākhippābhiññā sukhāpaṭipadādayo. Yo dukkhāya paṭipadāya visesaṃ adhigantuṃ bhabbo, tassa sukhāpaṭipadāyogyassa viya kariyamānā dhammadesanā visesāvahā na hoti, tasmā sā na yuttāti imamatthaṃ dasseti ‘‘rāgacarito’’tiādinā. Rāgacaritassa tathā tathā kāmānaṃ ādīnavaṃ, okāraṃ, saṃkilesaṃ, nekkhamme ānisaṃsañca avibhāvetvā ādito vipassanākathāva kariyamānā na visesāvahā hoti āsayassa asodhitattāti etamatthaṃ dassento pāḷiyaṃ ‘‘vipassanā…pe… desanā’’ti āhāti veditabbaṃ. Sesapadesupīti yathā ‘‘rāgacaritassā’’tiādinā rāgacaritakoṭṭhāsavasena pāḷiyaṃ desanāya ayutti vuttā, iminā nayena sesapadesupi dosacaritakoṭṭhāsādīsupi ‘‘dosacaritassa puggalassa asubhaṃ deseyyā’’tiādinā pāḷiyaṃ avuttopi yathāsambhavamattho niddhāretvā vattabbo. Kasmā pana yuttihāre ayuttiniddhāraṇā katāti codanaṃ manasi katvā āha ‘‘ettha cā’’tiādi. Sesesupi eseva nayoti sesesupi dosacaritādivasena niddhāritesu ayuttigavesanesu ayameva upāyo. Anulomappahāna’’ntipi pāḷi, so evattho.
‘‘яаавад̇игаа н̃аан̣асса бхуумий’’д̇и зд̇зна яуд̇д̇ихаарасса махаависаяад̇ам̣ д̣̇ассзд̇и. гасмаа банааяам̣ махаависаяод̇и? яуд̇д̇ивижаарабхаавад̇о, сам̣ван̣н̣зд̇аб̣б̣асса жа д̇хаммасса наанаанаяанибун̣аад̣̇иг̇ун̣ависзсаяог̇ад̇од̇и д̣̇ассзнд̇о ‘‘д̇ам̣ гисса хзд̇уу’’д̇и ааха.
‘‘Yāvatikāñāṇassa bhūmī’’ti etena yuttihārassa mahāvisayataṃ dasseti. Kasmā panāyaṃ mahāvisayoti? Yuttivicārabhāvato, saṃvaṇṇetabbassa ca dhammassa nānānayanipuṇādiguṇavisesayogatoti dassento ‘‘taṃ kissa hetū’’ti āha.
абарабхааг̇зд̇и бажчаабхааг̇з. мзд̇д̇аавихаарибхааг̇асса абарихийнад̇ааважанад̇о аяог̇о вуд̇д̇о. д̇знааха ‘‘сад̇о’’д̇и. яат̇аавуд̇д̇агааран̣ад̇о зваад̇и бадибагкад̇д̇аа зва.
Aparabhāgeti pacchābhāge. Mettāvihāribhāgassa aparihīnatāvacanato ayogo vutto. Tenāha ‘‘sato’’ti. Yathāvuttakāraṇato evāti paṭipakkhattā eva.
бахаанзгадтабхаавад̇о д̣̇идтиман̃н̃ид̇асса. аад̣̇ийнавад̣̇ассанзна вид̇аггам̣ ж̇иг̇ужчанд̇аа д̣̇уд̇ияаж̇жхаанасса аасаннаубажаараж̇жхаанад̇хаммааби вид̇аггаарамман̣аа на хонд̇и, баг̇зва д̣̇уд̇ияаж̇жхаанад̇хаммаад̇и ад̇хиббааязнааха ‘‘аарамман̣агаран̣ад̇т̇о хзд̇т̇а сахаг̇ад̇асад̣̇д̣̇о’’д̇и.
Pahānekaṭṭhabhāvato diṭṭhimaññitassa. Ādīnavadassanena vitakkaṃ jigucchantā dutiyajjhānassa āsannaupacārajjhānadhammāpi vitakkārammaṇā na honti, pageva dutiyajjhānadhammāti adhippāyenāha ‘‘ārammaṇakaraṇattho hettha sahagatasaddo’’ti.
звам̣ яуд̇д̇ихааралагкан̣ам̣ ааг̇амад̇о яуд̇д̇ааяуд̇д̇авижаарам̣ д̣̇ассзд̇ваа ид̣̇аани ааг̇амаануг̇ад̇ааяа яуд̇д̇ияааби д̇ам̣ д̣̇ассзд̇ум̣ г̇ун̣амукзна д̣̇осавибхаж̇анам̣ вибхаж̇анд̇о ‘‘абижзд̇т̇аа’’д̇иаад̣̇имааха. д̇ам̣ уд̇д̇аанад̇т̇амзва.
Evaṃ yuttihāralakkhaṇaṃ āgamato yuttāyuttavicāraṃ dassetvā idāni āgamānugatāya yuttiyāpi taṃ dassetuṃ guṇamukhena dosavibhajanaṃ vibhajanto ‘‘apicetthā’’tiādimāha. Taṃ uttānatthameva.
яуд̇д̇ихааравибхан̇г̇аван̣н̣анаа нидтид̇аа.
Yuttihāravibhaṅgavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / нзд̇д̇иббагаран̣абаал̣и • Nettippakaraṇapāḷi / 3. яуд̇д̇ихааравибхан̇г̇о • 3. Yuttihāravibhaṅgo
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / нзд̇д̇иббагаран̣а-адтагат̇аа • Nettippakaraṇa-aṭṭhakathā / 3. яуд̇д̇ихааравибхан̇г̇аван̣н̣анаа • 3. Yuttihāravibhaṅgavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 3. яуд̇д̇ихааравибхан̇г̇авибхааванаа • 3. Yuttihāravibhaṅgavibhāvanā
