| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
3. யுத்திஹாரவிப⁴ங்கோ³
3. Yuttihāravibhaṅgo
கதமஸ்மிங் ஸுத்தே ஓதாரயிதப்³பா³னி? சதூஸு அரியஸச்சேஸு. கதமஸ்மிங் வினயே ஸந்த³ஸ்ஸயிதப்³பா³னி? ராக³வினயே தோ³ஸவினயே மோஹவினயே. கதமிஸ்ஸங் 5 த⁴ம்மதாயங் உபனிக்கி²பிதப்³பா³னி? படிச்சஸமுப்பாதே³. யதி³ சதூஸு அரியஸச்சேஸு அவதரதி, கிலேஸவினயே ஸந்தி³ஸ்ஸதி , த⁴ம்மதஞ்ச ந விலோமேதி, ஏவங் ஆஸவே ந ஜனேதி. சதூஹி மஹாபதே³ஸேஹி யங் யங் யுஜ்ஜதி, யேன யேன யுஜ்ஜதி, யதா² யதா² யுஜ்ஜதி, தங் தங் க³ஹேதப்³ப³ங்.
Katamasmiṃ sutte otārayitabbāni? Catūsu ariyasaccesu. Katamasmiṃ vinaye sandassayitabbāni? Rāgavinaye dosavinaye mohavinaye. Katamissaṃ 6 dhammatāyaṃ upanikkhipitabbāni? Paṭiccasamuppāde. Yadi catūsu ariyasaccesu avatarati, kilesavinaye sandissati , dhammatañca na vilometi, evaṃ āsave na janeti. Catūhi mahāpadesehi yaṃ yaṃ yujjati, yena yena yujjati, yathā yathā yujjati, taṃ taṃ gahetabbaṃ.
19. பஞ்ஹங் புச்சி²தேன கதி பதா³னி பஞ்ஹேதி பத³ஸோ பரியோகா³ஹிதப்³ப³ங் விசேதப்³ப³ங்? யதி³ ஸப்³பா³னி பதா³னி ஏகங் அத்த²ங் அபி⁴வத³ந்தி, ஏகோ பஞ்ஹோ. அத² சத்தாரி பதா³னி ஏகங் அத்த²ங் அபி⁴வத³ந்தி, ஏகோ பஞ்ஹோ. அத² தீணி பதா³னி ஏகங் அத்த²ங் அபி⁴வத³ந்தி, ஏகோ பஞ்ஹோ. அத² த்³வே பதா³னி ஏகங் அத்த²ங் அபி⁴வத³ந்தி, ஏகோ பஞ்ஹோ. அத² ஏகங் பத³ங் ஏகங் அத்த²ங் அபி⁴வத³தி, ஏகோ பஞ்ஹோ. தங் உபபரிக்க²மானேன அஞ்ஞாதப்³ப³ங் கிங் இமே த⁴ம்மா நானத்தா² நானாப்³யஞ்ஜனா, உதா³ஹு இமேஸங் த⁴ம்மானங் ஏகோ அத்தோ² ப்³யஞ்ஜனமேவ நானந்தி. யதா² கிங் ப⁴வே? யதா² ஸா தே³வதா ப⁴க³வந்தங் பஞ்ஹங் புச்ச²தி.
19. Pañhaṃ pucchitena kati padāni pañheti padaso pariyogāhitabbaṃ vicetabbaṃ? Yadi sabbāni padāni ekaṃ atthaṃ abhivadanti, eko pañho. Atha cattāri padāni ekaṃ atthaṃ abhivadanti, eko pañho. Atha tīṇi padāni ekaṃ atthaṃ abhivadanti, eko pañho. Atha dve padāni ekaṃ atthaṃ abhivadanti, eko pañho. Atha ekaṃ padaṃ ekaṃ atthaṃ abhivadati, eko pañho. Taṃ upaparikkhamānena aññātabbaṃ kiṃ ime dhammā nānatthā nānābyañjanā, udāhu imesaṃ dhammānaṃ eko attho byañjanameva nānanti. Yathā kiṃ bhave? Yathā sā devatā bhagavantaṃ pañhaṃ pucchati.
கேன ஸல்லேன ஓதிண்ணோ, கிஸ்ஸ தூ⁴பாயிதோ ஸதா³’’தி.
Kena sallena otiṇṇo, kissa dhūpāyito sadā’’ti.
இமானி சத்தாரி பதா³னி புச்சி²தானி. தே தயோ பஞ்ஹா கத²ங் ஞாயதி? ப⁴க³வா ஹி தே³வதாய விஸஜ்ஜேதி.
Imāni cattāri padāni pucchitāni. Te tayo pañhā kathaṃ ñāyati? Bhagavā hi devatāya visajjeti.
தண்ஹாஸல்லேன ஓதிண்ணோ, இச்சா²தூ⁴பாயிதோ ஸதா³’’தி.
Taṇhāsallena otiṇṇo, icchādhūpāyito sadā’’ti.
20. தத்த² ஜரா ச மரணஞ்ச இமானி த்³வே ஸங்க²தஸ்ஸ ஸங்க²தலக்க²ணானி. ஜராயங் டி²தஸ்ஸ அஞ்ஞத²த்தங், மரணங் வயோ. தத்த² ஜராய ச மரணஸ்ஸ ச அத்த²தோ நானத்தங். கேன காரணேன, க³ப்³ப⁴க³தாபி ஹி மீயந்தி, ந ச தே ஜிண்ணா ப⁴வந்தி. அத்தி² ச தே³வானங் மரணங், ந ச தேஸங் ஸரீரானி ஜீரந்தி. ஸக்கதேவ ஜராய படிகம்மங் காதுங், ந பன ஸக்கதே மரணஸ்ஸ படிகம்மங் காதுங் அஞ்ஞத்ரேவ இத்³தி⁴மந்தானங் இத்³தி⁴விஸயா. யங் பனாஹ தண்ஹாஸல்லேன ஓதிண்ணோதி தி³ஸ்ஸந்தி வீதராகா³ ஜீரந்தாபி மீயந்தாபி. யதி³ ச யதா² ஜராமரணங், ஏவங் தண்ஹாபி ஸியா. ஏவங் ஸந்தே ஸப்³பே³ யொப்³ப³னட்டா²பி விக³ததண்ஹா ஸியுங். யதா² ச தண்ஹா து³க்க²ஸ்ஸ ஸமுத³யோ, ஏவங் ஜராமரணம்பி ஸியா து³க்க²ஸ்ஸ ஸமுத³யோ, ந ச ஸியா தண்ஹா து³க்க²ஸ்ஸ ஸமுத³யோ, ந ஹி ஜராமரணங் து³க்க²ஸ்ஸ ஸமுத³யோ, தண்ஹா து³க்க²ஸ்ஸ ஸமுத³யோ. யதா² ச தண்ஹா மக்³க³வஜ்ஜா², ஏவங் ஜராமரணம்பி ஸியா மக்³க³வஜ்ஜ²ங். இமாய யுத்தியா அஞ்ஞமஞ்ஞேஹி காரணேஹி க³வேஸிதப்³ப³ங். யதி³ ச ஸந்தி³ஸ்ஸதி யுத்திஸமாரூள்ஹங் அத்த²தோ ச அஞ்ஞத்தங், ப்³யஞ்ஜனதோபி க³வேஸிதப்³ப³ங்.
20. Tattha jarā ca maraṇañca imāni dve saṅkhatassa saṅkhatalakkhaṇāni. Jarāyaṃ ṭhitassa aññathattaṃ, maraṇaṃ vayo. Tattha jarāya ca maraṇassa ca atthato nānattaṃ. Kena kāraṇena, gabbhagatāpi hi mīyanti, na ca te jiṇṇā bhavanti. Atthi ca devānaṃ maraṇaṃ, na ca tesaṃ sarīrāni jīranti. Sakkateva jarāya paṭikammaṃ kātuṃ, na pana sakkate maraṇassa paṭikammaṃ kātuṃ aññatreva iddhimantānaṃ iddhivisayā. Yaṃ panāha taṇhāsallena otiṇṇoti dissanti vītarāgā jīrantāpi mīyantāpi. Yadi ca yathā jarāmaraṇaṃ, evaṃ taṇhāpi siyā. Evaṃ sante sabbe yobbanaṭṭhāpi vigatataṇhā siyuṃ. Yathā ca taṇhā dukkhassa samudayo, evaṃ jarāmaraṇampi siyā dukkhassa samudayo, na ca siyā taṇhā dukkhassa samudayo, na hi jarāmaraṇaṃ dukkhassa samudayo, taṇhā dukkhassa samudayo. Yathā ca taṇhā maggavajjhā, evaṃ jarāmaraṇampi siyā maggavajjhaṃ. Imāya yuttiyā aññamaññehi kāraṇehi gavesitabbaṃ. Yadi ca sandissati yuttisamārūḷhaṃ atthato ca aññattaṃ, byañjanatopi gavesitabbaṃ.
ஸல்லோதி வா தூ⁴பாயனந்தி வா இமேஸங் த⁴ம்மானங் அத்த²தோ ஏகத்தங். ந ஹி யுஜ்ஜதி இச்சா²ய ச தண்ஹாய ச அத்த²தோ அஞ்ஞத்தங். தண்ஹாய அதி⁴ப்பாயே அபரிபூரமானே நவஸு ஆகா⁴தவத்தூ²ஸு கோதோ⁴ ச உபனாஹோ ச உப்பஜ்ஜதி. இமாய யுத்தியா ஜராய ச மரணஸ்ஸ ச தண்ஹாய ச அத்த²தோ அஞ்ஞத்தங்.
Salloti vā dhūpāyananti vā imesaṃ dhammānaṃ atthato ekattaṃ. Na hi yujjati icchāya ca taṇhāya ca atthato aññattaṃ. Taṇhāya adhippāye aparipūramāne navasu āghātavatthūsu kodho ca upanāho ca uppajjati. Imāya yuttiyā jarāya ca maraṇassa ca taṇhāya ca atthato aññattaṃ.
யங் பனித³ங் ப⁴க³வதா த்³வீஹி நாமேஹி அபி⁴லபிதங் இச்சா²திபி தண்ஹாதிபி, இத³ங் ப⁴க³வதா பா³ஹிரானங் வத்தூ²னங் ஆரம்மணவஸேன த்³வீஹி நாமேஹி அபி⁴லபிதங் இச்சா²திபி தண்ஹாதிபி, ஸப்³பா³ ஹி தண்ஹா அஜ்ஜோ²ஸானலக்க²ணேன ஏகலக்க²ணா. யதா² ஸப்³போ³ அக்³கி³ உண்ஹத்தலக்க²ணேன ஏகலக்க²ணோ, அபி ச உபாதா³னவஸேன அஞ்ஞமஞ்ஞானி நாமானி லப⁴தி, கட்ட²க்³கீ³திபி திணக்³கீ³திபி ஸகலிகக்³கீ³திபி கோ³மயக்³கீ³திபி து²ஸக்³கீ³திபி ஸங்காரக்³கீ³திபி, ஸப்³போ³ ஹி அக்³கி³ உண்ஹத்தலக்க²ணோவ. ஏவங் ஸப்³பா³ தண்ஹா அஜ்ஜோ²ஸானலக்க²ணேன ஏகலக்க²ணா , அபி து ஆரம்மணஉபாதா³னவஸேன அஞ்ஞமஞ்ஞேஹி நாமேஹி அபி⁴லபிதா இச்சா²இதிபி தண்ஹாஇதிபி ஸல்லோஇதிபி தூ⁴பாயனாஇதிபி ஸரிதாஇதிபி விஸத்திகாஇதிபி ஸினேஹோஇதிபி கிலமதோ²இதிபி லதாஇதிபி மஞ்ஞனாஇதிபி ப³ந்தோ⁴இதிபி ஆஸாஇதிபி பிபாஸாஇதிபி அபி⁴னந்த³னாஇதிபி, இதி ஸப்³பா³ தண்ஹா அஜ்ஜோ²ஸானலக்க²ணேன ஏகலக்க²ணா. யதா² ச வேவசனே வுத்தா.
Yaṃ panidaṃ bhagavatā dvīhi nāmehi abhilapitaṃ icchātipi taṇhātipi, idaṃ bhagavatā bāhirānaṃ vatthūnaṃ ārammaṇavasena dvīhi nāmehi abhilapitaṃ icchātipi taṇhātipi, sabbā hi taṇhā ajjhosānalakkhaṇena ekalakkhaṇā. Yathā sabbo aggi uṇhattalakkhaṇena ekalakkhaṇo, api ca upādānavasena aññamaññāni nāmāni labhati, kaṭṭhaggītipi tiṇaggītipi sakalikaggītipi gomayaggītipi thusaggītipi saṅkāraggītipi, sabbo hi aggi uṇhattalakkhaṇova. Evaṃ sabbā taṇhā ajjhosānalakkhaṇena ekalakkhaṇā , api tu ārammaṇaupādānavasena aññamaññehi nāmehi abhilapitā icchāitipi taṇhāitipi salloitipi dhūpāyanāitipi saritāitipi visattikāitipi sinehoitipi kilamathoitipi latāitipi maññanāitipi bandhoitipi āsāitipi pipāsāitipi abhinandanāitipi, iti sabbā taṇhā ajjhosānalakkhaṇena ekalakkhaṇā. Yathā ca vevacane vuttā.
‘‘ஆஸா ச பிஹா அபி⁴னந்த³னா ச, அனேகதா⁴தூஸு ஸரா பதிட்டி²தா;
‘‘Āsā ca pihā abhinandanā ca, anekadhātūsu sarā patiṭṭhitā;
அஞ்ஞாணமூலப்பப⁴வா பஜப்பிதா, ஸப்³பா³ மயா ப்³யந்திகதா ஸமூலகா’’தி 11.
Aññāṇamūlappabhavā pajappitā, sabbā mayā byantikatā samūlakā’’ti 12.
தண்ஹாயேதங் வேவசனங். யதா²ஹ ப⁴க³வா – ரூபே திஸ்ஸ அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ. ஏவங் வேத³னாய ஸஞ்ஞாய ஸங்கா²ரேஸு விஞ்ஞாணே அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ ஸப்³ப³ங் ஸுத்தங் வித்தா²ரேதப்³ப³ங். தண்ஹாயேதங் வேவசனங். ஏவங் யுஜ்ஜதி.
Taṇhāyetaṃ vevacanaṃ. Yathāha bhagavā – rūpe tissa avigatarāgassa avigatacchandassa avigatapemassa avigatapipāsassa avigatapariḷāhassa. Evaṃ vedanāya saññāya saṅkhāresu viññāṇe avigatarāgassa avigatacchandassa avigatapemassa avigatapipāsassa avigatapariḷāhassa sabbaṃ suttaṃ vitthāretabbaṃ. Taṇhāyetaṃ vevacanaṃ. Evaṃ yujjati.
21. ஸப்³போ³ து³க்கூ²பசாரோ காமதண்ஹாஸங்கா²ரமூலகோ, ந பன யுஜ்ஜதி ஸப்³போ³ நிப்³பி³தூ³பசாரோ காமதண்ஹாபரிக்கா²ரமூலகோ. இமாய யுத்தியா அஞ்ஞமஞ்ஞேஹி காரணேஹி க³வேஸிதப்³ப³ங்.
21. Sabbo dukkhūpacāro kāmataṇhāsaṅkhāramūlako, na pana yujjati sabbo nibbidūpacāro kāmataṇhāparikkhāramūlako. Imāya yuttiyā aññamaññehi kāraṇehi gavesitabbaṃ.
யதா² ஹி 13 ப⁴க³வா ராக³சரிதஸ்ஸ புக்³க³லஸ்ஸ அஸுப⁴ங் தே³ஸயதி, தோ³ஸசரிதஸ்ஸ ப⁴க³வா புக்³க³லஸ்ஸ மெத்தங் தே³ஸயதி. மோஹசரிதஸ்ஸ ப⁴க³வா புக்³க³லஸ்ஸ படிச்சஸமுப்பாத³ங் தே³ஸயதி. யதி³ ஹி ப⁴க³வா ராக³சரிதஸ்ஸ புக்³க³லஸ்ஸ மெத்தங் சேதோவிமுத்திங் தே³ஸெய்ய. ஸுக²ங் வா படிபத³ங் த³ந்தா⁴பி⁴ஞ்ஞங் ஸுக²ங் வா படிபத³ங் கி²ப்பாபி⁴ஞ்ஞங் விபஸ்ஸனாபுப்³ப³ங்க³மங் வா பஹானங் தே³ஸெய்ய, ந யுஜ்ஜதி தே³ஸனா. ஏவங் யங் கிஞ்சி ராக³ஸ்ஸ அனுலோமப்பஹானங் தோ³ஸஸ்ஸ அனுலோமப்பஹானங் மோஹஸ்ஸ அனுலோமப்பஹானங். ஸப்³ப³ங் தங் விசயேன ஹாரேன விசினித்வா யுத்திஹாரேன யோஜேதப்³ப³ங். யாவதிகா ஞாணஸ்ஸ பூ⁴மி.
Yathā hi 14 bhagavā rāgacaritassa puggalassa asubhaṃ desayati, dosacaritassa bhagavā puggalassa mettaṃ desayati. Mohacaritassa bhagavā puggalassa paṭiccasamuppādaṃ desayati. Yadi hi bhagavā rāgacaritassa puggalassa mettaṃ cetovimuttiṃ deseyya. Sukhaṃ vā paṭipadaṃ dandhābhiññaṃ sukhaṃ vā paṭipadaṃ khippābhiññaṃ vipassanāpubbaṅgamaṃ vā pahānaṃ deseyya, na yujjati desanā. Evaṃ yaṃ kiñci rāgassa anulomappahānaṃ dosassa anulomappahānaṃ mohassa anulomappahānaṃ. Sabbaṃ taṃ vicayena hārena vicinitvā yuttihārena yojetabbaṃ. Yāvatikā ñāṇassa bhūmi.
மெத்தாவிஹாரிஸ்ஸ ஸதோ ப்³யாபாதோ³ சித்தங் பரியாதா³ய ட²ஸ்ஸதீதி ந யுஜ்ஜதி தே³ஸனா, ப்³யாபாதோ³ பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா. கருணாவிஹாரிஸ்ஸ ஸதோ விஹேஸா சித்தங் பரியாதா³ய ட²ஸ்ஸதீதி ந யுஜ்ஜதி தே³ஸனா, விஹேஸா பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா. முதி³தா விஹாரிஸ்ஸ ஸதோ அரதி சித்தங் பரியாதா³ய ட²ஸ்ஸதீதி ந யுஜ்ஜதி தே³ஸனா, அரதி பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா. உபெக்கா²விஹாரிஸ்ஸ ஸதோ ராகோ³ சித்தங் பரியாதா³ய ட²ஸ்ஸதீதி ந யுஜ்ஜதி தே³ஸனா, ராகோ³ பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா. அனிமித்தவிஹாரிஸ்ஸ ஸதோ நிமித்தானுஸாரீ தேன தேனேவ விஞ்ஞாணங் பவத்ததீதி ந யுஜ்ஜதி தே³ஸனா , நிமித்தங் பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா. அஸ்மீதி விக³தங் அயமஹமஸ்மீதி ந ஸமனுபஸ்ஸாமி. அத² ச பன மே கிஸ்மீதி கத²ஸ்மீதி விசிகிச்சா² கத²ங்கதா²ஸல்லங் சித்தங் பரியாதா³ய ட²ஸ்ஸதீதி ந யுஜ்ஜதி தே³ஸனா, விசிகிச்சா² கத²ங்கதா²ஸல்லங் பஹானங் அப்³ப⁴த்த²ங் க³ச்ச²தீதி யுஜ்ஜதி தே³ஸனா.
Mettāvihārissa sato byāpādo cittaṃ pariyādāya ṭhassatīti na yujjati desanā, byāpādo pahānaṃ abbhatthaṃ gacchatīti yujjati desanā. Karuṇāvihārissa sato vihesā cittaṃ pariyādāya ṭhassatīti na yujjati desanā, vihesā pahānaṃ abbhatthaṃ gacchatīti yujjati desanā. Muditā vihārissa sato arati cittaṃ pariyādāya ṭhassatīti na yujjati desanā, arati pahānaṃ abbhatthaṃ gacchatīti yujjati desanā. Upekkhāvihārissa sato rāgo cittaṃ pariyādāya ṭhassatīti na yujjati desanā, rāgo pahānaṃ abbhatthaṃ gacchatīti yujjati desanā. Animittavihārissa sato nimittānusārī tena teneva viññāṇaṃ pavattatīti na yujjati desanā , nimittaṃ pahānaṃ abbhatthaṃ gacchatīti yujjati desanā. Asmīti vigataṃ ayamahamasmīti na samanupassāmi. Atha ca pana me kismīti kathasmīti vicikicchā kathaṃkathāsallaṃ cittaṃ pariyādāya ṭhassatīti na yujjati desanā, vicikicchā kathaṃkathāsallaṃ pahānaṃ abbhatthaṃ gacchatīti yujjati desanā.
யதா² வா பன பட²மங் ஜா²னங் ஸமாபன்னஸ்ஸ ஸதோ காமராக³ப்³யாபாதா³ விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. விதக்கஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. து³தியங் ஜா²னங் ஸமாபன்னஸ்ஸ ஸதோ விதக்கவிசாரஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. உபெக்கா²ஸுக²ஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. ததியங் ஜா²னங் ஸமாபன்னஸ்ஸ ஸதோ பீதிஸுக²ஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா, உபெக்கா²ஸதிபாரிஸுத்³தி⁴ஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. சதுத்த²ங் ஜா²னங் ஸமாபன்னஸ்ஸ ஸதோ உபெக்கா²ஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா . ஆகாஸானஞ்சாயதனஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா.
Yathā vā pana paṭhamaṃ jhānaṃ samāpannassa sato kāmarāgabyāpādā visesāya saṃvattantīti na yujjati desanā, hānāya saṃvattantīti yujjati desanā. Vitakkasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Dutiyaṃ jhānaṃ samāpannassa sato vitakkavicārasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Upekkhāsukhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Tatiyaṃ jhānaṃ samāpannassa sato pītisukhasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā, upekkhāsatipārisuddhisahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Catutthaṃ jhānaṃ samāpannassa sato upekkhāsahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā . Ākāsānañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
ஆகாஸானஞ்சாயதனங் ஸமாபன்னஸ்ஸ ஸதோ ரூபஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. விஞ்ஞாணஞ்சாயதனஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. விஞ்ஞாணஞ்சாயதனங் ஸமாபன்னஸ்ஸ ஸதோ ஆகாஸானஞ்சாயதனஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. ஆகிஞ்சஞ்ஞாயதனஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா.
Ākāsānañcāyatanaṃ samāpannassa sato rūpasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Viññāṇañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Viññāṇañcāyatanaṃ samāpannassa sato ākāsānañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Ākiñcaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
ஆகிஞ்சஞ்ஞாயதனங் ஸமாபன்னஸ்ஸ ஸதோ விஞ்ஞாணஞ்சாயதனஸஹக³தா ஸஞ்ஞாமனஸிகாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. நேவஸஞ்ஞானாஸஞ்ஞாயதனஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. நேவஸஞ்ஞானாஸஞ்ஞாயதனங் ஸமாபன்னஸ்ஸ ஸதோ ஸஞ்ஞூபசாரா விஸேஸாய ஸங்வத்தந்தீதி ந யுஜ்ஜதி தே³ஸனா, ஹானாய ஸங்வத்தந்தீதி யுஜ்ஜதி தே³ஸனா. ஸஞ்ஞாவேத³யிதனிரோத⁴ஸஹக³தா வா ஸஞ்ஞாமனஸிகாரா ஹானாய ஸங்வத்தந்தீதி ந யுஜ்ஜதி தே³ஸனா, விஸேஸாய ஸங்வத்தந்தீதி யுஜ்ஜதி தே³ஸனா. கல்லதாபரிசிதங் சித்தங் ந ச அபி⁴னீஹாரங் க²மதீதி ந யுஜ்ஜதி தே³ஸனா, கல்லதாபரிசிதங் சித்தங் அத² ச அபி⁴னீஹாரங் க²மதீதி யுஜ்ஜதி தே³ஸனா.
Ākiñcaññāyatanaṃ samāpannassa sato viññāṇañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Nevasaññānāsaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Nevasaññānāsaññāyatanaṃ samāpannassa sato saññūpacārā visesāya saṃvattantīti na yujjati desanā, hānāya saṃvattantīti yujjati desanā. Saññāvedayitanirodhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Kallatāparicitaṃ cittaṃ na ca abhinīhāraṃ khamatīti na yujjati desanā, kallatāparicitaṃ cittaṃ atha ca abhinīhāraṃ khamatīti yujjati desanā.
ஏவங் ஸப்³பே³ நவஸுத்தந்தா யதா²த⁴ம்மங் யதா²வினயங் யதா²ஸத்து²ஸாஸனங் ஸப்³ப³தோ விசயேன ஹாரேன விசினித்வா யுத்திஹாரேன யோஜேதப்³பா³தி. தேனாஹ ஆயஸ்மா மஹாகச்சாயனோ ‘‘ஸப்³பே³ஸங் ஹாரானங் யா பூ⁴மி யோ ச கோ³சரோ தேஸ’’ந்தி.
Evaṃ sabbe navasuttantā yathādhammaṃ yathāvinayaṃ yathāsatthusāsanaṃ sabbato vicayena hārena vicinitvā yuttihārena yojetabbāti. Tenāha āyasmā mahākaccāyano ‘‘sabbesaṃ hārānaṃ yā bhūmi yo ca gocaro tesa’’nti.
நியுத்தோ யுத்தி ஹாரோ.
Niyutto yutti hāro.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 3. யுத்திஹாரவிப⁴ங்க³வண்ணனா • 3. Yuttihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 3. யுத்திஹாரவிப⁴ங்க³வண்ணனா • 3. Yuttihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 3. யுத்திஹாரவிப⁴ங்க³விபா⁴வனா • 3. Yuttihāravibhaṅgavibhāvanā
