| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৩. যুত্তিহারৰিভঙ্গো
3. Yuttihāravibhaṅgo
কতমস্মিং সুত্তে ওতারযিতব্বানি? চতূসু অরিযসচ্চেসু। কতমস্মিং ৰিনযে সন্দস্সযিতব্বানি? রাগৰিনযে দোসৰিনযে মোহৰিনযে। কতমিস্সং 5 ধম্মতাযং উপনিক্খিপিতব্বানি? পটিচ্চসমুপ্পাদে। যদি চতূসু অরিযসচ্চেসু অৰতরতি, কিলেসৰিনযে সন্দিস্সতি , ধম্মতঞ্চ ন ৰিলোমেতি, এৰং আসৰে ন জনেতি। চতূহি মহাপদেসেহি যং যং যুজ্জতি, যেন যেন যুজ্জতি, যথা যথা যুজ্জতি, তং তং গহেতব্বং।
Katamasmiṃ sutte otārayitabbāni? Catūsu ariyasaccesu. Katamasmiṃ vinaye sandassayitabbāni? Rāgavinaye dosavinaye mohavinaye. Katamissaṃ 6 dhammatāyaṃ upanikkhipitabbāni? Paṭiccasamuppāde. Yadi catūsu ariyasaccesu avatarati, kilesavinaye sandissati , dhammatañca na vilometi, evaṃ āsave na janeti. Catūhi mahāpadesehi yaṃ yaṃ yujjati, yena yena yujjati, yathā yathā yujjati, taṃ taṃ gahetabbaṃ.
১৯. পঞ্হং পুচ্ছিতেন কতি পদানি পঞ্হেতি পদসো পরিযোগাহিতব্বং ৰিচেতব্বং? যদি সব্বানি পদানি একং অত্থং অভিৰদন্তি, একো পঞ্হো। অথ চত্তারি পদানি একং অত্থং অভিৰদন্তি, একো পঞ্হো। অথ তীণি পদানি একং অত্থং অভিৰদন্তি, একো পঞ্হো। অথ দ্ৰে পদানি একং অত্থং অভিৰদন্তি, একো পঞ্হো। অথ একং পদং একং অত্থং অভিৰদতি, একো পঞ্হো। তং উপপরিক্খমানেন অঞ্ঞাতব্বং কিং ইমে ধম্মা নানত্থা নানাব্যঞ্জনা, উদাহু ইমেসং ধম্মানং একো অত্থো ব্যঞ্জনমেৰ নানন্তি। যথা কিং ভৰে? যথা সা দেৰতা ভগৰন্তং পঞ্হং পুচ্ছতি।
19. Pañhaṃ pucchitena kati padāni pañheti padaso pariyogāhitabbaṃ vicetabbaṃ? Yadi sabbāni padāni ekaṃ atthaṃ abhivadanti, eko pañho. Atha cattāri padāni ekaṃ atthaṃ abhivadanti, eko pañho. Atha tīṇi padāni ekaṃ atthaṃ abhivadanti, eko pañho. Atha dve padāni ekaṃ atthaṃ abhivadanti, eko pañho. Atha ekaṃ padaṃ ekaṃ atthaṃ abhivadati, eko pañho. Taṃ upaparikkhamānena aññātabbaṃ kiṃ ime dhammā nānatthā nānābyañjanā, udāhu imesaṃ dhammānaṃ eko attho byañjanameva nānanti. Yathā kiṃ bhave? Yathā sā devatā bhagavantaṃ pañhaṃ pucchati.
কেন সল্লেন ওতিণ্ণো, কিস্স ধূপাযিতো সদা’’তি॥
Kena sallena otiṇṇo, kissa dhūpāyito sadā’’ti.
ইমানি চত্তারি পদানি পুচ্ছিতানি। তে তযো পঞ্হা কথং ঞাযতি? ভগৰা হি দেৰতায ৰিসজ্জেতি।
Imāni cattāri padāni pucchitāni. Te tayo pañhā kathaṃ ñāyati? Bhagavā hi devatāya visajjeti.
তণ্হাসল্লেন ওতিণ্ণো, ইচ্ছাধূপাযিতো সদা’’তি॥
Taṇhāsallena otiṇṇo, icchādhūpāyito sadā’’ti.
২০. তত্থ জরা চ মরণঞ্চ ইমানি দ্ৰে সঙ্খতস্স সঙ্খতলক্খণানি। জরাযং ঠিতস্স অঞ্ঞথত্তং, মরণং ৰযো। তত্থ জরায চ মরণস্স চ অত্থতো নানত্তং। কেন কারণেন, গব্ভগতাপি হি মীযন্তি, ন চ তে জিণ্ণা ভৰন্তি। অত্থি চ দেৰানং মরণং, ন চ তেসং সরীরানি জীরন্তি। সক্কতেৰ জরায পটিকম্মং কাতুং, ন পন সক্কতে মরণস্স পটিকম্মং কাতুং অঞ্ঞত্রেৰ ইদ্ধিমন্তানং ইদ্ধিৰিসযা। যং পনাহ তণ্হাসল্লেন ওতিণ্ণোতি দিস্সন্তি ৰীতরাগা জীরন্তাপি মীযন্তাপি। যদি চ যথা জরামরণং, এৰং তণ্হাপি সিযা। এৰং সন্তে সব্বে যোব্বনট্ঠাপি ৰিগততণ্হা সিযুং। যথা চ তণ্হা দুক্খস্স সমুদযো, এৰং জরামরণম্পি সিযা দুক্খস্স সমুদযো, ন চ সিযা তণ্হা দুক্খস্স সমুদযো, ন হি জরামরণং দুক্খস্স সমুদযো, তণ্হা দুক্খস্স সমুদযো। যথা চ তণ্হা মগ্গৰজ্ঝা, এৰং জরামরণম্পি সিযা মগ্গৰজ্ঝং। ইমায যুত্তিযা অঞ্ঞমঞ্ঞেহি কারণেহি গৰেসিতব্বং। যদি চ সন্দিস্সতি যুত্তিসমারূল়্হং অত্থতো চ অঞ্ঞত্তং, ব্যঞ্জনতোপি গৰেসিতব্বং।
20. Tattha jarā ca maraṇañca imāni dve saṅkhatassa saṅkhatalakkhaṇāni. Jarāyaṃ ṭhitassa aññathattaṃ, maraṇaṃ vayo. Tattha jarāya ca maraṇassa ca atthato nānattaṃ. Kena kāraṇena, gabbhagatāpi hi mīyanti, na ca te jiṇṇā bhavanti. Atthi ca devānaṃ maraṇaṃ, na ca tesaṃ sarīrāni jīranti. Sakkateva jarāya paṭikammaṃ kātuṃ, na pana sakkate maraṇassa paṭikammaṃ kātuṃ aññatreva iddhimantānaṃ iddhivisayā. Yaṃ panāha taṇhāsallena otiṇṇoti dissanti vītarāgā jīrantāpi mīyantāpi. Yadi ca yathā jarāmaraṇaṃ, evaṃ taṇhāpi siyā. Evaṃ sante sabbe yobbanaṭṭhāpi vigatataṇhā siyuṃ. Yathā ca taṇhā dukkhassa samudayo, evaṃ jarāmaraṇampi siyā dukkhassa samudayo, na ca siyā taṇhā dukkhassa samudayo, na hi jarāmaraṇaṃ dukkhassa samudayo, taṇhā dukkhassa samudayo. Yathā ca taṇhā maggavajjhā, evaṃ jarāmaraṇampi siyā maggavajjhaṃ. Imāya yuttiyā aññamaññehi kāraṇehi gavesitabbaṃ. Yadi ca sandissati yuttisamārūḷhaṃ atthato ca aññattaṃ, byañjanatopi gavesitabbaṃ.
সল্লোতি ৰা ধূপাযনন্তি ৰা ইমেসং ধম্মানং অত্থতো একত্তং। ন হি যুজ্জতি ইচ্ছায চ তণ্হায চ অত্থতো অঞ্ঞত্তং। তণ্হায অধিপ্পাযে অপরিপূরমানে নৰসু আঘাতৰত্থূসু কোধো চ উপনাহো চ উপ্পজ্জতি। ইমায যুত্তিযা জরায চ মরণস্স চ তণ্হায চ অত্থতো অঞ্ঞত্তং।
Salloti vā dhūpāyananti vā imesaṃ dhammānaṃ atthato ekattaṃ. Na hi yujjati icchāya ca taṇhāya ca atthato aññattaṃ. Taṇhāya adhippāye aparipūramāne navasu āghātavatthūsu kodho ca upanāho ca uppajjati. Imāya yuttiyā jarāya ca maraṇassa ca taṇhāya ca atthato aññattaṃ.
যং পনিদং ভগৰতা দ্ৰীহি নামেহি অভিলপিতং ইচ্ছাতিপি তণ্হাতিপি, ইদং ভগৰতা বাহিরানং ৰত্থূনং আরম্মণৰসেন দ্ৰীহি নামেহি অভিলপিতং ইচ্ছাতিপি তণ্হাতিপি, সব্বা হি তণ্হা অজ্ঝোসানলক্খণেন একলক্খণা। যথা সব্বো অগ্গি উণ্হত্তলক্খণেন একলক্খণো, অপি চ উপাদানৰসেন অঞ্ঞমঞ্ঞানি নামানি লভতি, কট্ঠগ্গীতিপি তিণগ্গীতিপি সকলিকগ্গীতিপি গোমযগ্গীতিপি থুসগ্গীতিপি সঙ্কারগ্গীতিপি, সব্বো হি অগ্গি উণ্হত্তলক্খণোৰ। এৰং সব্বা তণ্হা অজ্ঝোসানলক্খণেন একলক্খণা , অপি তু আরম্মণউপাদানৰসেন অঞ্ঞমঞ্ঞেহি নামেহি অভিলপিতা ইচ্ছাইতিপি তণ্হাইতিপি সল্লোইতিপি ধূপাযনাইতিপি সরিতাইতিপি ৰিসত্তিকাইতিপি সিনেহোইতিপি কিলমথোইতিপি লতাইতিপি মঞ্ঞনাইতিপি বন্ধোইতিপি আসাইতিপি পিপাসাইতিপি অভিনন্দনাইতিপি, ইতি সব্বা তণ্হা অজ্ঝোসানলক্খণেন একলক্খণা। যথা চ ৰেৰচনে ৰুত্তা।
Yaṃ panidaṃ bhagavatā dvīhi nāmehi abhilapitaṃ icchātipi taṇhātipi, idaṃ bhagavatā bāhirānaṃ vatthūnaṃ ārammaṇavasena dvīhi nāmehi abhilapitaṃ icchātipi taṇhātipi, sabbā hi taṇhā ajjhosānalakkhaṇena ekalakkhaṇā. Yathā sabbo aggi uṇhattalakkhaṇena ekalakkhaṇo, api ca upādānavasena aññamaññāni nāmāni labhati, kaṭṭhaggītipi tiṇaggītipi sakalikaggītipi gomayaggītipi thusaggītipi saṅkāraggītipi, sabbo hi aggi uṇhattalakkhaṇova. Evaṃ sabbā taṇhā ajjhosānalakkhaṇena ekalakkhaṇā , api tu ārammaṇaupādānavasena aññamaññehi nāmehi abhilapitā icchāitipi taṇhāitipi salloitipi dhūpāyanāitipi saritāitipi visattikāitipi sinehoitipi kilamathoitipi latāitipi maññanāitipi bandhoitipi āsāitipi pipāsāitipi abhinandanāitipi, iti sabbā taṇhā ajjhosānalakkhaṇena ekalakkhaṇā. Yathā ca vevacane vuttā.
‘‘আসা চ পিহা অভিনন্দনা চ, অনেকধাতূসু সরা পতিট্ঠিতা।
‘‘Āsā ca pihā abhinandanā ca, anekadhātūsu sarā patiṭṭhitā;
অঞ্ঞাণমূলপ্পভৰা পজপ্পিতা, সব্বা মযা ব্যন্তিকতা সমূলকা’’তি 11॥
Aññāṇamūlappabhavā pajappitā, sabbā mayā byantikatā samūlakā’’ti 12.
তণ্হাযেতং ৰেৰচনং। যথাহ ভগৰা – রূপে তিস্স অৰিগতরাগস্স অৰিগতচ্ছন্দস্স অৰিগতপেমস্স অৰিগতপিপাসস্স অৰিগতপরিল়াহস্স। এৰং ৰেদনায সঞ্ঞায সঙ্খারেসু ৰিঞ্ঞাণে অৰিগতরাগস্স অৰিগতচ্ছন্দস্স অৰিগতপেমস্স অৰিগতপিপাসস্স অৰিগতপরিল়াহস্স সব্বং সুত্তং ৰিত্থারেতব্বং। তণ্হাযেতং ৰেৰচনং। এৰং যুজ্জতি।
Taṇhāyetaṃ vevacanaṃ. Yathāha bhagavā – rūpe tissa avigatarāgassa avigatacchandassa avigatapemassa avigatapipāsassa avigatapariḷāhassa. Evaṃ vedanāya saññāya saṅkhāresu viññāṇe avigatarāgassa avigatacchandassa avigatapemassa avigatapipāsassa avigatapariḷāhassa sabbaṃ suttaṃ vitthāretabbaṃ. Taṇhāyetaṃ vevacanaṃ. Evaṃ yujjati.
২১. সব্বো দুক্খূপচারো কামতণ্হাসঙ্খারমূলকো, ন পন যুজ্জতি সব্বো নিব্বিদূপচারো কামতণ্হাপরিক্খারমূলকো। ইমায যুত্তিযা অঞ্ঞমঞ্ঞেহি কারণেহি গৰেসিতব্বং।
21. Sabbo dukkhūpacāro kāmataṇhāsaṅkhāramūlako, na pana yujjati sabbo nibbidūpacāro kāmataṇhāparikkhāramūlako. Imāya yuttiyā aññamaññehi kāraṇehi gavesitabbaṃ.
যথা হি 13 ভগৰা রাগচরিতস্স পুগ্গলস্স অসুভং দেসযতি, দোসচরিতস্স ভগৰা পুগ্গলস্স মেত্তং দেসযতি। মোহচরিতস্স ভগৰা পুগ্গলস্স পটিচ্চসমুপ্পাদং দেসযতি। যদি হি ভগৰা রাগচরিতস্স পুগ্গলস্স মেত্তং চেতোৰিমুত্তিং দেসেয্য। সুখং ৰা পটিপদং দন্ধাভিঞ্ঞং সুখং ৰা পটিপদং খিপ্পাভিঞ্ঞং ৰিপস্সনাপুব্বঙ্গমং ৰা পহানং দেসেয্য, ন যুজ্জতি দেসনা। এৰং যং কিঞ্চি রাগস্স অনুলোমপ্পহানং দোসস্স অনুলোমপ্পহানং মোহস্স অনুলোমপ্পহানং। সব্বং তং ৰিচযেন হারেন ৰিচিনিত্ৰা যুত্তিহারেন যোজেতব্বং। যাৰতিকা ঞাণস্স ভূমি।
Yathā hi 14 bhagavā rāgacaritassa puggalassa asubhaṃ desayati, dosacaritassa bhagavā puggalassa mettaṃ desayati. Mohacaritassa bhagavā puggalassa paṭiccasamuppādaṃ desayati. Yadi hi bhagavā rāgacaritassa puggalassa mettaṃ cetovimuttiṃ deseyya. Sukhaṃ vā paṭipadaṃ dandhābhiññaṃ sukhaṃ vā paṭipadaṃ khippābhiññaṃ vipassanāpubbaṅgamaṃ vā pahānaṃ deseyya, na yujjati desanā. Evaṃ yaṃ kiñci rāgassa anulomappahānaṃ dosassa anulomappahānaṃ mohassa anulomappahānaṃ. Sabbaṃ taṃ vicayena hārena vicinitvā yuttihārena yojetabbaṃ. Yāvatikā ñāṇassa bhūmi.
মেত্তাৰিহারিস্স সতো ব্যাপাদো চিত্তং পরিযাদায ঠস্সতীতি ন যুজ্জতি দেসনা, ব্যাপাদো পহানং অব্ভত্থং গচ্ছতীতি যুজ্জতি দেসনা। করুণাৰিহারিস্স সতো ৰিহেসা চিত্তং পরিযাদায ঠস্সতীতি ন যুজ্জতি দেসনা, ৰিহেসা পহানং অব্ভত্থং গচ্ছতীতি যুজ্জতি দেসনা। মুদিতা ৰিহারিস্স সতো অরতি চিত্তং পরিযাদায ঠস্সতীতি ন যুজ্জতি দেসনা, অরতি পহানং অব্ভত্থং গচ্ছতীতি যুজ্জতি দেসনা। উপেক্খাৰিহারিস্স সতো রাগো চিত্তং পরিযাদায ঠস্সতীতি ন যুজ্জতি দেসনা, রাগো পহানং অব্ভত্থং গচ্ছতীতি যুজ্জতি দেসনা। অনিমিত্তৰিহারিস্স সতো নিমিত্তানুসারী তেন তেনেৰ ৰিঞ্ঞাণং পৰত্ততীতি ন যুজ্জতি দেসনা , নিমিত্তং পহানং অব্ভত্থং গচ্ছতীতি যুজ্জতি দেসনা। অস্মীতি ৰিগতং অযমহমস্মীতি ন সমনুপস্সামি। অথ চ পন মে কিস্মীতি কথস্মীতি ৰিচিকিচ্ছা কথংকথাসল্লং চিত্তং পরিযাদায ঠস্সতীতি ন যুজ্জতি দেসনা, ৰিচিকিচ্ছা কথংকথাসল্লং পহানং অব্ভত্থং গচ্ছতীতি যুজ্জতি দেসনা।
Mettāvihārissa sato byāpādo cittaṃ pariyādāya ṭhassatīti na yujjati desanā, byāpādo pahānaṃ abbhatthaṃ gacchatīti yujjati desanā. Karuṇāvihārissa sato vihesā cittaṃ pariyādāya ṭhassatīti na yujjati desanā, vihesā pahānaṃ abbhatthaṃ gacchatīti yujjati desanā. Muditā vihārissa sato arati cittaṃ pariyādāya ṭhassatīti na yujjati desanā, arati pahānaṃ abbhatthaṃ gacchatīti yujjati desanā. Upekkhāvihārissa sato rāgo cittaṃ pariyādāya ṭhassatīti na yujjati desanā, rāgo pahānaṃ abbhatthaṃ gacchatīti yujjati desanā. Animittavihārissa sato nimittānusārī tena teneva viññāṇaṃ pavattatīti na yujjati desanā , nimittaṃ pahānaṃ abbhatthaṃ gacchatīti yujjati desanā. Asmīti vigataṃ ayamahamasmīti na samanupassāmi. Atha ca pana me kismīti kathasmīti vicikicchā kathaṃkathāsallaṃ cittaṃ pariyādāya ṭhassatīti na yujjati desanā, vicikicchā kathaṃkathāsallaṃ pahānaṃ abbhatthaṃ gacchatīti yujjati desanā.
যথা ৰা পন পঠমং ঝানং সমাপন্নস্স সতো কামরাগব্যাপাদা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। ৰিতক্কসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। দুতিযং ঝানং সমাপন্নস্স সতো ৰিতক্কৰিচারসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। উপেক্খাসুখসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। ততিযং ঝানং সমাপন্নস্স সতো পীতিসুখসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা, উপেক্খাসতিপারিসুদ্ধিসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। চতুত্থং ঝানং সমাপন্নস্স সতো উপেক্খাসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা । আকাসানঞ্চাযতনসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা।
Yathā vā pana paṭhamaṃ jhānaṃ samāpannassa sato kāmarāgabyāpādā visesāya saṃvattantīti na yujjati desanā, hānāya saṃvattantīti yujjati desanā. Vitakkasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Dutiyaṃ jhānaṃ samāpannassa sato vitakkavicārasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Upekkhāsukhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Tatiyaṃ jhānaṃ samāpannassa sato pītisukhasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā, upekkhāsatipārisuddhisahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Catutthaṃ jhānaṃ samāpannassa sato upekkhāsahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā . Ākāsānañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
আকাসানঞ্চাযতনং সমাপন্নস্স সতো রূপসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। ৰিঞ্ঞাণঞ্চাযতনসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। ৰিঞ্ঞাণঞ্চাযতনং সমাপন্নস্স সতো আকাসানঞ্চাযতনসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। আকিঞ্চঞ্ঞাযতনসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা।
Ākāsānañcāyatanaṃ samāpannassa sato rūpasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Viññāṇañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Viññāṇañcāyatanaṃ samāpannassa sato ākāsānañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Ākiñcaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
আকিঞ্চঞ্ঞাযতনং সমাপন্নস্স সতো ৰিঞ্ঞাণঞ্চাযতনসহগতা সঞ্ঞামনসিকারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। নেৰসঞ্ঞানাসঞ্ঞাযতনসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। নেৰসঞ্ঞানাসঞ্ঞাযতনং সমাপন্নস্স সতো সঞ্ঞূপচারা ৰিসেসায সংৰত্তন্তীতি ন যুজ্জতি দেসনা, হানায সংৰত্তন্তীতি যুজ্জতি দেসনা। সঞ্ঞাৰেদযিতনিরোধসহগতা ৰা সঞ্ঞামনসিকারা হানায সংৰত্তন্তীতি ন যুজ্জতি দেসনা, ৰিসেসায সংৰত্তন্তীতি যুজ্জতি দেসনা। কল্লতাপরিচিতং চিত্তং ন চ অভিনীহারং খমতীতি ন যুজ্জতি দেসনা, কল্লতাপরিচিতং চিত্তং অথ চ অভিনীহারং খমতীতি যুজ্জতি দেসনা।
Ākiñcaññāyatanaṃ samāpannassa sato viññāṇañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Nevasaññānāsaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Nevasaññānāsaññāyatanaṃ samāpannassa sato saññūpacārā visesāya saṃvattantīti na yujjati desanā, hānāya saṃvattantīti yujjati desanā. Saññāvedayitanirodhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Kallatāparicitaṃ cittaṃ na ca abhinīhāraṃ khamatīti na yujjati desanā, kallatāparicitaṃ cittaṃ atha ca abhinīhāraṃ khamatīti yujjati desanā.
এৰং সব্বে নৰসুত্তন্তা যথাধম্মং যথাৰিনযং যথাসত্থুসাসনং সব্বতো ৰিচযেন হারেন ৰিচিনিত্ৰা যুত্তিহারেন যোজেতব্বাতি। তেনাহ আযস্মা মহাকচ্চাযনো ‘‘সব্বেসং হারানং যা ভূমি যো চ গোচরো তেস’’ন্তি।
Evaṃ sabbe navasuttantā yathādhammaṃ yathāvinayaṃ yathāsatthusāsanaṃ sabbato vicayena hārena vicinitvā yuttihārena yojetabbāti. Tenāha āyasmā mahākaccāyano ‘‘sabbesaṃ hārānaṃ yā bhūmi yo ca gocaro tesa’’nti.
নিযুত্তো যুত্তি হারো।
Niyutto yutti hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৩. যুত্তিহারৰিভঙ্গৰণ্ণনা • 3. Yuttihāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৩. যুত্তিহারৰিভঙ্গৰণ্ণনা • 3. Yuttihāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৩. যুত্তিহারৰিভঙ্গৰিভাৰনা • 3. Yuttihāravibhaṅgavibhāvanā
