| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎཔཱལི༹ • Nettippakaraṇapāḷi |
༣. ཡུཏྟིཧཱརཝིབྷངྒོ
3. Yuttihāravibhaṅgo
ཀཏམསྨིཾ སུཏྟེ ཨོཏཱརཡིཏབྦཱནི? ཙཏཱུསུ ཨརིཡསཙྩེསུ། ཀཏམསྨིཾ ཝིནཡེ སནྡསྶཡིཏབྦཱནི? རཱགཝིནཡེ དོསཝིནཡེ མོཧཝིནཡེ། ཀཏམིསྶཾ 5 དྷམྨཏཱཡཾ ཨུཔནིཀྑིཔིཏབྦཱནི? པཊིཙྩསམུཔྤཱདེ། ཡདི ཙཏཱུསུ ཨརིཡསཙྩེསུ ཨཝཏརཏི, ཀིལེསཝིནཡེ སནྡིསྶཏི , དྷམྨཏཉྩ ན ཝིལོམེཏི, ཨེཝཾ ཨཱསཝེ ན ཛནེཏི། ཙཏཱུཧི མཧཱཔདེསེཧི ཡཾ ཡཾ ཡུཛྫཏི, ཡེན ཡེན ཡུཛྫཏི, ཡཐཱ ཡཐཱ ཡུཛྫཏི, ཏཾ ཏཾ གཧེཏབྦཾ།
Katamasmiṃ sutte otārayitabbāni? Catūsu ariyasaccesu. Katamasmiṃ vinaye sandassayitabbāni? Rāgavinaye dosavinaye mohavinaye. Katamissaṃ 6 dhammatāyaṃ upanikkhipitabbāni? Paṭiccasamuppāde. Yadi catūsu ariyasaccesu avatarati, kilesavinaye sandissati , dhammatañca na vilometi, evaṃ āsave na janeti. Catūhi mahāpadesehi yaṃ yaṃ yujjati, yena yena yujjati, yathā yathā yujjati, taṃ taṃ gahetabbaṃ.
༡༩. པཉྷཾ པུཙྪིཏེན ཀཏི པདཱནི པཉྷེཏི པདསོ པརིཡོགཱཧིཏབྦཾ ཝིཙེཏབྦཾ? ཡདི སབྦཱནི པདཱནི ཨེཀཾ ཨཏྠཾ ཨབྷིཝདནྟི, ཨེཀོ པཉྷོ། ཨཐ ཙཏྟཱརི པདཱནི ཨེཀཾ ཨཏྠཾ ཨབྷིཝདནྟི, ཨེཀོ པཉྷོ། ཨཐ ཏཱིཎི པདཱནི ཨེཀཾ ཨཏྠཾ ཨབྷིཝདནྟི, ཨེཀོ པཉྷོ། ཨཐ དྭེ པདཱནི ཨེཀཾ ཨཏྠཾ ཨབྷིཝདནྟི, ཨེཀོ པཉྷོ། ཨཐ ཨེཀཾ པདཾ ཨེཀཾ ཨཏྠཾ ཨབྷིཝདཏི, ཨེཀོ པཉྷོ། ཏཾ ཨུཔཔརིཀྑམཱནེན ཨཉྙཱཏབྦཾ ཀིཾ ཨིམེ དྷམྨཱ ནཱནཏྠཱ ནཱནཱབྱཉྫནཱ, ཨུདཱཧུ ཨིམེསཾ དྷམྨཱནཾ ཨེཀོ ཨཏྠོ བྱཉྫནམེཝ ནཱནནྟི། ཡཐཱ ཀིཾ བྷཝེ? ཡཐཱ སཱ དེཝཏཱ བྷགཝནྟཾ པཉྷཾ པུཙྪཏི།
19. Pañhaṃ pucchitena kati padāni pañheti padaso pariyogāhitabbaṃ vicetabbaṃ? Yadi sabbāni padāni ekaṃ atthaṃ abhivadanti, eko pañho. Atha cattāri padāni ekaṃ atthaṃ abhivadanti, eko pañho. Atha tīṇi padāni ekaṃ atthaṃ abhivadanti, eko pañho. Atha dve padāni ekaṃ atthaṃ abhivadanti, eko pañho. Atha ekaṃ padaṃ ekaṃ atthaṃ abhivadati, eko pañho. Taṃ upaparikkhamānena aññātabbaṃ kiṃ ime dhammā nānatthā nānābyañjanā, udāhu imesaṃ dhammānaṃ eko attho byañjanameva nānanti. Yathā kiṃ bhave? Yathā sā devatā bhagavantaṃ pañhaṃ pucchati.
ཀེན སལླེན ཨོཏིཎྞོ, ཀིསྶ དྷཱུཔཱཡིཏོ སདཱ’’ཏི༎
Kena sallena otiṇṇo, kissa dhūpāyito sadā’’ti.
ཨིམཱནི ཙཏྟཱརི པདཱནི པུཙྪིཏཱནི། ཏེ ཏཡོ པཉྷཱ ཀཐཾ ཉཱཡཏི? བྷགཝཱ ཧི དེཝཏཱཡ ཝིསཛྫེཏི།
Imāni cattāri padāni pucchitāni. Te tayo pañhā kathaṃ ñāyati? Bhagavā hi devatāya visajjeti.
ཏཎྷཱསལླེན ཨོཏིཎྞོ, ཨིཙྪཱདྷཱུཔཱཡིཏོ སདཱ’’ཏི༎
Taṇhāsallena otiṇṇo, icchādhūpāyito sadā’’ti.
༢༠. ཏཏྠ ཛརཱ ཙ མརཎཉྩ ཨིམཱནི དྭེ སངྑཏསྶ སངྑཏལཀྑཎཱནི། ཛརཱཡཾ ཋིཏསྶ ཨཉྙཐཏྟཾ, མརཎཾ ཝཡོ། ཏཏྠ ཛརཱཡ ཙ མརཎསྶ ཙ ཨཏྠཏོ ནཱནཏྟཾ། ཀེན ཀཱརཎེན, གབྦྷགཏཱཔི ཧི མཱིཡནྟི, ན ཙ ཏེ ཛིཎྞཱ བྷཝནྟི། ཨཏྠི ཙ དེཝཱནཾ མརཎཾ, ན ཙ ཏེསཾ སརཱིརཱནི ཛཱིརནྟི། སཀྐཏེཝ ཛརཱཡ པཊིཀམྨཾ ཀཱཏུཾ, ན པན སཀྐཏེ མརཎསྶ པཊིཀམྨཾ ཀཱཏུཾ ཨཉྙཏྲེཝ ཨིདྡྷིམནྟཱནཾ ཨིདྡྷིཝིསཡཱ། ཡཾ པནཱཧ ཏཎྷཱསལླེན ཨོཏིཎྞོཏི དིསྶནྟི ཝཱིཏརཱགཱ ཛཱིརནྟཱཔི མཱིཡནྟཱཔི། ཡདི ཙ ཡཐཱ ཛརཱམརཎཾ, ཨེཝཾ ཏཎྷཱཔི སིཡཱ། ཨེཝཾ སནྟེ སབྦེ ཡོབྦནཊྛཱཔི ཝིགཏཏཎྷཱ སིཡུཾ། ཡཐཱ ཙ ཏཎྷཱ དུཀྑསྶ སམུདཡོ, ཨེཝཾ ཛརཱམརཎམྤི སིཡཱ དུཀྑསྶ སམུདཡོ, ན ཙ སིཡཱ ཏཎྷཱ དུཀྑསྶ སམུདཡོ, ན ཧི ཛརཱམརཎཾ དུཀྑསྶ སམུདཡོ, ཏཎྷཱ དུཀྑསྶ སམུདཡོ། ཡཐཱ ཙ ཏཎྷཱ མགྒཝཛ྄ཛྷཱ, ཨེཝཾ ཛརཱམརཎམྤི སིཡཱ མགྒཝཛ྄ཛྷཾ། ཨིམཱཡ ཡུཏྟིཡཱ ཨཉྙམཉྙེཧི ཀཱརཎེཧི གཝེསིཏབྦཾ། ཡདི ཙ སནྡིསྶཏི ཡུཏྟིསམཱརཱུལ༹ྷཾ ཨཏྠཏོ ཙ ཨཉྙཏྟཾ, བྱཉྫནཏོཔི གཝེསིཏབྦཾ།
20. Tattha jarā ca maraṇañca imāni dve saṅkhatassa saṅkhatalakkhaṇāni. Jarāyaṃ ṭhitassa aññathattaṃ, maraṇaṃ vayo. Tattha jarāya ca maraṇassa ca atthato nānattaṃ. Kena kāraṇena, gabbhagatāpi hi mīyanti, na ca te jiṇṇā bhavanti. Atthi ca devānaṃ maraṇaṃ, na ca tesaṃ sarīrāni jīranti. Sakkateva jarāya paṭikammaṃ kātuṃ, na pana sakkate maraṇassa paṭikammaṃ kātuṃ aññatreva iddhimantānaṃ iddhivisayā. Yaṃ panāha taṇhāsallena otiṇṇoti dissanti vītarāgā jīrantāpi mīyantāpi. Yadi ca yathā jarāmaraṇaṃ, evaṃ taṇhāpi siyā. Evaṃ sante sabbe yobbanaṭṭhāpi vigatataṇhā siyuṃ. Yathā ca taṇhā dukkhassa samudayo, evaṃ jarāmaraṇampi siyā dukkhassa samudayo, na ca siyā taṇhā dukkhassa samudayo, na hi jarāmaraṇaṃ dukkhassa samudayo, taṇhā dukkhassa samudayo. Yathā ca taṇhā maggavajjhā, evaṃ jarāmaraṇampi siyā maggavajjhaṃ. Imāya yuttiyā aññamaññehi kāraṇehi gavesitabbaṃ. Yadi ca sandissati yuttisamārūḷhaṃ atthato ca aññattaṃ, byañjanatopi gavesitabbaṃ.
སལློཏི ཝཱ དྷཱུཔཱཡནནྟི ཝཱ ཨིམེསཾ དྷམྨཱནཾ ཨཏྠཏོ ཨེཀཏྟཾ། ན ཧི ཡུཛྫཏི ཨིཙྪཱཡ ཙ ཏཎྷཱཡ ཙ ཨཏྠཏོ ཨཉྙཏྟཾ། ཏཎྷཱཡ ཨདྷིཔྤཱཡེ ཨཔརིཔཱུརམཱནེ ནཝསུ ཨཱགྷཱཏཝཏྠཱུསུ ཀོདྷོ ཙ ཨུཔནཱཧོ ཙ ཨུཔྤཛྫཏི། ཨིམཱཡ ཡུཏྟིཡཱ ཛརཱཡ ཙ མརཎསྶ ཙ ཏཎྷཱཡ ཙ ཨཏྠཏོ ཨཉྙཏྟཾ།
Salloti vā dhūpāyananti vā imesaṃ dhammānaṃ atthato ekattaṃ. Na hi yujjati icchāya ca taṇhāya ca atthato aññattaṃ. Taṇhāya adhippāye aparipūramāne navasu āghātavatthūsu kodho ca upanāho ca uppajjati. Imāya yuttiyā jarāya ca maraṇassa ca taṇhāya ca atthato aññattaṃ.
ཡཾ པནིདཾ བྷགཝཏཱ དྭཱིཧི ནཱམེཧི ཨབྷིལཔིཏཾ ཨིཙྪཱཏིཔི ཏཎྷཱཏིཔི, ཨིདཾ བྷགཝཏཱ བཱཧིརཱནཾ ཝཏྠཱུནཾ ཨཱརམྨཎཝསེན དྭཱིཧི ནཱམེཧི ཨབྷིལཔིཏཾ ཨིཙྪཱཏིཔི ཏཎྷཱཏིཔི, སབྦཱ ཧི ཏཎྷཱ ཨཛ྄ཛྷོསཱནལཀྑཎེན ཨེཀལཀྑཎཱ། ཡཐཱ སབྦོ ཨགྒི ཨུཎྷཏྟལཀྑཎེན ཨེཀལཀྑཎོ, ཨཔི ཙ ཨུཔཱདཱནཝསེན ཨཉྙམཉྙཱནི ནཱམཱནི ལབྷཏི, ཀཊྛགྒཱིཏིཔི ཏིཎགྒཱིཏིཔི སཀལིཀགྒཱིཏིཔི གོམཡགྒཱིཏིཔི ཐུསགྒཱིཏིཔི སངྐཱརགྒཱིཏིཔི, སབྦོ ཧི ཨགྒི ཨུཎྷཏྟལཀྑཎོཝ། ཨེཝཾ སབྦཱ ཏཎྷཱ ཨཛ྄ཛྷོསཱནལཀྑཎེན ཨེཀལཀྑཎཱ , ཨཔི ཏུ ཨཱརམྨཎཨུཔཱདཱནཝསེན ཨཉྙམཉྙེཧི ནཱམེཧི ཨབྷིལཔིཏཱ ཨིཙྪཱཨིཏིཔི ཏཎྷཱཨིཏིཔི སལློཨིཏིཔི དྷཱུཔཱཡནཱཨིཏིཔི སརིཏཱཨིཏིཔི ཝིསཏྟིཀཱཨིཏིཔི སིནེཧོཨིཏིཔི ཀིལམཐོཨིཏིཔི ལཏཱཨིཏིཔི མཉྙནཱཨིཏིཔི བནྡྷོཨིཏིཔི ཨཱསཱཨིཏིཔི པིཔཱསཱཨིཏིཔི ཨབྷིནནྡནཱཨིཏིཔི, ཨིཏི སབྦཱ ཏཎྷཱ ཨཛ྄ཛྷོསཱནལཀྑཎེན ཨེཀལཀྑཎཱ། ཡཐཱ ཙ ཝེཝཙནེ ཝུཏྟཱ།
Yaṃ panidaṃ bhagavatā dvīhi nāmehi abhilapitaṃ icchātipi taṇhātipi, idaṃ bhagavatā bāhirānaṃ vatthūnaṃ ārammaṇavasena dvīhi nāmehi abhilapitaṃ icchātipi taṇhātipi, sabbā hi taṇhā ajjhosānalakkhaṇena ekalakkhaṇā. Yathā sabbo aggi uṇhattalakkhaṇena ekalakkhaṇo, api ca upādānavasena aññamaññāni nāmāni labhati, kaṭṭhaggītipi tiṇaggītipi sakalikaggītipi gomayaggītipi thusaggītipi saṅkāraggītipi, sabbo hi aggi uṇhattalakkhaṇova. Evaṃ sabbā taṇhā ajjhosānalakkhaṇena ekalakkhaṇā , api tu ārammaṇaupādānavasena aññamaññehi nāmehi abhilapitā icchāitipi taṇhāitipi salloitipi dhūpāyanāitipi saritāitipi visattikāitipi sinehoitipi kilamathoitipi latāitipi maññanāitipi bandhoitipi āsāitipi pipāsāitipi abhinandanāitipi, iti sabbā taṇhā ajjhosānalakkhaṇena ekalakkhaṇā. Yathā ca vevacane vuttā.
‘‘ཨཱསཱ ཙ པིཧཱ ཨབྷིནནྡནཱ ཙ, ཨནེཀདྷཱཏཱུསུ སརཱ པཏིཊྛིཏཱ།
‘‘Āsā ca pihā abhinandanā ca, anekadhātūsu sarā patiṭṭhitā;
ཨཉྙཱཎམཱུལཔྤབྷཝཱ པཛཔྤིཏཱ, སབྦཱ མཡཱ བྱནྟིཀཏཱ སམཱུལཀཱ’’ཏི 11༎
Aññāṇamūlappabhavā pajappitā, sabbā mayā byantikatā samūlakā’’ti 12.
ཏཎྷཱཡེཏཾ ཝེཝཙནཾ། ཡཐཱཧ བྷགཝཱ – རཱུཔེ ཏིསྶ ཨཝིགཏརཱགསྶ ཨཝིགཏཙྪནྡསྶ ཨཝིགཏཔེམསྶ ཨཝིགཏཔིཔཱསསྶ ཨཝིགཏཔརིལཱ༹ཧསྶ། ཨེཝཾ ཝེདནཱཡ སཉྙཱཡ སངྑཱརེསུ ཝིཉྙཱཎེ ཨཝིགཏརཱགསྶ ཨཝིགཏཙྪནྡསྶ ཨཝིགཏཔེམསྶ ཨཝིགཏཔིཔཱསསྶ ཨཝིགཏཔརིལཱ༹ཧསྶ སབྦཾ སུཏྟཾ ཝིཏྠཱརེཏབྦཾ། ཏཎྷཱཡེཏཾ ཝེཝཙནཾ། ཨེཝཾ ཡུཛྫཏི།
Taṇhāyetaṃ vevacanaṃ. Yathāha bhagavā – rūpe tissa avigatarāgassa avigatacchandassa avigatapemassa avigatapipāsassa avigatapariḷāhassa. Evaṃ vedanāya saññāya saṅkhāresu viññāṇe avigatarāgassa avigatacchandassa avigatapemassa avigatapipāsassa avigatapariḷāhassa sabbaṃ suttaṃ vitthāretabbaṃ. Taṇhāyetaṃ vevacanaṃ. Evaṃ yujjati.
༢༡. སབྦོ དུཀྑཱུཔཙཱརོ ཀཱམཏཎྷཱསངྑཱརམཱུལཀོ, ན པན ཡུཛྫཏི སབྦོ ནིབྦིདཱུཔཙཱརོ ཀཱམཏཎྷཱཔརིཀྑཱརམཱུལཀོ། ཨིམཱཡ ཡུཏྟིཡཱ ཨཉྙམཉྙེཧི ཀཱརཎེཧི གཝེསིཏབྦཾ།
21. Sabbo dukkhūpacāro kāmataṇhāsaṅkhāramūlako, na pana yujjati sabbo nibbidūpacāro kāmataṇhāparikkhāramūlako. Imāya yuttiyā aññamaññehi kāraṇehi gavesitabbaṃ.
ཡཐཱ ཧི 13 བྷགཝཱ རཱགཙརིཏསྶ པུགྒལསྶ ཨསུབྷཾ དེསཡཏི, དོསཙརིཏསྶ བྷགཝཱ པུགྒལསྶ མེཏྟཾ དེསཡཏི། མོཧཙརིཏསྶ བྷགཝཱ པུགྒལསྶ པཊིཙྩསམུཔྤཱདཾ དེསཡཏི། ཡདི ཧི བྷགཝཱ རཱགཙརིཏསྶ པུགྒལསྶ མེཏྟཾ ཙེཏོཝིམུཏྟིཾ དེསེཡྻ། སུཁཾ ཝཱ པཊིཔདཾ དནྡྷཱབྷིཉྙཾ སུཁཾ ཝཱ པཊིཔདཾ ཁིཔྤཱབྷིཉྙཾ ཝིཔསྶནཱཔུབྦངྒམཾ ཝཱ པཧཱནཾ དེསེཡྻ, ན ཡུཛྫཏི དེསནཱ། ཨེཝཾ ཡཾ ཀིཉྩི རཱགསྶ ཨནུལོམཔྤཧཱནཾ དོསསྶ ཨནུལོམཔྤཧཱནཾ མོཧསྶ ཨནུལོམཔྤཧཱནཾ། སབྦཾ ཏཾ ཝིཙཡེན ཧཱརེན ཝིཙིནིཏྭཱ ཡུཏྟིཧཱརེན ཡོཛེཏབྦཾ། ཡཱཝཏིཀཱ ཉཱཎསྶ བྷཱུམི།
Yathā hi 14 bhagavā rāgacaritassa puggalassa asubhaṃ desayati, dosacaritassa bhagavā puggalassa mettaṃ desayati. Mohacaritassa bhagavā puggalassa paṭiccasamuppādaṃ desayati. Yadi hi bhagavā rāgacaritassa puggalassa mettaṃ cetovimuttiṃ deseyya. Sukhaṃ vā paṭipadaṃ dandhābhiññaṃ sukhaṃ vā paṭipadaṃ khippābhiññaṃ vipassanāpubbaṅgamaṃ vā pahānaṃ deseyya, na yujjati desanā. Evaṃ yaṃ kiñci rāgassa anulomappahānaṃ dosassa anulomappahānaṃ mohassa anulomappahānaṃ. Sabbaṃ taṃ vicayena hārena vicinitvā yuttihārena yojetabbaṃ. Yāvatikā ñāṇassa bhūmi.
མེཏྟཱཝིཧཱརིསྶ སཏོ བྱཱཔཱདོ ཙིཏྟཾ པརིཡཱདཱཡ ཋསྶཏཱིཏི ན ཡུཛྫཏི དེསནཱ, བྱཱཔཱདོ པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ། ཀརུཎཱཝིཧཱརིསྶ སཏོ ཝིཧེསཱ ཙིཏྟཾ པརིཡཱདཱཡ ཋསྶཏཱིཏི ན ཡུཛྫཏི དེསནཱ, ཝིཧེསཱ པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ། མུདིཏཱ ཝིཧཱརིསྶ སཏོ ཨརཏི ཙིཏྟཾ པརིཡཱདཱཡ ཋསྶཏཱིཏི ན ཡུཛྫཏི དེསནཱ, ཨརཏི པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ། ཨུཔེཀྑཱཝིཧཱརིསྶ སཏོ རཱགོ ཙིཏྟཾ པརིཡཱདཱཡ ཋསྶཏཱིཏི ན ཡུཛྫཏི དེསནཱ, རཱགོ པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ། ཨནིམིཏྟཝིཧཱརིསྶ སཏོ ནིམིཏྟཱནུསཱརཱི ཏེན ཏེནེཝ ཝིཉྙཱཎཾ པཝཏྟཏཱིཏི ན ཡུཛྫཏི དེསནཱ , ནིམིཏྟཾ པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ། ཨསྨཱིཏི ཝིགཏཾ ཨཡམཧམསྨཱིཏི ན སམནུཔསྶཱམི། ཨཐ ཙ པན མེ ཀིསྨཱིཏི ཀཐསྨཱིཏི ཝིཙིཀིཙྪཱ ཀཐཾཀཐཱསལླཾ ཙིཏྟཾ པརིཡཱདཱཡ ཋསྶཏཱིཏི ན ཡུཛྫཏི དེསནཱ, ཝིཙིཀིཙྪཱ ཀཐཾཀཐཱསལླཾ པཧཱནཾ ཨབྦྷཏྠཾ གཙྪཏཱིཏི ཡུཛྫཏི དེསནཱ།
Mettāvihārissa sato byāpādo cittaṃ pariyādāya ṭhassatīti na yujjati desanā, byāpādo pahānaṃ abbhatthaṃ gacchatīti yujjati desanā. Karuṇāvihārissa sato vihesā cittaṃ pariyādāya ṭhassatīti na yujjati desanā, vihesā pahānaṃ abbhatthaṃ gacchatīti yujjati desanā. Muditā vihārissa sato arati cittaṃ pariyādāya ṭhassatīti na yujjati desanā, arati pahānaṃ abbhatthaṃ gacchatīti yujjati desanā. Upekkhāvihārissa sato rāgo cittaṃ pariyādāya ṭhassatīti na yujjati desanā, rāgo pahānaṃ abbhatthaṃ gacchatīti yujjati desanā. Animittavihārissa sato nimittānusārī tena teneva viññāṇaṃ pavattatīti na yujjati desanā , nimittaṃ pahānaṃ abbhatthaṃ gacchatīti yujjati desanā. Asmīti vigataṃ ayamahamasmīti na samanupassāmi. Atha ca pana me kismīti kathasmīti vicikicchā kathaṃkathāsallaṃ cittaṃ pariyādāya ṭhassatīti na yujjati desanā, vicikicchā kathaṃkathāsallaṃ pahānaṃ abbhatthaṃ gacchatīti yujjati desanā.
ཡཐཱ ཝཱ པན པཋམཾ ཛྷཱནཾ སམཱཔནྣསྶ སཏོ ཀཱམརཱགབྱཱཔཱདཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། ཝིཏཀྐསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། དུཏིཡཾ ཛྷཱནཾ སམཱཔནྣསྶ སཏོ ཝིཏཀྐཝིཙཱརསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། ཨུཔེཀྑཱསུཁསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། ཏཏིཡཾ ཛྷཱནཾ སམཱཔནྣསྶ སཏོ པཱིཏིསུཁསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ, ཨུཔེཀྑཱསཏིཔཱརིསུདྡྷིསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། ཙཏུཏྠཾ ཛྷཱནཾ སམཱཔནྣསྶ སཏོ ཨུཔེཀྑཱསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ ། ཨཱཀཱསཱནཉྩཱཡཏནསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ།
Yathā vā pana paṭhamaṃ jhānaṃ samāpannassa sato kāmarāgabyāpādā visesāya saṃvattantīti na yujjati desanā, hānāya saṃvattantīti yujjati desanā. Vitakkasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Dutiyaṃ jhānaṃ samāpannassa sato vitakkavicārasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Upekkhāsukhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Tatiyaṃ jhānaṃ samāpannassa sato pītisukhasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā, upekkhāsatipārisuddhisahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Catutthaṃ jhānaṃ samāpannassa sato upekkhāsahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā . Ākāsānañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
ཨཱཀཱསཱནཉྩཱཡཏནཾ སམཱཔནྣསྶ སཏོ རཱུཔསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། ཝིཉྙཱཎཉྩཱཡཏནསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། ཝིཉྙཱཎཉྩཱཡཏནཾ སམཱཔནྣསྶ སཏོ ཨཱཀཱསཱནཉྩཱཡཏནསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། ཨཱཀིཉྩཉྙཱཡཏནསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ།
Ākāsānañcāyatanaṃ samāpannassa sato rūpasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Viññāṇañcāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Viññāṇañcāyatanaṃ samāpannassa sato ākāsānañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Ākiñcaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā.
ཨཱཀིཉྩཉྙཱཡཏནཾ སམཱཔནྣསྶ སཏོ ཝིཉྙཱཎཉྩཱཡཏནསཧགཏཱ སཉྙཱམནསིཀཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། ནེཝསཉྙཱནཱསཉྙཱཡཏནསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། ནེཝསཉྙཱནཱསཉྙཱཡཏནཾ སམཱཔནྣསྶ སཏོ སཉྙཱུཔཙཱརཱ ཝིསེསཱཡ སཾཝཏྟནྟཱིཏི ན ཡུཛྫཏི དེསནཱ, ཧཱནཱཡ སཾཝཏྟནྟཱིཏི ཡུཛྫཏི དེསནཱ། སཉྙཱཝེདཡིཏནིརོདྷསཧགཏཱ ཝཱ སཉྙཱམནསིཀཱརཱ ཧཱནཱཡ སཾཝཏྟནྟཱིཏི ན ཡུཛྫཏི དེསནཱ, ཝིསེསཱཡ སཾཝཏྟནྟཱིཏི ཡུཛྫཏི དེསནཱ། ཀལླཏཱཔརིཙིཏཾ ཙིཏྟཾ ན ཙ ཨབྷིནཱིཧཱརཾ ཁམཏཱིཏི ན ཡུཛྫཏི དེསནཱ, ཀལླཏཱཔརིཙིཏཾ ཙིཏྟཾ ཨཐ ཙ ཨབྷིནཱིཧཱརཾ ཁམཏཱིཏི ཡུཛྫཏི དེསནཱ།
Ākiñcaññāyatanaṃ samāpannassa sato viññāṇañcāyatanasahagatā saññāmanasikārā visesāya saṃvattantīti na yujjati desanā, hānāya saṃvattantīti yujjati desanā. Nevasaññānāsaññāyatanasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Nevasaññānāsaññāyatanaṃ samāpannassa sato saññūpacārā visesāya saṃvattantīti na yujjati desanā, hānāya saṃvattantīti yujjati desanā. Saññāvedayitanirodhasahagatā vā saññāmanasikārā hānāya saṃvattantīti na yujjati desanā, visesāya saṃvattantīti yujjati desanā. Kallatāparicitaṃ cittaṃ na ca abhinīhāraṃ khamatīti na yujjati desanā, kallatāparicitaṃ cittaṃ atha ca abhinīhāraṃ khamatīti yujjati desanā.
ཨེཝཾ སབྦེ ནཝསུཏྟནྟཱ ཡཐཱདྷམྨཾ ཡཐཱཝིནཡཾ ཡཐཱསཏྠུསཱསནཾ སབྦཏོ ཝིཙཡེན ཧཱརེན ཝིཙིནིཏྭཱ ཡུཏྟིཧཱརེན ཡོཛེཏབྦཱཏི། ཏེནཱཧ ཨཱཡསྨཱ མཧཱཀཙྩཱཡནོ ‘‘སབྦེསཾ ཧཱརཱནཾ ཡཱ བྷཱུམི ཡོ ཙ གོཙརོ ཏེས’’ནྟི།
Evaṃ sabbe navasuttantā yathādhammaṃ yathāvinayaṃ yathāsatthusāsanaṃ sabbato vicayena hārena vicinitvā yuttihārena yojetabbāti. Tenāha āyasmā mahākaccāyano ‘‘sabbesaṃ hārānaṃ yā bhūmi yo ca gocaro tesa’’nti.
ནིཡུཏྟོ ཡུཏྟི ཧཱརོ།
Niyutto yutti hāro.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༣. ཡུཏྟིཧཱརཝིབྷངྒཝཎྞནཱ • 3. Yuttihāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༣. ཡུཏྟིཧཱརཝིབྷངྒཝཎྞནཱ • 3. Yuttihāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༣. ཡུཏྟིཧཱརཝིབྷངྒཝིབྷཱཝནཱ • 3. Yuttihāravibhaṅgavibhāvanā
