| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. து³தியபண்ணாஸகங்
2. Dutiyapaṇṇāsakaṃ
(6) 1. புக்³க³லவக்³கோ³
(6) 1. Puggalavaggo
53. ‘‘த்³வேமே , பி⁴க்க²வே, புக்³க³லா லோகே உப்பஜ்ஜமானா உப்பஜ்ஜந்தி ப³ஹுஜனஹிதாய ப³ஹுஜனஸுகா²ய, ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங். கதமே த்³வே? ததா²க³தோ ச அரஹங் ஸம்மாஸம்பு³த்³தோ⁴, ராஜா ச சக்கவத்தீ. இமே கோ², பி⁴க்க²வே, த்³வே புக்³க³லா லோகே உப்பஜ்ஜமானா உப்பஜ்ஜந்தி ப³ஹுஜனஹிதாய ப³ஹுஜனஸுகா²ய, ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸான’’ந்தி.
53. ‘‘Dveme , bhikkhave, puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
54. ‘‘த்³வேமே, பி⁴க்க²வே, புக்³க³லா லோகே உப்பஜ்ஜமானா உப்பஜ்ஜந்தி அச்ச²ரியமனுஸ்ஸா. கதமே த்³வே? ததா²க³தோ ச அரஹங் ஸம்மாஸம்பு³த்³தோ⁴, ராஜா ச சக்கவத்தீ. இமே கோ², பி⁴க்க²வே, த்³வே புக்³க³லா லோகே உப்பஜ்ஜமானா உப்பஜ்ஜந்தி அச்ச²ரியமனுஸ்ஸா’’தி.
54. ‘‘Dveme, bhikkhave, puggalā loke uppajjamānā uppajjanti acchariyamanussā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti acchariyamanussā’’ti.
55. ‘‘த்³வின்னங், பி⁴க்க²வே, புக்³க³லானங் காலகிரியா ப³ஹுனோ ஜனஸ்ஸ அனுதப்பா ஹோதி. கதமேஸங் த்³வின்னங்? ததா²க³தஸ்ஸ ச அரஹதோ ஸம்மாஸம்பு³த்³த⁴ஸ்ஸ, ரஞ்ஞோ ச சக்கவத்திஸ்ஸ. இமேஸங் கோ², பி⁴க்க²வே, த்³வின்னங் புக்³க³லானங் காலகிரியா ப³ஹுனோ ஜனஸ்ஸ அனுதப்பா ஹோதீ’’தி.
55. ‘‘Dvinnaṃ, bhikkhave, puggalānaṃ kālakiriyā bahuno janassa anutappā hoti. Katamesaṃ dvinnaṃ? Tathāgatassa ca arahato sammāsambuddhassa, rañño ca cakkavattissa. Imesaṃ kho, bhikkhave, dvinnaṃ puggalānaṃ kālakiriyā bahuno janassa anutappā hotī’’ti.
56. ‘‘த்³வேமே, பி⁴க்க²வே, தூ²பாரஹா. கதமே த்³வே? ததா²க³தோ ச அரஹங் ஸம்மாஸம்பு³த்³தோ⁴, ராஜா ச சக்கவத்தீ. இமே கோ², பி⁴க்க²வே, த்³வே தூ²பாரஹா’’தி.
56. ‘‘Dveme, bhikkhave, thūpārahā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve thūpārahā’’ti.
57. ‘‘த்³வேமே, பி⁴க்க²வே, பு³த்³தா⁴. கதமே த்³வே? ததா²க³தோ ச அரஹங் ஸம்மாஸம்பு³த்³தோ⁴, பச்சேகபு³த்³தோ⁴ ச. இமே கோ², பி⁴க்க²வே, த்³வே பு³த்³தா⁴’’தி.
57. ‘‘Dveme, bhikkhave, buddhā. Katame dve? Tathāgato ca arahaṃ sammāsambuddho, paccekabuddho ca. Ime kho, bhikkhave, dve buddhā’’ti.
58. ‘‘த்³வேமே , பி⁴க்க²வே, அஸனியா ப²லந்தியா ந ஸந்தஸந்தி. கதமே த்³வே? பி⁴க்கு² ச கீ²ணாஸவோ, ஹத்தா²ஜானீயோ ச. இமே கோ², பி⁴க்க²வே, த்³வே அஸனியா ப²லந்தியா ந ஸந்தஸந்தீ’’தி.
58. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, hatthājānīyo ca. Ime kho, bhikkhave, dve asaniyā phalantiyā na santasantī’’ti.
59. ‘‘த்³வேமே, பி⁴க்க²வே, அஸனியா ப²லந்தியா ந ஸந்தஸந்தி. கதமே த்³வே? பி⁴க்கு² ச கீ²ணாஸவோ, அஸ்ஸாஜானீயோ ச. இமே கோ², பி⁴க்க²வே, த்³வே அஸனியா ப²லந்தியா ந ஸந்தஸந்தீ’’தி.
59. ‘‘Dveme, bhikkhave, asaniyā phalantiyā na santasanti. Katame dve? Bhikkhu ca khīṇāsavo, assājānīyo ca. Ime kho, bhikkhave, dve asaniyā phalantiyā na santasantī’’ti.
60. ‘‘த்³வேமே , பி⁴க்க²வே, அஸனியா ப²லந்தியா ந ஸந்தஸந்தி. கதமே த்³வே? பி⁴க்கு² ச கீ²ணாஸவோ, ஸீஹோ ச மிக³ராஜா. இமே கோ², பி⁴க்க²வே, த்³வே அஸனியா ப²லந்தியா ந ஸந்தஸந்தீ’’தி.
60. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, sīho ca migarājā. Ime kho, bhikkhave, dve asaniyā phalantiyā na santasantī’’ti.
61. ‘‘த்³வேமே, பி⁴க்க²வே, அத்த²வஸே ஸம்பஸ்ஸமானா கிங்புரிஸா மானுஸிங் வாசங் ந பா⁴ஸந்தி. கதமே த்³வே? மா ச முஸா ப⁴ணிம்ஹா, மா ச பரங் அபூ⁴தேன அப்³பா⁴சிக்கி²ம்ஹாதி. இமே கோ², பி⁴க்க²வே, த்³வே அத்த²வஸே ஸம்பஸ்ஸமானா கிங்புரிஸா மானுஸிங் வாசங் ந பா⁴ஸந்தீ’’தி.
61. ‘‘Dveme, bhikkhave, atthavase sampassamānā kiṃpurisā mānusiṃ vācaṃ na bhāsanti. Katame dve? Mā ca musā bhaṇimhā, mā ca paraṃ abhūtena abbhācikkhimhāti. Ime kho, bhikkhave, dve atthavase sampassamānā kiṃpurisā mānusiṃ vācaṃ na bhāsantī’’ti.
62. ‘‘த்³வின்னங் த⁴ம்மானங், பி⁴க்க²வே, அதித்தோ அப்படிவானோ மாதுகா³மோ காலங் கரோதி. கதமேஸங் த்³வின்னங்? மேது²னஸமாபத்தியா ச விஜாயனஸ்ஸ ச. இமேஸங் கோ², பி⁴க்க²வே, த்³வின்னங் த⁴ம்மானங் அதித்தோ அப்படிவானோ மாதுகா³மோ காலங் கரோதீ’’தி.
62. ‘‘Dvinnaṃ dhammānaṃ, bhikkhave, atitto appaṭivāno mātugāmo kālaṃ karoti. Katamesaṃ dvinnaṃ? Methunasamāpattiyā ca vijāyanassa ca. Imesaṃ kho, bhikkhave, dvinnaṃ dhammānaṃ atitto appaṭivāno mātugāmo kālaṃ karotī’’ti.
63. ‘‘அஸந்தஸன்னிவாஸஞ்ச வோ, பி⁴க்க²வே, தே³ஸெஸ்ஸாமி ஸந்தஸன்னிவாஸஞ்ச. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
63. ‘‘Asantasannivāsañca vo, bhikkhave, desessāmi santasannivāsañca. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘கத²ஞ்ச, பி⁴க்க²வே, அஸந்தஸன்னிவாஸோ ஹோதி, கத²ஞ்ச அஸந்தோ ஸன்னிவஸந்தி? இத⁴, பி⁴க்க²வே, தே²ரஸ்ஸ பி⁴க்கு²னோ ஏவங் ஹோதி – ‘தே²ரோபி மங் ந வதெ³ய்ய, மஜ்ஜி²மோபி மங் ந வதெ³ய்ய, நவோபி மங் ந வதெ³ய்ய; தே²ரம்பாஹங் ந வதெ³ய்யங், மஜ்ஜி²மம்பாஹங் ந வதெ³ய்யங், நவம்பாஹங் ந வதெ³ய்யங். தே²ரோ சேபி மங் வதெ³ய்ய அஹிதானுகம்பீ மங் வதெ³ய்ய நோ ஹிதானுகம்பீ, நோதி நங் வதெ³ய்யங் விஹேடெ²ய்யங் 1 பஸ்ஸம்பிஸ்ஸ நப்படிகரெய்யங். மஜ்ஜி²மோ சேபி மங் வதெ³ய்ய…பே॰… நவோ சேபி மங் வதெ³ய்ய அஹிதானுகம்பீ மங் வதெ³ய்ய நோ ஹிதானுகம்பீ, நோதி நங் வதெ³ய்யங் விஹேடெ²ய்யங் பஸ்ஸம்பிஸ்ஸ நப்படிகரெய்யங்’ . மஜ்ஜி²மஸ்ஸபி பி⁴க்கு²னோ ஏவங் ஹோதி…பே॰… நவஸ்ஸபி பி⁴க்கு²னோ ஏவங் ஹோதி – ‘தே²ரோபி மங் ந வதெ³ய்ய, மஜ்ஜி²மோபி மங் ந வதெ³ய்ய, நவோபி மங் ந வதெ³ய்ய; தே²ரம்பாஹங் ந வதெ³ய்யங், மஜ்ஜி²மம்பாஹங் ந வதெ³ய்யங், நவம்பாஹங் ந வதெ³ய்யங். தே²ரோ சேபி மங் வதெ³ய்ய அஹிதானுகம்பீ மங் வதெ³ய்ய நோ ஹிதானுகம்பீ நோதி நங் வதெ³ய்யங் விஹேடெ²ய்யங் பஸ்ஸம்பிஸ்ஸ நப்படிகரெய்யங். மஜ்ஜி²மோ சேபி மங் வதெ³ய்ய…பே॰… நவோ சேபி மங் வதெ³ய்ய அஹிதானுகம்பீ மங் வதெ³ய்ய நோ ஹிதானுகம்பீ, நோதி நங் வதெ³ய்யங் விஹேடெ²ய்யங் பஸ்ஸம்பிஸ்ஸ நப்படிகரெய்யங்’. ஏவங் கோ², பி⁴க்க²வே, அஸந்தஸன்னிவாஸோ ஹோதி, ஏவஞ்ச அஸந்தோ ஸன்னிவஸந்தி.
‘‘Kathañca, bhikkhave, asantasannivāso hoti, kathañca asanto sannivasanti? Idha, bhikkhave, therassa bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ 2 passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’ . Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheṭheyyaṃ passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’. Evaṃ kho, bhikkhave, asantasannivāso hoti, evañca asanto sannivasanti.
‘‘கத²ஞ்ச, பி⁴க்க²வே, ஸந்தஸன்னிவாஸோ ஹோதி, கத²ஞ்ச ஸந்தோ ஸன்னிவஸந்தி? இத⁴, பி⁴க்க²வே, தே²ரஸ்ஸ பி⁴க்கு²னோ ஏவங் ஹோதி – ‘தே²ரோபி மங் வதெ³ய்ய, மஜ்ஜி²மோபி மங் வதெ³ய்ய, நவோபி மங் வதெ³ய்ய; தே²ரம்பாஹங் வதெ³ய்யங், மஜ்ஜி²மம்பாஹங் வதெ³ய்யங், நவம்பாஹங் வதெ³ய்யங். தே²ரோ சேபி மங் வதெ³ய்ய ஹிதானுகம்பீ மங் வதெ³ய்ய நோ அஹிதானுகம்பீ, ஸாதூ⁴தி நங் வதெ³ய்யங் ந விஹேடெ²ய்யங் பஸ்ஸம்பிஸ்ஸ படிகரெய்யங். மஜ்ஜி²மோ சேபி மங் வதெ³ய்ய…பே॰… நவோ சேபி மங் வதெ³ய்ய ஹிதானுகம்பீ மங் வதெ³ய்ய நோ அஹிதானுகம்பீ, ஸாதூ⁴தி நங் வதெ³ய்யங் ந நங் விஹேடெ²ய்யங் பஸ்ஸம்பிஸ்ஸ படிகரெய்யங்’. மஜ்ஜி²மஸ்ஸபி பி⁴க்கு²னோ ஏவங் ஹோதி…பே॰… நவஸ்ஸபி பி⁴க்கு²னோ ஏவங் ஹோதி – ‘தே²ரோபி மங் வதெ³ய்ய, மஜ்ஜி²மோபி மங் வதெ³ய்ய, நவோபி மங் வதெ³ய்ய; தே²ரம்பாஹங் வதெ³ய்யங், மஜ்ஜி²மம்பாஹங் வதெ³ய்யங், நவம்பாஹங் வதெ³ய்யங். தே²ரோ சேபி மங் வதெ³ய்ய ஹிதானுகம்பீ மங் வதெ³ய்ய நோ அஹிதானுகம்பீ, ஸாதூ⁴தி நங் வதெ³ய்யங் ந நங் விஹேடெ²ய்யங் பஸ்ஸம்பிஸ்ஸ படிகரெய்யங். மஜ்ஜி²மோ சேபி மங் வதெ³ய்ய…பே॰… நவோ சேபி மங் வதெ³ய்ய ஹிதானுகம்பீ மங் வதெ³ய்ய நோ அஹிதானுகம்பீ, ஸாதூ⁴தி நங் வதெ³ய்யங் ந நங் விஹேடெ²ய்யங் பஸ்ஸம்பிஸ்ஸ படிகரெய்யங்’. ஏவங் கோ², பி⁴க்க²வே, ஸந்தஸன்னிவாஸோ ஹோதி, ஏவஞ்ச ஸந்தோ ஸன்னிவஸந்தீ’’தி.
‘‘Kathañca, bhikkhave, santasannivāso hoti, kathañca santo sannivasanti? Idha, bhikkhave, therassa bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Evaṃ kho, bhikkhave, santasannivāso hoti, evañca santo sannivasantī’’ti.
64. ‘‘யஸ்மிங், பி⁴க்க²வே, அதி⁴கரணே உப⁴தோ வசீஸங்ஸாரோ தி³ட்டி²பளாஸோ சேதஸோ ஆகா⁴தோ அப்பச்சயோ அனபி⁴ரத்³தி⁴ அஜ்ஜ²த்தங் அவூபஸந்தங் ஹோதி, தஸ்மேதங், பி⁴க்க²வே, அதி⁴கரணே பாடிகங்க²ங் – ‘தீ³க⁴த்தாய க²ரத்தாய வாளத்தாய ஸங்வத்திஸ்ஸதி, பி⁴க்கூ² ச ந பா²ஸுங் 3 விஹரிஸ்ஸந்தி’. யஸ்மிஞ்ச கோ², பி⁴க்க²வே, அதி⁴கரணே உப⁴தோ வசீஸங்ஸாரோ தி³ட்டி²பளாஸோ சேதஸோ ஆகா⁴தோ அப்பச்சயோ அனபி⁴ரத்³தி⁴ அஜ்ஜ²த்தங் ஸுவூபஸந்தங் ஹோதி, தஸ்மேதங், பி⁴க்க²வே, அதி⁴கரணே பாடிகங்க²ங் – ‘ந தீ³க⁴த்தாய க²ரத்தாய வாளத்தாய ஸங்வத்திஸ்ஸதி, பி⁴க்கூ² ச பா²ஸுங் விஹரிஸ்ஸந்தீ’’’தி.
64. ‘‘Yasmiṃ, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ avūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘dīghattāya kharattāya vāḷattāya saṃvattissati, bhikkhū ca na phāsuṃ 4 viharissanti’. Yasmiñca kho, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ suvūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘na dīghattāya kharattāya vāḷattāya saṃvattissati, bhikkhū ca phāsuṃ viharissantī’’’ti.
புக்³க³லவக்³கோ³ பட²மோ.
Puggalavaggo paṭhamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (6) 1. புக்³க³லவக்³க³வண்ணனா • (6) 1. Puggalavaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / (6) 1. புக்³க³லவக்³க³வண்ணனா • (6) 1. Puggalavaggavaṇṇanā
