| Library / Tipiṭaka / તિપિટક • Tipiṭaka / સમ્મોહવિનોદની-અટ્ઠકથા • Sammohavinodanī-aṭṭhakathā |
૨. અભિધમ્મભાજનીયવણ્ણના
2. Abhidhammabhājanīyavaṇṇanā
૪૭૨. અભિધમ્મભાજનીયે સત્તપિ બોજ્ઝઙ્ગે એકતો પુચ્છિત્વા વિસ્સજ્જનસ્સ ચ પાટિયેક્કં પુચ્છિત્વા વિસ્સજ્જનસ્સ ચ વસેન દ્વે નયા. તેસં અત્થવણ્ણના હેટ્ઠા વુત્તનયેનેવ વેદિતબ્બા.
472. Abhidhammabhājanīye sattapi bojjhaṅge ekato pucchitvā vissajjanassa ca pāṭiyekkaṃ pucchitvā vissajjanassa ca vasena dve nayā. Tesaṃ atthavaṇṇanā heṭṭhā vuttanayeneva veditabbā.
ઉપેક્ખાસમ્બોજ્ઝઙ્ગનિદ્દેસે પન ઉપેક્ખનવસેન ઉપેક્ખા. ઉપેક્ખનાકારો ઉપેક્ખના. ઉપેક્ખિતબ્બયુત્તે સમપ્પવત્તે ધમ્મે ઇક્ખતિ, ન ચોદેતીતિ ઉપેક્ખા. પુગ્ગલં ઉપેક્ખાપેતીતિ ઉપેક્ખના . બોજ્ઝઙ્ગભાવપ્પત્તિયા લોકિયઉપેક્ખનાય અધિકા ઉપેક્ખના અજ્ઝુપેક્ખના. અબ્યાપારાપજ્જનેન મજ્ઝત્તભાવો મજ્ઝત્તતા. સા પન ચિત્તસ્સ, ન સત્તસ્સાતિ દીપેતું મજ્ઝત્તતા ચિત્તસ્સાતિ વુત્તન્તિ. અયમેત્થ અનુપુબ્બપદવણ્ણના.
Upekkhāsambojjhaṅganiddese pana upekkhanavasena upekkhā. Upekkhanākāro upekkhanā. Upekkhitabbayutte samappavatte dhamme ikkhati, na codetīti upekkhā. Puggalaṃ upekkhāpetīti upekkhanā . Bojjhaṅgabhāvappattiyā lokiyaupekkhanāya adhikā upekkhanā ajjhupekkhanā. Abyāpārāpajjanena majjhattabhāvo majjhattatā. Sā pana cittassa, na sattassāti dīpetuṃ majjhattatā cittassāti vuttanti. Ayamettha anupubbapadavaṇṇanā.
નયા પનેત્થ ગણેતબ્બા – સત્તન્નમ્પિ હિ બોજ્ઝઙ્ગાનં એકતો પુચ્છિત્વા વિસ્સજ્જને એકેકમગ્ગે નયસહસ્સં નયસહસ્સન્તિ ચત્તારિ નયસહસ્સાનિ વિભત્તાનિ. પાટિયેક્કં પુચ્છિત્વા વિસ્સજ્જને એકેકબોજ્ઝઙ્ગવસેન ચત્તારિ ચત્તારીતિ સત્ત ચતુક્કા અટ્ઠવીસતિ. તાનિ પુરિમેહિ ચતૂહિ સદ્ધિં દ્વત્તિંસાતિ સબ્બાનિપિ અભિધમ્મભાજનીયે દ્વત્તિંસ નયસહસ્સાનિ વિભત્તાનિ કુસલાનેવ. યસ્મા પન ફલક્ખણેપિ બોજ્ઝઙ્ગા લબ્ભન્તિ, કુસલહેતુકાનિ ચ સામઞ્ઞફલાનિ, તસ્મા તેસુપિ બોજ્ઝઙ્ગદસ્સનત્થં કુસલનિદ્દેસપુબ્બઙ્ગમાય એવ તન્તિયા વિપાકનયો આરદ્ધો. સોપિ એકતો પુચ્છિત્વા વિસ્સજ્જનસ્સ ચ, પાટિયેક્કં પુચ્છિત્વા વિસ્સજ્જનસ્સ ચ વસેન દુવિધો હોતિ. સેસમેત્થ હેટ્ઠા વુત્તનયેનેવ વેદિતબ્બં. વિપાકે પન કુસલતો તિગુણા નયા કાતબ્બાતિ.
Nayā panettha gaṇetabbā – sattannampi hi bojjhaṅgānaṃ ekato pucchitvā vissajjane ekekamagge nayasahassaṃ nayasahassanti cattāri nayasahassāni vibhattāni. Pāṭiyekkaṃ pucchitvā vissajjane ekekabojjhaṅgavasena cattāri cattārīti satta catukkā aṭṭhavīsati. Tāni purimehi catūhi saddhiṃ dvattiṃsāti sabbānipi abhidhammabhājanīye dvattiṃsa nayasahassāni vibhattāni kusalāneva. Yasmā pana phalakkhaṇepi bojjhaṅgā labbhanti, kusalahetukāni ca sāmaññaphalāni, tasmā tesupi bojjhaṅgadassanatthaṃ kusalaniddesapubbaṅgamāya eva tantiyā vipākanayo āraddho. Sopi ekato pucchitvā vissajjanassa ca, pāṭiyekkaṃ pucchitvā vissajjanassa ca vasena duvidho hoti. Sesamettha heṭṭhā vuttanayeneva veditabbaṃ. Vipāke pana kusalato tiguṇā nayā kātabbāti.
અભિધમ્મભાજનીયવણ્ણના.
Abhidhammabhājanīyavaṇṇanā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / વિભઙ્ગપાળિ • Vibhaṅgapāḷi / ૧૦. બોજ્ઝઙ્ગવિભઙ્ગો • 10. Bojjhaṅgavibhaṅgo
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / વિભઙ્ગ-મૂલટીકા • Vibhaṅga-mūlaṭīkā / ૧૦. બોજ્ઝઙ્ગવિભઙ્ગો • 10. Bojjhaṅgavibhaṅgo
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / વિભઙ્ગ-અનુટીકા • Vibhaṅga-anuṭīkā / ૧૦. બોજ્ઝઙ્ગવિભઙ્ગો • 10. Bojjhaṅgavibhaṅgo
