| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. அபி⁴ஸந்த³ஸுத்தங்
9. Abhisandasuttaṃ
39. ‘‘அட்டி²மே , பி⁴க்க²வே, புஞ்ஞாபி⁴ஸந்தா³ குஸலாபி⁴ஸந்தா³ ஸுக²ஸ்ஸாஹாரா ஸோவக்³கி³கா ஸுக²விபாகா ஸக்³க³ஸங்வத்தனிகா, இட்டா²ய கந்தாய மனாபாய ஹிதாய ஸுகா²ய ஸங்வத்தந்தி. கதமே அட்ட²? இத⁴, பி⁴க்க²வே, அரியஸாவகோ பு³த்³த⁴ங் ஸரணங் க³தோ ஹோதி. அயங், பி⁴க்க²வே, பட²மோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ ஸோவக்³கி³கோ ஸுக²விபாகோ ஸக்³க³ஸங்வத்தனிகோ, இட்டா²ய கந்தாய மனாபாய ஹிதாய ஸுகா²ய ஸங்வத்ததி.
39. ‘‘Aṭṭhime , bhikkhave, puññābhisandā kusalābhisandā sukhassāhārā sovaggikā sukhavipākā saggasaṃvattanikā, iṭṭhāya kantāya manāpāya hitāya sukhāya saṃvattanti. Katame aṭṭha? Idha, bhikkhave, ariyasāvako buddhaṃ saraṇaṃ gato hoti. Ayaṃ, bhikkhave, paṭhamo puññābhisando kusalābhisando sukhassāhāro sovaggiko sukhavipāko saggasaṃvattaniko, iṭṭhāya kantāya manāpāya hitāya sukhāya saṃvattati.
‘‘புன சபரங், பி⁴க்க²வே, அரியஸாவகோ த⁴ம்மங் ஸரணங் க³தோ ஹோதி. அயங், பி⁴க்க²வே, து³தியோ புஞ்ஞாபி⁴ஸந்தோ³…பே॰… ஸங்வத்ததி.
‘‘Puna caparaṃ, bhikkhave, ariyasāvako dhammaṃ saraṇaṃ gato hoti. Ayaṃ, bhikkhave, dutiyo puññābhisando…pe… saṃvattati.
‘‘புன சபரங், பி⁴க்க²வே, அரியஸாவகோ ஸங்க⁴ங் ஸரணங் க³தோ ஹோதி. அயங், பி⁴க்க²வே, ததியோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ ஸோவக்³கி³கோ ஸுக²விபாகோ ஸக்³க³ஸங்வத்தனிகோ, இட்டா²ய கந்தாய மனாபாய ஹிதாய ஸுகா²ய ஸங்வத்ததி.
‘‘Puna caparaṃ, bhikkhave, ariyasāvako saṅghaṃ saraṇaṃ gato hoti. Ayaṃ, bhikkhave, tatiyo puññābhisando kusalābhisando sukhassāhāro sovaggiko sukhavipāko saggasaṃvattaniko, iṭṭhāya kantāya manāpāya hitāya sukhāya saṃvattati.
1 ‘‘பஞ்சிமானி , பி⁴க்க²வே, தா³னானி மஹாதா³னானி அக்³க³ஞ்ஞானி ரத்தஞ்ஞானி வங்ஸஞ்ஞானி போராணானி அஸங்கிண்ணானி அஸங்கிண்ணபுப்³பா³னி, ந ஸங்கியந்தி ந ஸங்கியிஸ்ஸந்தி, அப்படிகுட்டா²னி 2 ஸமணேஹி ப்³ராஹ்மணேஹி விஞ்ஞூஹி. கதமானி பஞ்ச? இத⁴, பி⁴க்க²வே, அரியஸாவகோ பாணாதிபாதங் பஹாய பாணாதிபாதா படிவிரதோ ஹோதி. பாணாதிபாதா படிவிரதோ, பி⁴க்க²வே, அரியஸாவகோ அபரிமாணானங் ஸத்தானங் அப⁴யங் தே³தி, அவேரங் தே³தி, அப்³யாப³ஜ்ஜ²ங் 3 தே³தி. அபரிமாணானங் ஸத்தானங் அப⁴யங் த³த்வா அவேரங் த³த்வா அப்³யாப³ஜ்ஜ²ங் த³த்வா அபரிமாணஸ்ஸ அப⁴யஸ்ஸ அவேரஸ்ஸ அப்³யாப³ஜ்ஜ²ஸ்ஸ பா⁴கீ³ ஹோதி. இத³ங், பி⁴க்க²வே, பட²மங் தா³னங் மஹாதா³னங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கியதி ந ஸங்கியிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. அயங், பி⁴க்க²வே, சதுத்தோ² புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ ஸோவக்³கி³கோ ஸுக²விபாகோ ஸக்³க³ஸங்வத்தனிகோ, இட்டா²ய கந்தாய மனாபாய ஹிதாய ஸுகா²ய ஸங்வத்ததி.
4 ‘‘Pañcimāni , bhikkhave, dānāni mahādānāni aggaññāni rattaññāni vaṃsaññāni porāṇāni asaṃkiṇṇāni asaṃkiṇṇapubbāni, na saṃkiyanti na saṃkiyissanti, appaṭikuṭṭhāni 5 samaṇehi brāhmaṇehi viññūhi. Katamāni pañca? Idha, bhikkhave, ariyasāvako pāṇātipātaṃ pahāya pāṇātipātā paṭivirato hoti. Pāṇātipātā paṭivirato, bhikkhave, ariyasāvako aparimāṇānaṃ sattānaṃ abhayaṃ deti, averaṃ deti, abyābajjhaṃ 6 deti. Aparimāṇānaṃ sattānaṃ abhayaṃ datvā averaṃ datvā abyābajjhaṃ datvā aparimāṇassa abhayassa averassa abyābajjhassa bhāgī hoti. Idaṃ, bhikkhave, paṭhamaṃ dānaṃ mahādānaṃ aggaññaṃ rattaññaṃ vaṃsaññaṃ porāṇaṃ asaṃkiṇṇaṃ asaṃkiṇṇapubbaṃ, na saṃkiyati na saṃkiyissati, appaṭikuṭṭhaṃ samaṇehi brāhmaṇehi viññūhi. Ayaṃ, bhikkhave, catuttho puññābhisando kusalābhisando sukhassāhāro sovaggiko sukhavipāko saggasaṃvattaniko, iṭṭhāya kantāya manāpāya hitāya sukhāya saṃvattati.
‘‘புன சபரங், பி⁴க்க²வே, அரியஸாவகோ அதி³ன்னாதா³னங் பஹாய அதி³ன்னாதா³னா படிவிரதோ ஹோதி…பே॰… காமேஸுமிச்சா²சாரங் பஹாய காமேஸுமிச்சா²சாரா படிவிரதோ ஹோதி…பே॰… முஸாவாத³ங் பஹாய முஸாவாதா³ படிவிரதோ ஹோதி…பே॰… ஸுராமேரயமஜ்ஜபமாத³ட்டா²னங் பஹாய ஸுராமேரயமஜ்ஜபமாத³ட்டா²னா படிவிரதோ ஹோதி. ஸுராமேரயமஜ்ஜபமாத³ட்டா²னா படிவிரதோ, பி⁴க்க²வே, அரியஸாவகோ அபரிமாணானங் ஸத்தானங் அப⁴யங் தே³தி அவேரங் தே³தி அப்³யாப³ஜ்ஜ²ங் தே³தி. அபரிமாணானங் ஸத்தானங் அப⁴யங் த³த்வா அவேரங் த³த்வா அப்³யாப³ஜ்ஜ²ங் த³த்வா, அபரிமாணஸ்ஸ அப⁴யஸ்ஸ அவேரஸ்ஸ அப்³யாப³ஜ்ஜ²ஸ்ஸ பா⁴கீ³ ஹோதி. இத³ங், பி⁴க்க²வே, பஞ்சமங் தா³னங் மஹாதா³னங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கியதி ந ஸங்கியிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. அயங் கோ², பி⁴க்க²வே, அட்ட²மோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ ஸோவக்³கி³கோ ஸுக²விபாகோ ஸக்³க³ஸங்வத்தனிகோ, இட்டா²ய கந்தாய மனாபாய ஹிதாய ஸுகா²ய ஸங்வத்ததி. இமே கோ², பி⁴க்க²வே, அட்ட² புஞ்ஞாபி⁴ஸந்தா³ குஸலாபி⁴ஸந்தா³ ஸுக²ஸ்ஸாஹாரா ஸோவக்³கி³கா ஸுக²விபாகா ஸக்³க³ஸங்வத்தனிகா, இட்டா²ய கந்தாய மனாபாய ஹிதாய ஸுகா²ய ஸங்வத்தந்தீ’’தி. நவமங்.
‘‘Puna caparaṃ, bhikkhave, ariyasāvako adinnādānaṃ pahāya adinnādānā paṭivirato hoti…pe… kāmesumicchācāraṃ pahāya kāmesumicchācārā paṭivirato hoti…pe… musāvādaṃ pahāya musāvādā paṭivirato hoti…pe… surāmerayamajjapamādaṭṭhānaṃ pahāya surāmerayamajjapamādaṭṭhānā paṭivirato hoti. Surāmerayamajjapamādaṭṭhānā paṭivirato, bhikkhave, ariyasāvako aparimāṇānaṃ sattānaṃ abhayaṃ deti averaṃ deti abyābajjhaṃ deti. Aparimāṇānaṃ sattānaṃ abhayaṃ datvā averaṃ datvā abyābajjhaṃ datvā, aparimāṇassa abhayassa averassa abyābajjhassa bhāgī hoti. Idaṃ, bhikkhave, pañcamaṃ dānaṃ mahādānaṃ aggaññaṃ rattaññaṃ vaṃsaññaṃ porāṇaṃ asaṃkiṇṇaṃ asaṃkiṇṇapubbaṃ, na saṃkiyati na saṃkiyissati, appaṭikuṭṭhaṃ samaṇehi brāhmaṇehi viññūhi. Ayaṃ kho, bhikkhave, aṭṭhamo puññābhisando kusalābhisando sukhassāhāro sovaggiko sukhavipāko saggasaṃvattaniko, iṭṭhāya kantāya manāpāya hitāya sukhāya saṃvattati. Ime kho, bhikkhave, aṭṭha puññābhisandā kusalābhisandā sukhassāhārā sovaggikā sukhavipākā saggasaṃvattanikā, iṭṭhāya kantāya manāpāya hitāya sukhāya saṃvattantī’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. அபி⁴ஸந்த³ஸுத்தவண்ணனா • 9. Abhisandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9-10. அபி⁴ஸந்த³ஸுத்தாதி³வண்ணனா • 9-10. Abhisandasuttādivaṇṇanā
