| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૨૨. બાવીસતિમવગ્ગો
22. Bāvīsatimavaggo
(૨૧૫) ૮. અબ્યાકતકથા
(215) 8. Abyākatakathā
૯૦૧. સબ્બં સુપિનગતસ્સ ચિત્તં અબ્યાકતન્તિ? આમન્તા. સુપિનન્તેન પાણં હનેય્યાતિ? આમન્તા. હઞ્ચિ સુપિનન્તેન પાણં હનેય્ય, નો ચ વત રે વત્તબ્બે – ‘‘સબ્બં સુપિનગતસ્સ ચિત્તં અબ્યાકત’’ન્તિ.
901. Sabbaṃ supinagatassa cittaṃ abyākatanti? Āmantā. Supinantena pāṇaṃ haneyyāti? Āmantā. Hañci supinantena pāṇaṃ haneyya, no ca vata re vattabbe – ‘‘sabbaṃ supinagatassa cittaṃ abyākata’’nti.
સુપિનન્તેન અદિન્નં આદિયેય્ય…પે॰… મુસા ભણેય્ય, પિસુણં ભણેય્ય, ફરુસં ભણેય્ય, સમ્ફં પલપેય્ય, સન્ધિં છિન્દેય્ય, નિલ્લોપં હરેય્ય, એકાગારિકં કરેય્ય, પરિપન્થે તિટ્ઠેય્ય, પરદારં ગચ્છેય્ય, ગામઘાતકં કરેય્ય, નિગમઘાતકં કરેય્ય, સુપિનન્તેન મેથુનં ધમ્મં પટિસેવેય્ય , સુપિનગતસ્સ અસુચિ મુચ્ચેય્ય, સુપિનન્તેન દાનં દદેય્ય, ચીવરં દદેય્ય, પિણ્ડપાતં દદેય્ય, સેનાસનં દદેય્ય, ગિલાનપચ્ચયભેસજ્જપરિક્ખારં દદેય્ય, ખાદનીયં દદેય્ય, ભોજનીયં દદેય્ય, પાનીયં દદેય્ય, ચેતિયં વન્દેય્ય, ચેતિયે માલં આરોપેય્ય, ગન્ધં આરોપેય્ય , વિલેપનં આરોપેય્ય…પે॰… ચેતિયં અભિદક્ખિણં કરેય્યાતિ? આમન્તા . હઞ્ચિ સુપિનન્તેન ચેતિયં અભિદક્ખિણં કરેય્ય, નો ચ વત રે વત્તબ્બે – ‘‘સબ્બં સુપિનગતસ્સ ચિત્તં અબ્યાકત’’ન્તિ.
Supinantena adinnaṃ ādiyeyya…pe… musā bhaṇeyya, pisuṇaṃ bhaṇeyya, pharusaṃ bhaṇeyya, samphaṃ palapeyya, sandhiṃ chindeyya, nillopaṃ hareyya, ekāgārikaṃ kareyya, paripanthe tiṭṭheyya, paradāraṃ gaccheyya, gāmaghātakaṃ kareyya, nigamaghātakaṃ kareyya, supinantena methunaṃ dhammaṃ paṭiseveyya , supinagatassa asuci mucceyya, supinantena dānaṃ dadeyya, cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyya, khādanīyaṃ dadeyya, bhojanīyaṃ dadeyya, pānīyaṃ dadeyya, cetiyaṃ vandeyya, cetiye mālaṃ āropeyya, gandhaṃ āropeyya , vilepanaṃ āropeyya…pe… cetiyaṃ abhidakkhiṇaṃ kareyyāti? Āmantā . Hañci supinantena cetiyaṃ abhidakkhiṇaṃ kareyya, no ca vata re vattabbe – ‘‘sabbaṃ supinagatassa cittaṃ abyākata’’nti.
૯૦૨. ન વત્તબ્બં – ‘‘સબ્બં સુપિનગતસ્સ ચિત્તં અબ્યાકત’’ન્તિ? આમન્તા. નનુ સુપિનગતસ્સ ચિત્તં અબ્બોહારિયં વુત્તં ભગવતાતિ? આમન્તા. હઞ્ચિ સુપિનગતસ્સ ચિત્તં અબ્બોહારિયં વુત્તં ભગવતા, તેન વત રે વત્તબ્બે – ‘‘સબ્બં સુપિનગતસ્સ ચિત્તં અબ્યાકત’’ન્તિ.
902. Na vattabbaṃ – ‘‘sabbaṃ supinagatassa cittaṃ abyākata’’nti? Āmantā. Nanu supinagatassa cittaṃ abbohāriyaṃ vuttaṃ bhagavatāti? Āmantā. Hañci supinagatassa cittaṃ abbohāriyaṃ vuttaṃ bhagavatā, tena vata re vattabbe – ‘‘sabbaṃ supinagatassa cittaṃ abyākata’’nti.
અબ્યાકતકથા નિટ્ઠિતા.
Abyākatakathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૮. અબ્યાકતકથાવણ્ણના • 8. Abyākatakathāvaṇṇanā
