| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. அச்சயஸுத்தவண்ணனா
4. Accayasuttavaṇṇanā
270. ஸம்பயோஜேஸுந்தி அஞ்ஞமஞ்ஞங் வாசஸிகங் ப²ருஸங் பயோஜேஸுங். தேனாஹ ‘‘கலஹங் அகங்ஸூ’’தி, விவாத³ங் அகங்ஸூதி அத்தோ². அதிக்கம்மவசனந்தி வசீஸங்வரங் அதிக்கமித்வா வசனங். யஸ்மா அச்சயே தே³ஸியமானே தங் கீ²ணயதி அஞ்ஞமஞ்ஞஸ்ஸ க²மமானஸ்ஸ க²மனங் படிக்³க³ண்ஹதோ, தஸ்மா வுத்தங் ‘‘நப்படிக³ண்ஹாதீதி ந க²மதீ’’தி. தும்ஹாகங் வஸே வத்தது, விஸேவிதங் அகத்வா யதா²காமகரணீயோ ஹோது. மித்தத⁴ம்மோ இத⁴ உத்தரபத³லோபேன ‘‘மித்தோ’’தி வுத்தோதி ஆஹ ‘‘மித்தத⁴ம்மே’’தி. கரணவசனந்தி ‘‘மித்தேஹீ’’தி கரணவசனங் பு⁴ம்மத்தே². தேனாஹ ‘‘மித்தேஸூ’’தி. யதா² நிப்³ப³த்தஸபா⁴வஸ்ஸ பா⁴வதோ அஞ்ஞத²த்தங் ஜரா, ஏவங் மித்தபா⁴வதோ வுத்தவிபரியாயோ அமித்தத⁴ம்மோ ஜராபரியாயேன வுத்தோ. அகா³ரய்ஹங் அனவஜ்ஜங் ஸப்³ப³ஸோ பஹீனகிலேஸங். தேனாஹ ‘‘கீ²ணாஸவபுக்³க³ல’’ந்தி.
270.Sampayojesunti aññamaññaṃ vācasikaṃ pharusaṃ payojesuṃ. Tenāha ‘‘kalahaṃ akaṃsū’’ti, vivādaṃ akaṃsūti attho. Atikkammavacananti vacīsaṃvaraṃ atikkamitvā vacanaṃ. Yasmā accaye desiyamāne taṃ khīṇayati aññamaññassa khamamānassa khamanaṃ paṭiggaṇhato, tasmā vuttaṃ ‘‘nappaṭigaṇhātīti na khamatī’’ti. Tumhākaṃ vase vattatu, visevitaṃ akatvā yathākāmakaraṇīyo hotu. Mittadhammo idha uttarapadalopena ‘‘mitto’’ti vuttoti āha ‘‘mittadhamme’’ti. Karaṇavacananti ‘‘mittehī’’ti karaṇavacanaṃ bhummatthe. Tenāha ‘‘mittesū’’ti. Yathā nibbattasabhāvassa bhāvato aññathattaṃ jarā, evaṃ mittabhāvato vuttavipariyāyo amittadhammo jarāpariyāyena vutto. Agārayhaṃ anavajjaṃ sabbaso pahīnakilesaṃ. Tenāha ‘‘khīṇāsavapuggala’’nti.
அச்சயஸுத்தவண்ணனா நிட்டி²தா.
Accayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அச்சயஸுத்தங் • 4. Accayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அச்சயஸுத்தவண்ணனா • 4. Accayasuttavaṇṇanā
