| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. அச்செந்திஸுத்தவண்ணனா
4. Accentisuttavaṇṇanā
4. காலயந்தி கே²பெந்தீதி காலா. புரேப⁴த்தாத³யோ ஹி காலா த⁴ம்மப்பவத்திமத்ததாய பரமத்த²தோ அவிஜ்ஜமானாபி லோகஸங்கேதமத்தஸித்³தா⁴ தஸ்ஸாயேவ த⁴ம்மப்பவத்தியா க³தக³தாய அனிவத்தனதோ தங் தங் த⁴ம்மப்பவத்திங் கே²பெந்தா வினாஸயந்தா விய ஸயஞ்ச தாஹி ஸத்³தி⁴ங் அச்செந்தா விய ஹொந்தி. தேனாஹ – ‘‘காலோ க⁴ஸதி பூ⁴தானி, ஸப்³பா³னேவ ஸஹத்தனா’’தி (ஜா॰ 1.2.190). ‘‘தரயந்தி ரத்தியோ’’தி எத்தா²பி வுத்தனயேனேவ அத்தோ² வேதி³தப்³போ³. ‘‘ஏதங் ப⁴யங் மரணே பெக்க²மானோ’’தி வுச்சமானத்தா புக்³க³லங் மரணூபக³மனாய தரயந்தீதி அத்தோ² வுத்தோ. வயோகு³ணாதி எத்த² கொட்டா²ஸா கு³ணா. தித்தி²யானங் ஹி சரிமசித்தேன ஸகலசித்தே வயஸமூஹே வயஸமஞ்ஞாதி ஆஹ – ‘‘பட²மமஜ்ஜி²மபச்சி²மவயானங் கு³ணா, ராஸயோதி அத்தோ²’’தி. ஆனிஸங்ஸட்டோ² கு³ணட்டோ² ‘‘வாகசிரங் நிவாஸேஸிங், த்³வாத³ஸகு³ணமுபாக³த’’ந்திஆதீ³ஸு (பு³॰ வங்॰ 2.30) விய. ‘‘தந்தி³கு³ணாஹங் கரிஸ்ஸாமி, தி³கு³ணங் தி³கு³ணங் வத்³தெ⁴ய்யா’’தி ச ஏவமாதீ³ஸு பன தப்³பா⁴வவுத்திஅத்தோ² கு³ணட்டோ².
4. Kālayanti khepentīti kālā. Purebhattādayo hi kālā dhammappavattimattatāya paramatthato avijjamānāpi lokasaṅketamattasiddhā tassāyeva dhammappavattiyā gatagatāya anivattanato taṃ taṃ dhammappavattiṃ khepentā vināsayantā viya sayañca tāhi saddhiṃ accentā viya honti. Tenāha – ‘‘kālo ghasati bhūtāni, sabbāneva sahattanā’’ti (jā. 1.2.190). ‘‘Tarayanti rattiyo’’ti etthāpi vuttanayeneva attho veditabbo. ‘‘Etaṃ bhayaṃ maraṇe pekkhamāno’’ti vuccamānattā puggalaṃ maraṇūpagamanāya tarayantīti attho vutto. Vayoguṇāti ettha koṭṭhāsā guṇā. Titthiyānaṃ hi carimacittena sakalacitte vayasamūhe vayasamaññāti āha – ‘‘paṭhamamajjhimapacchimavayānaṃ guṇā, rāsayoti attho’’ti. Ānisaṃsaṭṭho guṇaṭṭho ‘‘vākaciraṃ nivāsesiṃ, dvādasaguṇamupāgata’’ntiādīsu (bu. vaṃ. 2.30) viya. ‘‘Tandiguṇāhaṃ karissāmi, diguṇaṃ diguṇaṃ vaddheyyā’’ti ca evamādīsu pana tabbhāvavuttiattho guṇaṭṭho.
‘‘அஸங்க்²யெய்யானி நாமானி, ஸகு³ணேன மஹேஸினோ;
‘‘Asaṅkhyeyyāni nāmāni, saguṇena mahesino;
கு³ணேன நாமமுத்³தெ⁴ய்யங், அபி நாம ஸஹஸ்ஸதோ’’தி. (த⁴॰ ஸ॰ அட்ட²॰ 1313; உதா³॰ 53; படி॰ ம॰ அட்ட²॰ 1.1.76) –
Guṇena nāmamuddheyyaṃ, api nāma sahassato’’ti. (dha. sa. aṭṭha. 1313; udā. 53; paṭi. ma. aṭṭha. 1.1.76) –
ஆதீ³ஸு பஸங்ஸட்டோ² கு³ணட்டோ² த³ட்ட²ப்³போ³. ‘‘வயோகு³ணா அனுபுப்³ப³ங் ஜஹந்தீ’’தி எத்த² அத்தோ² ‘‘அச்செந்தி காலா’’தி எத்த² வுத்தனயோ ஏவ. பட²மமஜ்ஜி²மவயாதி பட²மக்³க³ஹணஞ்செத்த² வயஸ்ஸ க³தஸ்ஸ அபுனராவத்தித³ஸ்ஸனத்த²ங் கதங். தேனேவாஹ – ‘‘மரணக்க²ணே பன தயோபி வயா ஜஹந்தேவா’’தி.
Ādīsu pasaṃsaṭṭho guṇaṭṭho daṭṭhabbo. ‘‘Vayoguṇā anupubbaṃ jahantī’’ti ettha attho ‘‘accenti kālā’’ti ettha vuttanayo eva. Paṭhamamajjhimavayāti paṭhamaggahaṇañcettha vayassa gatassa apunarāvattidassanatthaṃ kataṃ. Tenevāha – ‘‘maraṇakkhaṇe pana tayopi vayā jahantevā’’ti.
எத்த² ச பாளியங் ‘‘அச்செந்தி காலா’’தி ஸாமஞ்ஞதோ காலஸ்ஸ அபக³மனங் த³ஸ்ஸிதங், புன தங் விஸேஸதோபி த³ஸ்ஸேதுங் இதரத்³வயங் வுத்தங். அட்ட²கதா²யங் பன முதி³ந்த்³ரியஸ்ஸ வஸேன ‘‘வயோகு³ணா அனுபுப்³ப³ங் ஜஹந்தீ’’தி வுத்தங், மஜ்ஜி²மிந்த்³ரியஸ்ஸ வஸேன ‘‘தரயந்தி ரத்தியோ’’தி வுத்தந்தி அதி⁴ப்பாயேன ‘‘காலாதி புரேப⁴த்தாத³யோ காலா’’தி வுத்தங். தஸ்மா தத்த² ஆதி³-ஸத்³தே³ன பச்சா²ப⁴த்தபட²மயாம-முஹுத்தகாலாதி³-காலகொட்டா²ஸோ ஏவ அணுபபே⁴தோ³ காலவிபா⁴கோ³ க³ஹிதோதி வேதி³தப்³போ³. ஸேஸந்தி இத⁴ த்³வீஸு கா³தா²ஸு பச்சி²மத்³தோ⁴. ஸோ ஹி இத⁴ அத்த²தோ அதி⁴க³தத்தா அனந்தரஸுத்தே ச வுத்தத்தா அதிதி³ஸிதோ.
Ettha ca pāḷiyaṃ ‘‘accenti kālā’’ti sāmaññato kālassa apagamanaṃ dassitaṃ, puna taṃ visesatopi dassetuṃ itaradvayaṃ vuttaṃ. Aṭṭhakathāyaṃ pana mudindriyassa vasena ‘‘vayoguṇā anupubbaṃ jahantī’’ti vuttaṃ, majjhimindriyassa vasena ‘‘tarayanti rattiyo’’ti vuttanti adhippāyena ‘‘kālāti purebhattādayo kālā’’ti vuttaṃ. Tasmā tattha ādi-saddena pacchābhattapaṭhamayāma-muhuttakālādi-kālakoṭṭhāso eva aṇupabhedo kālavibhāgo gahitoti veditabbo. Sesanti idha dvīsu gāthāsu pacchimaddho. So hi idha atthato adhigatattā anantarasutte ca vuttattā atidisito.
அச்செந்திஸுத்தவண்ணனா நிட்டி²தா.
Accentisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அச்செந்திஸுத்தங் • 4. Accentisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அச்செந்திஸுத்தவண்ணனா • 4. Accentisuttavaṇṇanā
