| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
3. அச்ச²ரியஅப்³பு⁴தஸுத்தங்
3. Acchariyaabbhutasuttaṃ
197. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஸம்ப³ஹுலானங் பி⁴க்கூ²னங் பச்சா²ப⁴த்தங் பிண்ட³பாதபடிக்கந்தானங் உபட்டா²னஸாலாயங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘‘அச்ச²ரியங், ஆவுஸோ, அப்³பு⁴தங், ஆவுஸோ, ததா²க³தஸ்ஸ மஹித்³தி⁴கதா மஹானுபா⁴வதா, யத்ர ஹி நாம ததா²க³தோ அதீதே பு³த்³தே⁴ பரினிப்³பு³தே சி²ன்னபபஞ்சே சி²ன்னவடுமே பரியாதி³ன்னவட்டே ஸப்³ப³து³க்க²வீதிவத்தே ஜானிஸ்ஸதி 1 – ‘ஏவங்ஜச்சா தே ப⁴க³வந்தோ அஹேஸுங்’ இதிபி, ‘ஏவங்னாமா தே ப⁴க³வந்தோ அஹேஸுங்’ இதிபி, ‘ஏவங்கொ³த்தா தே ப⁴க³வந்தோ அஹேஸுங்’ இதிபி, ‘ஏவங்ஸீலா தே ப⁴க³வந்தோ அஹேஸுங்’ இதிபி, ‘ஏவங்த⁴ம்மா தே ப⁴க³வந்தோ அஹேஸுங்’ இதிபி, ‘ஏவங்பஞ்ஞா தே ப⁴க³வந்தோ அஹேஸுங்’ இதிபி, ‘ஏவங்விஹாரீ தே ப⁴க³வந்தோ அஹேஸுங்’ இதிபி, ‘ஏவங்விமுத்தா தே ப⁴க³வந்தோ அஹேஸுங்’ இதிபீ’’தி! ஏவங் வுத்தே, ஆயஸ்மா ஆனந்தோ³ தே பி⁴க்கூ² ஏதத³வோச – ‘‘அச்ச²ரியா சேவ, ஆவுஸோ, ததா²க³தா அச்ச²ரியத⁴ம்மஸமன்னாக³தா ச; அப்³பு⁴தா சேவ, ஆவுஸோ, ததா²க³தா அப்³பு⁴தத⁴ம்மஸமன்னாக³தா சா’’தி. அயஞ்ச ஹித³ங் தேஸங் பி⁴க்கூ²னங் அந்தராகதா² விப்பகதா ஹோதி.
197. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho sambahulānaṃ bhikkhūnaṃ pacchābhattaṃ piṇḍapātapaṭikkantānaṃ upaṭṭhānasālāyaṃ sannisinnānaṃ sannipatitānaṃ ayamantarākathā udapādi – ‘‘acchariyaṃ, āvuso, abbhutaṃ, āvuso, tathāgatassa mahiddhikatā mahānubhāvatā, yatra hi nāma tathāgato atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte jānissati 2 – ‘evaṃjaccā te bhagavanto ahesuṃ’ itipi, ‘evaṃnāmā te bhagavanto ahesuṃ’ itipi, ‘evaṃgottā te bhagavanto ahesuṃ’ itipi, ‘evaṃsīlā te bhagavanto ahesuṃ’ itipi, ‘evaṃdhammā te bhagavanto ahesuṃ’ itipi, ‘evaṃpaññā te bhagavanto ahesuṃ’ itipi, ‘evaṃvihārī te bhagavanto ahesuṃ’ itipi, ‘evaṃvimuttā te bhagavanto ahesuṃ’ itipī’’ti! Evaṃ vutte, āyasmā ānando te bhikkhū etadavoca – ‘‘acchariyā ceva, āvuso, tathāgatā acchariyadhammasamannāgatā ca; abbhutā ceva, āvuso, tathāgatā abbhutadhammasamannāgatā cā’’ti. Ayañca hidaṃ tesaṃ bhikkhūnaṃ antarākathā vippakatā hoti.
198. அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேனுபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³ . நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி? ‘‘இத⁴, ப⁴ந்தே, அம்ஹாகங் பச்சா²ப⁴த்தங் பிண்ட³பாதபடிக்கந்தானங் உபட்டா²னஸாலாயங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘அச்ச²ரியங், ஆவுஸோ, அப்³பு⁴தங், ஆவுஸோ, ததா²க³தஸ்ஸ மஹித்³தி⁴கதா மஹானுபா⁴வதா, யத்ர ஹி நாம ததா²க³தோ அதீதே பு³த்³தே⁴ பரினிப்³பு³தே சி²ன்னபபஞ்சே சி²ன்னவடுமே பரியாதி³ன்னவட்டே ஸப்³ப³து³க்க²வீதிவத்தே ஜானிஸ்ஸதி – ஏவங்ஜச்சா தே ப⁴க³வந்தோ அஹேஸுங் இதிபி, ஏவங்னாமா… ஏவங்கொ³த்தா… ஏவங்ஸீலா… ஏவங்த⁴ம்மா.. ஏவங்பஞ்ஞா… ஏவங்விஹாரீ… ஏவங்விமுத்தா தே ப⁴க³வந்தோ அஹேஸுங் இதிபீ’தி! ஏவங் வுத்தே, ப⁴ந்தே, ஆயஸ்மா ஆனந்தோ³ அம்ஹே ஏதத³வோச – ‘அச்ச²ரியா சேவ, ஆவுஸோ, ததா²க³தா அச்ச²ரியத⁴ம்மஸமன்னாக³தா ச, அப்³பு⁴தா சேவ, ஆவுஸோ, ததா²க³தா அப்³பு⁴தத⁴ம்மஸமன்னாக³தா சா’தி. அயங் கோ² நோ, ப⁴ந்தே, அந்தராகதா² விப்பகதா; அத² ப⁴க³வா அனுப்பத்தோ’’தி.
198. Atha kho bhagavā sāyanhasamayaṃ paṭisallānā vuṭṭhito yenupaṭṭhānasālā tenupasaṅkami; upasaṅkamitvā paññatte āsane nisīdi . Nisajja kho bhagavā bhikkhū āmantesi – ‘‘kāya nuttha, bhikkhave, etarahi kathāya sannisinnā, kā ca pana vo antarākathā vippakatā’’ti? ‘‘Idha, bhante, amhākaṃ pacchābhattaṃ piṇḍapātapaṭikkantānaṃ upaṭṭhānasālāyaṃ sannisinnānaṃ sannipatitānaṃ ayamantarākathā udapādi – ‘acchariyaṃ, āvuso, abbhutaṃ, āvuso, tathāgatassa mahiddhikatā mahānubhāvatā, yatra hi nāma tathāgato atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte jānissati – evaṃjaccā te bhagavanto ahesuṃ itipi, evaṃnāmā… evaṃgottā… evaṃsīlā… evaṃdhammā.. evaṃpaññā… evaṃvihārī… evaṃvimuttā te bhagavanto ahesuṃ itipī’ti! Evaṃ vutte, bhante, āyasmā ānando amhe etadavoca – ‘acchariyā ceva, āvuso, tathāgatā acchariyadhammasamannāgatā ca, abbhutā ceva, āvuso, tathāgatā abbhutadhammasamannāgatā cā’ti. Ayaṃ kho no, bhante, antarākathā vippakatā; atha bhagavā anuppatto’’ti.
199. அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘தஸ்மாதிஹ தங், ஆனந்த³, பி⁴ய்யோஸோமத்தாய படிப⁴ந்து ததா²க³தஸ்ஸ அச்ச²ரியா அப்³பு⁴தத⁴ம்மா’’தி 3.
199. Atha kho bhagavā āyasmantaṃ ānandaṃ āmantesi – ‘‘tasmātiha taṃ, ānanda, bhiyyosomattāya paṭibhantu tathāgatassa acchariyā abbhutadhammā’’ti 4.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘ஸதோ ஸம்பஜானோ, ஆனந்த³, போ³தி⁴ஸத்தோ துஸிதங் காயங் உபபஜ்ஜீ’தி. யம்பி, ப⁴ந்தே, ஸதோ ஸம்பஜானோ போ³தி⁴ஸத்தோ துஸிதங் காயங் உபபஜ்ஜி இத³ங்பாஹங் , ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusitaṃ kāyaṃ upapajjī’ti. Yampi, bhante, sato sampajāno bodhisatto tusitaṃ kāyaṃ upapajji idaṃpāhaṃ , bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘ஸதோ ஸம்பஜானோ, ஆனந்த³, போ³தி⁴ஸத்தோ துஸிதே காயே அட்டா²ஸீ’தி. யம்பி, ப⁴ந்தே, ஸதோ ஸம்பஜானோ போ³தி⁴ஸத்தோ துஸிதே காயே அட்டா²ஸி இத³ங்பாஹங் 5, ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusite kāye aṭṭhāsī’ti. Yampi, bhante, sato sampajāno bodhisatto tusite kāye aṭṭhāsi idaṃpāhaṃ 6, bhante, bhagavato acchariyaṃ abbhutadhammaṃ dhāremi.
200. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யாவதாயுகங், ஆனந்த³, போ³தி⁴ஸத்தோ துஸிதே காயே அட்டா²ஸீ’தி. யம்பி, ப⁴ந்தே, யாவதாயுகங் போ³தி⁴ஸத்தோ துஸிதே காயே அட்டா²ஸி இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
200. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yāvatāyukaṃ, ānanda, bodhisatto tusite kāye aṭṭhāsī’ti. Yampi, bhante, yāvatāyukaṃ bodhisatto tusite kāye aṭṭhāsi idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘ஸதோ ஸம்பஜானோ, ஆனந்த³, போ³தி⁴ஸத்தோ துஸிதா, காயா சவித்வா மாதுகுச்சி²ங் ஓக்கமீ’தி. யம்பி, ப⁴ந்தே , ஸதோ ஸம்பஜானோ போ³தி⁴ஸத்தோ துஸிதா காயா சவித்வா மாதுகுச்சி²ங் ஓக்கமி இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sato sampajāno, ānanda, bodhisatto tusitā, kāyā cavitvā mātukucchiṃ okkamī’ti. Yampi, bhante , sato sampajāno bodhisatto tusitā kāyā cavitvā mātukucchiṃ okkami idaṃpāhaṃ, bhante, bhagavato acchariyaṃ abbhutadhammaṃ dhāremi.
201. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ துஸிதா காயா சவித்வா மாதுகுச்சி²ங் ஓக்கமதி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வங். யாபி தா லோகந்தரிகா அகா⁴ அஸங்வுதா அந்த⁴காரா அந்த⁴காரதிமிஸா, யத்த²பிமே சந்தி³மஸூரியா ஏவங்மஹித்³தி⁴கா ஏவங்மஹானுபா⁴வா ஆபா⁴ய நானுபொ⁴ந்தி தத்த²பி அப்பமாணோ உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வங். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞங் ஸஞ்ஜானந்தி – அஞ்ஞேபி கிர, போ⁴, ஸந்தி ஸத்தா இதூ⁴பபன்னாதி. அயஞ்ச த³ஸஸஹஸ்ஸீ லோகதா⁴து ஸங்கம்பதி ஸம்பகம்பதி ஸம்பவேத⁴தி அப்பமாணோ ச உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வ’ந்தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
201. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto tusitā kāyā cavitvā mātukucchiṃ okkamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso loke pātubhavati atikkammeva devānaṃ devānubhāvaṃ. Yāpi tā lokantarikā aghā asaṃvutā andhakārā andhakāratimisā, yatthapime candimasūriyā evaṃmahiddhikā evaṃmahānubhāvā ābhāya nānubhonti tatthapi appamāṇo uḷāro obhāso loke pātubhavati atikkammeva devānaṃ devānubhāvaṃ. Yepi tattha sattā upapannā tepi tenobhāsena aññamaññaṃ sañjānanti – aññepi kira, bho, santi sattā idhūpapannāti. Ayañca dasasahassī lokadhātu saṅkampati sampakampati sampavedhati appamāṇo ca uḷāro obhāso loke pātubhavati atikkammeva devānaṃ devānubhāva’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
202. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ங் ஓக்கந்தோ ஹோதி, சத்தாரோ தே³வபுத்தா சதுத்³தி³ஸங் ஆரக்கா²ய உபக³ச்ச²ந்தி – மா நங் போ³தி⁴ஸத்தங் வா போ³தி⁴ஸத்தமாதரங் வா மனுஸ்ஸோ வா அமனுஸ்ஸோ வா கோசி வா விஹேடே²ஸீ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
202. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, cattāro devaputtā catuddisaṃ ārakkhāya upagacchanti – mā naṃ bodhisattaṃ vā bodhisattamātaraṃ vā manusso vā amanusso vā koci vā viheṭhesī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
203. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ங் ஓக்கந்தோ ஹோதி, பகதியா ஸீலவதீ போ³தி⁴ஸத்தமாதா ஹோதி விரதா பாணாதிபாதா விரதா அதி³ன்னாதா³னா விரதா காமேஸுமிச்சா²சாரா விரதா முஸாவாதா³ விரதா ஸுராமேரயமஜ்ஜபமாத³ட்டா²னா’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
203. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, pakatiyā sīlavatī bodhisattamātā hoti viratā pāṇātipātā viratā adinnādānā viratā kāmesumicchācārā viratā musāvādā viratā surāmerayamajjapamādaṭṭhānā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³ , ஆனந்த³, போ³தி⁴ஸத்தோ மாதுகுச்சி²ங் ஓக்கந்தோ ஹோதி, ந போ³தி⁴ஸத்தமாது புரிஸேஸு மானஸங் உப்பஜ்ஜதி காமகு³ணூபஸங்ஹிதங், அனதிக்கமனீயா ச போ³தி⁴ஸத்தமாதா ஹோதி கேனசி புரிஸேன ரத்தசித்தேனா’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā , ānanda, bodhisatto mātukucchiṃ okkanto hoti, na bodhisattamātu purisesu mānasaṃ uppajjati kāmaguṇūpasaṃhitaṃ, anatikkamanīyā ca bodhisattamātā hoti kenaci purisena rattacittenā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ங் ஓக்கந்தோ ஹோதி, லாபி⁴னீ போ³தி⁴ஸத்தமாதா ஹோதி பஞ்சன்னங் காமகு³ணானங். ஸா பஞ்சஹி காமகு³ணேஹி ஸமப்பிதா ஸமங்கீ³பூ⁴தா பரிசாரேதீ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, lābhinī bodhisattamātā hoti pañcannaṃ kāmaguṇānaṃ. Sā pañcahi kāmaguṇehi samappitā samaṅgībhūtā paricāretī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
204. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ங் ஓக்கந்தோ ஹோதி, ந போ³தி⁴ஸத்தமாது கோசிதே³வ ஆபா³தோ⁴ உப்பஜ்ஜதி; ஸுகி²னீ போ³தி⁴ஸத்தமாதா ஹோதி அகிலந்தகாயா; போ³தி⁴ஸத்தஞ்ச போ³தி⁴ஸத்தமாதா திரோகுச்சி²க³தங் பஸ்ஸதி ஸப்³ப³ங்க³பச்சங்க³ங் அஹீனிந்த்³ரியங். ஸெய்யதா²பி, ஆனந்த³, மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ. தத்ராஸ்ஸ ஸுத்தங் ஆவுதங் நீலங் வா பீதங் வா லோஹிதங் வா ஓதா³தங் வா பண்டு³ஸுத்தங் வா. தமேனங் சக்கு²மா புரிஸோ ஹத்தே² கரித்வா பச்சவெக்கெ²ய்ய – அயங் கோ² மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ, தத்ரித³ங் ஸுத்தங் ஆவுதங் நீலங் வா பீதங் வா லோஹிதங் வா ஓதா³தங் வா பண்டு³ஸுத்தங் வாதி. ஏவமேவ கோ², ஆனந்த³, யதா³ போ³தி⁴ஸத்தோ மாதுகுச்சி²ங் ஓக்கந்தோ ஹோதி , ந போ³தி⁴ஸத்தமாது கோசிதே³வ ஆபா³தோ⁴ உப்பஜ்ஜதி; ஸுகி²னீ போ³தி⁴ஸத்தமாதா ஹோதி அகிலந்தகாயா; போ³தி⁴ஸத்தஞ்ச போ³தி⁴ஸத்தமாதா திரோகுச்சி²க³தங் பஸ்ஸதி ஸப்³ப³ங்க³பச்சங்க³ங் அஹீனிந்த்³ரிய’ந்தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
204. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchiṃ okkanto hoti, na bodhisattamātu kocideva ābādho uppajjati; sukhinī bodhisattamātā hoti akilantakāyā; bodhisattañca bodhisattamātā tirokucchigataṃ passati sabbaṅgapaccaṅgaṃ ahīnindriyaṃ. Seyyathāpi, ānanda, maṇi veḷuriyo subho jātimā aṭṭhaṃso suparikammakato. Tatrāssa suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍusuttaṃ vā. Tamenaṃ cakkhumā puriso hatthe karitvā paccavekkheyya – ayaṃ kho maṇi veḷuriyo subho jātimā aṭṭhaṃso suparikammakato, tatridaṃ suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍusuttaṃ vāti. Evameva kho, ānanda, yadā bodhisatto mātukucchiṃ okkanto hoti , na bodhisattamātu kocideva ābādho uppajjati; sukhinī bodhisattamātā hoti akilantakāyā; bodhisattañca bodhisattamātā tirokucchigataṃ passati sabbaṅgapaccaṅgaṃ ahīnindriya’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
205. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘ஸத்தாஹஜாதே, ஆனந்த³, போ³தி⁴ஸத்தே போ³தி⁴ஸத்தமாதா காலங் கரோதி, துஸிதங் காயங் உபபஜ்ஜதீ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
205. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sattāhajāte, ānanda, bodhisatte bodhisattamātā kālaṃ karoti, tusitaṃ kāyaṃ upapajjatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா² கோ² பனானந்த³, அஞ்ஞா இத்தி²கா நவ வா த³ஸ வா மாஸே க³ப்³ப⁴ங் குச்சி²னா பரிஹரித்வா விஜாயந்தி, ந ஹேவங் போ³தி⁴ஸத்தங் போ³தி⁴ஸத்தமாதா விஜாயதி. த³ஸேவ மாஸானி போ³தி⁴ஸத்தங் போ³தி⁴ஸத்தமாதா குச்சி²னா பரிஹரித்வா விஜாயதீ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yathā kho panānanda, aññā itthikā nava vā dasa vā māse gabbhaṃ kucchinā pariharitvā vijāyanti, na hevaṃ bodhisattaṃ bodhisattamātā vijāyati. Daseva māsāni bodhisattaṃ bodhisattamātā kucchinā pariharitvā vijāyatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா² கோ² பனானந்த³, அஞ்ஞா இத்தி²கா நிஸின்னா வா நிபன்னா வா விஜாயந்தி, ந ஹேவங் போ³தி⁴ஸத்தங் போ³தி⁴ஸத்தமாதா விஜாயதி. டி²தாவ போ³தி⁴ஸத்தங் போ³தி⁴ஸத்தமாதா விஜாயதீ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yathā kho panānanda, aññā itthikā nisinnā vā nipannā vā vijāyanti, na hevaṃ bodhisattaṃ bodhisattamātā vijāyati. Ṭhitāva bodhisattaṃ bodhisattamātā vijāyatī’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³ , ஆனந்த³, போ³தி⁴ஸத்தோ மாதுகுச்சி²ம்ஹா நிக்க²மதி, தே³வா நங் பட²மங் படிக்³க³ண்ஹந்தி பச்சா² மனுஸ்ஸா’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā , ānanda, bodhisatto mātukucchimhā nikkhamati, devā naṃ paṭhamaṃ paṭiggaṇhanti pacchā manussā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
206. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ம்ஹா நிக்க²மதி, அப்பத்தோவ போ³தி⁴ஸத்தோ பத²விங் ஹோதி, சத்தாரோ நங் தே³வபுத்தா படிக்³க³ஹெத்வா மாது புரதோ ட²பெந்தி – அத்தமனா, தே³வி, ஹோஹி; மஹேஸக்கோ² தே புத்தோ உப்பன்னோ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
206. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, appattova bodhisatto pathaviṃ hoti, cattāro naṃ devaputtā paṭiggahetvā mātu purato ṭhapenti – attamanā, devi, hohi; mahesakkho te putto uppanno’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ம்ஹா நிக்க²மதி, விஸதோ³வ நிக்க²மதி அமக்கி²தோ உதே³ன 7 அமக்கி²தோ ஸெம்ஹேன அமக்கி²தோ ருஹிரேன அமக்கி²தோ கேனசி அஸுசினா ஸுத்³தோ⁴ விஸதோ³ 8. ஸெய்யதா²பி, ஆனந்த³, மணிரதனங் காஸிகே வத்தே² நிக்கி²த்தங் நேவ மணிரதனங் காஸிகங் வத்த²ங் மக்கே²தி நாபி காஸிகங் வத்த²ங் மணிரதனங் மக்கே²தி. தங் கிஸ்ஸ ஹேது? உபி⁴ன்னங் ஸுத்³த⁴த்தா. ஏவமேவ கோ², ஆனந்த³, யதா³ போ³தி⁴ஸத்தோ மாதுகுச்சி²ம்ஹா நிக்க²மதி, விஸதோ³வ நிக்க²மதி அமக்கி²தோ உதே³ன அமக்கி²தோ ஸெம்ஹேன அமக்கி²தோ ருஹிரேன அமக்கி²தோ கேனசி அஸுசினா ஸுத்³தோ⁴ விஸதோ³’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, visadova nikkhamati amakkhito udena 9 amakkhito semhena amakkhito ruhirena amakkhito kenaci asucinā suddho visado 10. Seyyathāpi, ānanda, maṇiratanaṃ kāsike vatthe nikkhittaṃ neva maṇiratanaṃ kāsikaṃ vatthaṃ makkheti nāpi kāsikaṃ vatthaṃ maṇiratanaṃ makkheti. Taṃ kissa hetu? Ubhinnaṃ suddhattā. Evameva kho, ānanda, yadā bodhisatto mātukucchimhā nikkhamati, visadova nikkhamati amakkhito udena amakkhito semhena amakkhito ruhirena amakkhito kenaci asucinā suddho visado’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ம்ஹா நிக்க²மதி, த்³வே உத³கஸ்ஸ தா⁴ரா அந்தலிக்கா² பாதுப⁴வந்தி – ஏகா ஸீதஸ்ஸ, ஏகா உண்ஹஸ்ஸ; யேன போ³தி⁴ஸத்தஸ்ஸ உத³ககிச்சங் கரொந்தி மாது சா’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, dve udakassa dhārā antalikkhā pātubhavanti – ekā sītassa, ekā uṇhassa; yena bodhisattassa udakakiccaṃ karonti mātu cā’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
207. ‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘ஸம்பதிஜாதோ, ஆனந்த³, போ³தி⁴ஸத்தோ ஸமேஹி பாதே³ஹி பத²வியங் பதிட்ட²ஹித்வா உத்தராபி⁴முகோ² ஸத்தபத³வீதிஹாரேன க³ச்ச²தி, ஸேதம்ஹி ச²த்தே அனுதா⁴ரியமானே, ஸப்³பா³ ச தி³ஸா விலோகேதி, ஆஸபி⁴ஞ்ச வாசங் பா⁴ஸதி – அக்³கோ³ஹமஸ்மி லோகஸ்ஸ, ஜெட்டோ²ஹமஸ்மி லோகஸ்ஸ, ஸெட்டோ²ஹமஸ்மி லோகஸ்ஸ. அயமந்திமா ஜாதி , நத்தி² தா³னி புனப்³ப⁴வோ’தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமி.
207. ‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘sampatijāto, ānanda, bodhisatto samehi pādehi pathaviyaṃ patiṭṭhahitvā uttarābhimukho sattapadavītihārena gacchati, setamhi chatte anudhāriyamāne, sabbā ca disā viloketi, āsabhiñca vācaṃ bhāsati – aggohamasmi lokassa, jeṭṭhohamasmi lokassa, seṭṭhohamasmi lokassa. Ayamantimā jāti , natthi dāni punabbhavo’ti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremi.
‘‘ஸம்முகா² மேதங், ப⁴ந்தே, ப⁴க³வதோ ஸுதங், ஸம்முகா² படிக்³க³ஹிதங் – ‘யதா³, ஆனந்த³, போ³தி⁴ஸத்தோ மாதுகுச்சி²ம்ஹா நிக்க²மதி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வங். யாபி தா லோகந்தரிகா அகா⁴ அஸங்வுதா அந்த⁴காரா அந்த⁴காரதிமிஸா யத்த²பிமே சந்தி³மஸூரியா ஏவங்மஹித்³தி⁴கா ஏவங்மஹானுபா⁴வா ஆபா⁴ய நானுபொ⁴ந்தி தத்த²பி அப்பமாணோ உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வங். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞங் ஸஞ்ஜானந்தி – அஞ்ஞேபி கிர, போ⁴, ஸந்தி ஸத்தா இதூ⁴பபன்னாதி. அயஞ்ச த³ஸஸஹஸ்ஸீ லோகதா⁴து ஸங்கம்பதி ஸம்பகம்பதி ஸம்பவேத⁴தி, அப்பமாணோ ச உளாரோ ஓபா⁴ஸோ லோகே பாதுப⁴வதி அதிக்கம்மேவ தே³வானங் தே³வானுபா⁴வ’ந்தி. யம்பி, ப⁴ந்தே…பே॰… இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமீ’’தி.
‘‘Sammukhā metaṃ, bhante, bhagavato sutaṃ, sammukhā paṭiggahitaṃ – ‘yadā, ānanda, bodhisatto mātukucchimhā nikkhamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso loke pātubhavati atikkammeva devānaṃ devānubhāvaṃ. Yāpi tā lokantarikā aghā asaṃvutā andhakārā andhakāratimisā yatthapime candimasūriyā evaṃmahiddhikā evaṃmahānubhāvā ābhāya nānubhonti tatthapi appamāṇo uḷāro obhāso loke pātubhavati atikkammeva devānaṃ devānubhāvaṃ. Yepi tattha sattā upapannā tepi tenobhāsena aññamaññaṃ sañjānanti – aññepi kira, bho, santi sattā idhūpapannāti. Ayañca dasasahassī lokadhātu saṅkampati sampakampati sampavedhati, appamāṇo ca uḷāro obhāso loke pātubhavati atikkammeva devānaṃ devānubhāva’nti. Yampi, bhante…pe… idaṃpāhaṃ, bhante, bhagavato acchariyaṃ abbhutadhammaṃ dhāremī’’ti.
208. ‘‘தஸ்மாதிஹ த்வங், ஆனந்த³, இத³ம்பி ததா²க³தஸ்ஸ அச்ச²ரியங் அப்³பு⁴தத⁴ம்மங் தா⁴ரேஹி. இதா⁴னந்த³, ததா²க³தஸ்ஸ விதி³தா வேத³னா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா ஸஞ்ஞா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா விதக்கா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி. இத³ம்பி கோ², த்வங், ஆனந்த³, ததா²க³தஸ்ஸ அச்ச²ரியங் அப்³பு⁴தத⁴ம்மங் தா⁴ரேஹீ’’தி. ‘‘யம்பி, ப⁴ந்தே, ப⁴க³வதோ விதி³தா வேத³னா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா ஸஞ்ஞா… விதி³தா விதக்கா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி. இத³ங்பாஹங், ப⁴ந்தே, ப⁴க³வதோ அச்ச²ரியங் அப்³பு⁴தத⁴ம்மங் தா⁴ரேமீ’’தி.
208. ‘‘Tasmātiha tvaṃ, ānanda, idampi tathāgatassa acchariyaṃ abbhutadhammaṃ dhārehi. Idhānanda, tathāgatassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā uppajjanti, viditā upaṭṭhahanti, viditā abbhatthaṃ gacchanti; viditā vitakkā uppajjanti, viditā upaṭṭhahanti, viditā abbhatthaṃ gacchanti. Idampi kho, tvaṃ, ānanda, tathāgatassa acchariyaṃ abbhutadhammaṃ dhārehī’’ti. ‘‘Yampi, bhante, bhagavato viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā… viditā vitakkā uppajjanti, viditā upaṭṭhahanti, viditā abbhatthaṃ gacchanti. Idaṃpāhaṃ, bhante, bhagavato acchariyaṃ abbhutadhammaṃ dhāremī’’ti.
இத³மவோச ஆயஸ்மா ஆனந்தோ³. ஸமனுஞ்ஞோ ஸத்தா² அஹோஸி; அத்தமனா ச தே பி⁴க்கூ² ஆயஸ்மதோ ஆனந்த³ஸ்ஸ பா⁴ஸிதங் அபி⁴னந்து³ந்தி.
Idamavoca āyasmā ānando. Samanuñño satthā ahosi; attamanā ca te bhikkhū āyasmato ānandassa bhāsitaṃ abhinandunti.
அச்ச²ரியஅப்³பு⁴தஸுத்தங் நிட்டி²தங் ததியங்.
Acchariyaabbhutasuttaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. அச்ச²ரியஅப்³பு⁴தஸுத்தவண்ணனா • 3. Acchariyaabbhutasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. அச்ச²ரியப்³பு⁴தஸுத்தவண்ணனா • 3. Acchariyabbhutasuttavaṇṇanā
