| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. அச்ச²ரியஅப்³பு⁴தஸுத்தவண்ணனா
3. Acchariyaabbhutasuttavaṇṇanā
197. ஏவங் மே ஸுதந்தி அச்ச²ரியஅப்³பு⁴தஸுத்தங். தத்த² யத்ர ஹி நாமாதி அச்ச²ரியத்தே² நிபாதோ. யோ நாம ததா²க³தோதி அத்தோ². சி²ன்னபபஞ்சேதி எத்த² பபஞ்சா நாம தண்ஹா மானோ தி³ட்டீ²தி இமே தயோ கிலேஸா. சி²ன்னவடுமேதி எத்த² வடுமந்தி குஸலாகுஸலகம்மவட்டங் வுச்சதி. பரியாதி³ன்னவட்டேதி தஸ்ஸேவ வேவசனங். ஸப்³ப³து³க்க²வீதிவத்தேதி ஸப்³ப³ங் விபாகவட்டஸங்கா²தங் து³க்க²ங் வீதிவத்தே. அனுஸ்ஸரிஸ்ஸதீதி இத³ங் யத்ராதி நிபாதவஸேன அனாக³தவசனங், அத்தோ² பனெத்த² அதீதவஸேன வேதி³தப்³போ³. ப⁴க³வா ஹி தே பு³த்³தே⁴ அனுஸ்ஸரி, ந இதா³னி அனுஸ்ஸரிஸ்ஸதி. ஏவங்ஜச்சாதி விபஸ்ஸீஆத³யோ க²த்தியஜச்சா, ககுஸந்தா⁴த³யோ ப்³ராஹ்மணஜச்சாதி. ஏவங்கொ³த்தாதி விபஸ்ஸீஆத³யோ கொண்ட³ஞ்ஞகொ³த்தா, ககுஸந்தா⁴த³யோ கஸ்ஸபகொ³த்தாதி. ஏவங்ஸீலாதி லோகியலோகுத்தரஸீலேன ஏவங்ஸீலா. ஏவங்த⁴ம்மாதி எத்த² ஸமாதி⁴பக்கா² த⁴ம்மா அதி⁴ப்பேதா . லோகியலோகுத்தரேன ஸமாதி⁴னா ஏவங்ஸமாதி⁴னோதி அத்தோ². ஏவங்பஞ்ஞாதி லோகியலோகுத்தரபஞ்ஞாய ஏவங்பஞ்ஞா. ஏவங்விஹாரீதி எத்த² பன ஹெட்டா² ஸமாதி⁴பக்கா²னங் த⁴ம்மானங் க³ஹிதத்தா விஹாரோ க³ஹிதோவ, புன கஸ்மா க³ஹிதமேவ க³ண்ஹாதீதி சே, ந இத³ங் க³ஹிதமேவ. இத³ஞ்ஹி நிரோத⁴ஸமாபத்திதீ³பனத்த²ங், தஸ்மா ஏவங்னிரோத⁴ஸமாபத்திவிஹாரீதி அயமெத்த² அத்தோ².
197.Evaṃme sutanti acchariyaabbhutasuttaṃ. Tattha yatra hi nāmāti acchariyatthe nipāto. Yo nāma tathāgatoti attho. Chinnapapañceti ettha papañcā nāma taṇhā māno diṭṭhīti ime tayo kilesā. Chinnavaṭumeti ettha vaṭumanti kusalākusalakammavaṭṭaṃ vuccati. Pariyādinnavaṭṭeti tasseva vevacanaṃ. Sabbadukkhavītivatteti sabbaṃ vipākavaṭṭasaṅkhātaṃ dukkhaṃ vītivatte. Anussarissatīti idaṃ yatrāti nipātavasena anāgatavacanaṃ, attho panettha atītavasena veditabbo. Bhagavā hi te buddhe anussari, na idāni anussarissati. Evaṃjaccāti vipassīādayo khattiyajaccā, kakusandhādayo brāhmaṇajaccāti. Evaṃgottāti vipassīādayo koṇḍaññagottā, kakusandhādayo kassapagottāti. Evaṃsīlāti lokiyalokuttarasīlena evaṃsīlā. Evaṃdhammāti ettha samādhipakkhā dhammā adhippetā . Lokiyalokuttarena samādhinā evaṃsamādhinoti attho. Evaṃpaññāti lokiyalokuttarapaññāya evaṃpaññā. Evaṃvihārīti ettha pana heṭṭhā samādhipakkhānaṃ dhammānaṃ gahitattā vihāro gahitova, puna kasmā gahitameva gaṇhātīti ce, na idaṃ gahitameva. Idañhi nirodhasamāpattidīpanatthaṃ, tasmā evaṃnirodhasamāpattivihārīti ayamettha attho.
ஏவங்விமுத்தாதி எத்த² விக்க²ம்ப⁴னவிமுத்தி தத³ங்க³விமுத்தி ஸமுச்சே²த³விமுத்தி படிப்பஸ்ஸத்³தி⁴விமுத்தி நிஸ்ஸரணவிமுத்தீதி பஞ்சவிதா⁴ விமுத்தியோ. தத்த² அட்ட² ஸமாபத்தியோ ஸயங் விக்க²ம்பி⁴தேஹி நீவரணாதீ³ஹி விமுத்தத்தா விக்க²ம்ப⁴னவிமுத்தீதி ஸங்க²ங் க³ச்ச²ந்தி. அனிச்சானுபஸ்ஸனாதி³கா ஸத்த அனுபஸ்ஸனா ஸயங் தஸ்ஸ தஸ்ஸ பச்சனீகங்க³வஸேன பரிசத்தாஹி நிச்சஸஞ்ஞாதீ³ஹி விமுத்தத்தா தத³ங்க³விமுத்தீதி ஸங்க²ங் க³ச்ச²ந்தி. சத்தாரோ அரியமக்³கா³ ஸயங் ஸமுச்சி²ன்னேஹி கிலேஸேஹி விமுத்தத்தா ஸமுச்சே²த³விமுத்தீதி ஸங்க²ங் க³ச்ச²ந்தி. சத்தாரி ஸாமஞ்ஞப²லானி மக்³கா³னுபா⁴வேன கிலேஸானங் படிப்பஸ்ஸத்³த⁴ந்தே உப்பன்னத்தா படிப்பஸ்ஸத்³தி⁴விமுத்தீதி ஸங்க²ங் க³ச்ச²ந்தி. நிப்³பா³னங் ஸப்³ப³கிலேஸேஹி நிஸ்ஸடத்தா அபக³தத்தா தூ³ரே டி²தத்தா நிஸ்ஸரணவிமுத்தீதி ஸங்க²ங் க³தங். இதி இமாஸங் பஞ்சன்னங் விமுத்தீனங் வஸேன ஏவங்விமுத்தாதி ஏவமெத்த² அத்தோ² வேதி³தப்³போ³.
Evaṃvimuttāti ettha vikkhambhanavimutti tadaṅgavimutti samucchedavimutti paṭippassaddhivimutti nissaraṇavimuttīti pañcavidhā vimuttiyo. Tattha aṭṭha samāpattiyo sayaṃ vikkhambhitehi nīvaraṇādīhi vimuttattā vikkhambhanavimuttīti saṅkhaṃ gacchanti. Aniccānupassanādikā satta anupassanā sayaṃ tassa tassa paccanīkaṅgavasena paricattāhi niccasaññādīhi vimuttattā tadaṅgavimuttīti saṅkhaṃ gacchanti. Cattāro ariyamaggā sayaṃ samucchinnehi kilesehi vimuttattā samucchedavimuttīti saṅkhaṃ gacchanti. Cattāri sāmaññaphalāni maggānubhāvena kilesānaṃ paṭippassaddhante uppannattā paṭippassaddhivimuttīti saṅkhaṃ gacchanti. Nibbānaṃ sabbakilesehi nissaṭattā apagatattā dūre ṭhitattā nissaraṇavimuttīti saṅkhaṃ gataṃ. Iti imāsaṃ pañcannaṃ vimuttīnaṃ vasena evaṃvimuttāti evamettha attho veditabbo.
199. தஸ்மாதிஹாதி யஸ்மா த்வங் ‘‘ததா²க³தா அச்ச²ரியா’’தி வத³ஸி, தஸ்மா தங் பி⁴ய்யோஸோ மத்தாய படிப⁴ந்து ததா²க³தஸ்ஸ அச்ச²ரியா அப்³பு⁴தத⁴ம்மாதி. ஸதோ ஸம்பஜானோதி எத்த² த்³வேஸம்பஜஞ்ஞானி மனுஸ்ஸலோகே தே³வலோகே ச. தத்த² வெஸ்ஸந்தரஜாதகே ப்³ராஹ்மணஸ்ஸ த்³வே புத்தே த³த்வா புனதி³வஸே ஸக்கஸ்ஸ தே³விங் த³த்வா ஸக்கேன பஸீதி³த்வா தி³ன்னே அட்ட² வரே க³ண்ஹந்தோ –
199.Tasmātihāti yasmā tvaṃ ‘‘tathāgatā acchariyā’’ti vadasi, tasmā taṃ bhiyyoso mattāya paṭibhantu tathāgatassa acchariyā abbhutadhammāti. Sato sampajānoti ettha dvesampajaññāni manussaloke devaloke ca. Tattha vessantarajātake brāhmaṇassa dve putte datvā punadivase sakkassa deviṃ datvā sakkena pasīditvā dinne aṭṭha vare gaṇhanto –
‘‘இதோ விமுச்சமானாஹங், ஸக்³க³கா³மீ விஸேஸகூ³;
‘‘Ito vimuccamānāhaṃ, saggagāmī visesagū;
அனிவத்தீ ததோ அஸ்ஸங், அட்ட²மேதங் வரங் வரே’’தி. (ஜா॰ 2.22.2300) –
Anivattī tato assaṃ, aṭṭhametaṃ varaṃ vare’’ti. (jā. 2.22.2300) –
ஏவங் துஸிதப⁴வனே மே படிஸந்தி⁴ ஹோதூதி வரங் அக்³க³ஹேஸி, ததோ பட்டா²ய துஸிதப⁴வனே உப்பஜ்ஜிஸ்ஸாமீதி ஜானாதி, இத³ங் மனுஸ்ஸலோகே ஸம்பஜஞ்ஞங். வெஸ்ஸந்தரத்தபா⁴வதோ பன சுதோ புன துஸிதப⁴வனே நிப்³ப³த்தித்வா நிப்³ப³த்தொஸ்மீதி அஞ்ஞாஸி, இத³ங் தே³வலோகே ஸம்பஜஞ்ஞங்.
Evaṃ tusitabhavane me paṭisandhi hotūti varaṃ aggahesi, tato paṭṭhāya tusitabhavane uppajjissāmīti jānāti, idaṃ manussaloke sampajaññaṃ. Vessantarattabhāvato pana cuto puna tusitabhavane nibbattitvā nibbattosmīti aññāsi, idaṃ devaloke sampajaññaṃ.
கிங் பன ஸேஸதே³வதா ந ஜானந்தீதி? நோ ந ஜானந்தி. தா பன உய்யானவிமானகப்பருக்கே² ஓலோகெத்வா தே³வனாடகேஹி தூரியஸத்³தே³ன பபோ³தி⁴தா ‘‘மாரிஸ அயங் தே³வலோகோ தும்ஹே இத⁴ நிப்³ப³த்தா’’தி ஸாரிதா ஜானந்தி. போ³தி⁴ஸத்தோ பட²மஜவனவாரே ந ஜானாதி, து³தியஜவனதோ பட்டா²ய ஜானாதி. இச்சஸ்ஸ அஞ்ஞேஹி அஸாதா⁴ரணஜானநங் ஹோதி.
Kiṃ pana sesadevatā na jānantīti? No na jānanti. Tā pana uyyānavimānakapparukkhe oloketvā devanāṭakehi tūriyasaddena pabodhitā ‘‘mārisa ayaṃ devaloko tumhe idha nibbattā’’ti sāritā jānanti. Bodhisatto paṭhamajavanavāre na jānāti, dutiyajavanato paṭṭhāya jānāti. Iccassa aññehi asādhāraṇajānanaṃ hoti.
அட்டா²ஸீதி எத்த² கிஞ்சாபி அஞ்ஞேபி தே³வா தத்த² டி²தா டி²தம்ஹாதி ஜானந்தி, தே பன ச²ஸு த்³வாரேஸு ப³லவதா இட்டா²ரம்மணேன அபி⁴பு⁴ய்யமானா ஸதிங் விஸ்ஸஜ்ஜெத்வா அத்தனோ பு⁴த்தபீதபா⁴வம்பி அஜானந்தா ஆஹாரூபச்சே²தே³ன காலங் கரொந்தி. போ³தி⁴ஸத்தஸ்ஸ கிங் ததா²ரூபங் ஆரம்மணங் நத்தீ²தி? நோ நத்தி². ஸோ ஹி ஸேஸதே³வே த³ஸஹி டா²னேஹி அதி⁴க்³க³ண்ஹாதி, ஆரம்மணேன பன அத்தானங் மத்³தி³துங் ந தே³தி, தங் ஆரம்மணங் அபி⁴ப⁴வித்வா திட்ட²தி. தேன வுத்தங் – ‘‘ஸதோ ஸம்பஜானோ, ஆனந்த³, போ³தி⁴ஸத்தோ துஸிதே காயே அட்டா²ஸீ’’தி.
Aṭṭhāsīti ettha kiñcāpi aññepi devā tattha ṭhitā ṭhitamhāti jānanti, te pana chasu dvāresu balavatā iṭṭhārammaṇena abhibhuyyamānā satiṃ vissajjetvā attano bhuttapītabhāvampi ajānantā āhārūpacchedena kālaṃ karonti. Bodhisattassa kiṃ tathārūpaṃ ārammaṇaṃ natthīti? No natthi. So hi sesadeve dasahi ṭhānehi adhiggaṇhāti, ārammaṇena pana attānaṃ maddituṃ na deti, taṃ ārammaṇaṃ abhibhavitvā tiṭṭhati. Tena vuttaṃ – ‘‘sato sampajāno, ānanda, bodhisatto tusite kāye aṭṭhāsī’’ti.
200. யாவதாயுகந்தி ஸேஸத்தபா⁴வேஸு கிங் யாவதாயுகங் ந திட்ட²த்தீதி? ஆம ந திட்ட²தி. அஞ்ஞதா³ ஹி தீ³கா⁴யுகதே³வலோகே நிப்³ப³த்தோ தத்த² பாரமியோ ந ஸக்கா பூரேதுந்தி அக்கீ²னி நிமீலெத்வா அதி⁴முத்திகாலங்கிரியங் நாம கத்வா மனுஸ்ஸலோகே நிப்³ப³த்ததி . அயங் காலங்கிரியா அஞ்ஞேஸங் ந ஹோதி. ததா³ பன அதி³ன்னதா³னங் நாம நத்தி², அரக்கி²தஸீலங் நாம நத்தி², ஸப்³ப³பாரமீனங் பூரிதத்தா யாவதாயுகங் அட்டா²ஸி.
200.Yāvatāyukanti sesattabhāvesu kiṃ yāvatāyukaṃ na tiṭṭhattīti? Āma na tiṭṭhati. Aññadā hi dīghāyukadevaloke nibbatto tattha pāramiyo na sakkā pūretunti akkhīni nimīletvā adhimuttikālaṃkiriyaṃ nāma katvā manussaloke nibbattati . Ayaṃ kālaṅkiriyā aññesaṃ na hoti. Tadā pana adinnadānaṃ nāma natthi, arakkhitasīlaṃ nāma natthi, sabbapāramīnaṃ pūritattā yāvatāyukaṃ aṭṭhāsi.
ஸதோ ஸம்பஜானோ துஸிதா காயா சவித்வா மாதுகுச்சி²ங் ஓக்கமதீதி ஏவங் தாவ ஸப்³ப³பாரமியோ பூரெத்வா ததா³ போ³தி⁴ஸத்தோ யாவதாயுகங் அட்டா²ஸி. தே³வதானங் பன – ‘‘மனுஸ்ஸக³ணனாவஸேன இதா³னி ஸத்தஹி தி³வஸேஹி சுதி ப⁴விஸ்ஸதீ’’தி பஞ்ச புப்³ப³னிமித்தானி உப்பஜ்ஜந்தி – மாலா மிலாயந்தி, வத்தா²னி கிலிஸ்ஸந்தி, கச்சே²ஹி ஸேதா³ முச்சந்தி, காயே து³ப்³ப³ண்ணியங் ஓக்கமதி, தே³வோ தே³வாஸனே ந ஸண்டா²தி.
Sato sampajāno tusitā kāyā cavitvā mātukucchiṃ okkamatīti evaṃ tāva sabbapāramiyo pūretvā tadā bodhisatto yāvatāyukaṃ aṭṭhāsi. Devatānaṃ pana – ‘‘manussagaṇanāvasena idāni sattahi divasehi cuti bhavissatī’’ti pañca pubbanimittāni uppajjanti – mālā milāyanti, vatthāni kilissanti, kacchehi sedā muccanti, kāye dubbaṇṇiyaṃ okkamati, devo devāsane na saṇṭhāti.
தத்த² மாலாதி படிஸந்தி⁴க்³க³ஹணதி³வஸே பிளந்த⁴னமாலா. தா கிர ஸட்டி²ஸதஸஹஸ்ஸாதி⁴கா ஸத்தபண்ணாஸ-வஸ்ஸகோடியோ அமிலாயித்வா ததா³ மிலாயந்தி. வத்தே²ஸுபி ஏஸேவ நயோ. எத்தகங் பன காலங் தே³வானங் நேவ ஸீதங் ந உண்ஹங் ஹோதி, தஸ்மிங் காலே ஸரீரதோ பி³ந்து³பி³ந்து³வஸேன ஸேதா³ முச்சந்தி. எத்தகஞ்ச காலங் தேஸங் ஸரீரே க²ண்டி³ச்சபாலிச்சாதி³வஸேன விவண்ணதா ந பஞ்ஞாயதி, தே³வதீ⁴தா ஸோளஸவஸ்ஸுத்³தே³ஸிகா விய, தே³வபுத்தா வீஸதிவஸ்ஸுத்³தே³ஸிகா விய கா²யந்தி. மரணகாலே பன நேஸங் கிலந்தரூபோ அத்தபா⁴வோ ஹோதி. எத்தகஞ்ச நேஸங் காலங் தே³வலோகே உக்கண்டி²தா நாம நத்தி², மரணகாலே பன நிஸ்ஸஸந்தி விஜம்ப⁴ந்தி, ஸகே ஆஸனே நாபி⁴ரமந்தி.
Tattha mālāti paṭisandhiggahaṇadivase piḷandhanamālā. Tā kira saṭṭhisatasahassādhikā sattapaṇṇāsa-vassakoṭiyo amilāyitvā tadā milāyanti. Vatthesupi eseva nayo. Ettakaṃ pana kālaṃ devānaṃ neva sītaṃ na uṇhaṃ hoti, tasmiṃ kāle sarīrato bindubinduvasena sedā muccanti. Ettakañca kālaṃ tesaṃ sarīre khaṇḍiccapāliccādivasena vivaṇṇatā na paññāyati, devadhītā soḷasavassuddesikā viya, devaputtā vīsativassuddesikā viya khāyanti. Maraṇakāle pana nesaṃ kilantarūpo attabhāvo hoti. Ettakañca nesaṃ kālaṃ devaloke ukkaṇṭhitā nāma natthi, maraṇakāle pana nissasanti vijambhanti, sake āsane nābhiramanti.
இமானி பன புப்³ப³னிமித்தானி, யதா² லோகே மஹாபுஞ்ஞானங் ராஜராஜமஹாமத்தாதீ³னங்யேவ உக்காபாதபூ⁴மிசாலசந்த³க்³கா³ஹாதீ³னி நிமித்தானி பஞ்ஞாயந்தி, ந ஸப்³பே³ஸங், ஏவமேவ மஹேஸக்கா²னங் தே³வதானங்யேவ பஞ்ஞாயந்தி, ந ஸப்³பே³ஸங். யதா² ச மனுஸ்ஸேஸு புப்³ப³னிமித்தானி நக்க²த்தபாட²காத³யோவ ஜானந்தி, ந ஸப்³பே³, ஏவமேவ தானிபி ஸப்³பே³ தே³வா ந ஜானந்தி, பண்டி³தா ஏவ பன ஜானந்தி. தத்த² யே ச மந்தே³ன குஸலகம்மேன நிப்³ப³த்தா தே³வபுத்தா, தே தேஸு உப்பன்னேஸு – ‘‘இதா³னி கோ ஜானாதி, குஹிங் நிப்³ப³த்திஸ்ஸாமா’’தி பா⁴யந்தி. யே மஹாபுஞ்ஞா, தே – ‘‘அம்ஹேஹி தி³ன்னங் தா³னங் ரக்கி²தங் ஸீலங் பா⁴விதங் பா⁴வனங் ஆக³ம்ம உபரிதே³வலோகேஸு ஸம்பத்திங் அனுப⁴விஸ்ஸாமா’’தி ந பா⁴யந்தி. போ³தி⁴ஸத்தோபி தானி புப்³ப³னிமித்தானி தி³ஸ்வா ‘‘இதா³னி அனந்தரே அத்தபா⁴வே பு³த்³தோ⁴ ப⁴விஸ்ஸாமீ’’தி ந பா⁴யி. அத²ஸ்ஸ தேஸு நிமித்தேஸு பாதுபூ⁴தேஸு த³ஸஸஹஸ்ஸசக்கவாளதே³வதா ஸன்னிபதித்வா – ‘‘மாரிஸ தும்ஹேஹி த³ஸ பாரமியோ பூரெந்தேஹி ந ஸக்கஸம்பத்திங் ந மாரப்³ரஹ்மசக்கவத்திஸம்பத்திங் பத்தெ²ந்தேஹி பூரிதா, லோகனித்த²ரணத்தா²ய பன பு³த்³த⁴த்தங் பத்த²யமானேஹி பூரிதா. ஸோ வோ இதா³னி காலோ மாரிஸ பு³த்³த⁴த்தாய, ஸமயோ மாரிஸ பு³த்³த⁴த்தாயா’’தி யாசந்தி.
Imāni pana pubbanimittāni, yathā loke mahāpuññānaṃ rājarājamahāmattādīnaṃyeva ukkāpātabhūmicālacandaggāhādīni nimittāni paññāyanti, na sabbesaṃ, evameva mahesakkhānaṃ devatānaṃyeva paññāyanti, na sabbesaṃ. Yathā ca manussesu pubbanimittāni nakkhattapāṭhakādayova jānanti, na sabbe, evameva tānipi sabbe devā na jānanti, paṇḍitā eva pana jānanti. Tattha ye ca mandena kusalakammena nibbattā devaputtā, te tesu uppannesu – ‘‘idāni ko jānāti, kuhiṃ nibbattissāmā’’ti bhāyanti. Ye mahāpuññā, te – ‘‘amhehi dinnaṃ dānaṃ rakkhitaṃ sīlaṃ bhāvitaṃ bhāvanaṃ āgamma uparidevalokesu sampattiṃ anubhavissāmā’’ti na bhāyanti. Bodhisattopi tāni pubbanimittāni disvā ‘‘idāni anantare attabhāve buddho bhavissāmī’’ti na bhāyi. Athassa tesu nimittesu pātubhūtesu dasasahassacakkavāḷadevatā sannipatitvā – ‘‘mārisa tumhehi dasa pāramiyo pūrentehi na sakkasampattiṃ na mārabrahmacakkavattisampattiṃ patthentehi pūritā, lokanittharaṇatthāya pana buddhattaṃ patthayamānehi pūritā. So vo idāni kālo mārisa buddhattāya, samayo mārisa buddhattāyā’’ti yācanti.
அத² மஹாஸத்தோ தே³வதானங் படிஞ்ஞங் அத³த்வாவ காலதீ³பதே³ஸகுலஜனெத்திஆயுபரிச்சே²த³வஸேன பஞ்சமஹாவிலோகனங் நாம விலோகேஸி. தத்த² ‘‘காலோ நு கோ², ந காலோ’’தி பட²மங் காலங் விலோகேஸி. தத்த² வஸ்ஸஸதஸஹஸ்ஸதோ உத்³த⁴ங் வட்³டி⁴தஆயுகாலோ காலோ நாம ந ஹோதி. கஸ்மா? ததா³ ஹி ஸத்தானங் ஜாதிஜராமரணானி ந பஞ்ஞாயந்தி, பு³த்³தா⁴னஞ்ச த⁴ம்மதே³ஸனா நாம திலக்க²ணமுத்தா நத்தி², தேஸங் அனிச்சங் து³க்க²ங் அனத்தாதி கதெ²ந்தானங் ‘‘கிங் நாமேதங் கதெ²ந்தீ’’தி நேவ ஸோதுங் ந ஸத்³தா⁴துங் மஞ்ஞந்தி, ததோ அபி⁴ஸமயோ ந ஹோதி, தஸ்மிங் அஸதி அனிய்யானிகங் ஸாஸனங் ஹோதி. தஸ்மா ஸோ அகாலோ. வஸ்ஸஸததோ ஊனஆயுகாலோபி காலோ நாம ந ஹோதி. கஸ்மா? ததா³ ஹி ஸத்தா உஸ்ஸன்னகிலேஸா ஹொந்தி, உஸ்ஸன்னகிலேஸானஞ்ச தி³ன்னோவாதோ³ ஓவாத³ட்டா²னே ந திட்ட²தி. உத³கே த³ண்ட³ராஜி விய கி²ப்பங் விக³ச்ச²தி. தஸ்மா ஸோபி அகாலோ. ஸதஸஹஸ்ஸதோ பன பட்டா²ய ஹெட்டா² வஸ்ஸஸததோ பட்டா²ய உத்³த⁴ங் ஆயுகாலோ காலோ நாம. ததா³ ச வஸ்ஸஸதகாலோ ஹோதி. அத² மஹாஸத்தோ ‘‘நிப்³ப³த்திதப்³ப³காலோ’’தி காலங் பஸ்ஸி.
Atha mahāsatto devatānaṃ paṭiññaṃ adatvāva kāladīpadesakulajanettiāyuparicchedavasena pañcamahāvilokanaṃ nāma vilokesi. Tattha ‘‘kālo nu kho, na kālo’’ti paṭhamaṃ kālaṃ vilokesi. Tattha vassasatasahassato uddhaṃ vaḍḍhitaāyukālo kālo nāma na hoti. Kasmā? Tadā hi sattānaṃ jātijarāmaraṇāni na paññāyanti, buddhānañca dhammadesanā nāma tilakkhaṇamuttā natthi, tesaṃ aniccaṃ dukkhaṃ anattāti kathentānaṃ ‘‘kiṃ nāmetaṃ kathentī’’ti neva sotuṃ na saddhātuṃ maññanti, tato abhisamayo na hoti, tasmiṃ asati aniyyānikaṃ sāsanaṃ hoti. Tasmā so akālo. Vassasatato ūnaāyukālopi kālo nāma na hoti. Kasmā? Tadā hi sattā ussannakilesā honti, ussannakilesānañca dinnovādo ovādaṭṭhāne na tiṭṭhati. Udake daṇḍarāji viya khippaṃ vigacchati. Tasmā sopi akālo. Satasahassato pana paṭṭhāya heṭṭhā vassasatato paṭṭhāya uddhaṃ āyukālo kālo nāma. Tadā ca vassasatakālo hoti. Atha mahāsatto ‘‘nibbattitabbakālo’’ti kālaṃ passi.
ததோ தீ³பங் விலோகெந்தோ ஸபரிவாரே சத்தாரோ தீ³பே ஓலோகெத்வா – ‘‘தீஸு தீ³பேஸு பு³த்³தா⁴ ந நிப்³ப³த்தந்தி, ஜம்பு³தீ³பேயேவ நிப்³ப³த்தந்தீ’’தி தீ³பங் பஸ்ஸி.
Tato dīpaṃ vilokento saparivāre cattāro dīpe oloketvā – ‘‘tīsu dīpesu buddhā na nibbattanti, jambudīpeyeva nibbattantī’’ti dīpaṃ passi.
ததோ – ‘‘ஜம்பு³தீ³போ நாம மஹா, த³ஸயோஜனஸஹஸ்ஸபரிமாணோ, கதரஸ்மிங் நு கோ² பதே³ஸே பு³த்³தா⁴ நிப்³ப³த்தந்தீ’’தி தே³ஸங் விலோகெந்தோ மஜ்ஜி²மதே³ஸங் பஸ்ஸி. மஜ்ஜி²மதே³ஸோ நாம ‘‘புரத்தி²மாய தி³ஸாய க³ஜங்க³லங் நாம நிக³மோ’’திஆதி³னா நயேன வினயே (மஹாவ॰ 259) வுத்தோவ. ஸோ பன ஆயாமதோ தீணி யோஜனஸதானி. வித்தா²ரதோ அட்³ட⁴தியானி, பரிக்கே²பதோ நவயோஜனஸதானீதி. ஏதஸ்மிஞ்ஹி பதே³ஸே சத்தாரி அட்ட² ஸோளஸ வா அஸங்க்²யெய்யானி, கப்பஸதஸஹஸ்ஸஞ்ச பாரமியோ பூரெத்வா ஸம்மாஸம்பு³த்³தா⁴ உப்பஜ்ஜந்தி. த்³வே அஸங்க்²யெய்யானி, கப்பஸதஸஹஸ்ஸஞ்ச பாரமியோ பூரெத்வா பச்சேகபு³த்³தா⁴ உப்பஜ்ஜந்தி, ஏகங் அஸங்க்²யெய்யங், கப்பஸதஸஹஸ்ஸஞ்ச பாரமியோ பூரெத்வா ஸாரிபுத்தமொக்³க³ல்லானாத³யோ மஹாஸாவகா உப்பஜ்ஜந்தி, சதுன்னங் மஹாதீ³பானங் த்³விஸஹஸ்ஸானங் பரித்ததீ³பானஞ்ச இஸ்ஸரியாதி⁴பச்சகாரகசக்கவத்திராஜானோ உப்பஜ்ஜந்தி, அஞ்ஞே ச மஹேஸக்கா² க²த்தியப்³ராஹ்மணக³ஹபதிமஹாஸாலா உப்பஜ்ஜந்தி. இத³ஞ்செத்த² கபிலவத்து² நாம நக³ரங், தத்த² மயா நிப்³ப³த்திதப்³ப³ந்தி நிட்ட²மக³மாஸி.
Tato – ‘‘jambudīpo nāma mahā, dasayojanasahassaparimāṇo, katarasmiṃ nu kho padese buddhā nibbattantī’’ti desaṃ vilokento majjhimadesaṃ passi. Majjhimadeso nāma ‘‘puratthimāya disāya gajaṅgalaṃ nāma nigamo’’tiādinā nayena vinaye (mahāva. 259) vuttova. So pana āyāmato tīṇi yojanasatāni. Vitthārato aḍḍhatiyāni, parikkhepato navayojanasatānīti. Etasmiñhi padese cattāri aṭṭha soḷasa vā asaṅkhyeyyāni, kappasatasahassañca pāramiyo pūretvā sammāsambuddhā uppajjanti. Dve asaṅkhyeyyāni, kappasatasahassañca pāramiyo pūretvā paccekabuddhā uppajjanti, ekaṃ asaṅkhyeyyaṃ, kappasatasahassañca pāramiyo pūretvā sāriputtamoggallānādayo mahāsāvakā uppajjanti, catunnaṃ mahādīpānaṃ dvisahassānaṃ parittadīpānañca issariyādhipaccakārakacakkavattirājāno uppajjanti, aññe ca mahesakkhā khattiyabrāhmaṇagahapatimahāsālā uppajjanti. Idañcettha kapilavatthu nāma nagaraṃ, tattha mayā nibbattitabbanti niṭṭhamagamāsi.
ததோ குலங் விலோகெந்தோ – ‘‘பு³த்³தா⁴ நாம லோகஸம்மதே குலே நிப்³ப³த்தந்தி, இதா³னி ச க²த்தியகுலங் லோகஸம்மதங், தத்த² நிப்³ப³த்திஸ்ஸாமி, ஸுத்³தோ⁴த³னோ நாம ராஜா மே பிதா ப⁴விஸ்ஸதீ’’தி குலங் பஸ்ஸி.
Tato kulaṃ vilokento – ‘‘buddhā nāma lokasammate kule nibbattanti, idāni ca khattiyakulaṃ lokasammataṃ, tattha nibbattissāmi, suddhodano nāma rājā me pitā bhavissatī’’ti kulaṃ passi.
ததோ மாதரங் விலோகெந்தோ – ‘‘பு³த்³த⁴மாதா நாம லோலா ஸுராது⁴த்தா ந ஹோதி, கப்பஸதஸஹஸ்ஸங் பூரிதபாரமீ ஜாதிதோ பட்டா²ய அக²ண்ட³பஞ்சஸீலா ஹோதி, அயஞ்ச மஹாமாயா நாம தே³வீ ஏதி³ஸா. அயங் மே மாதா ப⁴விஸ்ஸதி. கித்தகங் பனஸ்ஸா ஆயூ’’தி ஆவஜ்ஜந்தோ – ‘‘த³ஸன்னங் மாஸானங் உபரி ஸத்த தி³வஸானீ’’தி பஸ்ஸி.
Tato mātaraṃ vilokento – ‘‘buddhamātā nāma lolā surādhuttā na hoti, kappasatasahassaṃ pūritapāramī jātito paṭṭhāya akhaṇḍapañcasīlā hoti, ayañca mahāmāyā nāma devī edisā. Ayaṃ me mātā bhavissati. Kittakaṃ panassā āyū’’ti āvajjanto – ‘‘dasannaṃ māsānaṃ upari satta divasānī’’ti passi.
இதி இமங் பஞ்சமஹாவிலோகனங் விலோகெத்வா – ‘‘காலோ மே மாரிஸா பு³த்³த⁴பா⁴வாயா’’தி தே³வதானங் ஸங்க³ஹங் கரொந்தோ படிஞ்ஞங் த³த்வா ‘‘க³ச்ச²த² தும்ஹே’’தி தா தே³வதா உய்யோஜெத்வா துஸிததே³வதாஹி பரிவுதோ துஸிதபுரே நந்த³னவனங் பாவிஸி. ஸப்³ப³தே³வலோகேஸு ஹி நந்த³னவனங் அத்தி²யேவ. தத்த² நங் தே³வதா – ‘‘இதோ சுதோ ஸுக³திங் க³ச்ச², இதோ சுதோ ஸுக³திங் க³ச்சா²’’தி புப்³பே³கதகுஸலகம்மோகாஸங் ஸாரயமானா விசரந்தி. ஸோ ஏவங் தே³வதாஹி குஸலங் ஸாரயமானாஹி பரிவுதோ தத்த² விசரந்தோவ சவி.
Iti imaṃ pañcamahāvilokanaṃ viloketvā – ‘‘kālo me mārisā buddhabhāvāyā’’ti devatānaṃ saṅgahaṃ karonto paṭiññaṃ datvā ‘‘gacchatha tumhe’’ti tā devatā uyyojetvā tusitadevatāhi parivuto tusitapure nandanavanaṃ pāvisi. Sabbadevalokesu hi nandanavanaṃ atthiyeva. Tattha naṃ devatā – ‘‘ito cuto sugatiṃ gaccha, ito cuto sugatiṃ gacchā’’ti pubbekatakusalakammokāsaṃ sārayamānā vicaranti. So evaṃ devatāhi kusalaṃ sārayamānāhi parivuto tattha vicarantova cavi.
ஏவங் சுதோ சவாமீதி பஜானாதி, சுதிசித்தங் ந ஜானாதி. படிஸந்தி⁴ங் க³ஹெத்வாபி படிஸந்தி⁴சித்தங் ந ஜானாதி, இமஸ்மிங் மே டா²னே படிஸந்தி⁴ க³ஹிதாதி ஏவங் பன ஜானாதி. கேசி பன தே²ரா ‘‘ஆவஜ்ஜனபரியாயோ நாம லத்³து⁴ங் வட்டதி, து³தியததியசித்தவாரேயேவ ஜானிஸ்ஸதீ’’தி வத³ந்தி. திபிடகமஹாஸீவத்தே²ரோ பனாஹ – ‘‘மஹாஸத்தானங் படிஸந்தி⁴ ந அஞ்ஞேஸங் படிஸந்தி⁴ஸதி³ஸா, கோடிப்பத்தங் தேஸங் ஸதிஸம்பஜஞ்ஞங். யஸ்மா பன தேனேவ சித்தேன தங் சித்தங் ஞாதுங் ந ஸக்கா, தஸ்மா சுதிசித்தங் ந ஜானாதி. சுதிக்க²ணேபி சவாமீதி பஜானாதி, படிஸந்தி⁴ங் க³ஹெத்வாபி படிஸந்தி⁴சித்தங் ந ஜானாதி, அஸுகஸ்மிங் டா²னே படிஸந்தி⁴ க³ஹிதாதி பஜானாதி, தஸ்மிங் காலே த³ஸஸஹஸ்ஸீ கம்பதீ’’தி. ஏவங் ஸதோ ஸம்பஜானோ மாதுகுச்சி²ங் ஓக்கமந்தோ பன ஏகூனவீஸதியா படிஸந்தி⁴சித்தேஸு மெத்தாபுப்³ப³பா⁴க³ஸ்ஸ ஸோமனஸ்ஸ-ஸஹக³த-ஞாணஸம்பயுத்த-அஸங்கா²ரிக-குஸலசித்தஸ்ஸ ஸதி³ஸமஹாவிபாகசித்தேன படிஸந்தி⁴ங் க³ண்ஹி. மஹாஸீவத்தே²ரோ பன ‘‘உபெக்கா²ஸஹக³தேனா’’தி ஆஹ.
Evaṃ cuto cavāmīti pajānāti, cuticittaṃ na jānāti. Paṭisandhiṃ gahetvāpi paṭisandhicittaṃ na jānāti, imasmiṃ me ṭhāne paṭisandhi gahitāti evaṃ pana jānāti. Keci pana therā ‘‘āvajjanapariyāyo nāma laddhuṃ vaṭṭati, dutiyatatiyacittavāreyeva jānissatī’’ti vadanti. Tipiṭakamahāsīvatthero panāha – ‘‘mahāsattānaṃ paṭisandhi na aññesaṃ paṭisandhisadisā, koṭippattaṃ tesaṃ satisampajaññaṃ. Yasmā pana teneva cittena taṃ cittaṃ ñātuṃ na sakkā, tasmā cuticittaṃ na jānāti. Cutikkhaṇepi cavāmīti pajānāti, paṭisandhiṃ gahetvāpi paṭisandhicittaṃ na jānāti, asukasmiṃ ṭhāne paṭisandhi gahitāti pajānāti, tasmiṃ kāle dasasahassī kampatī’’ti. Evaṃ sato sampajāno mātukucchiṃ okkamanto pana ekūnavīsatiyā paṭisandhicittesu mettāpubbabhāgassa somanassa-sahagata-ñāṇasampayutta-asaṅkhārika-kusalacittassa sadisamahāvipākacittena paṭisandhiṃ gaṇhi. Mahāsīvatthero pana ‘‘upekkhāsahagatenā’’ti āha.
படிஸந்தி⁴ங் க³ண்ஹந்தோ பன ஆஸாள்ஹீபுண்ணமாயங் உத்தராஸாள்ஹனக்க²த்தேன அக்³க³ஹேஸி. ததா³ கிர மஹாமாயா புரே புண்ணமாய ஸத்தமதி³வஸதோ பட்டா²ய விக³தஸுராபானங் மாலாக³ந்த⁴விபூ⁴ஸனஸம்பன்னங் நக்க²த்தகீளங் அனுப⁴வமானா ஸத்தமே தி³வஸே பாதோ வுட்டா²ய க³ந்தோ⁴த³கேன ந்ஹாயித்வா ஸப்³பா³லங்காரவிபூ⁴ஸிதா வரபோ⁴ஜனங் பு⁴ஞ்ஜித்வா உபோஸத²ங்கா³னி அதி⁴ட்டா²ய ஸிரீக³ப்³ப⁴ங் பவிஸித்வா ஸிரீஸயனே நிபன்னா நித்³த³ங் ஓக்கமமானா இத³ங் ஸுபினங் அத்³த³ஸ – ‘‘சத்தாரோ கிர நங் மஹாராஜானோ ஸயனேனேவ ஸத்³தி⁴ங் உக்கி²பித்வா அனோதத்தத³ஹங் நெத்வா ஏகமந்தங் அட்ட²ங்ஸு. அத² நேஸங் தே³வியோ ஆக³ந்த்வா மனுஸ்ஸமலஹரணத்த²ங் ந்ஹாபெத்வா தி³ப்³ப³வத்த²ங் நிவாஸெத்வா க³ந்தே⁴ஹி விலிம்பெத்வா தி³ப்³ப³புப்பா²னி பிளந்தி⁴த்வா ததோ அவிதூ³ரே ரஜதபப்³ப³தோ, தஸ்ஸ அந்தோ கனகவிமானங் அத்தி², தஸ்மிங் பாசீனதோ ஸீஸங் கத்வா நிபஜ்ஜாபேஸுங். அத² போ³தி⁴ஸத்தோ ஸேதவரவாரணோ ஹுத்வா ததோ அவிதூ³ரே ஏகோ ஸுவண்ணபப்³ப³தோ, தத்த² சரித்வா ததோ ஓருய்ஹ ரஜதபப்³ப³தங் அபி⁴ருஹித்வா உத்தரதி³ஸதோ ஆக³ம்ம கனகவிமானங் பவிஸித்வா மாதரங் பத³க்கி²ணங் கத்வா த³க்கி²ணபஸ்ஸங் பா²லெத்வா குச்சி²ங் பவிட்ட²ஸதி³ஸோ அஹோஸி.
Paṭisandhiṃ gaṇhanto pana āsāḷhīpuṇṇamāyaṃ uttarāsāḷhanakkhattena aggahesi. Tadā kira mahāmāyā pure puṇṇamāya sattamadivasato paṭṭhāya vigatasurāpānaṃ mālāgandhavibhūsanasampannaṃ nakkhattakīḷaṃ anubhavamānā sattame divase pāto vuṭṭhāya gandhodakena nhāyitvā sabbālaṅkāravibhūsitā varabhojanaṃ bhuñjitvā uposathaṅgāni adhiṭṭhāya sirīgabbhaṃ pavisitvā sirīsayane nipannā niddaṃ okkamamānā idaṃ supinaṃ addasa – ‘‘cattāro kira naṃ mahārājāno sayaneneva saddhiṃ ukkhipitvā anotattadahaṃ netvā ekamantaṃ aṭṭhaṃsu. Atha nesaṃ deviyo āgantvā manussamalaharaṇatthaṃ nhāpetvā dibbavatthaṃ nivāsetvā gandhehi vilimpetvā dibbapupphāni piḷandhitvā tato avidūre rajatapabbato, tassa anto kanakavimānaṃ atthi, tasmiṃ pācīnato sīsaṃ katvā nipajjāpesuṃ. Atha bodhisatto setavaravāraṇo hutvā tato avidūre eko suvaṇṇapabbato, tattha caritvā tato oruyha rajatapabbataṃ abhiruhitvā uttaradisato āgamma kanakavimānaṃ pavisitvā mātaraṃ padakkhiṇaṃ katvā dakkhiṇapassaṃ phāletvā kucchiṃ paviṭṭhasadiso ahosi.
அத² பபு³த்³தா⁴ தே³வீ தங் ஸுபினங் ரஞ்ஞோ ஆரோசேஸி. ராஜா பபா⁴தாய ரத்தியா சதுஸட்டி²மத்தே ப்³ராஹ்மணபாமொக்கே² பக்கோஸாபெத்வா ஹரிதூபலித்தாய லாஜாதீ³ஹி கதமங்க³லஸக்காராய பூ⁴மியா மஹாரஹானி ஆஸனானி பஞ்ஞாபெத்வா தத்த² நிஸின்னானங் ப்³ராஹ்மணானங் ஸப்பிமது⁴ஸக்கராபி⁴ஸங்கா²ரஸ்ஸ வரபாயாஸஸ்ஸ ஸுவண்ணரஜதபாதியோ பூரெத்வா ஸுவண்ணரஜதபாதீதிஹேவ படிகுஜ்ஜித்வா அதா³ஸி, அஞ்ஞேஹி ச அஹதவத்த²கபிலகா³வீதா³னாதீ³ஹி தே ஸந்தப்பேஸி. அத² நேஸங் ஸப்³ப³காமஸந்தப்பிதானங் ஸுபினங் ஆரோசாபெத்வா – ‘‘கிங் ப⁴விஸ்ஸதீ’’தி புச்சி². ப்³ராஹ்மணா ஆஹங்ஸு – ‘‘மா சிந்தயி மஹாராஜ, தே³வியா தே குச்சி²ம்ஹி க³ப்³போ⁴ பதிட்டி²தோ, ஸோ ச கோ² புரிஸக³ப்³போ⁴, ந இத்தி²க³ப்³போ⁴, புத்தோ தே ப⁴விஸ்ஸதி. ஸோ ஸசே அகா³ரங் அஜ்ஜா²வஸிஸ்ஸதி, ராஜா ப⁴விஸ்ஸதி சக்கவத்தீ. ஸசே அகா³ரா நிக்க²ம்ம பப்³ப³ஜிஸ்ஸதி, பு³த்³தோ⁴ ப⁴விஸ்ஸதி லோகே விவட்டச்ச²தோ³’’தி. ஏவங் ஸதோ ஸம்பஜானோ போ³தி⁴ஸத்தோ துஸிதகாயா சவித்வா மாதுகுச்சி²ங் ஓக்கமதி.
Atha pabuddhā devī taṃ supinaṃ rañño ārocesi. Rājā pabhātāya rattiyā catusaṭṭhimatte brāhmaṇapāmokkhe pakkosāpetvā haritūpalittāya lājādīhi katamaṅgalasakkārāya bhūmiyā mahārahāni āsanāni paññāpetvā tattha nisinnānaṃ brāhmaṇānaṃ sappimadhusakkarābhisaṅkhārassa varapāyāsassa suvaṇṇarajatapātiyo pūretvā suvaṇṇarajatapātītiheva paṭikujjitvā adāsi, aññehi ca ahatavatthakapilagāvīdānādīhi te santappesi. Atha nesaṃ sabbakāmasantappitānaṃ supinaṃ ārocāpetvā – ‘‘kiṃ bhavissatī’’ti pucchi. Brāhmaṇā āhaṃsu – ‘‘mā cintayi mahārāja, deviyā te kucchimhi gabbho patiṭṭhito, so ca kho purisagabbho, na itthigabbho, putto te bhavissati. So sace agāraṃ ajjhāvasissati, rājā bhavissati cakkavattī. Sace agārā nikkhamma pabbajissati, buddho bhavissati loke vivaṭṭacchado’’ti. Evaṃ sato sampajāno bodhisatto tusitakāyā cavitvā mātukucchiṃ okkamati.
தத்த² ஸதோ ஸம்பஜானோதி இமினா சதுத்தா²ய க³ப்³பா⁴வக்கந்தியா ஓக்கமதீதி த³ஸ்ஸேதி. சதஸ்ஸோ ஹி க³ப்³பா⁴வக்கந்தியோ.
Tattha sato sampajānoti iminā catutthāya gabbhāvakkantiyā okkamatīti dasseti. Catasso hi gabbhāvakkantiyo.
‘‘சதஸ்ஸோ இமா, ப⁴ந்தே, க³ப்³பா⁴வக்கந்தியோ. இத⁴, ப⁴ந்தே, ஏகச்சோ அஸம்பஜானோ மாதுகுச்சி²ங் ஓக்கமதி, அஸம்பஜானோ மாதுகுச்சி²ஸ்மிங் டா²தி, அஸம்பஜானோ மாதுகுச்சி²ம்ஹா நிக்க²மதி, அயங் பட²மா க³ப்³பா⁴வக்கந்தி.
‘‘Catasso imā, bhante, gabbhāvakkantiyo. Idha, bhante, ekacco asampajāno mātukucchiṃ okkamati, asampajāno mātukucchismiṃ ṭhāti, asampajāno mātukucchimhā nikkhamati, ayaṃ paṭhamā gabbhāvakkanti.
புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி, அஸம்பஜானோ மாதுகுச்சி²ஸ்மிங் டா²தி, அஸம்பஜானோ மாதுகுச்சி²ம்ஹா நிக்க²மதி, அயங் து³தியா க³ப்³பா⁴வக்கந்தி.
Puna caparaṃ, bhante, idhekacco sampajāno mātukucchiṃ okkamati, asampajāno mātukucchismiṃ ṭhāti, asampajāno mātukucchimhā nikkhamati, ayaṃ dutiyā gabbhāvakkanti.
புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி, ஸம்பஜானோ மாதுகுச்சி²ஸ்மிங் டா²தி, அஸம்பஜானோ மாதுகுச்சி²ம்ஹா நிக்க²மதி, அயங் ததியா க³ப்³பா⁴வக்கந்தி.
Puna caparaṃ, bhante, idhekacco sampajāno mātukucchiṃ okkamati, sampajāno mātukucchismiṃ ṭhāti, asampajāno mātukucchimhā nikkhamati, ayaṃ tatiyā gabbhāvakkanti.
புன சபரங், ப⁴ந்தே, இதே⁴கச்சோ ஸம்பஜானோ மாதுகுச்சி²ங் ஓக்கமதி, ஸம்பஜானோ மாதுகுச்சி²ஸ்மிங் டா²தி, ஸம்பஜானோ மாதுகுச்சி²ம்ஹா நிக்க²மதி, அயங் சதுத்தா² க³ப்³பா⁴வக்கந்தீ’’தி (தீ³॰ நி॰ 3.147).
Puna caparaṃ, bhante, idhekacco sampajāno mātukucchiṃ okkamati, sampajāno mātukucchismiṃ ṭhāti, sampajāno mātukucchimhā nikkhamati, ayaṃ catutthā gabbhāvakkantī’’ti (dī. ni. 3.147).
ஏதாஸு பட²மா லோகியமனுஸ்ஸானங் ஹோதி, து³தியா அஸீதிமஹாஸாவகானங், ததியா த்³வின்னங் அக்³க³ஸாவகானங் பச்சேகபோ³தி⁴ஸத்தானஞ்ச. தே கிர கம்மஜவாதேஹி உத்³த⁴ங்பாதா³ அதோ⁴ஸிரா அனேகஸதபோரிஸே பபாதே விய யோனிமுகே² தாளச்சி²க்³க³லேன ஹத்தீ² விய அதிவிய ஸம்பா³தே⁴ன யோனிமுகே²ன நிக்க²மமானா அனந்தங் து³க்க²ங் பாபுணந்தி. தேன நேஸங் ‘‘மயங் நிக்க²மாமா’’தி ஸம்பஜானதா ந ஹோதி. சதுத்தா² ஸப்³ப³ஞ்ஞுபோ³தி⁴ஸத்தானங். தே ஹி மாதுகுச்சி²ஸ்மிங் படிஸந்தி⁴ங் க³ண்ஹந்தாபி ஜானந்தி, தத்த² வஸந்தாபி ஜானந்தி. நிக்க²மனகாலேபி நேஸங் கம்மஜவாதா உத்³த⁴ங்பாதே³ அதோ⁴ஸிரே கத்வா கி²பிதுங் ந ஸக்கொந்தி, த்³வே ஹத்தே² பஸாரெத்வா அக்கீ²னி உம்மீலெத்வா டி²தகாவ நிக்க²மந்தி.
Etāsu paṭhamā lokiyamanussānaṃ hoti, dutiyā asītimahāsāvakānaṃ, tatiyā dvinnaṃ aggasāvakānaṃ paccekabodhisattānañca. Te kira kammajavātehi uddhaṃpādā adhosirā anekasataporise papāte viya yonimukhe tāḷacchiggalena hatthī viya ativiya sambādhena yonimukhena nikkhamamānā anantaṃ dukkhaṃ pāpuṇanti. Tena nesaṃ ‘‘mayaṃ nikkhamāmā’’ti sampajānatā na hoti. Catutthā sabbaññubodhisattānaṃ. Te hi mātukucchismiṃ paṭisandhiṃ gaṇhantāpi jānanti, tattha vasantāpi jānanti. Nikkhamanakālepi nesaṃ kammajavātā uddhaṃpāde adhosire katvā khipituṃ na sakkonti, dve hatthe pasāretvā akkhīni ummīletvā ṭhitakāva nikkhamanti.
201. மாதுகுச்சி²ங் ஓக்கமதீதி எத்த² மாதுகுச்சி²ங் ஓக்கந்தோ ஹோதீதி அத்தோ². ஓக்கந்தே ஹி தஸ்மிங் ஏவங் ஹோதி, ந ஓக்கமமானே. அப்பமாணோதி பு³த்³த⁴ப்பமாணோ, விபுலோதி அத்தோ². உளாரோதி தஸ்ஸேவ வேவசனங். தே³வானுபா⁴வந்தி எத்த² தே³வானங் அயமானுபா⁴வோ – நிவத்த²வத்த²ஸ்ஸ பபா⁴ த்³வாத³ஸ யோஜனானி ப²ரதி, ததா² ஸரீரஸ்ஸ, ததா² அலங்காரஸ்ஸ, ததா² விமானஸ்ஸ, தங் அதிக்கமித்வாதி அத்தோ².
201.Mātukucchiṃ okkamatīti ettha mātukucchiṃ okkanto hotīti attho. Okkante hi tasmiṃ evaṃ hoti, na okkamamāne. Appamāṇoti buddhappamāṇo, vipuloti attho. Uḷāroti tasseva vevacanaṃ. Devānubhāvanti ettha devānaṃ ayamānubhāvo – nivatthavatthassa pabhā dvādasa yojanāni pharati, tathā sarīrassa, tathā alaṅkārassa, tathā vimānassa, taṃ atikkamitvāti attho.
லோகந்தரிகாதி திண்ணங் திண்ணங் சக்கவாளானங் அந்தரா ஏகேகோ லோகந்தரிகா ஹோதி, திண்ணங் ஸகடசக்கானங் பத்தானங் வா அஞ்ஞமஞ்ஞங் ஆஹச்ச ட²பிதானங் மஜ்ஜே² ஓகாஸோ விய. ஸோ பன லோகந்தரிகனிரயோ பரிமாணதோ அட்ட²யோஜனஸஹஸ்ஸோ ஹோதி. அகா⁴தி நிச்சவிவடா. அஸங்வுதாதி ஹெட்டா²பி அப்பதிட்டா². அந்த⁴காராதி தமபூ⁴தா. அந்த⁴காரதிமிஸாதி சக்கு²விஞ்ஞாணுப்பத்தினிவாரணதோ அந்த⁴பா⁴வகரணதிமிஸேன ஸமன்னாக³தா. தத்த² கிர சக்கு²விஞ்ஞாணங் ந ஜாயதி. ஏவங்மஹித்³தி⁴காதி சந்தி³மஸூரியா கிர ஏகப்பஹாரேனேவ தீஸு தீ³பேஸு பஞ்ஞாயந்தி, ஏவங்மஹித்³தி⁴கா. ஏகேகாய தி³ஸாய நவனவயோஜனஸதஸஹஸ்ஸானி அந்த⁴காரங் வித⁴மித்வா ஆலோகங் த³ஸ்ஸெந்தி, ஏவங் மஹானுபா⁴வா. ஆபா⁴ய நானுபொ⁴ந்தீதி அத்தனோ பபா⁴ய நப்பஹொந்தி. தே கிர சக்கவாளபப்³ப³தஸ்ஸ வேமஜ்ஜே²ன சரந்தி, சக்கவாளபப்³ப³தஞ்ச அதிக்கம்ம லோகந்தரிகனிரயோ, தஸ்மா தே தத்த² ஆபா⁴ய நப்பஹொந்தி.
Lokantarikāti tiṇṇaṃ tiṇṇaṃ cakkavāḷānaṃ antarā ekeko lokantarikā hoti, tiṇṇaṃ sakaṭacakkānaṃ pattānaṃ vā aññamaññaṃ āhacca ṭhapitānaṃ majjhe okāso viya. So pana lokantarikanirayo parimāṇato aṭṭhayojanasahasso hoti. Aghāti niccavivaṭā. Asaṃvutāti heṭṭhāpi appatiṭṭhā. Andhakārāti tamabhūtā. Andhakāratimisāti cakkhuviññāṇuppattinivāraṇato andhabhāvakaraṇatimisena samannāgatā. Tattha kira cakkhuviññāṇaṃ na jāyati. Evaṃmahiddhikāti candimasūriyā kira ekappahāreneva tīsu dīpesu paññāyanti, evaṃmahiddhikā. Ekekāya disāya navanavayojanasatasahassāni andhakāraṃ vidhamitvā ālokaṃ dassenti, evaṃ mahānubhāvā. Ābhāyanānubhontīti attano pabhāya nappahonti. Te kira cakkavāḷapabbatassa vemajjhena caranti, cakkavāḷapabbatañca atikkamma lokantarikanirayo, tasmā te tattha ābhāya nappahonti.
யேபி தத்த² ஸத்தாதி யேபி தஸ்மிங் லோகந்தரமஹானிரயே ஸத்தா உபபன்னா. கிங் பன கம்மங் கத்வா தே தத்த² உப்பஜ்ஜந்தீதி? பா⁴ரியங் தா³ருணங் மாதாபிதூனங் த⁴ம்மிகஸமணப்³ராஹ்மணானஞ்ச உபரி அபராத⁴ங் அஞ்ஞஞ்ச தி³வஸே தி³வஸே பாணவதா⁴தி³ஸாஹஸிககம்மங் கத்வா உப்பஜ்ஜந்தி தம்ப³பண்ணிதீ³பே அப⁴யசோரனாக³சோராத³யோ விய. தேஸங் அத்தபா⁴வோ திகா³வுதிகோ ஹோதி, வக்³கு³லீனங் விய தீ³க⁴னகா² ஹொந்தி. தே ருக்கே² வக்³கு³லியோ விய நகே²ஹி சக்கவாளபாதே³ லக்³க³ந்தி. யதா³ பன ஸங்ஸப்பந்தா அஞ்ஞமஞ்ஞஸ்ஸ ஹத்த²பாஸங் க³தா ஹொந்தி, அத² ‘‘ப⁴க்கோ² நோ லத்³தோ⁴’’தி மஞ்ஞமானா தத்த² வாவடா விபரிவத்தித்வா லோகஸந்தா⁴ரகஉத³கே பதந்தி. வாதே பஹரந்தே மது⁴கப²லானி விய சி²ஜ்ஜித்வா உத³கே பதந்தி. பதிதமத்தா ச அச்சந்தகா²ரே உத³கே பிட்ட²பிண்டி³ விய விலீயந்தி.
Yepi tattha sattāti yepi tasmiṃ lokantaramahāniraye sattā upapannā. Kiṃ pana kammaṃ katvā te tattha uppajjantīti? Bhāriyaṃ dāruṇaṃ mātāpitūnaṃ dhammikasamaṇabrāhmaṇānañca upari aparādhaṃ aññañca divase divase pāṇavadhādisāhasikakammaṃ katvā uppajjanti tambapaṇṇidīpe abhayacoranāgacorādayo viya. Tesaṃ attabhāvo tigāvutiko hoti, vaggulīnaṃ viya dīghanakhā honti. Te rukkhe vagguliyo viya nakhehi cakkavāḷapāde lagganti. Yadā pana saṃsappantā aññamaññassa hatthapāsaṃ gatā honti, atha ‘‘bhakkho no laddho’’ti maññamānā tattha vāvaṭā viparivattitvā lokasandhārakaudake patanti. Vāte paharante madhukaphalāni viya chijjitvā udake patanti. Patitamattā ca accantakhāre udake piṭṭhapiṇḍi viya vilīyanti.
அஞ்ஞேபி கிர போ⁴ ஸந்தி ஸத்தாதி – ‘‘யதா² மயங் மஹாது³க்க²ங் அனுப⁴வாம, ஏவங் அஞ்ஞேபி கிர ஸத்தா இத³ங் து³க்க²ங் அனுப⁴வந்தா இதூ⁴பபன்னா’’தி தங் தி³வஸங் பஸ்ஸந்தி. அயங் பன ஓபா⁴ஸோ ஏகயாகு³பானமத்தம்பி ந திட்ட²தி, யாவதா நித்³தா³யித்வா பபு³த்³தோ⁴ ஆரம்மணங் விபா⁴வேதி, தத்தகங் காலங் ஹோதி. தீ³க⁴பா⁴ணகா பன ‘‘அச்ச²ராஸங்கா⁴டமத்தமேவ விஜ்ஜுபா⁴ஸோ விய நிச்ச²ரித்வா கிங் இத³ந்தி ப⁴ணந்தானங்யேவ அந்தரதா⁴யதீ’’தி வத³ந்தி. ஸங்கம்பதீதி ஸமந்ததோ கம்பதி. இதரத்³வயங் புரிமபஸ்ஸேவ வேவசனங். புன அப்பமாணோ சாதிஆதி³ நிக³மனத்த²ங் வுத்தங்.
Aññepi kira bho santi sattāti – ‘‘yathā mayaṃ mahādukkhaṃ anubhavāma, evaṃ aññepi kira sattā idaṃ dukkhaṃ anubhavantā idhūpapannā’’ti taṃ divasaṃ passanti. Ayaṃ pana obhāso ekayāgupānamattampi na tiṭṭhati, yāvatā niddāyitvā pabuddho ārammaṇaṃ vibhāveti, tattakaṃ kālaṃ hoti. Dīghabhāṇakā pana ‘‘accharāsaṅghāṭamattameva vijjubhāso viya niccharitvā kiṃ idanti bhaṇantānaṃyeva antaradhāyatī’’ti vadanti. Saṅkampatīti samantato kampati. Itaradvayaṃ purimapasseva vevacanaṃ. Puna appamāṇo cātiādi nigamanatthaṃ vuttaṃ.
202. சத்தாரோ தே³வபுத்தா சதுத்³தி³ஸங் ஆரக்கா²ய உபக³ச்ச²ந்தீதி எத்த² சத்தாரோதி சதுன்னங் மஹாராஜூனங் வஸேன வுத்தங், த³ஸஸஹஸ்ஸசக்கவாளே பன சத்தாரோ சத்தாரோ கத்வா சத்தாலீஸத³ஸஸஹஸ்ஸா ஹொந்தி. தத்த² இமஸ்மிங் சக்கவாளே மஹாராஜானோ க²க்³க³ஹத்தா² ஆக³ந்த்வா போ³தி⁴ஸத்தஸ்ஸ ஆரக்க²ணத்தா²ய உபக³ந்த்வா ஸிரீக³ப்³ப⁴ங் பவிட்டா², இதரே க³ப்³ப⁴த்³வாரதோ பட்டா²ய அவருத்³த⁴பங்ஸுபிஸாசகாதி³யக்க²க³ணே படிக்கமாபெத்வா யாவ சக்கவாளா ஆரக்க²ங் க³ண்ஹிங்ஸு.
202.Cattāro devaputtā catuddisaṃ ārakkhāya upagacchantīti ettha cattāroti catunnaṃ mahārājūnaṃ vasena vuttaṃ, dasasahassacakkavāḷe pana cattāro cattāro katvā cattālīsadasasahassā honti. Tattha imasmiṃ cakkavāḷe mahārājāno khaggahatthā āgantvā bodhisattassa ārakkhaṇatthāya upagantvā sirīgabbhaṃ paviṭṭhā, itare gabbhadvārato paṭṭhāya avaruddhapaṃsupisācakādiyakkhagaṇe paṭikkamāpetvā yāva cakkavāḷā ārakkhaṃ gaṇhiṃsu.
கிமத்த²ங் பனாயங் ரக்கா² ஆக³தா? நனு படிஸந்தி⁴க்க²ணே கலலகாலதோ பட்டா²ய ஸசேபி கோடிஸதஸஹஸ்ஸா மாரா கோடிஸதஸஹஸ்ஸங் ஸினேருங் உக்கி²பித்வா போ³தி⁴ஸத்தஸ்ஸ வா போ³தி⁴ஸத்தமாதுயா வா அந்தராயகரணத்த²ங் ஆக³ச்செ²ய்யுங், ஸப்³பே³ அந்தராவ அந்தரதா⁴யெய்யுங். வுத்தம்பி சேதங் ப⁴க³வதா ருஹிருப்பாத³வத்து²ஸ்மிங் – ‘‘அட்டா²னமேதங், பி⁴க்க²வே, அனவகாஸோ, யங் பரூபக்கமேன ததா²க³தங் ஜீவிதா வோரோபெய்ய. அனுபக்கமேன, பி⁴க்க²வே, ததா²க³தா பரினிப்³பா³யந்தி. க³ச்ச²த² தும்ஹே, பி⁴க்க²வே, யதா²விஹாரங், அரக்கி²யா, பி⁴க்க²வே, ததா²க³தா’’தி (சூளவ॰ 341). ஏவமேதங், ந பரூபக்கமேன தேஸங் ஜீவிதந்தராயோ அத்தி². ஸந்தி கோ² பன அமனுஸ்ஸா விரூபா து³த்³த³ஸிகா, பே⁴ரவருபா பக்கி²னோ, யேஸங் ரூபங் தி³ஸ்வா ஸத்³த³ங் வா ஸுத்வா போ³தி⁴ஸத்தமாது ப⁴யங் வா ஸந்தாஸோ வா உப்பஜ்ஜெய்ய, தேஸங் நிவாரணத்தா²ய ரக்க²ங் அக்³க³ஹேஸுங். அபிச கோ² போ³தி⁴ஸத்தஸ்ஸ புஞ்ஞதேஜேன ஸஞ்ஜாதகா³ரவா அத்தனோ கா³ரவசோதி³தாபி தே ஏவமகங்ஸு.
Kimatthaṃ panāyaṃ rakkhā āgatā? Nanu paṭisandhikkhaṇe kalalakālato paṭṭhāya sacepi koṭisatasahassā mārā koṭisatasahassaṃ sineruṃ ukkhipitvā bodhisattassa vā bodhisattamātuyā vā antarāyakaraṇatthaṃ āgaccheyyuṃ, sabbe antarāva antaradhāyeyyuṃ. Vuttampi cetaṃ bhagavatā ruhiruppādavatthusmiṃ – ‘‘aṭṭhānametaṃ, bhikkhave, anavakāso, yaṃ parūpakkamena tathāgataṃ jīvitā voropeyya. Anupakkamena, bhikkhave, tathāgatā parinibbāyanti. Gacchatha tumhe, bhikkhave, yathāvihāraṃ, arakkhiyā, bhikkhave, tathāgatā’’ti (cūḷava. 341). Evametaṃ, na parūpakkamena tesaṃ jīvitantarāyo atthi. Santi kho pana amanussā virūpā duddasikā, bheravarupā pakkhino, yesaṃ rūpaṃ disvā saddaṃ vā sutvā bodhisattamātu bhayaṃ vā santāso vā uppajjeyya, tesaṃ nivāraṇatthāya rakkhaṃ aggahesuṃ. Apica kho bodhisattassa puññatejena sañjātagāravā attano gāravacoditāpi te evamakaṃsu.
கிங் பன தே அந்தோக³ப்³ப⁴ங் பவிஸித்வா டி²தா சத்தாரோ மஹாராஜானோ போ³தி⁴ஸத்தமாதுயா அத்தானங் த³ஸ்ஸெந்தி ந த³ஸ்ஸெந்தீதி? நஹானமண்ட³னபோ⁴ஜனாதி³ஸரீரகிச்சகாலே ந த³ஸ்ஸெந்தி, ஸிரீக³ப்³ப⁴ங் பவிஸித்வா வரஸயனே நிபன்னகாலே பன த³ஸ்ஸெந்தி. தத்த² கிஞ்சாபி அமனுஸ்ஸத³ஸ்ஸனங் நாம மனுஸ்ஸானங் ஸப்படிப⁴யங் ஹோதி, போ³தி⁴ஸத்தமாதா பன அத்தனோ சேவ புத்தஸ்ஸ ச புஞ்ஞானுபா⁴வேன தே தி³ஸ்வா ந பா⁴யதி, பகதிஅந்தேபுரபாலகேஸு விய அஸ்ஸா தேஸு சித்தங் உப்பஜ்ஜதி.
Kiṃ pana te antogabbhaṃ pavisitvā ṭhitā cattāro mahārājāno bodhisattamātuyā attānaṃ dassenti na dassentīti? Nahānamaṇḍanabhojanādisarīrakiccakāle na dassenti, sirīgabbhaṃ pavisitvā varasayane nipannakāle pana dassenti. Tattha kiñcāpi amanussadassanaṃ nāma manussānaṃ sappaṭibhayaṃ hoti, bodhisattamātā pana attano ceva puttassa ca puññānubhāvena te disvā na bhāyati, pakatiantepurapālakesu viya assā tesu cittaṃ uppajjati.
203. பகதியா ஸீலவதீதி ஸபா⁴வேனேவ ஸீலஸம்பன்னா. அனுப்பன்னே கிர பு³த்³தே⁴ மனுஸ்ஸா தாபஸபரிப்³பா³ஜகானங் ஸந்திகே வந்தி³த்வா உக்குடிகங் நிஸீதி³த்வா ஸீலங் க³ண்ஹந்தி, போ³தி⁴ஸத்தமாதாபி காலதே³விலஸ்ஸ இஸினோ ஸந்திகே க³ண்ஹாதி. போ³தி⁴ஸத்தே பன குச்சி²க³தே அஞ்ஞஸ்ஸ பாத³மூலே நிஸீதி³துங் நாம ந ஸக்கா, ஸமாஸனே நிஸீதி³த்வா க³ஹிதஸீலம்பி அவஞ்ஞா காரணமத்தங் ஹோதி. தஸ்மா ஸயமேவ ஸீலங் அக்³க³ஹேஸீதி வுத்தங் ஹோதி.
203.Pakatiyāsīlavatīti sabhāveneva sīlasampannā. Anuppanne kira buddhe manussā tāpasaparibbājakānaṃ santike vanditvā ukkuṭikaṃ nisīditvā sīlaṃ gaṇhanti, bodhisattamātāpi kāladevilassa isino santike gaṇhāti. Bodhisatte pana kucchigate aññassa pādamūle nisīdituṃ nāma na sakkā, samāsane nisīditvā gahitasīlampi avaññā kāraṇamattaṃ hoti. Tasmā sayameva sīlaṃ aggahesīti vuttaṃ hoti.
புரிஸேஸூதி போ³தி⁴ஸத்தஸ்ஸ பிதரங் ஆதி³ங் கத்வா கேஸுசி மனுஸ்ஸேஸு புரிஸாதி⁴ப்பாயசித்தங் நுப்பஜ்ஜதி. தஞ்ச கோ² போ³தி⁴ஸத்தே கா³ரவேன, ந பஹீனகிலேஸதாய. போ³தி⁴ஸத்தமாது ரூபங் பன ஸுகுஸலாபி ஸிப்பிகா பொத்த²கம்மாதீ³ஸுபி காதுங் ந ஸக்கொந்தி, தங் தி³ஸ்வா புரிஸஸ்ஸ ராகோ³ நுப்பஜ்ஜதீதி ந ஸக்கா வத்துங். ஸசே பன தங் ரத்தசித்தோ உபஸங்கமிதுகாமோ ஹோதி, பாதா³ ந வஹந்தி, தி³ப்³ப³ஸங்க²லிகா விய ப³ஜ்ஜ²ந்தி. தஸ்மா ‘‘அனதிக்கமனீயா’’திஆதி³ வுத்தங்.
Purisesūti bodhisattassa pitaraṃ ādiṃ katvā kesuci manussesu purisādhippāyacittaṃ nuppajjati. Tañca kho bodhisatte gāravena, na pahīnakilesatāya. Bodhisattamātu rūpaṃ pana sukusalāpi sippikā potthakammādīsupi kātuṃ na sakkonti, taṃ disvā purisassa rāgo nuppajjatīti na sakkā vattuṃ. Sace pana taṃ rattacitto upasaṅkamitukāmo hoti, pādā na vahanti, dibbasaṅkhalikā viya bajjhanti. Tasmā ‘‘anatikkamanīyā’’tiādi vuttaṃ.
பஞ்சன்னங் காமகு³ணானந்தி புப்³பே³ ‘‘காமகு³ணூபஸங்ஹித’’ந்தி புரிஸாதி⁴ப்பாயவஸேன வத்து²படிக்கே²போ கதி²தோ, இத⁴ ஆரம்மணப்படிலாபோ⁴ த³ஸ்ஸிதோ. ததா³ கிர ‘‘தே³வியா ஏவரூபோ புத்தோ குச்சி²ஸ்மிங் உப்பன்னோ’’தி, ஸுத்வா ஸமந்ததோ ராஜானோ மஹக்³க⁴ஆப⁴ரணதூரியாதி³வஸேன பஞ்சத்³வாராரம்மணவத்து²பூ⁴தங் பண்ணாகாரங் பேஸெந்தி, போ³தி⁴ஸத்தஸ்ஸ ச போ³தி⁴ஸத்தமாதுயா ச கதகம்மஸ்ஸ உஸ்ஸன்னத்தா லாப⁴ஸக்காரஸ்ஸ பமாணபரிச்சே²தோ³ நாம நத்தி².
Pañcannaṃ kāmaguṇānanti pubbe ‘‘kāmaguṇūpasaṃhita’’nti purisādhippāyavasena vatthupaṭikkhepo kathito, idha ārammaṇappaṭilābho dassito. Tadā kira ‘‘deviyā evarūpo putto kucchismiṃ uppanno’’ti, sutvā samantato rājāno mahagghaābharaṇatūriyādivasena pañcadvārārammaṇavatthubhūtaṃ paṇṇākāraṃ pesenti, bodhisattassa ca bodhisattamātuyā ca katakammassa ussannattā lābhasakkārassa pamāṇaparicchedo nāma natthi.
204. அகிலந்தகாயாதி யதா² அஞ்ஞா இத்தி²யோ க³ப்³ப⁴பா⁴ரேன கிலமந்தி, ஹத்த²பாதா³ உத்³து⁴மாதகாதீ³னி பாபுணந்தி, ந ஏவங் தஸ்ஸா கோசி கிலமதோ² அஹோஸி. திரோகுச்சி²க³தந்தி அந்தோகுச்சி²க³தங். கலலாதி³காலங் அதிக்கமித்வா ஸஞ்ஜாதஅங்க³பச்சங்க³ங் அஹீனிந்த்³ரியபா⁴வங் உபக³தங்யேவ பஸ்ஸதி. கிமத்த²ங் பஸ்ஸதி? ஸுக²வாஸத்த²ங். யதே²வ ஹி மாதா புத்தேன ஸத்³தி⁴ங் நிஸின்னா வா நிபன்னா வா ‘‘ஹத்த²ங் வா பாத³ங் வா ஓலம்ப³ந்தங் உக்கி²பித்வா ஸண்ட²பெஸ்ஸாமீ’’தி ஸுக²வாஸத்த²ங் புத்தங் ஓலோகேதி, ஏவங் போ³தி⁴ஸத்தமாதாபி யங் தங் மாது உட்டா²னக³மனபரிவத்தனநிஸஜ்ஜாதீ³ஸு உண்ஹஸீதலோணிகதித்தககடுகாஹாரஅஜ்ஜோ²ஹரணகாலேஸு ச க³ப்³ப⁴ஸ்ஸ து³க்க²ங் உப்பஜ்ஜதி, அத்தி² நு கோ² மே தங் புத்தஸ்ஸாதி ஸுக²வாஸத்த²ங் போ³தி⁴ஸத்தங் ஓலோகயமானா பல்லங்கங் ஆபு⁴ஜித்வா நிஸின்னங் போ³தி⁴ஸத்தங் பஸ்ஸதி. யதா² ஹி அஞ்ஞே அந்தோகுச்சி²க³தா பக்காஸயங் அஜ்ஜொ²த்த²ரித்வா ஆமாஸயங் உக்கி²பித்வா உத³ரபடலங் பிட்டி²தோ கத்வா பிட்டி²கண்டகங் நிஸ்ஸாய உக்குடிகா த்³வீஸு முட்டீ²ஸு ஹனுகங் ட²பெத்வா தே³வே வஸ்ஸந்தே ருக்க²ஸுஸிரே மக்கடா விய நிஸீத³ந்தி, ந ஏவங் போ³தி⁴ஸத்தோ. போ³தி⁴ஸத்தோ பன பிட்டி²கண்டகங் பிட்டி²தோ கத்வா த⁴ம்மாஸனே த⁴ம்மகதி²கோ விய பல்லங்கங் ஆபு⁴ஜித்வா புரத்தா²பி⁴முகோ² நிஸீத³தி. புப்³பே³ கதகம்மங் பனஸ்ஸா வத்து²ங் ஸோதே⁴தி, ஸுத்³தே⁴ வத்து²ம்ஹி ஸுகு²மச்ச²விலக்க²ணங் நிப்³ப³த்ததி . அத² நங் குச்சி²க³தங் தசோ படிச்சா²தே³துங் ந ஸக்கோதி, ஓலோகெந்தியா ப³ஹி டி²தோ விய பஞ்ஞாயதி. தமத்த²ங் உபமாய விபா⁴வெந்தோ ஸெய்யதா²பீதிஆதி³மாஹ. போ³தி⁴ஸத்தோ பன அந்தோகுச்சி²க³தோ மாதரங் ந பஸ்ஸதி. ந ஹி அந்தோகுச்சி²யங் சக்கு²விஞ்ஞாணங் உப்பஜ்ஜதி.
204.Akilantakāyāti yathā aññā itthiyo gabbhabhārena kilamanti, hatthapādā uddhumātakādīni pāpuṇanti, na evaṃ tassā koci kilamatho ahosi. Tirokucchigatanti antokucchigataṃ. Kalalādikālaṃ atikkamitvā sañjātaaṅgapaccaṅgaṃ ahīnindriyabhāvaṃ upagataṃyeva passati. Kimatthaṃ passati? Sukhavāsatthaṃ. Yatheva hi mātā puttena saddhiṃ nisinnā vā nipannā vā ‘‘hatthaṃ vā pādaṃ vā olambantaṃ ukkhipitvā saṇṭhapessāmī’’ti sukhavāsatthaṃ puttaṃ oloketi, evaṃ bodhisattamātāpi yaṃ taṃ mātu uṭṭhānagamanaparivattananisajjādīsu uṇhasītaloṇikatittakakaṭukāhāraajjhoharaṇakālesu ca gabbhassa dukkhaṃ uppajjati, atthi nu kho me taṃ puttassāti sukhavāsatthaṃ bodhisattaṃ olokayamānā pallaṅkaṃ ābhujitvā nisinnaṃ bodhisattaṃ passati. Yathā hi aññe antokucchigatā pakkāsayaṃ ajjhottharitvā āmāsayaṃ ukkhipitvā udarapaṭalaṃ piṭṭhito katvā piṭṭhikaṇṭakaṃ nissāya ukkuṭikā dvīsu muṭṭhīsu hanukaṃ ṭhapetvā deve vassante rukkhasusire makkaṭā viya nisīdanti, na evaṃ bodhisatto. Bodhisatto pana piṭṭhikaṇṭakaṃ piṭṭhito katvā dhammāsane dhammakathiko viya pallaṅkaṃ ābhujitvā puratthābhimukho nisīdati. Pubbe katakammaṃ panassā vatthuṃ sodheti, suddhe vatthumhi sukhumacchavilakkhaṇaṃ nibbattati . Atha naṃ kucchigataṃ taco paṭicchādetuṃ na sakkoti, olokentiyā bahi ṭhito viya paññāyati. Tamatthaṃ upamāya vibhāvento seyyathāpītiādimāha. Bodhisatto pana antokucchigato mātaraṃ na passati. Na hi antokucchiyaṃ cakkhuviññāṇaṃ uppajjati.
205. காலங் கரோதீதி ந விஜாதபா⁴வபச்சயா, ஆயுபரிக்க²யேனேவ. போ³தி⁴ஸத்தேன வஸிதட்டா²னஞ்ஹி சேதியகுடிஸதி³ஸங் ஹோதி அஞ்ஞேஸங் அபரிபோ⁴க³ங், ந ச ஸக்கா போ³தி⁴ஸத்தமாதரங் அபனெத்வா அஞ்ஞங் அக்³க³மஹேஸிட்டா²னே ட²பேதுந்தி தத்தகங்யேவ போ³தி⁴ஸத்தமாது ஆயுப்பமாணங் ஹோதி, தஸ்மா ததா³ காலங் கரோதி. கதரஸ்மிங் பன வயே காலங் கரோதீதி? மஜ்ஜி²மவயே. பட²மவயஸ்மிஞ்ஹி ஸத்தானங் அத்தபா⁴வே ச²ந்த³ராகோ³ ப³லவா ஹோதி, தேன ததா³ ஸஞ்ஜாதக³ப்³பா⁴ இத்தீ² தங் க³ப்³ப⁴ங் அனுரக்கி²துங் ந ஸக்கொந்தி, க³ப்³போ⁴ ப³ஹ்வாபா³தோ⁴ ஹோதி. மஜ்ஜி²மவயஸ்ஸ பன த்³வே கொட்டா²ஸே அதிக்கம்ம ததியகொட்டா²ஸே வத்து²ங் விஸத³ங் ஹோதி, விஸதே³ வத்து²ம்ஹி நிப்³ப³த்தா தா³ரகா அரோகா³ ஹொந்தி. தஸ்மா போ³தி⁴ஸத்தமாதாபி பட²மவயே ஸம்பத்திங் அனுப⁴வித்வா மஜ்ஜி²மவயஸ்ஸ ததியகொட்டா²ஸே விஜாயித்வா காலங் கரோதி.
205.Kālaṃkarotīti na vijātabhāvapaccayā, āyuparikkhayeneva. Bodhisattena vasitaṭṭhānañhi cetiyakuṭisadisaṃ hoti aññesaṃ aparibhogaṃ, na ca sakkā bodhisattamātaraṃ apanetvā aññaṃ aggamahesiṭṭhāne ṭhapetunti tattakaṃyeva bodhisattamātu āyuppamāṇaṃ hoti, tasmā tadā kālaṃ karoti. Katarasmiṃ pana vaye kālaṃ karotīti? Majjhimavaye. Paṭhamavayasmiñhi sattānaṃ attabhāve chandarāgo balavā hoti, tena tadā sañjātagabbhā itthī taṃ gabbhaṃ anurakkhituṃ na sakkonti, gabbho bahvābādho hoti. Majjhimavayassa pana dve koṭṭhāse atikkamma tatiyakoṭṭhāse vatthuṃ visadaṃ hoti, visade vatthumhi nibbattā dārakā arogā honti. Tasmā bodhisattamātāpi paṭhamavaye sampattiṃ anubhavitvā majjhimavayassa tatiyakoṭṭhāse vijāyitvā kālaṃ karoti.
நவ வா த³ஸ வாதி எத்த² வா-ஸத்³தே³ன விகப்பனவஸேன ஸத்த வா அட்ட² வா ஏகாத³ஸ வா த்³வாத³ஸ வாதி ஏவமாதீ³னம்பி ஸங்க³ஹோ வேதி³தப்³போ³. தத்த² ஸத்தமாஸஜாதோ ஜீவதி, ஸீதுண்ஹக்க²மோ பன ந ஹோதி. அட்ட²மாஸஜாதோ ந ஜீவதி, ஸேஸா ஜீவந்தி.
Nava vā dasa vāti ettha vā-saddena vikappanavasena satta vā aṭṭha vā ekādasa vā dvādasa vāti evamādīnampi saṅgaho veditabbo. Tattha sattamāsajāto jīvati, sītuṇhakkhamo pana na hoti. Aṭṭhamāsajāto na jīvati, sesā jīvanti.
டி²தாவாதி டி²தாவ ஹுத்வா. மஹாமாயாபி தே³வீ உபவிஜஞ்ஞா ஞாதிகுலக⁴ரங் க³மிஸ்ஸாமீதி ரஞ்ஞோ ஆரோசேஸி. ராஜா கபிலவத்து²தோ தே³வத³ஹனக³ரகா³மிமக்³க³ங் அலங்காராபெத்வா தே³விங் ஸுவண்ணஸிவிகாய நிஸீதா³பேஸி. ஸகலனக³ரவாஸினோ ஸக்யா பரிவாரெத்வா க³ந்த⁴மாலாதீ³ஹி பூஜயமானா தே³விங் க³ஹெத்வா பாயிங்ஸு. ஸா தே³வத³ஹனக³ரஸ்ஸ அவிதூ³ரே லும்பி³னிஸாலவனுய்யானங் தி³ஸ்வா உய்யானவிசரணத்தா²ய சித்தங் உப்பாதெ³த்வா ரஞ்ஞோ ஸஞ்ஞங் அதா³ஸி. ராஜா உய்யானங் படிஜக்³கா³பெத்வா ஆரக்க²ங் ஸங்வித³ஹாபேஸி. தே³வியா உய்யானங் பவிட்ட²மத்தாய காயது³ப்³ப³ல்யங் அஹோஸி, அத²ஸ்ஸா மங்க³லஸாலமூலே ஸிரீஸயனங் பஞ்ஞாபெத்வா ஸாணியா பரிக்கி²பிங்ஸு. ஸா அந்தோஸாணிங் பவிஸித்வா ஸாலஸாக²ங் ஹத்தே²ன க³ஹெத்வா அட்டா²ஸி. அத²ஸ்ஸா தாவதே³வ க³ப்³ப⁴வுட்டா²னங் அஹோஸி.
Ṭhitāvāti ṭhitāva hutvā. Mahāmāyāpi devī upavijaññā ñātikulagharaṃ gamissāmīti rañño ārocesi. Rājā kapilavatthuto devadahanagaragāmimaggaṃ alaṅkārāpetvā deviṃ suvaṇṇasivikāya nisīdāpesi. Sakalanagaravāsino sakyā parivāretvā gandhamālādīhi pūjayamānā deviṃ gahetvā pāyiṃsu. Sā devadahanagarassa avidūre lumbinisālavanuyyānaṃ disvā uyyānavicaraṇatthāya cittaṃ uppādetvā rañño saññaṃ adāsi. Rājā uyyānaṃ paṭijaggāpetvā ārakkhaṃ saṃvidahāpesi. Deviyā uyyānaṃ paviṭṭhamattāya kāyadubbalyaṃ ahosi, athassā maṅgalasālamūle sirīsayanaṃ paññāpetvā sāṇiyā parikkhipiṃsu. Sā antosāṇiṃ pavisitvā sālasākhaṃ hatthena gahetvā aṭṭhāsi. Athassā tāvadeva gabbhavuṭṭhānaṃ ahosi.
தே³வா நங் பட²மங் படிக்³க³ண்ஹந்தீதி கீ²ணாஸவா ஸுத்³தா⁴வாஸப்³ரஹ்மானோ படிக்³க³ண்ஹந்தி. கத²ங்? ஸூதிவேஸங் க³ண்ஹித்வாதி ஏகே. தங் பன படிக்கி²பித்வா இத³ங் வுத்தங் – ததா³ போ³தி⁴ஸத்தமாதா ஸுவண்ணக²சிதங் வத்த²ங் நிவாஸெத்வா மச்ச²க்கி²ஸதி³ஸங் து³கூலபடங் யாவ பாத³ந்தாவ பாருபித்வா அட்டா²ஸி. அத²ஸ்ஸா ஸல்லஹுகங் க³ப்³ப⁴வுட்டா²னங் அஹோஸி த⁴ம்மகரணதோ உத³கனிக்க²மனஸதி³ஸங். அத² தே பகதிப்³ரஹ்மவேஸேனேவ உபஸங்கமித்வா பட²மங் ஸுவண்ணஜாலேன படிக்³க³ஹேஸுங். தேஸங் ஹத்த²தோ மனுஸ்ஸா து³கூலசும்ப³டகேன படிக்³க³ஹேஸுங். தேன வுத்தங் – ‘‘தே³வா நங் பட²மங் படிக்³க³ண்ஹந்தி பச்சா² மனுஸ்ஸா’’தி.
Devā naṃ paṭhamaṃ paṭiggaṇhantīti khīṇāsavā suddhāvāsabrahmāno paṭiggaṇhanti. Kathaṃ? Sūtivesaṃ gaṇhitvāti eke. Taṃ pana paṭikkhipitvā idaṃ vuttaṃ – tadā bodhisattamātā suvaṇṇakhacitaṃ vatthaṃ nivāsetvā macchakkhisadisaṃ dukūlapaṭaṃ yāva pādantāva pārupitvā aṭṭhāsi. Athassā sallahukaṃ gabbhavuṭṭhānaṃ ahosi dhammakaraṇato udakanikkhamanasadisaṃ. Atha te pakatibrahmaveseneva upasaṅkamitvā paṭhamaṃ suvaṇṇajālena paṭiggahesuṃ. Tesaṃ hatthato manussā dukūlacumbaṭakena paṭiggahesuṃ. Tena vuttaṃ – ‘‘devā naṃ paṭhamaṃ paṭiggaṇhanti pacchā manussā’’ti.
206. சத்தாரோ நங் தே³வபுத்தாதி சத்தாரோ மஹாராஜானோ. படிக்³க³ஹெத்வாதி அஜினப்பவேணியா படிக்³க³ஹெத்வா. மஹேஸக்கோ²தி மஹாதேஜோ மஹாயஸோ லக்க²ணஸம்பன்னோதி அத்தோ².
206.Cattāro naṃ devaputtāti cattāro mahārājāno. Paṭiggahetvāti ajinappaveṇiyā paṭiggahetvā. Mahesakkhoti mahātejo mahāyaso lakkhaṇasampannoti attho.
விஸதோ³வ நிக்க²மதீதி யதா² அஞ்ஞே ஸத்தா யோனிமக்³கே³ லக்³க³ந்தா ப⁴க்³க³விப⁴க்³கா³ நிக்க²மந்தி, ந ஏவங் நிக்க²மதி, அலக்³கோ³ ஹுத்வா நிக்க²மதீதி அத்தோ². உதே³னாதி உத³கேன. கேனசி அஸுசினாதி யதா² அஞ்ஞே ஸத்தா கம்மஜவாதேஹி உத்³த⁴ங்பாதா³ அதோ⁴ஸிரா யோனிமக்³கே³ பக்கி²த்தா ஸதபோரிஸனரகபபாதங் பதந்தா விய தாளச்சி²த்³தே³ன நிக்கட்³டி⁴யமானா ஹத்தீ² விய மஹாது³க்க²ங் அனுப⁴வந்தா நானாஅஸுசிமக்கி²தாவ நிக்க²மந்தி, ந ஏவங் போ³தி⁴ஸத்தோ. போ³தி⁴ஸத்தஞ்ஹி கம்மஜவாதா உத்³த⁴ங்பாத³ங் அதோ⁴ஸிரங் காதுங் ந ஸக்கொந்தி. ஸோ த⁴ம்மாஸனதோ ஓதரந்தோ த⁴ம்மகதி²கோ விய நிஸ்ஸேணிதோ ஓதரந்தோ புரிஸோ விய ச த்³வே ஹத்தே² ச பாதே³ ச பஸாரெத்வா டி²தகோவ மாதுகுச்சி²ஸம்ப⁴வேன கேனசி அஸுசினா அமக்கி²தோவ நிக்க²மதி.
Visadova nikkhamatīti yathā aññe sattā yonimagge laggantā bhaggavibhaggā nikkhamanti, na evaṃ nikkhamati, alaggo hutvā nikkhamatīti attho. Udenāti udakena. Kenaci asucināti yathā aññe sattā kammajavātehi uddhaṃpādā adhosirā yonimagge pakkhittā sataporisanarakapapātaṃ patantā viya tāḷacchiddena nikkaḍḍhiyamānā hatthī viya mahādukkhaṃ anubhavantā nānāasucimakkhitāva nikkhamanti, na evaṃ bodhisatto. Bodhisattañhi kammajavātā uddhaṃpādaṃ adhosiraṃ kātuṃ na sakkonti. So dhammāsanato otaranto dhammakathiko viya nisseṇito otaranto puriso viya ca dve hatthe ca pāde ca pasāretvā ṭhitakova mātukucchisambhavena kenaci asucinā amakkhitova nikkhamati.
உத³கஸ்ஸ தா⁴ராதி உத³கவட்டியோ. தாஸு ஸீதா ஸுவண்ணகடாஹே பததி, உண்ஹா ரஜதகடாஹே. இத³ஞ்ச பத²வீதலே கேனசி அஸுசினா அஸம்மிஸ்ஸங் தேஸங் பானீயபரிபோ⁴ஜனீயஉத³கஞ்சேவ அஞ்ஞேஹி அஸாதா⁴ரணங் கீளனஉத³கஞ்ச த³ஸ்ஸேதுங் வுத்தங். அஞ்ஞஸ்ஸ பன ஸுவண்ணரஜதக⁴டேஹி ஆஹரியமானஉத³கஸ்ஸ சேவ ஹங்ஸவட்டகாதி³பொக்க²ரணிக³தஸ்ஸ ச உத³கஸ்ஸ பரிச்சே²தோ³ நத்தி².
Udakassa dhārāti udakavaṭṭiyo. Tāsu sītā suvaṇṇakaṭāhe patati, uṇhā rajatakaṭāhe. Idañca pathavītale kenaci asucinā asammissaṃ tesaṃ pānīyaparibhojanīyaudakañceva aññehi asādhāraṇaṃ kīḷanaudakañca dassetuṃ vuttaṃ. Aññassa pana suvaṇṇarajataghaṭehi āhariyamānaudakassa ceva haṃsavaṭṭakādipokkharaṇigatassa ca udakassa paricchedo natthi.
207. ஸம்பதிஜாதோதி முஹுத்தஜாதோ. பாளியங் பன மாதுகுச்சி²தோ நிக்க²ந்தமத்தோ விய த³ஸ்ஸிதோ, ந பன ஏவங் த³ட்ட²ப்³ப³ங். நிக்க²ந்தமத்தஞ்ஹி தங் பட²மங் ப்³ரஹ்மானோ ஸுவண்ணஜாலேன படிக்³க³ண்ஹிங்ஸு, தேஸங் ஹத்த²தோ சத்தாரோ மஹாராஜானோ மங்க³லஸம்மதாய ஸுக²ஸம்ப²ஸ்ஸாய அஜினப்பவேணியா, தேஸங் ஹத்த²தோ மனுஸ்ஸா து³கூலசும்ப³டகேன, மனுஸ்ஸானங் ஹத்த²தோ முச்சித்வா பத²வியங் பதிட்டி²தோ.
207.Sampatijātoti muhuttajāto. Pāḷiyaṃ pana mātukucchito nikkhantamatto viya dassito, na pana evaṃ daṭṭhabbaṃ. Nikkhantamattañhi taṃ paṭhamaṃ brahmāno suvaṇṇajālena paṭiggaṇhiṃsu, tesaṃ hatthato cattāro mahārājāno maṅgalasammatāya sukhasamphassāya ajinappaveṇiyā, tesaṃ hatthato manussā dukūlacumbaṭakena, manussānaṃ hatthato muccitvā pathaviyaṃ patiṭṭhito.
ஸேதம்ஹி ச²த்தே அனுதா⁴ரியமானேதி தி³ப்³ப³ஸேதச்ச²த்தே அனுதா⁴ரியமானே. எத்த² ச ச²த்தஸ்ஸ பரிவாரானி க²க்³கா³தீ³னி பஞ்ச ராஜககுத⁴ப⁴ண்டா³னிபி ஆக³தானேவ. பாளியங் பன ராஜக³மனே ராஜா விய ச²த்தமேவ வுத்தங். தேஸு ச²த்தமேவ பஞ்ஞாயதி, ந ச²த்தக்³கா³ஹகா. ததா² க²க்³க³-தாலவண்ட-மோரஹத்த²க-வாளபீ³ஜனி-உண்ஹீஸமத்தாயேவ பஞ்ஞாயந்தி, ந தேஸங் கா³ஹகா. ஸப்³பா³னி கிர தானி அதி³ஸ்ஸமானரூபா தே³வதா க³ண்ஹிங்ஸு. வுத்தம்பி சேதங் –
Setamhi chatte anudhāriyamāneti dibbasetacchatte anudhāriyamāne. Ettha ca chattassa parivārāni khaggādīni pañca rājakakudhabhaṇḍānipi āgatāneva. Pāḷiyaṃ pana rājagamane rājā viya chattameva vuttaṃ. Tesu chattameva paññāyati, na chattaggāhakā. Tathā khagga-tālavaṇṭa-morahatthaka-vāḷabījani-uṇhīsamattāyeva paññāyanti, na tesaṃ gāhakā. Sabbāni kira tāni adissamānarūpā devatā gaṇhiṃsu. Vuttampi cetaṃ –
‘‘அனேகஸாக²ஞ்ச ஸஹஸ்ஸமண்ட³லங்,
‘‘Anekasākhañca sahassamaṇḍalaṃ,
ச²த்தங் மரூ தா⁴ரயுமந்தலிக்கே²;
Chattaṃ marū dhārayumantalikkhe;
ஸுவண்ணத³ண்டா³ விபதந்தி சாமரா,
Suvaṇṇadaṇḍā vipatanti cāmarā,
ந தி³ஸ்ஸரே சாமரச²த்தகா³ஹகா’’தி. (ஸு॰ நி॰ 693);
Na dissare cāmarachattagāhakā’’ti. (su. ni. 693);
ஸப்³பா³ ச தி³ஸாதி இத³ங் ஸத்தபத³வீதிஹாரூபரி டி²தஸ்ஸ விய ஸப்³ப³தி³ஸானுவிலோகனங் வுத்தங், ந கோ² பனேவங் த³ட்ட²ப்³ப³ங். மஹாஸத்தோ ஹி மனுஸ்ஸானங் ஹத்த²தோ முச்சித்வா புரத்தி²மதி³ஸங் ஓலோகேஸி, அனேகசக்கவாளஸஹஸ்ஸானி ஏகங்க³ணானி அஹேஸுங். தத்த² தே³வமனுஸ்ஸா க³ந்த⁴மாலாதீ³ஹி பூஜயமானா – ‘‘மஹாபுரிஸ இத⁴ தும்ஹேஹி ஸதி³ஸோபி நத்தி², குதோ உத்தரிதரோ’’தி ஆஹங்ஸு. ஏவங் சதஸ்ஸோ தி³ஸா, சதஸ்ஸோ அனுதி³ஸா, ஹெட்டா², உபரீதி த³ஸபி தி³ஸா அனுவிலோகெத்வா அத்தனா ஸதி³ஸங் அதி³ஸ்வா அயங் உத்தரா தி³ஸாதி ஸத்தபத³வீதிஹாரேன அக³மாஸீதி ஏவமெத்த² அத்தோ² த³ட்ட²ப்³போ³. ஆஸபி⁴ந்தி உத்தமங். அக்³கோ³தி கு³ணேஹி ஸப்³ப³பட²மோ. இதரானி த்³வே பதா³னி ஏதஸ்ஸேவ வேவசனானி. அயமந்திமா ஜாதி, நத்தி² தா³னி புனப்³ப⁴வோதி பத³த்³வயேன இமஸ்மிங் அத்தபா⁴வே பத்தப்³ப³ங் அரஹத்தங் ப்³யாகாஸி.
Sabbā ca disāti idaṃ sattapadavītihārūpari ṭhitassa viya sabbadisānuvilokanaṃ vuttaṃ, na kho panevaṃ daṭṭhabbaṃ. Mahāsatto hi manussānaṃ hatthato muccitvā puratthimadisaṃ olokesi, anekacakkavāḷasahassāni ekaṅgaṇāni ahesuṃ. Tattha devamanussā gandhamālādīhi pūjayamānā – ‘‘mahāpurisa idha tumhehi sadisopi natthi, kuto uttaritaro’’ti āhaṃsu. Evaṃ catasso disā, catasso anudisā, heṭṭhā, uparīti dasapi disā anuviloketvā attanā sadisaṃ adisvā ayaṃ uttarā disāti sattapadavītihārena agamāsīti evamettha attho daṭṭhabbo. Āsabhinti uttamaṃ. Aggoti guṇehi sabbapaṭhamo. Itarāni dve padāni etasseva vevacanāni. Ayamantimā jāti, natthi dāni punabbhavoti padadvayena imasmiṃ attabhāve pattabbaṃ arahattaṃ byākāsi.
எத்த² ச ஸமேஹி பாதே³ஹி பத²வியங் பதிட்டா²னங் சதுஇத்³தி⁴பாத³படிலாப⁴ஸ்ஸ புப்³ப³னிமித்தங், உத்தராபி⁴முக²பா⁴வோ மஹாஜனங் அஜ்ஜொ²த்த²ரித்வா அபி⁴ப⁴வித்வா க³மனஸ்ஸ புப்³ப³னிமித்தங் , ஸத்தபத³க³மனங் ஸத்தபொ³ஜ்ஜ²ங்க³ரதனபடிலாப⁴ஸ்ஸ புப்³ப³னிமித்தங், தி³ப்³ப³ஸேதச்ச²த்ததா⁴ரணங் விமுத்திச்ச²த்தபடிலாப⁴ஸ்ஸ புப்³ப³னிமித்தங், பஞ்சராஜககுத⁴ப⁴ண்டா³னி பஞ்சஹி விமுத்தீஹி விமுச்சனஸ்ஸ புப்³ப³னிமித்தங், தி³ஸானுவிலோகனங் அனாவரணஞாணபடிலாப⁴ஸ்ஸ புப்³ப³னிமித்தங், ஆஸபீ⁴வாசாபா⁴ஸனங் அப்படிவத்தியத⁴ம்மசக்கப்பவத்தனஸ்ஸ புப்³ப³னிமித்தங். ‘‘அயமந்திமா ஜாதீ’’தி ஸீஹனாதோ³ அனுபாதி³ஸேஸாய நிப்³பா³னதா⁴துயா பரினிப்³பா³னஸ்ஸ புப்³ப³னிமித்தந்தி வேதி³தப்³ப³ங். இமே வாரா பாளியங் ஆக³தா, ஸம்ப³ஹுலவாரோ பன ஆக³தோ, ஆஹரித்வா தீ³பேதப்³போ³.
Ettha ca samehi pādehi pathaviyaṃ patiṭṭhānaṃ catuiddhipādapaṭilābhassa pubbanimittaṃ, uttarābhimukhabhāvo mahājanaṃ ajjhottharitvā abhibhavitvā gamanassa pubbanimittaṃ , sattapadagamanaṃ sattabojjhaṅgaratanapaṭilābhassa pubbanimittaṃ, dibbasetacchattadhāraṇaṃ vimutticchattapaṭilābhassa pubbanimittaṃ, pañcarājakakudhabhaṇḍāni pañcahi vimuttīhi vimuccanassa pubbanimittaṃ, disānuvilokanaṃ anāvaraṇañāṇapaṭilābhassa pubbanimittaṃ, āsabhīvācābhāsanaṃ appaṭivattiyadhammacakkappavattanassa pubbanimittaṃ. ‘‘Ayamantimā jātī’’ti sīhanādo anupādisesāya nibbānadhātuyā parinibbānassa pubbanimittanti veditabbaṃ. Ime vārā pāḷiyaṃ āgatā, sambahulavāro pana āgato, āharitvā dīpetabbo.
மஹாபுரிஸஸ்ஸ ஹி ஜாததி³வஸே த³ஸஸஹஸ்ஸிலோகதா⁴து கம்பி. த³ஸஸஹஸ்ஸிலோகதா⁴தும்ஹி தே³வதா ஏகசக்கவாளே ஸன்னிபதிங்ஸு. பட²மங் தே³வா படிக்³க³ஹிங்ஸு, பச்சா² மனுஸ்ஸா. தந்திப³த்³தா⁴ வீணா சம்மப³த்³தா⁴ பே⁴ரியோ ச கேனசி அவாதி³தா ஸயமேவ வஜ்ஜிங்ஸு, மனுஸ்ஸானங் அந்து³ப³ந்த⁴னாதீ³னி க²ண்டா³க²ண்ட³ங் பி⁴ஜ்ஜிங்ஸு. ஸப்³ப³ரோகா³ அம்பி³லேன தோ⁴ததம்ப³மலங் விய விக³ச்சி²ங்ஸு, ஜச்சந்தா⁴ ரூபானி பஸ்ஸிங்ஸு. ஜச்சப³தி⁴ரா ஸத்³த³ங் ஸுணிங்ஸு, பீட²ஸப்பீ ஜவனஸம்பன்னா அஹேஸுங், ஜாதிஜளானம்பி ஏளமூகா³னங் ஸதி பதிட்டா²ஸி, விதே³ஸே பக்க²ந்த³னாவா ஸுபட்டனங் பாபுணிங்ஸு, ஆகாஸட்ட²கபூ⁴மட்ட²கரதனானி ஸகதேஜோபா⁴ஸிதானி அஹேஸுங், வேரினோ மெத்தசித்தங் படிலபி⁴ங்ஸு, அவீசிம்ஹி அக்³கி³ நிப்³பா³யி. லோகந்தரே ஆலோகோ உத³பாதி³, நதீ³ஸு ஜலங் ந பவத்தி, மஹாஸமுத்³தே³ஸு மது⁴ரஸதி³ஸங் உத³கங் அஹோஸி, வாதோ ந வாயி, ஆகாஸபப்³ப³தருக்க²க³தா ஸகுணா ப⁴ஸ்ஸித்வா பத²வீக³தா அஹேஸுங், சந்தோ³ அதிரோசி, ஸூரியோ ந உண்ஹோ ந ஸீதலோ நிம்மலோ உதுஸம்பன்னோ அஹோஸி, தே³வதா அத்தனோ அத்தனோ விமானத்³வாரே ட²த்வா அப்போ²டனஸேளனசேலுக்கே²பாதீ³ஹி மஹாகீளங் கீளிங்ஸு, சாதுத்³தீ³பிகமஹாமேகோ⁴ வஸ்ஸி, மஹாஜனங் நேவ கு²தா³ ந பிபாஸா பீளேஸி, த்³வாரகவாடானி ஸயமேவ விவரிங்ஸு, புப்பூ²பக³ப²லூபகா³ ருக்கா² புப்ப²ப²லானி க³ண்ஹிங்ஸு, த³ஸஸஹஸ்ஸிலோகதா⁴து ஏகத்³த⁴ஜமாலா அஹோஸீதி.
Mahāpurisassa hi jātadivase dasasahassilokadhātu kampi. Dasasahassilokadhātumhi devatā ekacakkavāḷe sannipatiṃsu. Paṭhamaṃ devā paṭiggahiṃsu, pacchā manussā. Tantibaddhā vīṇā cammabaddhā bheriyo ca kenaci avāditā sayameva vajjiṃsu, manussānaṃ andubandhanādīni khaṇḍākhaṇḍaṃ bhijjiṃsu. Sabbarogā ambilena dhotatambamalaṃ viya vigacchiṃsu, jaccandhā rūpāni passiṃsu. Jaccabadhirā saddaṃ suṇiṃsu, pīṭhasappī javanasampannā ahesuṃ, jātijaḷānampi eḷamūgānaṃ sati patiṭṭhāsi, videse pakkhandanāvā supaṭṭanaṃ pāpuṇiṃsu, ākāsaṭṭhakabhūmaṭṭhakaratanāni sakatejobhāsitāni ahesuṃ, verino mettacittaṃ paṭilabhiṃsu, avīcimhi aggi nibbāyi. Lokantare āloko udapādi, nadīsu jalaṃ na pavatti, mahāsamuddesu madhurasadisaṃ udakaṃ ahosi, vāto na vāyi, ākāsapabbatarukkhagatā sakuṇā bhassitvā pathavīgatā ahesuṃ, cando atiroci, sūriyo na uṇho na sītalo nimmalo utusampanno ahosi, devatā attano attano vimānadvāre ṭhatvā apphoṭanaseḷanacelukkhepādīhi mahākīḷaṃ kīḷiṃsu, cātuddīpikamahāmegho vassi, mahājanaṃ neva khudā na pipāsā pīḷesi, dvārakavāṭāni sayameva vivariṃsu, pupphūpagaphalūpagā rukkhā pupphaphalāni gaṇhiṃsu, dasasahassilokadhātu ekaddhajamālā ahosīti.
தத்ராபிஸ்ஸ த³ஸஸஹஸ்ஸிலோகதா⁴துகம்போ ஸப்³ப³ஞ்ஞுதஞாணபடிலாப⁴ஸ்ஸ புப்³ப³னிமித்தங், தே³வதானங் ஏகசக்கவாளே ஸன்னிபாதோ த⁴ம்மசக்கப்பவத்தனகாலே ஏகப்பஹாரேன ஸன்னிபதித்வா த⁴ம்மபடிக்³க³ண்ஹனஸ்ஸ புப்³ப³னிமித்தங், பட²மங் தே³வதானங் படிக்³க³ஹணங் சதுன்னங் ரூபாவசரஜ்ஜா²னானங் படிலாப⁴ஸ்ஸ புப்³ப³னிமித்தங். பச்சா² மனுஸ்ஸானங் படிக்³க³ஹணங் சதுன்னங் அரூபஜ்ஜா²னானங் படிலாப⁴ஸ்ஸ புப்³ப³னிமித்தங், தந்திப³த்³த⁴வீணானங் ஸயங் வஜ்ஜனங் அனுபுப்³ப³விஹாரபடிலாப⁴ஸ்ஸ புப்³ப³னிமித்தங், சம்மப³த்³த⁴பே⁴ரீனங் வஜ்ஜனங் மஹதியா த⁴ம்மபே⁴ரியா அனுஸ்ஸாவனஸ்ஸ புப்³ப³னிமித்தங், அந்து³ப³ந்த⁴னாதீ³னங் சே²தோ³ அஸ்மிமானஸமுச்சே²த³ஸ்ஸ புப்³ப³னிமித்தங், ஸப்³ப³ரோக³விக³மோ ஸப்³ப³கிலேஸவிக³மஸ்ஸ புப்³ப³னிமித்தங், ஜச்சந்தா⁴னங் ரூபத³ஸ்ஸனங் தி³ப்³ப³சக்கு²படிலாப⁴ஸ்ஸ புப்³ப³னிமித்தங், ஜச்சப³தி⁴ரானங் ஸத்³த³ஸ்ஸவனங் தி³ப்³ப³ஸோததா⁴துபடிலாப⁴ஸ்ஸ புப்³ப³னிமித்தங் , பீட²ஸப்பீனங் ஜவனஸம்பதா³ சதுஇத்³தி⁴பாதா³தி⁴க³மஸ்ஸ புப்³ப³னிமித்தங், ஜளானங் ஸதிபதிட்டா²னங் சதுஸதிபட்டா²னபடிலாப⁴ஸ்ஸ புப்³ப³னிமித்தங், விதே³ஸபக்க²ந்த³னாவானங் ஸுபட்டனஸம்பாபுணனங் சதுபடிஸம்பி⁴தா³தி⁴க³மஸ்ஸ புப்³ப³னிமித்தங், ரதனானங் ஸகதேஜோபா⁴ஸிதத்தங் யங் லோகஸ்ஸ த⁴ம்மோபா⁴ஸங் த³ஸ்ஸெஸ்ஸதி தஸ்ஸ புப்³ப³னிமித்தங்.
Tatrāpissa dasasahassilokadhātukampo sabbaññutañāṇapaṭilābhassa pubbanimittaṃ, devatānaṃ ekacakkavāḷe sannipāto dhammacakkappavattanakāle ekappahārena sannipatitvā dhammapaṭiggaṇhanassa pubbanimittaṃ, paṭhamaṃ devatānaṃ paṭiggahaṇaṃ catunnaṃ rūpāvacarajjhānānaṃ paṭilābhassa pubbanimittaṃ. Pacchā manussānaṃ paṭiggahaṇaṃ catunnaṃ arūpajjhānānaṃ paṭilābhassa pubbanimittaṃ, tantibaddhavīṇānaṃ sayaṃ vajjanaṃ anupubbavihārapaṭilābhassa pubbanimittaṃ, cammabaddhabherīnaṃ vajjanaṃ mahatiyā dhammabheriyā anussāvanassa pubbanimittaṃ, andubandhanādīnaṃ chedo asmimānasamucchedassa pubbanimittaṃ, sabbarogavigamo sabbakilesavigamassa pubbanimittaṃ, jaccandhānaṃ rūpadassanaṃ dibbacakkhupaṭilābhassa pubbanimittaṃ, jaccabadhirānaṃ saddassavanaṃ dibbasotadhātupaṭilābhassa pubbanimittaṃ , pīṭhasappīnaṃ javanasampadā catuiddhipādādhigamassa pubbanimittaṃ, jaḷānaṃ satipatiṭṭhānaṃ catusatipaṭṭhānapaṭilābhassa pubbanimittaṃ, videsapakkhandanāvānaṃ supaṭṭanasampāpuṇanaṃ catupaṭisambhidādhigamassa pubbanimittaṃ, ratanānaṃ sakatejobhāsitattaṃ yaṃ lokassa dhammobhāsaṃ dassessati tassa pubbanimittaṃ.
வேரீனங் மெத்தசித்தபடிலாபோ⁴ சதுப்³ரஹ்மவிஹாரபடிலாப⁴ஸ்ஸ புப்³ப³னிமித்தங், அவீசிம்ஹி அக்³கி³னிப்³பா³னங் ஏகாத³ஸஅக்³கி³னிப்³பா³னஸ்ஸ புப்³ப³னிமித்தங், லோகந்தராலோகோ அவிஜ்ஜந்த⁴காரங் வித⁴மித்வா ஞாணாலோகத³ஸ்ஸனஸ்ஸ புப்³ப³னிமித்தங், மஹாஸமுத்³த³ஸ்ஸ மது⁴ரதா நிப்³பா³னரஸேன ஏகரஸபா⁴வஸ்ஸ புப்³ப³னிமித்தங், வாதஸ்ஸ அவாயனங் த்³வாஸட்டி²தி³ட்டி²க³தபி⁴ந்த³னஸ்ஸ புப்³ப³னிமித்தங், ஸகுணானங் பத²வீக³மனங் மஹாஜனஸ்ஸ ஓவாத³ங் ஸுத்வா பாணேஹி ஸரணக³மனஸ்ஸ புப்³ப³னிமித்தங், சந்த³ஸ்ஸ அதிவிரோசனங் ப³ஹுஜனகந்ததாய புப்³ப³னிமித்தங், ஸூரியஸ்ஸ உண்ஹஸீதவிவஜ்ஜனஉதுஸுக²தா காயிகசேதஸிகஸுகு²ப்பத்தியா புப்³ப³னிமித்தங், தே³வதானங் விமானத்³வாரேஸு அப்போ²டனாதீ³ஹி கீளனங் பு³த்³த⁴பா⁴வங் பத்வா உதா³னங் உதா³னஸ்ஸ புப்³ப³னிமித்தங், சாதுத்³தீ³பிகமஹாமேக⁴வஸ்ஸனங் மஹதோ த⁴ம்மமேக⁴வஸ்ஸனஸ்ஸ புப்³ப³னிமித்தங், கு²தா³பீளனஸ்ஸ அபா⁴வோ காயக³தாஸதிஅமதபடிலாப⁴ஸ்ஸ புப்³ப³னிமித்தங், பிபாஸாபீளனஸ்ஸ அபா⁴வோ விமுத்திஸுகே²ன ஸுகி²தபா⁴வஸ்ஸ புப்³ப³னிமித்தங், த்³வாரகவாடானங் ஸயமேவ விவரணங் அட்ட²ங்கி³கமக்³க³த்³வாரவிவரணஸ்ஸ புப்³ப³னிமித்தங், ருக்கா²னங் புப்ப²ப²லக³ஹணங் விமுத்திபுப்பே²ஹி புப்பி²தஸ்ஸ ச ஸாமஞ்ஞப²லபா⁴ரப⁴ரிதபா⁴வஸ்ஸ ச புப்³ப³னிமித்தங், த³ஸஸஹஸ்ஸிலோகதா⁴துயா ஏகத்³த⁴ஜமாலதா அரியத்³த⁴ஜமாலாமாலிதாய புப்³ப³னிமித்தந்தி வேதி³தப்³ப³ங். அயங் ஸம்ப³ஹுலவாரோ நாம.
Verīnaṃ mettacittapaṭilābho catubrahmavihārapaṭilābhassa pubbanimittaṃ, avīcimhi agginibbānaṃ ekādasaagginibbānassa pubbanimittaṃ, lokantarāloko avijjandhakāraṃ vidhamitvā ñāṇālokadassanassa pubbanimittaṃ, mahāsamuddassa madhuratā nibbānarasena ekarasabhāvassa pubbanimittaṃ, vātassa avāyanaṃ dvāsaṭṭhidiṭṭhigatabhindanassa pubbanimittaṃ, sakuṇānaṃ pathavīgamanaṃ mahājanassa ovādaṃ sutvā pāṇehi saraṇagamanassa pubbanimittaṃ, candassa ativirocanaṃ bahujanakantatāya pubbanimittaṃ, sūriyassa uṇhasītavivajjanautusukhatā kāyikacetasikasukhuppattiyā pubbanimittaṃ, devatānaṃ vimānadvāresu apphoṭanādīhi kīḷanaṃ buddhabhāvaṃ patvā udānaṃ udānassa pubbanimittaṃ, cātuddīpikamahāmeghavassanaṃ mahato dhammameghavassanassa pubbanimittaṃ, khudāpīḷanassa abhāvo kāyagatāsatiamatapaṭilābhassa pubbanimittaṃ, pipāsāpīḷanassa abhāvo vimuttisukhena sukhitabhāvassa pubbanimittaṃ, dvārakavāṭānaṃ sayameva vivaraṇaṃ aṭṭhaṅgikamaggadvāravivaraṇassa pubbanimittaṃ, rukkhānaṃ pupphaphalagahaṇaṃ vimuttipupphehi pupphitassa ca sāmaññaphalabhārabharitabhāvassa ca pubbanimittaṃ, dasasahassilokadhātuyā ekaddhajamālatā ariyaddhajamālāmālitāya pubbanimittanti veditabbaṃ. Ayaṃ sambahulavāro nāma.
எத்த² பஞ்ஹே புச்ச²ந்தி – ‘‘யதா³ மஹாபுரிஸோ பத²வியங் பதிட்ட²ஹித்வா உத்தராபி⁴முகோ² க³ந்த்வா ஆஸபி⁴ங் வாசங் பா⁴ஸதி, ததா³ கிங் பத²வியா க³தோ , உதா³ஹு ஆகாஸேன? தி³ஸ்ஸமானோ க³தோ, உதா³ஹு அதி³ஸ்ஸமானோ? அசேலகோ க³தோ, உதா³ஹு அலங்கதப்படியத்தோ? த³ஹரோ ஹுத்வா க³தோ, உதா³ஹு மஹல்லகோ? பச்சா²பி கிங் தாதி³ஸோவ அஹோஸி, உதா³ஹு புன பா³லதா³ரகோ’’தி? அயங் பன பஞ்ஹோ ஹெட்டா² லோஹபாஸாதே³ ஸங்க⁴ஸன்னிபாதே திபிடகசூளாப⁴யத்தே²ரேன விஸ்ஸஜ்ஜிதோவ. தே²ரோ கிரெத்த² நியதி புப்³பே³கதகம்ம-இஸ்ஸரனிம்மானவாத³வஸேன தங் தங் ப³ஹுங் வத்வா அவஸானே ஏவங் ப்³யாகாஸி – ‘‘மஹாபுரிஸோ பத²வியங் க³தோ, மஹாஜனஸ்ஸ பன ஆகாஸே க³ச்ச²ந்தோ விய அஹோஸி. தி³ஸ்ஸமானோ க³தோ, மஹாஜனஸ்ஸ பன அதி³ஸ்ஸமானோ விய அஹோஸி. அசேலகோ க³தோ, மஹாஜனஸ்ஸ பன அலங்கதப்படியத்தோவ உபட்டா²ஸி. த³ஹரோவ க³தோ, மஹாஜனஸ்ஸ பன ஸோளஸவஸ்ஸுத்³தே³ஸிகோ விய அஹோஸி. பச்சா² பன பா³லதா³ரகோவ அஹோஸி, ந தாதி³ஸோ’’தி. ஏவங் வுத்தே பரிஸா சஸ்ஸ ‘‘பு³த்³தே⁴ன விய ஹுத்வா போ⁴ தே²ரேன பஞ்ஹோ கதி²தோ’’தி அத்தமனா அஹோஸி. லோகந்தரிகவாரோ வுத்தனயோ ஏவ.
Ettha pañhe pucchanti – ‘‘yadā mahāpuriso pathaviyaṃ patiṭṭhahitvā uttarābhimukho gantvā āsabhiṃ vācaṃ bhāsati, tadā kiṃ pathaviyā gato , udāhu ākāsena? Dissamāno gato, udāhu adissamāno? Acelako gato, udāhu alaṅkatappaṭiyatto? Daharo hutvā gato, udāhu mahallako? Pacchāpi kiṃ tādisova ahosi, udāhu puna bāladārako’’ti? Ayaṃ pana pañho heṭṭhā lohapāsāde saṅghasannipāte tipiṭakacūḷābhayattherena vissajjitova. Thero kirettha niyati pubbekatakamma-issaranimmānavādavasena taṃ taṃ bahuṃ vatvā avasāne evaṃ byākāsi – ‘‘mahāpuriso pathaviyaṃ gato, mahājanassa pana ākāse gacchanto viya ahosi. Dissamāno gato, mahājanassa pana adissamāno viya ahosi. Acelako gato, mahājanassa pana alaṅkatappaṭiyattova upaṭṭhāsi. Daharova gato, mahājanassa pana soḷasavassuddesiko viya ahosi. Pacchā pana bāladārakova ahosi, na tādiso’’ti. Evaṃ vutte parisā cassa ‘‘buddhena viya hutvā bho therena pañho kathito’’ti attamanā ahosi. Lokantarikavāro vuttanayo eva.
விதி³தாதி பாகடா ஹுத்வா. யதா² ஹி ஸாவகா நஹானமுக²தோ⁴வனகா²த³னபிவனாதி³காலே அனோகாஸக³தே அதீதஸங்கா²ரே நிப்பதே³ஸே ஸம்மஸிதுங் ந ஸக்கொந்தி, ஓகாஸபத்தயேவ ஸம்மஸந்தி, ந ஏவங் பு³த்³தா⁴. பு³த்³தா⁴ ஹி ஸத்ததி³வஸப்³ப⁴ந்தரே வவத்தி²தஸங்கா²ரே ஆதி³தோ பட்டா²ய ஸம்மஸித்வா திலக்க²ணங் ஆரோபெத்வாவ விஸ்ஸஜ்ஜெந்தி, தேஸங் அவிபஸ்ஸிதத⁴ம்மோ நாம நத்தி², தஸ்மா ‘‘விதி³தா’’தி ஆஹ. ஸேஸங் ஸப்³ப³த்த² உத்தானமேவாதி.
Viditāti pākaṭā hutvā. Yathā hi sāvakā nahānamukhadhovanakhādanapivanādikāle anokāsagate atītasaṅkhāre nippadese sammasituṃ na sakkonti, okāsapattayeva sammasanti, na evaṃ buddhā. Buddhā hi sattadivasabbhantare vavatthitasaṅkhāre ādito paṭṭhāya sammasitvā tilakkhaṇaṃ āropetvāva vissajjenti, tesaṃ avipassitadhammo nāma natthi, tasmā ‘‘viditā’’ti āha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அச்ச²ரியஅப்³பு⁴தஸுத்தவண்ணனா நிட்டி²தா.
Acchariyaabbhutasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. அச்ச²ரியஅப்³பு⁴தஸுத்தங் • 3. Acchariyaabbhutasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. அச்ச²ரியப்³பு⁴தஸுத்தவண்ணனா • 3. Acchariyabbhutasuttavaṇṇanā
