| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. அசேலகஸ்ஸபஸுத்தவண்ணனா
7. Acelakassapasuttavaṇṇanā
17. லிங்கே³ன அசேலகோதி பப்³ப³ஜிதலிங்கே³ன அசேலகோ. தேன அசேலகசரணேன அசேலோ, ந நிச்சேலதாமத்தேனாதி த³ஸ்ஸேதி. நாமேனாதி கொ³த்தனாமேன கஸ்ஸபோதி. தே³ஸேதி பவேதே³தி ஸங்ஸயவிக³மனங் ஏதேனாதி தே³ஸோ, நிச்ச²யஹேதூதி ஆஹ ‘‘கிஞ்சிதே³வ தே³ஸ’’ந்திஆதி³. ஸோ ஹி ஸங்ஸயவிக³மனங் கரோதீதி காரணங். ஓகாஸந்தி அவஸங்ஸந்த³னபதே³ஸங். தேனாஹ ‘‘க²ணங் கால’’ந்தி. அந்தரக⁴ரங் அந்தோனிவேஸனங். அந்தரே க⁴ரானி ஏதஸ்ஸாதி அந்தரக⁴ரங், அந்தோகா³மோ. யதா³கங்க²ஸீதி யங் ஆகங்க²ஸி. இதி ப⁴க³வா ஸப்³ப³ஞ்ஞுபவாரணாய பவாரேதி. தேனாஹ ‘‘யங் இச்ச²ஸீ’’தி. யதா³கங்க²ஸீதி யங் ஆகங்க²ஸி, கஸ்ஸப, திக்க²த்துங் படிக்கி²பந்தோபி புச்ச²ஸி, யங் ஆகங்க²ஸி, தமேவ புச்சா²தி அத்தோ².
17.Liṅgenaacelakoti pabbajitaliṅgena acelako. Tena acelakacaraṇena acelo, na niccelatāmattenāti dasseti. Nāmenāti gottanāmena kassapoti. Deseti pavedeti saṃsayavigamanaṃ etenāti deso, nicchayahetūti āha ‘‘kiñcideva desa’’ntiādi. So hi saṃsayavigamanaṃ karotīti kāraṇaṃ. Okāsanti avasaṃsandanapadesaṃ. Tenāha ‘‘khaṇaṃ kāla’’nti. Antaragharaṃ antonivesanaṃ. Antare gharāni etassāti antaragharaṃ, antogāmo. Yadākaṅkhasīti yaṃ ākaṅkhasi. Iti bhagavā sabbaññupavāraṇāya pavāreti. Tenāha ‘‘yaṃ icchasī’’ti. Yadākaṅkhasīti yaṃ ākaṅkhasi, kassapa, tikkhattuṃ paṭikkhipantopi pucchasi, yaṃ ākaṅkhasi, tameva pucchāti attho.
‘‘யாவததியங் படிக்கி²பீ’’தி வுத்தத்தா ‘‘ததியம்பி கோ²’’திஆதி³னா பாடே²ன ப⁴விதப்³ப³ங். ஸோ பன நயவஸேன ஸங்கி²த்தோதி த³ட்ட²ப்³போ³. யேன காரணேன ப⁴க³வா அசேலகஸ்ஸ திக்க²த்துங் யாசாபெத்வா சஸ்ஸ பஞ்ஹங் கதே²ஸி, தங் த³ஸ்ஸேதுங் ‘‘கஸ்மா பனா’’திஆதி³மாஹ. கா³ரவஜனநத்த²ங் யாவததியங் படிக்கி²பி தஞ்ச த⁴ம்மஸ்ஸ ஸுஸ்ஸூஸாய. த⁴ம்மக³ருகா ஹி பு³த்³தா⁴ ப⁴க³வந்தோ. ஸத்தானங் ஞாணபரிபாகங் ஆக³மயமானோ யாவததியங் யாசாபேதீதி விப⁴த்திவிபரிணாமவஸேன ஸாதா⁴ரணதோ பத³ங் யோஜெத்வா புன ‘‘எத்தகேன காலேனா’’தி கஸ்ஸபஸ்ஸ வஸேன யோஜேதப்³ப³ங்.
‘‘Yāvatatiyaṃ paṭikkhipī’’ti vuttattā ‘‘tatiyampi kho’’tiādinā pāṭhena bhavitabbaṃ. So pana nayavasena saṃkhittoti daṭṭhabbo. Yena kāraṇena bhagavā acelakassa tikkhattuṃ yācāpetvā cassa pañhaṃ kathesi, taṃ dassetuṃ ‘‘kasmā panā’’tiādimāha. Gāravajananatthaṃ yāvatatiyaṃ paṭikkhipi tañca dhammassa sussūsāya. Dhammagarukā hi buddhā bhagavanto. Sattānaṃ ñāṇaparipākaṃ āgamayamāno yāvatatiyaṃ yācāpetīti vibhattivipariṇāmavasena sādhāraṇato padaṃ yojetvā puna ‘‘ettakena kālenā’’ti kassapassa vasena yojetabbaṃ.
மாதி படிஸேதே⁴ நிபாதோ. ப⁴ணீதி புனவசனவஸேன கிரியாபத³ங் வத³தி. மா ஏவங் ப⁴ணி, கதே²ஸீதி அத்தோ². ‘‘இதி ப⁴க³வா அவோசா’’தி பன ஸங்கீ³திகாரவசனங். ஸயங்கதங் து³க்க²ந்தி புரிஸஸ்ஸ உப்பஜ்ஜமானது³க்க²ங், தேன கதங் நாம தஸ்ஸ காரணஸ்ஸ புப்³பே³ தேனேவ கம்மஸ்ஸ உபசிதத்தாதி அயங் நயோ அனவஜ்ஜோ. தி³ட்டி²க³திகோ பன பஞ்சக்க²ந்த⁴வினிமுத்தங் நிச்சங் காரகவேத³கலக்க²ணங் அத்தானங் பரிகப்பெத்வா தஸ்ஸ வஸேன ‘‘ஸயங்கதங் து³க்க²’’ந்தி புச்ச²தீதி ப⁴க³வா ‘‘மா ஹேவ’’ந்தி அவோச, தேனாஹ ‘‘ஸயங்கதங் து³க்க²ந்தி வத்துங் ந வட்டதீ’’திஆதி³. எத்த² ச யதி³ பா³ஹிரகேஹி பரிகப்பிதோ அத்தா நாம கோசி அத்தி², ஸோ ச நிச்சோ, தஸ்ஸ நிப்³பி³காரதாய, புரிமரூபாவிஜஹனதோ கஸ்ஸசி விஸேஸாதா⁴னஸ்ஸ காதுங் அஸக்குணெய்யதாய அஹிததோ நிவத்தனத்த²ங், ஹிதே ச வத்தனத்த²ங் உபதே³ஸோ ச நிப்பயோஜனோ ஸியா அத்தவாதி³னோ. கத²ங் வா ஸோ உபதே³ஸோ பவத்தீயதி? விகாராபா⁴வதோ. ஏவஞ்ச அத்தனோ அஜடாகாஸஸ்ஸ விய தா³னாதி³கிரியா ஹிங்ஸாதி³கிரியா ச ந ஸம்ப⁴வதி, ததா² ஸுக²ஸ்ஸ து³க்க²ஸ்ஸ ச அனுப⁴வனப³ந்தோ⁴ ஏவ அத்தவாதி³னோ ந யுஜ்ஜதி கம்மப³ந்தா⁴பா⁴வதோ. ஜாதிஆதீ³னஞ்ச அஸம்ப⁴வதோ குதோ விமொக்கோ². அத² பன ‘‘த⁴ம்மமத்தங் தஸ்ஸ உப்பஜ்ஜதி சேவ வினஸ்ஸதி ச. யஸ்ஸ வஸேனாயங் கிரியாவோஹாரோ’’தி வதெ³ய்ய, ஏவம்பி புரிமரூபாவிஜஹனேன அவட்டி²தஸ்ஸ அத்தனோ த⁴ம்மமத்தந்தி ந ஸக்கா ஸம்பா⁴வேதுங். தே வா பனஸ்ஸ த⁴ம்மா அவத்தா²பூ⁴தா, ததோ அஞ்ஞே வா ஸியுங் அனஞ்ஞே வா. யதி³ அஞ்ஞே, ந தாஹி தஸ்ஸ உப்பன்னாஹிபி கோசி விஸேஸோ அத்தி². யோ ஹி கரோதி படிஸங்வேதே³தி சவதி உபபஜ்ஜதி சாதி இச்சி²தங், தஸ்மா தத³த்தோ² ஏவ யதா²வுத்ததோ³ஸோ. கிஞ்ச த⁴ம்மகப்பனாபி நிரத்தி²கா ஸியா. அத² அனஞ்ஞே, உப்பாத³வினாஸவந்தீஹி அவத்தா²ஹி அனஞ்ஞஸ்ஸ அத்தனோ தாஸங் விய உப்பாத³வினாஸஸம்ப⁴வதோ குதோ நிச்சதாவகாஸோ. தாஸம்பி வா அத்தனோ விய நிச்சதாபத்தீதி ப³ந்த⁴விமொக்கா²னங் அஸம்ப⁴வோ ஏவாதி ந யுஜ்ஜதேவாயங் அத்தவாதோ³. தேனாஹ ‘‘அத்தா நாம கோசி து³க்க²ஸ்ஸ காரகோ நத்தீ²தி தீ³பேதீ’’தி. பரதோதி ‘‘பரங்கதங் து³க்க²’’ந்திஆதி³கே பரஸ்மிங் திவிதே⁴பி நயே. அதி⁴ச்சஸமுப்பன்னந்தி அதி⁴ச்ச யதி³ச்சா²ய கிஞ்சி காரணங் கஸ்ஸசி வா புப்³ப³ங் வினா ஸமுப்பன்னங். தேனாஹ ‘‘அகாரணேன யதி³ச்சா²ய உப்பன்ன’’ந்தி. கஸ்மா ஏவமாஹாதி ஏவங் வக்க²மானோதி அதி⁴ப்பாயோ. அஸ்ஸாதி அசேலஸ்ஸ. அயந்தி ப⁴க³வந்தங் ஸந்தா⁴ய வத³தி. ஸோதெ⁴ந்தோதி ஸயங் விஸுத்³த⁴ங் கத்வா புச்சி²தமத்த²ங் ஏவ அத்தனோ புச்சா²ய ஸுத்³தி⁴ங் த³ஸ்ஸெந்தோ. லத்³தி⁴யா ‘‘ஸயங்கதங் து³க்க²’’ந்தி மிச்சா²க³ஹணஸ்ஸ படிஸேத⁴னத்தா²ய.
Māti paṭisedhe nipāto. Bhaṇīti punavacanavasena kiriyāpadaṃ vadati. Mā evaṃ bhaṇi, kathesīti attho. ‘‘Iti bhagavā avocā’’ti pana saṅgītikāravacanaṃ. Sayaṃkataṃ dukkhanti purisassa uppajjamānadukkhaṃ, tena kataṃ nāma tassa kāraṇassa pubbe teneva kammassa upacitattāti ayaṃ nayo anavajjo. Diṭṭhigatiko pana pañcakkhandhavinimuttaṃ niccaṃ kārakavedakalakkhaṇaṃ attānaṃ parikappetvā tassa vasena ‘‘sayaṃkataṃ dukkha’’nti pucchatīti bhagavā ‘‘mā heva’’nti avoca, tenāha ‘‘sayaṃkataṃ dukkhanti vattuṃ na vaṭṭatī’’tiādi. Ettha ca yadi bāhirakehi parikappito attā nāma koci atthi, so ca nicco, tassa nibbikāratāya, purimarūpāvijahanato kassaci visesādhānassa kātuṃ asakkuṇeyyatāya ahitato nivattanatthaṃ, hite ca vattanatthaṃ upadeso ca nippayojano siyā attavādino. Kathaṃ vā so upadeso pavattīyati? Vikārābhāvato. Evañca attano ajaṭākāsassa viya dānādikiriyā hiṃsādikiriyā ca na sambhavati, tathā sukhassa dukkhassa ca anubhavanabandho eva attavādino na yujjati kammabandhābhāvato. Jātiādīnañca asambhavato kuto vimokkho. Atha pana ‘‘dhammamattaṃ tassa uppajjati ceva vinassati ca. Yassa vasenāyaṃ kiriyāvohāro’’ti vadeyya, evampi purimarūpāvijahanena avaṭṭhitassa attano dhammamattanti na sakkā sambhāvetuṃ. Te vā panassa dhammā avatthābhūtā, tato aññe vā siyuṃ anaññe vā. Yadi aññe, na tāhi tassa uppannāhipi koci viseso atthi. Yo hi karoti paṭisaṃvedeti cavati upapajjati cāti icchitaṃ, tasmā tadattho eva yathāvuttadoso. Kiñca dhammakappanāpi niratthikā siyā. Atha anaññe, uppādavināsavantīhi avatthāhi anaññassa attano tāsaṃ viya uppādavināsasambhavato kuto niccatāvakāso. Tāsampi vā attano viya niccatāpattīti bandhavimokkhānaṃ asambhavo evāti na yujjatevāyaṃ attavādo. Tenāha ‘‘attā nāma koci dukkhassa kārako natthīti dīpetī’’ti. Paratoti ‘‘paraṃkataṃ dukkha’’ntiādike parasmiṃ tividhepi naye. Adhiccasamuppannanti adhicca yadicchāya kiñci kāraṇaṃ kassaci vā pubbaṃ vinā samuppannaṃ. Tenāha ‘‘akāraṇena yadicchāya uppanna’’nti. Kasmā evamāhāti evaṃ vakkhamānoti adhippāyo. Assāti acelassa. Ayanti bhagavantaṃ sandhāya vadati. Sodhentoti sayaṃ visuddhaṃ katvā pucchitamatthaṃ eva attano pucchāya suddhiṃ dassento. Laddhiyā ‘‘sayaṃkataṃ dukkha’’nti micchāgahaṇassa paṭisedhanatthāya.
ஸோ கரோதீதி ஸோ கம்மங் கரோதி. ஸோ படிஸங்வேத³யதீதி காரகவேத³கானங் அனஞ்ஞத்தத³ஸ்ஸனபரங் ஏதங், ந பன கம்மகிரியாப²லானங் படிஸங்வேத³னானங் ஸமானகாலதாத³ஸ்ஸனபரங். இதீதி நித³ஸ்ஸனத்தே² நிபாதோ. கோ²தி அவதா⁴ரணே. ‘‘ஸோ ஏவா’’தி த³ஸ்ஸிதோ. அனியதாதே³ஸா ஹி ஏதே நிபாதா. ஆதி³தோதி பு⁴ம்மத்தே² நிஸ்ஸக்கவசனந்தி ஆஹ ‘‘ஆதி³ம்ஹியேவா’’தி. ‘‘ஸயங்கதங் து³க்க²’’ந்தி லத்³தி⁴யா பகே³வ ‘‘ஸோ கரோதி, ஸோ படிஸங்வேத³யதீ’’தி ஸஞ்ஞாசித்தவிபல்லாஸா ப⁴வந்தி. ஸஞ்ஞாவிபல்லாஸதோ ஹி சித்தவிபல்லாஸோ, சித்தவிபல்லாஸதோ தி³ட்டி²விபல்லாஸோ, தேனாஹ ‘‘ஏவங் ஸதி பச்சா² ஸயங்கதங் து³க்க²ந்தி அயங் லத்³தி⁴ ஹோதீ’’தி. ஏவங் ஸதி ஸஞ்ஞாசித்தவிபல்லாஸானங் ப்³ரூஹிதோ மிச்சா²பி⁴னிவேஸோ, யதி³த³ங் ‘‘ஸயங்கதங் து³க்க²’’ந்தி லத்³தி⁴. தஸ்மா படினிஸ்ஸஜ்ஜேதுங் பாபகங் தி³ட்டி²க³தந்தி த³ஸ்ஸேதி. தேனாஹ ப⁴க³வா ‘‘ஸயங்கதங்…பே॰… ஏதங் பரேதீ’’தி. வட்டது³க்க²ங் அதி⁴ப்பேதங் அவிஸேஸதோ அத்தீ²தி ச வுத்தத்தா. ஸஸ்ஸதங் ஸஸ்ஸதகா³ஹங் தீ³பேதி பரேஸங் பகாஸேதி, ததா²பூ⁴தோ ச ஸஸ்ஸதங் த³ள்ஹக்³கா³ஹங் க³ண்ஹாதீதி. தஸ்ஸாதி தி³ட்டி²க³திகஸ்ஸ. தங் ‘‘ஸயங்கதங் து³க்க²’’ந்தி ஏவங் பவத்தங் விபரீதத³ஸ்ஸனங். ஏதங் ஸஸ்ஸதக்³க³ஹணங். பரேதி உபேதி. தேனாஹ ‘‘காரகஞ்ச…பே॰… அத்தோ²’’தி. ஏகமேவ க³ண்ஹந்தந்தி ஸதிபி வத்து²பே⁴தே³ அயோனிஸோ உப்பஜ்ஜனேன ஏகமேவ கத்வா க³ண்ஹந்தங்.
So karotīti so kammaṃ karoti. So paṭisaṃvedayatīti kārakavedakānaṃ anaññattadassanaparaṃ etaṃ, na pana kammakiriyāphalānaṃ paṭisaṃvedanānaṃ samānakālatādassanaparaṃ. Itīti nidassanatthe nipāto. Khoti avadhāraṇe. ‘‘So evā’’ti dassito. Aniyatādesā hi ete nipātā. Āditoti bhummatthe nissakkavacananti āha ‘‘ādimhiyevā’’ti. ‘‘Sayaṃkataṃ dukkha’’nti laddhiyā pageva ‘‘so karoti, so paṭisaṃvedayatī’’ti saññācittavipallāsā bhavanti. Saññāvipallāsato hi cittavipallāso, cittavipallāsato diṭṭhivipallāso, tenāha ‘‘evaṃ sati pacchā sayaṃkataṃ dukkhanti ayaṃ laddhi hotī’’ti. Evaṃ sati saññācittavipallāsānaṃ brūhito micchābhiniveso, yadidaṃ ‘‘sayaṃkataṃ dukkha’’nti laddhi. Tasmā paṭinissajjetuṃ pāpakaṃ diṭṭhigatanti dasseti. Tenāha bhagavā ‘‘sayaṃkataṃ…pe… etaṃ paretī’’ti. Vaṭṭadukkhaṃ adhippetaṃ avisesato atthīti ca vuttattā. Sassataṃ sassatagāhaṃ dīpeti paresaṃ pakāseti, tathābhūto ca sassataṃ daḷhaggāhaṃ gaṇhātīti. Tassāti diṭṭhigatikassa. Taṃ ‘‘sayaṃkataṃ dukkha’’nti evaṃ pavattaṃ viparītadassanaṃ. Etaṃ sassataggahaṇaṃ. Pareti upeti. Tenāha ‘‘kārakañca…pe… attho’’ti. Ekameva gaṇhantanti satipi vatthubhede ayoniso uppajjanena ekameva katvā gaṇhantaṃ.
இத⁴ ‘‘ஆதி³ம்ஹியேவா’’தி பதே³. ‘‘பரங்கதங் து³க்க²’’ந்தி லத்³தி⁴யா பகே³வாதிஆதி³னா ஹெத்த² வுத்தனயானுஸாரேன அத்தோ² வேதி³தப்³போ³. அயஞ்ஹெத்த² யோஜனா – ‘‘பரங்கதங் து³க்க²’’ந்தி லத்³தி⁴யா பகே³வ அஞ்ஞோ கரோதி, அஞ்ஞோ படிஸங்வேத³யதீதி ஸஞ்ஞாசித்தவிபல்லாஸா ப⁴வந்தீதி ஸப்³ப³ங் ஹெட்டா² வுத்தனயேனேவ யோஜேதப்³ப³ங். ஏவங் ஸதீதி ஏவங் முது³கே உச்சே²த³விபல்லாஸே பட²முப்பன்னே ஸதி பச்சா² ‘‘பரங்கதங் து³க்க²’’ந்தி அயங் லத்³தி⁴ ஹோதீதி ஸம்ப³ந்தோ⁴. காரகோதி கம்மஸ்ஸ காரகோ. தேன கதந்தி கம்மகாரகேன கதங். கம்முனா ஹி ப²லஸ்ஸ வோஹாரோ அபே⁴தோ³பசாரகத்தா. ஏவந்தி தி³ட்டி²ஸஹக³தா வேத³னா ஸாதஸபா⁴வா கிலேஸபரிளாஹாதி³னா ஸபரிஸ்ஸயா ஸஉபாயாஸா, ஏவங். ‘‘பகே³வ இதரே’’தி வுத்தவேத³னாய அபி⁴துன்னஸ்ஸ வித்³த⁴ஸ்ஸ. ‘‘வுத்தனயேன யோஜேதப்³ப³’’ந்தி வத்வா தங் யோஜனங் த³ஸ்ஸெந்தோ ‘‘தத்ராய’’ந்திஆதி³மாஹ. உச்சே²த³ந்தி ஸதோ ஸத்தஸ்ஸ உச்சே²த³ங் வினாஸங், விப⁴வந்தி அத்தோ². அஸதோ ஹி வினாஸாஸம்ப⁴வதோ அத்தி²பா⁴வனிப³ந்த⁴னோ உச்சே²தோ³. யதா² ஹேதுப²லபா⁴வேன பவத்தமானானங் ஸபா⁴வத⁴ம்மானங் ஸதிபி ஏகஸந்தானபரியாபன்னானங் பி⁴ன்னஸந்ததிபதிதேஹி விஸேஸே ஹேதுப²லானங் பரமத்த²தோ அவினாபா⁴வத்தா பி⁴ன்னஸந்தானபதிதானங் விய அச்சந்தபே⁴த³ஸன்னிட்டா²னேன நானத்தனயஸ்ஸ மிச்சா²க³ஹணங் உச்சே²தா³பி⁴னிவேஸஸ்ஸ காரணங். ஏவங் ஹேதுப²லபூ⁴தானங் த⁴ம்மானங் விஜ்ஜமானேபி ஸபா⁴வபே⁴தே³ ஏகஸந்ததிபரியாபன்னதாய ஏகத்தனயேன அச்சந்தாபே⁴த³க³ஹணம்பி காரணமேவாதி த³ஸ்ஸேதுங் ‘‘ஸத்தஸ்ஸா’’தி வுத்தங் பாளியங். ஸந்தானவஸேன ஹி வத்தமானேஸு க²ந்தே⁴ஸு க⁴னவினிப்³போ⁴கா³பா⁴வேன ஏகத்தக³ஹணனிப³ந்த⁴னோ ஸத்தக்³கா³ஹோ, ஸத்தஸ்ஸ ச அத்தி²பா⁴வக்³கா³ஹனிப³ந்த⁴னோ உச்சே²த³க்³கா³ஹோ, யாவாயங் அத்தா ந உச்சி²ஜ்ஜதி, தாவாயங் விஜ்ஜதியேவாதி க³ஹணதோ நிருத³யவினாஸோ இத⁴ உச்சே²தோ³தி அதி⁴ப்பேதோதி ‘‘உச்சே²த³’’ந்தி வுத்தங். விஸேஸேன நாஸோ வினாஸோ, அபா⁴வோ. ஸோ பன மங்ஸசக்கு²பஞ்ஞாசக்கூ²னங் த³ஸ்ஸனபதா²திக்கமோயேவ ஹோதீதி வுத்தங் ‘‘அத³ஸ்ஸன’’ந்தி. அத³ஸ்ஸனே ஹி நாஸஸத்³தோ³ லோகே நிருள்ஹோதி. ஸபா⁴வவிக³மோ ஸபா⁴வாபக³மோ விப⁴வோ. யோ ஹி நிருத³யவினாஸேன உச்சி²ஜ்ஜதி, ந ஸோ அத்தனோ ஸபா⁴வேன திட்ட²தி.
Idha ‘‘ādimhiyevā’’ti pade. ‘‘Paraṃkataṃ dukkha’’nti laddhiyā pagevātiādinā hettha vuttanayānusārena attho veditabbo. Ayañhettha yojanā – ‘‘paraṃkataṃ dukkha’’nti laddhiyā pageva añño karoti, añño paṭisaṃvedayatīti saññācittavipallāsā bhavantīti sabbaṃ heṭṭhā vuttanayeneva yojetabbaṃ. Evaṃ satīti evaṃ muduke ucchedavipallāse paṭhamuppanne sati pacchā ‘‘paraṃkataṃ dukkha’’nti ayaṃ laddhi hotīti sambandho. Kārakoti kammassa kārako. Tena katanti kammakārakena kataṃ. Kammunā hi phalassa vohāro abhedopacārakattā. Evanti diṭṭhisahagatā vedanā sātasabhāvā kilesapariḷāhādinā saparissayā saupāyāsā, evaṃ. ‘‘Pageva itare’’ti vuttavedanāya abhitunnassa viddhassa. ‘‘Vuttanayena yojetabba’’nti vatvā taṃ yojanaṃ dassento ‘‘tatrāya’’ntiādimāha. Ucchedanti sato sattassa ucchedaṃ vināsaṃ, vibhavanti attho. Asato hi vināsāsambhavato atthibhāvanibandhano ucchedo. Yathā hetuphalabhāvena pavattamānānaṃ sabhāvadhammānaṃ satipi ekasantānapariyāpannānaṃ bhinnasantatipatitehi visese hetuphalānaṃ paramatthato avinābhāvattā bhinnasantānapatitānaṃ viya accantabhedasanniṭṭhānena nānattanayassa micchāgahaṇaṃ ucchedābhinivesassa kāraṇaṃ. Evaṃ hetuphalabhūtānaṃ dhammānaṃ vijjamānepi sabhāvabhede ekasantatipariyāpannatāya ekattanayena accantābhedagahaṇampi kāraṇamevāti dassetuṃ ‘‘sattassā’’ti vuttaṃ pāḷiyaṃ. Santānavasena hi vattamānesu khandhesu ghanavinibbhogābhāvena ekattagahaṇanibandhano sattaggāho, sattassa ca atthibhāvaggāhanibandhano ucchedaggāho, yāvāyaṃ attā na ucchijjati, tāvāyaṃ vijjatiyevāti gahaṇato nirudayavināso idha ucchedoti adhippetoti ‘‘uccheda’’nti vuttaṃ. Visesena nāso vināso, abhāvo. So pana maṃsacakkhupaññācakkhūnaṃ dassanapathātikkamoyeva hotīti vuttaṃ ‘‘adassana’’nti. Adassane hi nāsasaddo loke niruḷhoti. Sabhāvavigamo sabhāvāpagamo vibhavo. Yo hi nirudayavināsena ucchijjati, na so attano sabhāvena tiṭṭhati.
ஏதே தேதி வா யே இமே தயா ‘‘ஸயங்கதங் து³க்க²’’ந்தி ச புட்டே²ன மயா ‘‘ஸோ கரோதி, ஸோ படிஸங்வேத³யதீ’’திஆதி³னா, ‘‘அஞ்ஞோ கரோதி, அஞ்ஞோ படிஸங்வேத³யதீ’’திஆதி³னா ச படிக்கி²த்தா ஸஸ்ஸதுச்சே²த³ஸங்கா²தா அந்தா, தே உபோ⁴ அந்தேதி யோஜனா. அத² வா ஏதே தேதி யத்த² புதூ² அஞ்ஞதித்தி²யா அனுபசிதஞாணஸம்பா⁴ரதாய பரமக³ம்பீ⁴ரங் ஸண்ஹங் ஸுகு²மங் ஸுஞ்ஞதங் அப்பஜானந்தா ஸஸ்ஸதுச்சே²தே³ நிமுக்³கா³ ஸீஸங் உக்கி²பிதுங் ந விஸஹந்தி, ஏதே தே உபோ⁴ அந்தே அனுபக³ம்மாதி யோஜனா. தே³ஸேதீதி பட²மங் தாவ அனஞ்ஞஸாதா⁴ரணே படிபத்தித⁴ம்மே ஞாணானுபா⁴வேன மஜ்ஜி²மாய படிபதா³ய டி²தோ, கருணானுபா⁴வேன தே³ஸனாத⁴ம்மே மஜ்ஜி²மாய படிபதா³ய டி²தோ த⁴ம்மங் தே³ஸேதி. எத்த² ஹீதி ஹி-ஸத்³தோ³ ஹேதுஅத்தோ². யஸ்மா காரணதோ…பே॰… நித்³தி³ட்டோ², தஸ்மா மஜ்ஜி²மாய படிபதா³ய டி²தோ த⁴ம்மங் தே³ஸேதீதி யோஜனா. காரணதோ ப²லங் தீ³பிதந்தி யோஜனா, அபி⁴தெ⁴ய்யானுரூபஞ்ஹி லிங்க³வசனானி ஹொந்தி. அஸ்ஸாதி ப²லஸ்ஸ. ந கோசி காரகோ வா வேத³கோ வா நித்³தி³ட்டோ², அஞ்ஞத³த்து² படிக்கி²த்தோ ஹேதுப²லமத்ததாத³ஸ்ஸனதோ கேவலங் து³க்க²க்க²ந்த⁴க³ஹணதோதி. எத்தாவதாதி ‘‘ஏதே தே, கஸ்ஸப…பே॰… து³க்க²க்க²ந்த⁴ஸ்ஸ நிரோதோ⁴ ஹோதீ’’தி எத்தகேன தாவ பதே³ன. ஸேஸபஞ்ஹாதி ‘‘ஸயங்கதஞ்ச பரங்கதஞ்ச து³க்க²’’ந்திஆதி³கா ஸேஸா சத்தாரோ பஞ்ஹா. அட்ட²கதா²யங் பன ‘‘கிங் நு கோ², போ⁴ கோ³தம, நத்தி² து³க்க²’’ந்தி பஞ்ஹோ பாளியங் ஸரூபேனேவ படிக்கி²த்தோதி ந உத்³த⁴தோ. படிஸேதி⁴தா ஹொந்தீதி ததியபஞ்ஹோ, தாவ பட²மது³தியபஞ்ஹபடிக்கே²பேனேவ படிக்கி²த்தோ, ஸோ ஹி பஞ்ஹோ விஸுங் விஸுங் படிக்கே²பேன ஏகஜ்ஜ²ங் படிக்கே²பேன ச. தேனாஹ ‘‘உபோ⁴…பே॰… படிக்கி²த்தோ’’தி. எத்த² ச யஸ்ஸ அத்தா காரகோ வேத³கோ வா இச்சி²தோ, தேன விபரிணாமத⁴ம்மோ அத்தா அனுஞ்ஞாதோ ஹோதி. ததா² ச ஸதி அனுபுப்³ப³த⁴ம்மப்பவத்தியா ரூபாதி³த⁴ம்மானங் விய , ஸுகா²தி³த⁴ம்மானங் விய சஸ்ஸ பச்சயாயத்தவுத்திதாய உப்பாத³வந்ததா ஆபஜ்ஜதி. உப்பாதே³ ச ஸதி அவஸ்ஸங்பா⁴வீ நிரோதோ⁴தி அனவகாஸா நிச்சதாதி. தஸ்ஸ ‘‘ஸயங்கத’’ந்தி பட²மபஞ்ஹபடிக்கே²போ பச்சா² சே அத்தனோ நிருள்ஹஸ்ஸ ஸமுத³யோ ஹோதீதி புப்³பே³ விய அனேன ப⁴விதப்³ப³ங், புப்³பே³ விய வா பச்சா²பி. ஸேஸபஞ்ஹாதி ததியபஞ்ஹாத³யோ. ததியபஞ்ஹோ படிக்கி²த்தோதி ஏவஞ்ச ததியபஞ்ஹோ படிக்கி²த்தோ வேதி³தப்³போ³ – ‘‘அவிஜ்ஜாபச்சயா ஸங்கா²ரா’’திஆதி³னா ஸததங் ஸமிதங் பச்சயாயத்தஸ்ஸ தீ³பனேன து³க்க²ஸ்ஸ அதி⁴ச்சஸமுப்பன்னதா படிக்கி²த்தா, ததோ ஏவ தஸ்ஸ அஜானநஞ்ச படிக்கி²த்தங். தேனாஹ ப⁴க³வா ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி (ம॰ நி॰ 3.126; ஸங்॰ நி॰ 2.39-40; மஹாவ॰ 1; உதா³॰ 1).
Ete teti vā ye ime tayā ‘‘sayaṃkataṃ dukkha’’nti ca puṭṭhena mayā ‘‘so karoti, so paṭisaṃvedayatī’’tiādinā, ‘‘añño karoti, añño paṭisaṃvedayatī’’tiādinā ca paṭikkhittā sassatucchedasaṅkhātā antā, te ubho anteti yojanā. Atha vā ete teti yattha puthū aññatitthiyā anupacitañāṇasambhāratāya paramagambhīraṃ saṇhaṃ sukhumaṃ suññataṃ appajānantā sassatucchede nimuggā sīsaṃ ukkhipituṃ na visahanti, ete te ubho ante anupagammāti yojanā. Desetīti paṭhamaṃ tāva anaññasādhāraṇe paṭipattidhamme ñāṇānubhāvena majjhimāya paṭipadāya ṭhito, karuṇānubhāvena desanādhamme majjhimāya paṭipadāya ṭhito dhammaṃ deseti. Ettha hīti hi-saddo hetuattho. Yasmā kāraṇato…pe… niddiṭṭho, tasmā majjhimāya paṭipadāya ṭhito dhammaṃ desetīti yojanā. Kāraṇato phalaṃ dīpitanti yojanā, abhidheyyānurūpañhi liṅgavacanāni honti. Assāti phalassa. Na koci kārako vā vedako vā niddiṭṭho, aññadatthu paṭikkhitto hetuphalamattatādassanato kevalaṃ dukkhakkhandhagahaṇatoti. Ettāvatāti ‘‘ete te, kassapa…pe… dukkhakkhandhassa nirodho hotī’’ti ettakena tāva padena. Sesapañhāti ‘‘sayaṃkatañca paraṃkatañca dukkha’’ntiādikā sesā cattāro pañhā. Aṭṭhakathāyaṃ pana ‘‘kiṃ nu kho, bho gotama, natthi dukkha’’nti pañho pāḷiyaṃ sarūpeneva paṭikkhittoti na uddhato. Paṭisedhitā hontīti tatiyapañho, tāva paṭhamadutiyapañhapaṭikkhepeneva paṭikkhitto, so hi pañho visuṃ visuṃ paṭikkhepena ekajjhaṃ paṭikkhepena ca. Tenāha ‘‘ubho…pe… paṭikkhitto’’ti. Ettha ca yassa attā kārako vedako vā icchito, tena vipariṇāmadhammo attā anuññāto hoti. Tathā ca sati anupubbadhammappavattiyā rūpādidhammānaṃ viya , sukhādidhammānaṃ viya cassa paccayāyattavuttitāya uppādavantatā āpajjati. Uppāde ca sati avassaṃbhāvī nirodhoti anavakāsā niccatāti. Tassa ‘‘sayaṃkata’’nti paṭhamapañhapaṭikkhepo pacchā ce attano niruḷhassa samudayo hotīti pubbe viya anena bhavitabbaṃ, pubbe viya vā pacchāpi. Sesapañhāti tatiyapañhādayo. Tatiyapañho paṭikkhittoti evañca tatiyapañho paṭikkhitto veditabbo – ‘‘avijjāpaccayā saṅkhārā’’tiādinā satataṃ samitaṃ paccayāyattassa dīpanena dukkhassa adhiccasamuppannatā paṭikkhittā, tato eva tassa ajānanañca paṭikkhittaṃ. Tenāha bhagavā ‘‘evametassa kevalassa dukkhakkhandhassa samudayo hotī’’ti (ma. ni. 3.126; saṃ. ni. 2.39-40; mahāva. 1; udā. 1).
யங் பரிவாஸங் ஸமாதி³யித்வா பரிவஸதீதி யோஜனா. வசனஸிலிட்ட²தாவஸேனாதி ‘‘ப⁴க³வதோ ஸந்திகே பப்³ப³ஜ்ஜங் லபெ⁴ய்யங் உபஸம்பத³’’ந்தி யாசந்தேன தேன வுத்தவசனஸிலிட்ட²தாவஸேன. கா³மப்பவேஸனாதீ³னீதி ஆதி³-ஸத்³தே³ன நாதிதி³வாபடிக்கமனங், நவேஸியாதி³கோ³சரதா, ஸப்³ரஹ்மசாரீனங் கிச்சேஸு த³க்க²தாதி³, உத்³தே³ஸாதீ³ஸு திப்³ப³ச்ச²ந்த³தா, தித்தி²யானங் அவண்ணப⁴ணனே அத்தமனதா, பு³த்³தா⁴தீ³னங் அவண்ணப⁴ணனே அனத்தமனதா, தித்தி²யானங் வண்ணப⁴ணனே அனத்தமனதா, பு³த்³தா⁴தீ³னங் வண்ணப⁴ணனே அத்தமனதாதி (மஹாவ॰ 87) இமேஸங் ஸங்க³ஹோ. அட்ட² வத்தானீதி இமானி அட்ட² தித்தி²யவத்தானி பூரெந்தேன. எத்த² ச நாதிகாலேன கா³மப்பவேஸனா தத்த² விஸுத்³த⁴காயவசீஸமாசாரேன பிண்டா³ய சரித்வா நாதிதி³வாபடிக்கமனந்தி இத³மேகங் வத்தங்.
Yaṃ parivāsaṃ samādiyitvā parivasatīti yojanā. Vacanasiliṭṭhatāvasenāti ‘‘bhagavato santike pabbajjaṃ labheyyaṃ upasampada’’nti yācantena tena vuttavacanasiliṭṭhatāvasena. Gāmappavesanādīnīti ādi-saddena nātidivāpaṭikkamanaṃ, navesiyādigocaratā, sabrahmacārīnaṃ kiccesu dakkhatādi, uddesādīsu tibbacchandatā, titthiyānaṃ avaṇṇabhaṇane attamanatā, buddhādīnaṃ avaṇṇabhaṇane anattamanatā, titthiyānaṃ vaṇṇabhaṇane anattamanatā, buddhādīnaṃ vaṇṇabhaṇane attamanatāti (mahāva. 87) imesaṃ saṅgaho. Aṭṭha vattānīti imāni aṭṭha titthiyavattāni pūrentena. Ettha ca nātikālena gāmappavesanā tattha visuddhakāyavacīsamācārena piṇḍāya caritvā nātidivāpaṭikkamananti idamekaṃ vattaṃ.
அயமெத்த² பாடோ²தி ஏதஸ்மிங் கஸ்ஸபஸுத்தே அயங் பாடோ². அஞ்ஞத்தா²தி ஸீஹனாத³ஸுத்தாதீ³ஸு (தீ³॰ நி॰ 1.402-403). க⁴ங்ஸித்வா கொட்டெத்வாதி யதா² ஸுவண்ணங் நிக⁴ங்ஸித்வா அதி⁴கரணியா கொட்டெத்வா நித்³தோ³ஸமேவ க³ய்ஹதி, ஏவங் பரிவாஸவத்தசரணேன க⁴ங்ஸித்வா ஸுத்³த⁴பா⁴வவீமங்ஸனேன கொட்டெத்வா ஸுத்³தோ⁴ ஏவ அஞ்ஞதித்தி²யபுப்³போ³ இத⁴ க³ய்ஹதி. திப்³ப³ச்ச²ந்த³தந்தி ஸாஸனங் அனுபவிஸித்வா ப்³ரஹ்மசரியவாஸே திப்³ப³ச்ச²ந்த³தங் த³ள்ஹதராபி⁴ருசிதங். அஞ்ஞதரங் பி⁴க்கு²ங் ஆமந்தேஸீதி நாமகொ³த்தேன அபாகடங் ஏகங் பி⁴க்கு²ங் ஆணாபேஸி ஏஹிபி⁴க்கு²உபஸம்பதா³ய உபனிஸ்ஸயாபா⁴வதோ. க³ணே நிஸீதி³த்வாதி பி⁴க்கூ² அத்தனோ ஸந்திகே பத்தாஸனவஸேன க³ணே நிஸீதி³த்வா.
Ayamettha pāṭhoti etasmiṃ kassapasutte ayaṃ pāṭho. Aññatthāti sīhanādasuttādīsu (dī. ni. 1.402-403). Ghaṃsitvā koṭṭetvāti yathā suvaṇṇaṃ nighaṃsitvā adhikaraṇiyā koṭṭetvā niddosameva gayhati, evaṃ parivāsavattacaraṇena ghaṃsitvā suddhabhāvavīmaṃsanena koṭṭetvā suddho eva aññatitthiyapubbo idha gayhati. Tibbacchandatanti sāsanaṃ anupavisitvā brahmacariyavāse tibbacchandataṃ daḷhatarābhirucitaṃ. Aññataraṃ bhikkhuṃ āmantesīti nāmagottena apākaṭaṃ ekaṃ bhikkhuṃ āṇāpesi ehibhikkhuupasampadāya upanissayābhāvato. Gaṇe nisīditvāti bhikkhū attano santike pattāsanavasena gaṇe nisīditvā.
அசேலகஸ்ஸபஸுத்தவண்ணனா நிட்டி²தா.
Acelakassapasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. அசேலகஸ்ஸபஸுத்தங் • 7. Acelakassapasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. அசேலகஸ்ஸபஸுத்தவண்ணனா • 7. Acelakassapasuttavaṇṇanā
