| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. ஸளவக்³கோ³
10. Saḷavaggo
1. அத³ந்தஅகு³த்தஸுத்தவண்ணனா
1. Adantaaguttasuttavaṇṇanā
94. அத³மிதாதி த³மங் நிப்³பி³ஸேவனபா⁴வங் அனீதா. அகோ³பிதாதி ஸதிஸங்கா²தாய வதியா ந ரக்கி²தா. அபிஹிதாதி ஸதிகவாடேன ந பிஹிதா. சதூஹிபி பதே³ஹி இந்த்³ரியானங் அனாவரணமேவாஹ. அதி⁴கங் வஹந்தீதி அதி⁴வாஹா, து³க்க²ஸ்ஸ அதி⁴வாஹா து³க்கா²தி⁴வாஹா. நிரயேஸு உப்பஜ்ஜனகங் நேரயிகங். ஆதி³-ஸத்³தே³ன ஸேஸபாளிங் ஸங்க³ண்ஹாதி.
94.Adamitāti damaṃ nibbisevanabhāvaṃ anītā. Agopitāti satisaṅkhātāya vatiyā na rakkhitā. Apihitāti satikavāṭena na pihitā. Catūhipi padehi indriyānaṃ anāvaraṇamevāha. Adhikaṃ vahantīti adhivāhā, dukkhassa adhivāhā dukkhādhivāhā. Nirayesu uppajjanakaṃ nerayikaṃ. Ādi-saddena sesapāḷiṃ saṅgaṇhāti.
ஸளேவாதி ச²-காரஸ்ஸ ஸ-காரோ, ள-காரோ பத³ஸந்தி⁴கரோ. யத்தா²தி நிமித்தத்தே² பு⁴ம்மங். அனவஸ்ஸுதா அதிந்தாதி ராகே³ன அதேமிதா.
Saḷevāti cha-kārassa sa-kāro, ḷa-kāro padasandhikaro. Yatthāti nimittatthe bhummaṃ. Anavassutā atintāti rāgena atemitā.
அஸ்ஸாதி³தந்தி அஸ்ஸாத³ங் இதங் உபக³தங். தேனாஹ ‘‘அஸ்ஸாத³வந்த’’ந்தி. ஸுக²து³க்க²ந்தி இட்டா²னிட்ட²ங். அன்வயதீதி அன்வயோ, ஹேது. ப²ஸ்ஸோதி அன்வயோ ஏதஸ்ஸாதி ப²ஸ்ஸன்வயந்தி ஆஹ – ‘‘ப²ஸ்ஸஹேதுக’’ந்தி. ‘‘அவிருத்³த⁴’’இதி விப⁴த்திலோபேன நித்³தே³ஸோ.
Assāditanti assādaṃ itaṃ upagataṃ. Tenāha ‘‘assādavanta’’nti. Sukhadukkhanti iṭṭhāniṭṭhaṃ. Anvayatīti anvayo, hetu. Phassoti anvayo etassāti phassanvayanti āha – ‘‘phassahetuka’’nti. ‘‘Aviruddha’’iti vibhattilopena niddeso.
பபஞ்சஸஞ்ஞாதி தண்ஹாதி³ஸமதூ⁴பஸங்ஹதஸஞ்ஞா. தேனாஹ ‘‘கிலேஸஸஞ்ஞாய பபஞ்சஸஞ்ஞா நாம ஹுத்வா’’தி. பபஞ்சஸஞ்ஞா ஏதேஸங் அத்தீ²தி பபஞ்சஸஞ்ஞா, இதரீதரா நரா. பபஞ்சயந்தாதி ஸங்ஸாரே பபஞ்சங் சிராயனங் கரொந்தா. ஸஞ்ஞினோதி கே³ஹஸ்ஸிதஸஞ்ஞாய ஸஞ்ஞாவந்தோ. மனோமயங் விதக்கந்தி கேவலங் மனஸா ஸம்பா⁴விதங் மிச்சா²விதக்கங். இரீயதீதி இரியங் படிபத்திங் இரீயதி படிபஜ்ஜதி.
Papañcasaññāti taṇhādisamadhūpasaṃhatasaññā. Tenāha ‘‘kilesasaññāya papañcasaññā nāma hutvā’’ti. Papañcasaññā etesaṃ atthīti papañcasaññā, itarītarā narā. Papañcayantāti saṃsāre papañcaṃ cirāyanaṃ karontā. Saññinoti gehassitasaññāya saññāvanto. Manomayaṃ vitakkanti kevalaṃ manasā sambhāvitaṃ micchāvitakkaṃ. Irīyatīti iriyaṃ paṭipattiṃ irīyati paṭipajjati.
ஸுட்டு² பா⁴விதோதி ஸுட்டு²பா⁴வங் ஸுபா⁴வனங் இதோ பா⁴விதபா⁴விதோ. பு²ட்ட²ஸ்ஸ சித்தந்தி தேன யதா²வுத்தப²ஸ்ஸேன பு²ட்ட²ங் அஸ்ஸ சித்தங். ந விகம்பதே க்வசீதி கிஸ்மிஞ்சி இட்டா²னிட்டா²ரம்மணே ந கம்பதி. பாரகா³தி பாரகா³மினோ ப⁴வத².
Suṭṭhu bhāvitoti suṭṭhubhāvaṃ subhāvanaṃ ito bhāvitabhāvito. Phuṭṭhassa cittanti tena yathāvuttaphassena phuṭṭhaṃ assa cittaṃ. Na vikampate kvacīti kismiñci iṭṭhāniṭṭhārammaṇe na kampati. Pāragāti pāragāmino bhavatha.
அத³ந்தஅகு³த்தஸுத்தவண்ணனா நிட்டி²தா.
Adantaaguttasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அத³ந்தஅகு³த்தஸுத்தங் • 1. Adantaaguttasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அத³ந்தஅகு³த்தவண்ணனா • 1. Adantaaguttavaṇṇanā
