| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૧૦. સળવગ્ગો
10. Saḷavaggo
૧. અદન્તઅગુત્તવણ્ણના
1. Adantaaguttavaṇṇanā
૯૪. સળવગ્ગસ્સ પઠમે અદન્તાતિ અદમિતા. અગુત્તાતિ અગોપિતા. અરક્ખિતાતિ ન રક્ખિતા. અસંવુતાતિ અપિહિતા. દુક્ખાધિવાહા હોન્તીતિ નેરયિકાદિભેદં અધિકદુક્ખં આવહનકા હોન્તિ. સુખાધિવાહા હોન્તીતિ ઝાનમગ્ગફલપભેદં અધિકસુખં આવહનકા હોન્તિ. અધિવહાતિપિ પાઠો, એસેવત્થો.
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
સળેવાતિ છ એવ. અસંવુતો યત્થ દુક્ખં નિગચ્છતીતિ યેસુ આયતનેસુ સંવરવિરહિતો દુક્ખં પાપુણાતિ. તેસઞ્ચ યે સંવરણં અવેદિસુન્તિ યે તેસં આયતનાનં સંવરં વિન્દિંસુ પટિલભિંસુ. વિહરન્તાનવસ્સુતાતિ વિહરન્તિ અનવસ્સુતા અતિન્તા.
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
અસાદિતઞ્ચ સાદુન્તિ અસ્સાદવન્તઞ્ચ મધુરઞ્ચ. ફસ્સદ્વયં સુખદુક્ખે ઉપેક્ખેતિ સુખફસ્સઞ્ચ દુક્ખફસ્સઞ્ચાતિ ઇદં ફસ્સદ્વયં ઉપેક્ખે, ઉપેક્ખામેવેત્થ ઉપ્પાદેય્યાતિ અત્થો. ફસ્સદ્વયં સુખદુક્ખં ઉપેક્ખોતિ વા પાઠો, ફસ્સહેતુકં સુખદુક્ખં ઉપેક્ખો, સુખે અનુરોધં દુક્ખે ચ વિરોધં અનુપ્પાદેન્તો ઉપેક્ખકો ભવેય્યાતિપિ અત્થો. અનાનુરુદ્ધો અવિરુદ્ધો કેનચીતિ કેનચિ સદ્ધિં નેવ અનુરુદ્ધો ન વિરુદ્ધો ભવેય્ય.
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
પપઞ્ચસઞ્ઞાતિ કિલેસસઞ્ઞાય પપઞ્ચસઞ્ઞા નામ હુત્વા. ઇતરીતરા નરાતિ લામકસત્તા પપઞ્ચયન્તા ઉપયન્તીતિ પપઞ્ચયમાના વટ્ટં ઉપગચ્છન્તિ. સઞ્ઞિનોતિ સસઞ્ઞા સત્તા. મનોમયં ગેહસિતઞ્ચ સબ્બન્તિ સબ્બમેવ પઞ્ચકામગુણગેહનિસ્સિતં મનોમયં વિતક્કં. પનુજ્જાતિ પનુદિત્વા નીહરિત્વા. નેક્ખમ્મસિતં ઇરીયતીતિ દબ્બજાતિકો ભિક્ખુ નેક્ખમ્મસિતં ઇરિયેન ઇરીયતિ.
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
છસ્સુ યદા સુભાવિતોતિ છસુ આરમ્મણેસુ યદા સુટ્ઠુ ભાવિતો. ફુટ્ઠસ્સ ચિત્તં ન વિકમ્પતે ક્વચીતિ સુખફસ્સેન વા દુક્ખફસ્સેન વા ફુટ્ઠસ્સ કિસ્મિઞ્ચિ ચિત્તં ન કમ્પતિ ન વેધતિ. ભવત્થ જાતિમરણસ્સ પારગાતિ જાતિમરણાનં પારં નિબ્બાનં ગમકા હોથ.
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. અદન્તઅગુત્તસુત્તં • 1. Adantaaguttasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. અદન્તઅગુત્તસુત્તવણ્ણના • 1. Adantaaguttasuttavaṇṇanā
