| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૭. અડ્ડકરણસુત્તવણ્ણના
7. Aḍḍakaraṇasuttavaṇṇanā
૧૧૮. સત્તમે કામહેતૂતિ કામમૂલકં. કામનિદાનન્તિ કામપચ્ચયા. કામાધિકરણન્તિ કામકારણા. સબ્બાનિ હેતાનિ અઞ્ઞમઞ્ઞવેવચનાનેવ. ભદ્રમુખોતિ સુન્દરમુખો. એકદિવસં કિર રાજા અડ્ડકરણે નિસીદિ. તત્થ પઠમતરં લઞ્જં ગહેત્વા નિસિન્ના અમચ્ચા અસ્સામિકેપિ સામિકે કરિંસુ. રાજા તં ઞત્વા – ‘‘મય્હં તાવ પથવિસ્સરસ્સ સમ્મુખાપેતે એવં કરોન્તિ, પરમ્મુખા કિં નામ ન કરિસ્સન્તિ? પઞ્ઞાયિસ્સતિ દાનિ વિટટૂભો સેનાપતિ સકેન રજ્જેન, કિં મય્હં એવરૂપેહિ લઞ્જખાદકેહિ મુસાવાદીહિ સદ્ધિં એકટ્ઠાને નિસજ્જાયા’’તિ ચિન્તેસિ. તસ્મા એવમાહ. ખિપ્પંવ ઓડ્ડિતન્તિ કુમિનં વિય ઓડ્ડિતં. યથા મચ્છા ઓડ્ડિતં કુમિનં પવિસન્તા ન જાનન્તિ, એવં સત્તા કિલેસકામેન વત્થુકામં વીતિક્કમન્તા ન જાનન્તીતિ અત્થો. સત્તમં.
118. Sattame kāmahetūti kāmamūlakaṃ. Kāmanidānanti kāmapaccayā. Kāmādhikaraṇanti kāmakāraṇā. Sabbāni hetāni aññamaññavevacanāneva. Bhadramukhoti sundaramukho. Ekadivasaṃ kira rājā aḍḍakaraṇe nisīdi. Tattha paṭhamataraṃ lañjaṃ gahetvā nisinnā amaccā assāmikepi sāmike kariṃsu. Rājā taṃ ñatvā – ‘‘mayhaṃ tāva pathavissarassa sammukhāpete evaṃ karonti, parammukhā kiṃ nāma na karissanti? Paññāyissati dāni viṭaṭūbho senāpati sakena rajjena, kiṃ mayhaṃ evarūpehi lañjakhādakehi musāvādīhi saddhiṃ ekaṭṭhāne nisajjāyā’’ti cintesi. Tasmā evamāha. Khippaṃva oḍḍitanti kuminaṃ viya oḍḍitaṃ. Yathā macchā oḍḍitaṃ kuminaṃ pavisantā na jānanti, evaṃ sattā kilesakāmena vatthukāmaṃ vītikkamantā na jānantīti attho. Sattamaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૭. અડ્ડકરણસુત્તં • 7. Aḍḍakaraṇasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૭. અડ્ડકરણસુત્તવણ્ણના • 7. Aḍḍakaraṇasuttavaṇṇanā
