| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. ஆதி³த்தபரியாயஸுத்தவண்ணனா
8. Ādittapariyāyasuttavaṇṇanā
235. கிலேஸானங் அனு அனு ப்³யஞ்ஜனதோ பரிப்³யத்தியா உப்பத்திபச்சயபா⁴வதோ அனுப்³யஞ்ஜனங், ஹத்த²பாதா³தி³அவயவாதி ஆஹ – ‘‘ஹத்தா² ஸோப⁴னா’’திஆதி³. நிமித்தக்³கா³ஹோதி கிலேஸுப்பத்தியா நிமித்தபூ⁴தோ கா³ஹோ. ஸங்ஸந்தெ³த்வா க³ஹணந்தி அவயவே ஸமோதா⁴னெத்வா ‘‘இத்தி²புரிஸோ’’திஆதி³னா ஏகஜ்ஜ²ங் க³ஹணங். விப⁴த்திக³ஹணந்தி விபா⁴கே³ன அனவஸேஸக்³க³ஹணங். கும்பீ⁴லஸதி³ஸோதி கும்பீ⁴லகா³ஹஸதி³ஸோ. தேனாஹ – ‘‘ஸப்³ப³மேவ க³ண்ஹாதீ’’தி ஹத்த²பாதா³தீ³ஸு தங் தங் கொட்டா²ஸங் விப⁴ஜித்வா க³ஹணங் ரத்தபாஸதி³ஸோ ஜலூககா³ஹஸதி³ஸோ. ஏகஜவனவாரேபி லப்³ப⁴ந்தீதி இத³ங் சக்கு²த்³வாரானுஸாரேன உப்பன்னமனொத்³வாரிகஜவனங் ஸந்தா⁴ய வுத்தங்.
235. Kilesānaṃ anu anu byañjanato paribyattiyā uppattipaccayabhāvato anubyañjanaṃ, hatthapādādiavayavāti āha – ‘‘hatthā sobhanā’’tiādi. Nimittaggāhoti kilesuppattiyā nimittabhūto gāho. Saṃsandetvā gahaṇanti avayave samodhānetvā ‘‘itthipuriso’’tiādinā ekajjhaṃ gahaṇaṃ. Vibhattigahaṇanti vibhāgena anavasesaggahaṇaṃ. Kumbhīlasadisoti kumbhīlagāhasadiso. Tenāha – ‘‘sabbameva gaṇhātī’’ti hatthapādādīsu taṃ taṃ koṭṭhāsaṃ vibhajitvā gahaṇaṃ rattapāsadiso jalūkagāhasadiso. Ekajavanavārepi labbhantīti idaṃ cakkhudvārānusārena uppannamanodvārikajavanaṃ sandhāya vuttaṃ.
நிமித்தஸ்ஸாதே³ன க³ந்தி²தந்தி யதா²வுத்தே நிமித்தே அஸ்ஸாத³கா³ஹேன க³ந்தி²தங் ஸம்ப³த்³த⁴ங். ப⁴வங்கே³னேவாதி மூலப⁴வங்கே³னேவ. கிலேஸப⁴யங் த³ஸ்ஸெந்தோதி ததா² கிலேஸுப்பத்தியா ஸதி அகுஸலசித்தேன அந்தரிதங் சே மரணசித்தங் ப⁴வெய்ய, ஏகந்ததோ நிரயே வா திரச்சா²னயோனியா வா உப்பத்தி ஸியாதி கிலேஸானங் பா⁴யிதப்³ப³ங் த³ஸ்ஸெந்தோ. ‘‘ஸமயவஸேன வா ஏவங் வுத்த’’ந்தி வத்வா தமத்த²ங் விவரந்தோ ‘‘சக்கு²த்³வாரஸ்மிஞ்ஹீ’’திஆதி³மாஹ. ரத்தசித்தங் வாதி ராக³வஸேன ரத்தசித்தங் வா. து³ட்ட²சித்தேன கத²ங் ஆரம்மணரஸானுப⁴வனந்தி? தோ³மனஸ்ஸவேத³னுப்பத்தி ஏவ தஸ்ஸ ஆரம்மணரஸானுப⁴வனங் த³ட்ட²ப்³ப³ங். இமஸ்ஸ ஸமயஸ்ஸாதி மரணஸமயஸ்ஸ.
Nimittassādena ganthitanti yathāvutte nimitte assādagāhena ganthitaṃ sambaddhaṃ. Bhavaṅgenevāti mūlabhavaṅgeneva. Kilesabhayaṃ dassentoti tathā kilesuppattiyā sati akusalacittena antaritaṃ ce maraṇacittaṃ bhaveyya, ekantato niraye vā tiracchānayoniyā vā uppatti siyāti kilesānaṃ bhāyitabbaṃ dassento. ‘‘Samayavasena vā evaṃ vutta’’nti vatvā tamatthaṃ vivaranto ‘‘cakkhudvārasmiñhī’’tiādimāha. Rattacittaṃ vāti rāgavasena rattacittaṃ vā. Duṭṭhacittena kathaṃ ārammaṇarasānubhavananti? Domanassavedanuppatti eva tassa ārammaṇarasānubhavanaṃ daṭṭhabbaṃ. Imassa samayassāti maraṇasamayassa.
உபி⁴ன்னங் நாஸச்சி²த்³தா³னங் மஜ்ஜே² டி²த-அட்டி²துத³னங் ஸஹ கு²ரட்டே²ன சி²ந்த³னங். த³ண்ட³கவாஸீதி தீ³க⁴த³ண்ட³கா மஹாவாஸி. நிபஜ்ஜித்வா நித்³தோ³க்கமனந்தி இமினா பசலாயிகனித்³த³ங் படிக்கி²பதி. தத்த² ஹி கதா³சி அந்தரா மிச்சா²விதக்கானங் ஸல்லகானங் அவஸரோ ஸியா, நத்தே²வ நிபஜ்ஜித்வா மஹானித்³த³ங் ஓக்கந்தகாலே. விதக்கானந்தி மிச்சா²விதக்கானங்.
Ubhinnaṃ nāsacchiddānaṃ majjhe ṭhita-aṭṭhitudanaṃ saha khuraṭṭhena chindanaṃ. Daṇḍakavāsīti dīghadaṇḍakā mahāvāsi. Nipajjitvā niddokkamananti iminā pacalāyikaniddaṃ paṭikkhipati. Tattha hi kadāci antarā micchāvitakkānaṃ sallakānaṃ avasaro siyā, nattheva nipajjitvā mahāniddaṃ okkantakāle. Vitakkānanti micchāvitakkānaṃ.
ஆதி³த்தபரியாயஸுத்தவண்ணனா நிட்டி²தா.
Ādittapariyāyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஆதி³த்தபரியாயஸுத்தங் • 8. Ādittapariyāyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஆதி³த்தபரியாயஸுத்தவண்ணனா • 8. Ādittapariyāyasuttavaṇṇanā
