| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஆதி³த்தஸுத்தவண்ணனா
6. Ādittasuttavaṇṇanā
28. க³யானாமிகாய நதி³யா அவிதூ³ரே பவத்தோ கா³மோ க³யா நாம, தஸ்ஸங் க³யாயங் விஹரதீதி ஸமீபத்தே² சேதங் பு⁴ம்மவசனங். க³யாகா³மஸ்ஸ ஹி ஆஸன்னே க³யாஸீஸனாமகே பிட்டி²பாஸாணே ப⁴க³வா ததா³ விஹாஸி. தேனாஹ ‘‘ப⁴க³வா தத்த² விஹரதீ’’தி.
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
தத்ராதி ‘‘பி⁴க்கூ² ஆமந்தேஸீ’’தி யே பி⁴க்கூ² ஆமந்தேஸி, யதா² சாயங் தே³ஸனா தேஸங் ஸப்பாயா ஜாதா, தத்ர தஸ்மிங் அத்த²த்³வயே விபா⁴வேதப்³பே³ அயங் அனுபுப்³பி³கதா² ஸமுதா³க³மதோ பட்டா²ய அனுபடிபாடிகதா². இதோதி இமஸ்மா கப்பதோ. கிராதி அனுஸ்ஸவனத்தே² நிபாதோ. பாரமிதாபரிபா⁴வனாய பரிபாகக³தே. ஞாணேதி போ³தி⁴ஞாணே. கனிட்ட²புத்தோ வேமாதிகபா⁴தா ப⁴க³வதோ. வேளுபி⁴த்திகுடிகாஹி பரிக்கி²பித்வா ப³ஹித்³தா⁴, அந்தோ பன படஸாணீஹி.
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
ஸப்³பே³ஸங் ஸத்தானங். புஞ்ஞசேதனங் அந்தோ அப்³ப⁴ந்தரே பவேஸேதி. ப⁴க³வாபி தஸ்ஸ புத்தோதி கத்வா ‘‘அஞ்ஞே தயோ புத்தா’’தி வுத்தங். அவிப்பகிரித்வாதி பராஜயேன அவிப்பகிரிய அபலாயித்வா. பித³ஹீதி தா³துங் ந ஸக்கோமீதி ததா² அகாஸி. ஸச்சவாதி³தாய க³ண்ஹிங்ஸூதி ராஜகுலஸ்ஸ ஸச்சவாதி³தாய அத்தனோ வரங் க³ண்ஹிங்ஸு.
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
வினிவத்திதுந்தி படிஞ்ஞாய நிவத்திதுங். அந்தராதி தும்ஹேஹி பரிச்சி²ன்னகாலஸ்ஸ அந்தரா ஏவ மதா. அட்ட²வீஸதிஹத்த²ட்டா²னங் உஸப⁴ங் நாம. உஸபே⁴ அட்ட²வீஸதிஹத்த²ப்பமாணே டா²னே. தா³னக்³கே³ ப்³யாவடோதி பஸுதோ.
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
ஸோதி ப⁴க³வா. ததா²ரூபஞ்ஹி பு³த்³தா⁴னங் தே³ஸனாபாடிஹாரியங், யதா² தே³ஸனாய க³ஹிதோ அத்தோ² பச்சக்க²தோ விபூ⁴தோ ஹுத்வா உபட்டா²தி. தேனாஹ ‘‘இமேஸங்…பே॰… தே³ஸெஸ்ஸாமீ’’தி. ஸன்னிட்டா²னந்தி சிரகாலபரிசிதாதி³த்தஅக்³கி³கானங் ஆதி³த்தபரியாயதே³ஸனாவ ஸப்பாயாதி நிச்ச²யமகாஸி. பதி³த்தந்தி பதீ³பிதங் ஏகாத³ஸஹி அக்³கீ³ஹி ஏகஜாலீபூ⁴தங். தேனாஹ ‘‘ஸம்பஜ்ஜலித’’ந்தி. து³க்க²லக்க²ணங் கதி²தங் சக்கா²தீ³னங் ஏகாத³ஸஹி அக்³கீ³ஹி ஆதி³த்தபா⁴வேன து³க்க²மதாய து³க்க²ஸ்ஸ கதி²தத்தா.
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
ஆதி³த்தஸுத்தவண்ணனா நிட்டி²தா.
Ādittasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஆதி³த்தஸுத்தங் • 6. Ādittasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஆதி³த்தஸுத்தவண்ணனா • 6. Ādittasuttavaṇṇanā
