| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૬. આદિત્તસુત્તવણ્ણના
6. Ādittasuttavaṇṇanā
૨૮. ગયાનામિકાય નદિયા અવિદૂરે પવત્તો ગામો ગયા નામ, તસ્સં ગયાયં વિહરતીતિ સમીપત્થે ચેતં ભુમ્મવચનં. ગયાગામસ્સ હિ આસન્ને ગયાસીસનામકે પિટ્ઠિપાસાણે ભગવા તદા વિહાસિ. તેનાહ ‘‘ભગવા તત્થ વિહરતી’’તિ.
28. Gayānāmikāya nadiyā avidūre pavatto gāmo gayā nāma, tassaṃ gayāyaṃ viharatīti samīpatthe cetaṃ bhummavacanaṃ. Gayāgāmassa hi āsanne gayāsīsanāmake piṭṭhipāsāṇe bhagavā tadā vihāsi. Tenāha ‘‘bhagavā tattha viharatī’’ti.
તત્રાતિ ‘‘ભિક્ખૂ આમન્તેસી’’તિ યે ભિક્ખૂ આમન્તેસિ, યથા ચાયં દેસના તેસં સપ્પાયા જાતા, તત્ર તસ્મિં અત્થદ્વયે વિભાવેતબ્બે અયં અનુપુબ્બિકથા સમુદાગમતો પટ્ઠાય અનુપટિપાટિકથા. ઇતોતિ ઇમસ્મા કપ્પતો. કિરાતિ અનુસ્સવનત્થે નિપાતો. પારમિતાપરિભાવનાય પરિપાકગતે. ઞાણેતિ બોધિઞાણે. કનિટ્ઠપુત્તો વેમાતિકભાતા ભગવતો. વેળુભિત્તિકુટિકાહિ પરિક્ખિપિત્વા બહિદ્ધા, અન્તો પન પટસાણીહિ.
Tatrāti ‘‘bhikkhū āmantesī’’ti ye bhikkhū āmantesi, yathā cāyaṃ desanā tesaṃ sappāyā jātā, tatra tasmiṃ atthadvaye vibhāvetabbe ayaṃ anupubbikathā samudāgamato paṭṭhāya anupaṭipāṭikathā. Itoti imasmā kappato. Kirāti anussavanatthe nipāto. Pāramitāparibhāvanāya paripākagate. Ñāṇeti bodhiñāṇe. Kaniṭṭhaputto vemātikabhātā bhagavato. Veḷubhittikuṭikāhi parikkhipitvā bahiddhā, anto pana paṭasāṇīhi.
સબ્બેસં સત્તાનં. પુઞ્ઞચેતનં અન્તો અબ્ભન્તરે પવેસેતિ. ભગવાપિ તસ્સ પુત્તોતિ કત્વા ‘‘અઞ્ઞે તયો પુત્તા’’તિ વુત્તં. અવિપ્પકિરિત્વાતિ પરાજયેન અવિપ્પકિરિય અપલાયિત્વા. પિદહીતિ દાતું ન સક્કોમીતિ તથા અકાસિ. સચ્ચવાદિતાય ગણ્હિંસૂતિ રાજકુલસ્સ સચ્ચવાદિતાય અત્તનો વરં ગણ્હિંસુ.
Sabbesaṃ sattānaṃ. Puññacetanaṃ anto abbhantare paveseti. Bhagavāpi tassa puttoti katvā ‘‘aññe tayo puttā’’ti vuttaṃ. Avippakiritvāti parājayena avippakiriya apalāyitvā. Pidahīti dātuṃ na sakkomīti tathā akāsi. Saccavāditāya gaṇhiṃsūti rājakulassa saccavāditāya attano varaṃ gaṇhiṃsu.
વિનિવત્તિતુન્તિ પટિઞ્ઞાય નિવત્તિતું. અન્તરાતિ તુમ્હેહિ પરિચ્છિન્નકાલસ્સ અન્તરા એવ મતા. અટ્ઠવીસતિહત્થટ્ઠાનં ઉસભં નામ. ઉસભે અટ્ઠવીસતિહત્થપ્પમાણે ઠાને. દાનગ્ગે બ્યાવટોતિ પસુતો.
Vinivattitunti paṭiññāya nivattituṃ. Antarāti tumhehi paricchinnakālassa antarā eva matā. Aṭṭhavīsatihatthaṭṭhānaṃ usabhaṃ nāma. Usabhe aṭṭhavīsatihatthappamāṇe ṭhāne. Dānagge byāvaṭoti pasuto.
સોતિ ભગવા. તથારૂપઞ્હિ બુદ્ધાનં દેસનાપાટિહારિયં, યથા દેસનાય ગહિતો અત્થો પચ્ચક્ખતો વિભૂતો હુત્વા ઉપટ્ઠાતિ. તેનાહ ‘‘ઇમેસં…પે॰… દેસેસ્સામી’’તિ. સન્નિટ્ઠાનન્તિ ચિરકાલપરિચિતાદિત્તઅગ્ગિકાનં આદિત્તપરિયાયદેસનાવ સપ્પાયાતિ નિચ્છયમકાસિ. પદિત્તન્તિ પદીપિતં એકાદસહિ અગ્ગીહિ એકજાલીભૂતં. તેનાહ ‘‘સમ્પજ્જલિત’’ન્તિ. દુક્ખલક્ખણં કથિતં ચક્ખાદીનં એકાદસહિ અગ્ગીહિ આદિત્તભાવેન દુક્ખમતાય દુક્ખસ્સ કથિતત્તા.
Soti bhagavā. Tathārūpañhi buddhānaṃ desanāpāṭihāriyaṃ, yathā desanāya gahito attho paccakkhato vibhūto hutvā upaṭṭhāti. Tenāha ‘‘imesaṃ…pe… desessāmī’’ti. Sanniṭṭhānanti cirakālaparicitādittaaggikānaṃ ādittapariyāyadesanāva sappāyāti nicchayamakāsi. Padittanti padīpitaṃ ekādasahi aggīhi ekajālībhūtaṃ. Tenāha ‘‘sampajjalita’’nti. Dukkhalakkhaṇaṃ kathitaṃ cakkhādīnaṃ ekādasahi aggīhi ādittabhāvena dukkhamatāya dukkhassa kathitattā.
આદિત્તસુત્તવણ્ણના નિટ્ઠિતા.
Ādittasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૬. આદિત્તસુત્તં • 6. Ādittasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૬. આદિત્તસુત્તવણ્ણના • 6. Ādittasuttavaṇṇanā
