| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
4. அக்³கி³ஸுத்தவண்ணனா
4. Aggisuttavaṇṇanā
93. சதுத்தே² அனுத³ஹனட்டே²ன அக்³கி³, ராகோ³ ஏவ அக்³கி³ ராக³க்³கி³. ராகோ³ ஹி உப்பஜ்ஜமானோ ஸத்தே அனுத³ஹதி ஜா²பேதி, தஸ்மா ‘‘அக்³கீ³’’தி வுச்சதி. இதரேஸுபி த்³வீஸு ஏஸேவ நயோ. தத்த² யதா² அக்³கி³ யதே³வ இந்த⁴னங் நிஸ்ஸாய உப்பஜ்ஜதி, தங் நித³ஹதி, மஹாபரிளாஹோ ச ஹோதி, ஏவமிமேபி ராகா³த³யோ யஸ்மிங் ஸந்தானே ஸயங் உப்பன்னா, தங் நித³ஹந்தி, மஹாபரிளாஹா ச ஹொந்தி து³ன்னிப்³பா³பயா. தேஸு ராக³பரிளாஹேன ஸந்தத்தஹத³யானங் இச்சி²தாலாப⁴து³க்கே²ன மரணப்பத்தானங் ஸத்தானங் பமாணங் நத்தி². அயங் தாவ ராக³ஸ்ஸ அனுத³ஹனதா. தோ³ஸஸ்ஸ பன அனுத³ஹனதாய விஸேஸதோ மனோபதோ³ஸிகா தே³வா, மோஹஸ்ஸ அனுத³ஹனதாய கி²ட்³டா³பதோ³ஸிகா தே³வா ச நித³ஸ்ஸனங். மோஹவஸேன ஹி தேஸங் ஸதிஸம்மோஸோ ஹோதி, தஸ்மா கி²ட்³டா³வஸேன ஆஹாரவேலங் அதிவத்தெந்தா காலங் கரொந்தி. அயங் தாவ ராகா³தீ³னங் தி³ட்ட²த⁴ம்மிகோ அனுத³ஹனபா⁴வோ. ஸம்பராயிகோ பன நிரயாதீ³ஸு நிப்³ப³த்தாபனவஸேன கோ⁴ரதரோ து³ரதி⁴வாஸோ ச. அயஞ்ச அத்தோ² ஆதி³த்தபரியாயேன விபா⁴வேதப்³போ³.
93. Catutthe anudahanaṭṭhena aggi, rāgo eva aggi rāgaggi. Rāgo hi uppajjamāno satte anudahati jhāpeti, tasmā ‘‘aggī’’ti vuccati. Itaresupi dvīsu eseva nayo. Tattha yathā aggi yadeva indhanaṃ nissāya uppajjati, taṃ nidahati, mahāpariḷāho ca hoti, evamimepi rāgādayo yasmiṃ santāne sayaṃ uppannā, taṃ nidahanti, mahāpariḷāhā ca honti dunnibbāpayā. Tesu rāgapariḷāhena santattahadayānaṃ icchitālābhadukkhena maraṇappattānaṃ sattānaṃ pamāṇaṃ natthi. Ayaṃ tāva rāgassa anudahanatā. Dosassa pana anudahanatāya visesato manopadosikā devā, mohassa anudahanatāya khiḍḍāpadosikā devā ca nidassanaṃ. Mohavasena hi tesaṃ satisammoso hoti, tasmā khiḍḍāvasena āhāravelaṃ ativattentā kālaṃ karonti. Ayaṃ tāva rāgādīnaṃ diṭṭhadhammiko anudahanabhāvo. Samparāyiko pana nirayādīsu nibbattāpanavasena ghorataro duradhivāso ca. Ayañca attho ādittapariyāyena vibhāvetabbo.
கா³தா²ஸு காமேஸு முச்சி²தேதி வத்து²காமேஸு பாதப்³யதாவஸேன முச்ச²ங் பா³ல்யங் பமாத³ங் மிச்சா²சாரங் ஆபன்னே. ப்³யாபன்னேதி ப்³யாபன்னசித்தே த³ஹதீதி ஸம்ப³ந்தோ⁴. நரே பாணாதிபாதினோதி இத³ங் தோ³ஸக்³கி³ஸ்ஸ. அரியத⁴ம்மே அகோவிதே³தி யே க²ந்தா⁴யதனாதீ³ஸு ஸப்³பே³ன ஸப்³ப³ங் உக்³க³ஹபரிபுச்சா²ய மனஸிகாரரஹிதா அரியத⁴ம்மஸ்ஸ அகுஸலா, தே ஸம்மோஹேன அபி⁴பூ⁴தா விஸேஸேன ஸம்மூள்ஹா நாமாதி வுத்தா. ஏதே அக்³கீ³ அஜானந்தாதி ‘‘ஏதே ராக³க்³கி³ஆத³யோ இத⁴ சேவ ஸம்பராயே ச அனுத³ஹந்தீ’’தி அஜானந்த்தாஆ பரிஞ்ஞாபி⁴ஸமயவஸேன பஹானாபி⁴ஸமயவஸேன ச அப்படிவிஜ்ஜ²ந்தா. ஸக்காயாபி⁴ரதாதி ஸக்காயே உபாதா³னக்க²ந்த⁴பஞ்சகே தண்ஹாதி³ட்டி²மானநந்த³னாபி⁴ரதா. வட்³ட⁴யந்தீதி புனப்புனங் உப்பஜ்ஜனேன வட்³ட⁴யந்தி ஆசினந்தி. நிரயந்தி அட்ட²வித⁴ங் மஹானிரயங், ஸோளஸவித⁴ங் உஸ்ஸத³னிரயந்தி ஸப்³ப³ம்பி நிரயங். திரச்சா²னஞ்ச யோனியோதி திரச்சா²னயோனியோ ச. அஸுரந்தி அஸுரகாயங் பெத்திவிஸயஞ்ச வட்³ட⁴யந்தீதி ஸம்ப³ந்தோ⁴.
Gāthāsu kāmesu mucchiteti vatthukāmesu pātabyatāvasena mucchaṃ bālyaṃ pamādaṃ micchācāraṃ āpanne. Byāpanneti byāpannacitte dahatīti sambandho. Nare pāṇātipātinoti idaṃ dosaggissa. Ariyadhamme akovideti ye khandhāyatanādīsu sabbena sabbaṃ uggahaparipucchāya manasikārarahitā ariyadhammassa akusalā, te sammohena abhibhūtā visesena sammūḷhā nāmāti vuttā. Ete aggī ajānantāti ‘‘ete rāgaggiādayo idha ceva samparāye ca anudahantī’’ti ajānanttāā pariññābhisamayavasena pahānābhisamayavasena ca appaṭivijjhantā. Sakkāyābhiratāti sakkāye upādānakkhandhapañcake taṇhādiṭṭhimānanandanābhiratā. Vaḍḍhayantīti punappunaṃ uppajjanena vaḍḍhayanti ācinanti. Nirayanti aṭṭhavidhaṃ mahānirayaṃ, soḷasavidhaṃ ussadanirayanti sabbampi nirayaṃ. Tiracchānañca yoniyoti tiracchānayoniyo ca. Asuranti asurakāyaṃ pettivisayañca vaḍḍhayantīti sambandho.
எத்தாவதா ராக³க்³கி³ஆதீ³னங் இத⁴ சேவ ஸம்பராயே ச அனுத³ஹனபா⁴வத³ஸ்ஸனமுகே²ன வட்டங் த³ஸ்ஸெத்வா இதா³னி நேஸங் நிப்³பா³பனேன விவட்டங் த³ஸ்ஸேதுங் ‘‘யே ச ரத்திந்தி³வா’’திஆதி³ வுத்தங். தத்த² யுத்தாதி பா⁴வனானுயோக³வஸேன யுத்தா. கத்த²? ஸம்மாஸம்பு³த்³த⁴ஸாஸனே. தேன அஞ்ஞஸாஸனே ராக³க்³கி³ஆதீ³னங் நிப்³பா³பனாபா⁴வங் த³ஸ்ஸேதி. ததா² ஹி அனஞ்ஞஸாதா⁴ரணங் தேஸங் நிப்³பா³பனவிதி⁴ங் அஸுப⁴கம்மட்டா²னங் ஸங்கே²பேனேவ த³ஸ்ஸெந்தோ –
Ettāvatā rāgaggiādīnaṃ idha ceva samparāye ca anudahanabhāvadassanamukhena vaṭṭaṃ dassetvā idāni nesaṃ nibbāpanena vivaṭṭaṃ dassetuṃ ‘‘ye ca rattindivā’’tiādi vuttaṃ. Tattha yuttāti bhāvanānuyogavasena yuttā. Kattha? Sammāsambuddhasāsane. Tena aññasāsane rāgaggiādīnaṃ nibbāpanābhāvaṃ dasseti. Tathā hi anaññasādhāraṇaṃ tesaṃ nibbāpanavidhiṃ asubhakammaṭṭhānaṃ saṅkhepeneva dassento –
‘‘தே நிப்³பா³பெந்தி ராக³க்³கி³ங், நிச்சங் அஸுப⁴ஸஞ்ஞினோ;
‘‘Te nibbāpenti rāgaggiṃ, niccaṃ asubhasaññino;
தோ³ஸக்³கி³ங் பன மெத்தாய, நிப்³பா³பெந்தி நருத்தமா;
Dosaggiṃ pana mettāya, nibbāpenti naruttamā;
மோஹக்³கி³ங் பன பஞ்ஞாய, யாயங் நிப்³பே³த⁴கா³மினீ’’தி. –
Mohaggiṃ pana paññāya, yāyaṃ nibbedhagāminī’’ti. –
ஆஹ . தத்த² அஸுப⁴ஸஞ்ஞினோதி த்³வத்திங்ஸாகாரவஸேன சேவ உத்³து⁴மாதகாதி³வஸேன ச அஸுப⁴பா⁴வனானுயோகே³ன அஸுப⁴ஸஞ்ஞினோ. மெத்தாயாதி ‘‘ஸோ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதீ’’தி (அ॰ நி॰ 3.64, 66) வுத்தாய மெத்தாபா⁴வனாய. எத்த² ச அஸுப⁴ஜ்ஜா²னஞ்ச பாத³கங் கத்வா நிப்³ப³த்திதஅனாகா³மிமக்³கே³ன ராக³க்³கி³தோ³ஸக்³கீ³னங் நிப்³பா³பனங் வேதி³தப்³ப³ங். பஞ்ஞாயாதி விபஸ்ஸனாபஞ்ஞாஸஹிதாய மக்³க³பஞ்ஞாய. தேனேவாஹ ‘‘யாயங் நிப்³பே³த⁴கா³மினீ’’தி. ஸா ஹி கிலேஸக்க²ந்த⁴ங் வினிவிஜ்ஜ²ந்தீ க³ச்ச²தி பவத்ததீதி நிப்³பே³த⁴கா³மினீதி வுச்சதி. அஸேஸங் பரினிப்³ப³ந்தீதி அரஹத்தமக்³கே³ன அஸேஸங் ராக³க்³கி³ஆதி³ங் நிப்³பா³பெத்வா ஸஉபாதி³ஸேஸாய நிப்³பா³னதா⁴துயா டி²தா பஞ்ஞாவேபுல்லப்பத்தியா நிபகா புப்³பே³வ ஸம்மப்பதா⁴னேன ஸப்³ப³ஸோ கோஸஜ்ஜஸ்ஸ ஸுப்பஹீனத்தா ப²லஸமாபத்திஸமாபஜ்ஜனேன அகிலாஸுபா⁴வேன ச ரத்திந்தி³வமதந்தி³தா சரிமகசித்தனிரோதே⁴ன அனுபாதி³ஸேஸாய நிப்³பா³னதா⁴துயா அஸேஸங் பரினிப்³ப³ந்தி. ததோ ச அஸேஸங் நிஸ்ஸேஸங் வட்டது³க்க²ங் அச்சகு³ங் அதிக்கமங்ஸு.
Āha . Tattha asubhasaññinoti dvattiṃsākāravasena ceva uddhumātakādivasena ca asubhabhāvanānuyogena asubhasaññino. Mettāyāti ‘‘so mettāsahagatena cetasā ekaṃ disaṃ pharitvā viharatī’’ti (a. ni. 3.64, 66) vuttāya mettābhāvanāya. Ettha ca asubhajjhānañca pādakaṃ katvā nibbattitaanāgāmimaggena rāgaggidosaggīnaṃ nibbāpanaṃ veditabbaṃ. Paññāyāti vipassanāpaññāsahitāya maggapaññāya. Tenevāha ‘‘yāyaṃ nibbedhagāminī’’ti. Sā hi kilesakkhandhaṃ vinivijjhantī gacchati pavattatīti nibbedhagāminīti vuccati. Asesaṃ parinibbantīti arahattamaggena asesaṃ rāgaggiādiṃ nibbāpetvā saupādisesāya nibbānadhātuyā ṭhitā paññāvepullappattiyā nipakā pubbeva sammappadhānena sabbaso kosajjassa suppahīnattā phalasamāpattisamāpajjanena akilāsubhāvena ca rattindivamatanditā carimakacittanirodhena anupādisesāya nibbānadhātuyā asesaṃ parinibbanti. Tato ca asesaṃ nissesaṃ vaṭṭadukkhaṃ accaguṃ atikkamaṃsu.
ஏவங் யே ராக³க்³கி³ஆதி³கே நிப்³பா³பெந்தி, தேஸங் அனுபாதி³ஸேஸனிப்³பா³னேன நிப்³பு³திங் த³ஸ்ஸெத்வா இதா³னி படிவித்³த⁴கு³ணேஹி தோ²மெந்தோ ஓஸானகா³த²மாஹ. தத்த² அரியத்³த³ஸாதி அரியேஹி பு³த்³தா⁴தீ³ஹி பஸ்ஸிதப்³ப³ங் கிலேஸேஹி வா ஆரகத்தா அரியங் நிப்³பா³னங், அரியங் சதுஸச்சமேவ வா தி³ட்ட²வந்தோதி அரியத்³த³ஸா. வேத³ஸ்ஸ மக்³க³ஞாணஸ்ஸ, தேன வா வேதே³ன ஸங்ஸாரஸ்ஸ பரியோஸானங் க³தாதி வேத³கு³னோ. ஸம்மத³ஞ்ஞாயாதி ஸம்மதே³வ ஸப்³ப³ங் ஆஜானிதப்³ப³ங் குஸலாதி³ங் க²ந்தா⁴தி³ஞ்ச ஜானித்வா. ஸேஸங் வுத்தனயமேவ.
Evaṃ ye rāgaggiādike nibbāpenti, tesaṃ anupādisesanibbānena nibbutiṃ dassetvā idāni paṭividdhaguṇehi thomento osānagāthamāha. Tattha ariyaddasāti ariyehi buddhādīhi passitabbaṃ kilesehi vā ārakattā ariyaṃ nibbānaṃ, ariyaṃ catusaccameva vā diṭṭhavantoti ariyaddasā. Vedassa maggañāṇassa, tena vā vedena saṃsārassa pariyosānaṃ gatāti vedaguno. Sammadaññāyāti sammadeva sabbaṃ ājānitabbaṃ kusalādiṃ khandhādiñca jānitvā. Sesaṃ vuttanayameva.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 4. அக்³கி³ஸுத்தங் • 4. Aggisuttaṃ
