| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
2. அக்³கி³வச்ச²ஸுத்தங்
2. Aggivacchasuttaṃ
187. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² வச்ச²கொ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச –
187. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca –
‘‘கிங் நு கோ², போ⁴ கோ³தம, ‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² 1 ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ nu kho, bho gotama, ‘sassato loko, idameva saccaṃ moghamañña’nti – evaṃdiṭṭhi 2 bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘sassato loko, idameva saccaṃ moghamañña’’’nti.
‘‘கிங் பன, போ⁴ கோ³தம, ‘அஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘அஸஸ்ஸதோ லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ pana, bho gotama, ‘asassato loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘asassato loko, idameva saccaṃ moghamañña’’’nti.
‘‘கிங் நு கோ², போ⁴ கோ³தம, ‘அந்தவா லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘அந்தவா லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ nu kho, bho gotama, ‘antavā loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘antavā loko, idameva saccaṃ moghamañña’’’nti.
‘‘கிங் பன, போ⁴ கோ³தம, ‘அனந்தவா லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘அனந்தவா லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ pana, bho gotama, ‘anantavā loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘anantavā loko, idameva saccaṃ moghamañña’’’nti.
‘‘கிங் நு கோ², போ⁴ கோ³தம, ‘தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ nu kho, bho gotama, ‘taṃ jīvaṃ taṃ sarīraṃ, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘taṃ jīvaṃ taṃ sarīraṃ, idameva saccaṃ moghamañña’’’nti.
‘‘கிங் பன, போ⁴ கோ³தம, ‘அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ pana, bho gotama, ‘aññaṃ jīvaṃ aññaṃ sarīraṃ, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘aññaṃ jīvaṃ aññaṃ sarīraṃ, idameva saccaṃ moghamañña’’’nti.
‘‘கிங் நு கோ², போ⁴ கோ³தம, ‘ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ nu kho, bho gotama, ‘hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘hoti tathāgato paraṃ maraṇā, idameva saccaṃ moghamañña’’’nti.
‘‘கிங் பன, போ⁴ கோ³தம, ‘ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ pana, bho gotama, ‘na hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘na hoti tathāgato paraṃ maraṇā, idameva saccaṃ moghamañña’’’nti.
‘‘கிங் நு கோ², போ⁴ கோ³தம, ‘ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி ? ‘‘ந கோ² அஹங், வச்ச², ஏவங்தி³ட்டி² – ‘ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ nu kho, bho gotama, ‘hoti ca na ca hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti ? ‘‘Na kho ahaṃ, vaccha, evaṃdiṭṭhi – ‘hoti ca na ca hoti tathāgato paraṃ maraṇā, idameva saccaṃ moghamañña’’’nti.
‘‘கிங் பன, போ⁴ கோ³தம, ‘நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Kiṃ pana, bho gotama, ‘neva hoti na na hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘neva hoti na na hoti tathāgato paraṃ maraṇā, idameva saccaṃ moghamañña’’’nti.
188. ‘‘‘கிங் நு கோ², போ⁴ கோ³தம, ஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி 3. ‘கிங் பன, போ⁴ கோ³தம, அஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச² , ஏவங்தி³ட்டி² – அஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴ கோ³தம, அந்தவா லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – அந்தவா லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் பன, போ⁴ கோ³தம, அனந்தவா லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – அனந்தவா லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴ கோ³தம, தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் பன, போ⁴ கோ³தம, அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴ கோ³தம, ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி.
188. ‘‘‘Kiṃ nu kho, bho gotama, sassato loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – sassato loko, idameva saccaṃ moghamañña’nti vadesi 4. ‘Kiṃ pana, bho gotama, asassato loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha , evaṃdiṭṭhi – asassato loko, idameva saccaṃ moghamañña’nti vadesi. ‘Kiṃ nu kho, bho gotama, antavā loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – antavā loko, idameva saccaṃ moghamañña’nti vadesi. ‘Kiṃ pana, bho gotama, anantavā loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – anantavā loko, idameva saccaṃ moghamañña’nti vadesi. ‘Kiṃ nu kho, bho gotama, taṃ jīvaṃ taṃ sarīraṃ, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – taṃ jīvaṃ taṃ sarīraṃ, idameva saccaṃ moghamañña’nti vadesi. ‘Kiṃ pana, bho gotama, aññaṃ jīvaṃ aññaṃ sarīraṃ, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – aññaṃ jīvaṃ aññaṃ sarīraṃ, idameva saccaṃ moghamañña’nti vadesi. ‘Kiṃ nu kho, bho gotama, hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – hoti tathāgato paraṃ maraṇā, idameva saccaṃ moghamañña’nti vadesi.
‘‘‘கிங் பன, போ⁴ கோ³தம, ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴ கோ³தம, ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் பன, போ⁴ கோ³தம, நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி.
‘‘‘Kiṃ pana, bho gotama, na hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – na hoti tathāgato paraṃ maraṇā, idameva saccaṃ moghamañña’nti vadesi. ‘Kiṃ nu kho, bho gotama, hoti ca na ca hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – hoti ca na ca hoti tathāgato paraṃ maraṇā, idameva saccaṃ moghamañña’nti vadesi. ‘Kiṃ pana, bho gotama, neva hoti na na hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – neva hoti na na hoti tathāgato paraṃ maraṇā, idameva saccaṃ moghamañña’nti vadesi.
‘‘கிங் பன போ⁴ கோ³தமோ ஆதீ³னவங் ஸம்பஸ்ஸமானோ ஏவங் இமானி ஸப்³ப³ஸோ தி³ட்டி²க³தானி அனுபக³தோ’’தி?
‘‘Kiṃ pana bho gotamo ādīnavaṃ sampassamāno evaṃ imāni sabbaso diṭṭhigatāni anupagato’’ti?
189. ‘‘‘ஸஸ்ஸதோ லோகோ’தி கோ², வச்ச², தி³ட்டி²க³தமேதங் தி³ட்டி²க³ஹனங் தி³ட்டி²கந்தாரோ 5 தி³ட்டி²விஸூகங் தி³ட்டி²விப்ப²ந்தி³தங் தி³ட்டி²ஸங்யோஜனங் ஸது³க்க²ங் ஸவிகா⁴தங் ஸஉபாயாஸங் ஸபரிளாஹங், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி . ‘அஸஸ்ஸதோ லோகோ’தி கோ², வச்ச²…பே॰… ‘அந்தவா லோகோ’தி கோ², வச்ச²…பே॰… ‘அனந்தவா லோகோ’தி கோ², வச்ச²…பே॰… ‘தங் ஜீவங் தங் ஸரீர’ந்தி கோ², வச்ச²…பே॰… ‘அஞ்ஞங் ஜீவங் அஞ்ஞங் ஸரீர’ந்தி கோ², வச்ச²…பே॰… ‘ஹோதி ததா²க³தோ பரங் மரணா’தி கோ², வச்ச² …பே॰… ‘ந ஹோதி ததா²க³தோ பரங் மரணா’தி கோ², வச்ச²…பே॰… ‘ஹோதி ச ந ச ஹோதி ததா²க³தோ பரங் மரணா’தி கோ², வச்ச²…பே॰… ‘நேவ ஹோதி ந ந ஹோதி ததா²க³தோ பரங் மரணா’தி கோ², வச்ச², தி³ட்டி²க³தமேதங் தி³ட்டி²க³ஹனங் தி³ட்டி²கந்தாரோ தி³ட்டி²விஸூகங் தி³ட்டி²விப்ப²ந்தி³தங் தி³ட்டி²ஸங்யோஜனங் ஸது³க்க²ங் ஸவிகா⁴தங் ஸஉபாயாஸங் ஸபரிளாஹங், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி. இமங் கோ² அஹங், வச்ச², ஆதீ³னவங் ஸம்பஸ்ஸமானோ ஏவங் இமானி ஸப்³ப³ஸோ தி³ட்டி²க³தானி அனுபக³தோ’’தி.
189. ‘‘‘Sassato loko’ti kho, vaccha, diṭṭhigatametaṃ diṭṭhigahanaṃ diṭṭhikantāro 6 diṭṭhivisūkaṃ diṭṭhivipphanditaṃ diṭṭhisaṃyojanaṃ sadukkhaṃ savighātaṃ saupāyāsaṃ sapariḷāhaṃ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati . ‘Asassato loko’ti kho, vaccha…pe… ‘antavā loko’ti kho, vaccha…pe… ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho, vaccha…pe… ‘hoti tathāgato paraṃ maraṇā’ti kho, vaccha …pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, diṭṭhigatametaṃ diṭṭhigahanaṃ diṭṭhikantāro diṭṭhivisūkaṃ diṭṭhivipphanditaṃ diṭṭhisaṃyojanaṃ sadukkhaṃ savighātaṃ saupāyāsaṃ sapariḷāhaṃ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Imaṃ kho ahaṃ, vaccha, ādīnavaṃ sampassamāno evaṃ imāni sabbaso diṭṭhigatāni anupagato’’ti.
‘‘அத்தி² பன போ⁴தோ கோ³தமஸ்ஸ கிஞ்சி தி³ட்டி²க³த’’ந்தி? ‘‘தி³ட்டி²க³தந்தி கோ², வச்ச², அபனீதமேதங் ததா²க³தஸ்ஸ. தி³ட்ட²ஞ்ஹேதங், வச்ச², ததா²க³தேன – ‘இதி ரூபங், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா, இதி வேத³னாய ஸமுத³யோ, இதி வேத³னாய அத்த²ங்க³மோ; இதி ஸஞ்ஞா, இதி ஸஞ்ஞாய ஸமுத³யோ, இதி ஸஞ்ஞாய அத்த²ங்க³மோ; இதி ஸங்கா²ரா, இதி ஸங்கா²ரானங் ஸமுத³யோ, இதி ஸங்கா²ரானங் அத்த²ங்க³மோ; இதி விஞ்ஞாணங், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. தஸ்மா ததா²க³தோ ஸப்³ப³மஞ்ஞிதானங் ஸப்³ப³மதி²தானங் ஸப்³ப³அஹங்காரமமங்காரமானானுஸயானங் க²யா விராகா³ நிரோதா⁴ சாகா³ படினிஸ்ஸக்³கா³ அனுபாதா³ விமுத்தோதி வதா³மீ’’தி.
‘‘Atthi pana bhoto gotamassa kiñci diṭṭhigata’’nti? ‘‘Diṭṭhigatanti kho, vaccha, apanītametaṃ tathāgatassa. Diṭṭhañhetaṃ, vaccha, tathāgatena – ‘iti rūpaṃ, iti rūpassa samudayo, iti rūpassa atthaṅgamo; iti vedanā, iti vedanāya samudayo, iti vedanāya atthaṅgamo; iti saññā, iti saññāya samudayo, iti saññāya atthaṅgamo; iti saṅkhārā, iti saṅkhārānaṃ samudayo, iti saṅkhārānaṃ atthaṅgamo; iti viññāṇaṃ, iti viññāṇassa samudayo, iti viññāṇassa atthaṅgamo’ti. Tasmā tathāgato sabbamaññitānaṃ sabbamathitānaṃ sabbaahaṃkāramamaṃkāramānānusayānaṃ khayā virāgā nirodhā cāgā paṭinissaggā anupādā vimuttoti vadāmī’’ti.
190. ‘‘ஏவங் விமுத்தசித்தோ பன, போ⁴ கோ³தம, பி⁴க்கு² குஹிங் உபபஜ்ஜதீ’’தி? ‘‘உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, ந உபபஜ்ஜதீ’’தி? ‘‘ந உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, உபபஜ்ஜதி ச ந ச உபபஜ்ஜதீ’’தி? ‘‘உபபஜ்ஜதி ச ந ச உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, நேவ உபபஜ்ஜதி ந ந உபபஜ்ஜதீ’’தி? ‘‘நேவ உபபஜ்ஜதி ந ந உபபஜ்ஜதீதி கோ², வச்ச², ந உபேதி’’.
190. ‘‘Evaṃ vimuttacitto pana, bho gotama, bhikkhu kuhiṃ upapajjatī’’ti? ‘‘Upapajjatīti kho, vaccha, na upeti’’. ‘‘Tena hi, bho gotama, na upapajjatī’’ti? ‘‘Na upapajjatīti kho, vaccha, na upeti’’. ‘‘Tena hi, bho gotama, upapajjati ca na ca upapajjatī’’ti? ‘‘Upapajjati ca na ca upapajjatīti kho, vaccha, na upeti’’. ‘‘Tena hi, bho gotama, neva upapajjati na na upapajjatī’’ti? ‘‘Neva upapajjati na na upapajjatīti kho, vaccha, na upeti’’.
‘‘‘ஏவங் விமுத்தசித்தோ பன, போ⁴ கோ³தம, பி⁴க்கு² குஹிங் உபபஜ்ஜதீ’தி இதி புட்டோ² ஸமானோ ‘உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, ந உபபஜ்ஜதீ’தி இதி புட்டோ² ஸமானோ ‘ந உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, உபபஜ்ஜதி ச ந ச உபபஜ்ஜதீ’தி இதி புட்டோ² ஸமானோ ‘உபபஜ்ஜதி ச ந ச உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, நேவ உபபஜ்ஜதி ந ந உபபஜ்ஜதீ’தி இதி புட்டோ² ஸமானோ ‘நேவ உபபஜ்ஜதி ந ந உபபஜ்ஜதீதி கோ², வச்ச², ந உபேதீ’தி வதே³ஸி. எத்தா²ஹங், போ⁴ கோ³தம, அஞ்ஞாணமாபாதி³ங், எத்த² ஸம்மோஹமாபாதி³ங். யாபி மே ஏஸா போ⁴தோ கோ³தமஸ்ஸ புரிமேன கதா²ஸல்லாபேன அஹு பஸாத³மத்தா ஸாபி மே ஏதரஹி அந்தரஹிதா’’தி. ‘‘அலஞ்ஹி தே, வச்ச², அஞ்ஞாணாய, அலங் ஸம்மோஹாய. க³ம்பீ⁴ரோ ஹாயங், வச்ச², த⁴ம்மோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ. ஸோ தயா து³ஜ்ஜானோ அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ரயோகே³ன 7 அஞ்ஞத்ராசரியகேன’’ 8.
‘‘‘Evaṃ vimuttacitto pana, bho gotama, bhikkhu kuhiṃ upapajjatī’ti iti puṭṭho samāno ‘upapajjatīti kho, vaccha, na upetī’ti vadesi. ‘Tena hi, bho gotama, na upapajjatī’ti iti puṭṭho samāno ‘na upapajjatīti kho, vaccha, na upetī’ti vadesi. ‘Tena hi, bho gotama, upapajjati ca na ca upapajjatī’ti iti puṭṭho samāno ‘upapajjati ca na ca upapajjatīti kho, vaccha, na upetī’ti vadesi. ‘Tena hi, bho gotama, neva upapajjati na na upapajjatī’ti iti puṭṭho samāno ‘neva upapajjati na na upapajjatīti kho, vaccha, na upetī’ti vadesi. Etthāhaṃ, bho gotama, aññāṇamāpādiṃ, ettha sammohamāpādiṃ. Yāpi me esā bhoto gotamassa purimena kathāsallāpena ahu pasādamattā sāpi me etarahi antarahitā’’ti. ‘‘Alañhi te, vaccha, aññāṇāya, alaṃ sammohāya. Gambhīro hāyaṃ, vaccha, dhammo duddaso duranubodho santo paṇīto atakkāvacaro nipuṇo paṇḍitavedanīyo. So tayā dujjāno aññadiṭṭhikena aññakhantikena aññarucikena aññatrayogena 9 aññatrācariyakena’’ 10.
191. ‘‘தேன ஹி, வச்ச², தஞ்ஞேவெத்த² படிபுச்சி²ஸ்ஸாமி; யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, வச்ச², ஸசே தே புரதோ அக்³கி³ ஜலெய்ய, ஜானெய்யாஸி த்வங் – ‘அயங் மே புரதோ அக்³கி³ ஜலதீ’’’தி? ‘‘ஸசே மே, போ⁴ கோ³தம, புரதோ அக்³கி³ ஜலெய்ய, ஜானெய்யாஹங் – ‘அயங் மே புரதோ அக்³கி³ ஜலதீ’’’தி.
191. ‘‘Tena hi, vaccha, taññevettha paṭipucchissāmi; yathā te khameyya tathā naṃ byākareyyāsi. Taṃ kiṃ maññasi, vaccha, sace te purato aggi jaleyya, jāneyyāsi tvaṃ – ‘ayaṃ me purato aggi jalatī’’’ti? ‘‘Sace me, bho gotama, purato aggi jaleyya, jāneyyāhaṃ – ‘ayaṃ me purato aggi jalatī’’’ti.
‘‘ஸசே பன தங், வச்ச², ஏவங் புச்செ²ய்ய – ‘யோ தே அயங் புரதோ அக்³கி³ ஜலதி அயங் அக்³கி³ கிங் படிச்ச ஜலதீ’தி, ஏவங் புட்டோ² த்வங், வச்ச², கிந்தி ப்³யாகரெய்யாஸீ’’தி? ‘‘ஸசே மங், போ⁴ கோ³தம, ஏவங் புச்செ²ய்ய – ‘யோ தே அயங் புரதோ அக்³கி³ ஜலதி அயங் அக்³கி³ கிங் படிச்ச ஜலதீ’தி, ஏவங் புட்டோ² அஹங், போ⁴ கோ³தம, ஏவங் ப்³யாகரெய்யங் – ‘யோ மே அயங் புரதோ அக்³கி³ ஜலதி அயங் அக்³கி³ திணகட்டு²பாதா³னங் படிச்ச ஜலதீ’’’தி.
‘‘Sace pana taṃ, vaccha, evaṃ puccheyya – ‘yo te ayaṃ purato aggi jalati ayaṃ aggi kiṃ paṭicca jalatī’ti, evaṃ puṭṭho tvaṃ, vaccha, kinti byākareyyāsī’’ti? ‘‘Sace maṃ, bho gotama, evaṃ puccheyya – ‘yo te ayaṃ purato aggi jalati ayaṃ aggi kiṃ paṭicca jalatī’ti, evaṃ puṭṭho ahaṃ, bho gotama, evaṃ byākareyyaṃ – ‘yo me ayaṃ purato aggi jalati ayaṃ aggi tiṇakaṭṭhupādānaṃ paṭicca jalatī’’’ti.
‘‘ஸசே தே, வச்ச², புரதோ ஸோ அக்³கி³ நிப்³பா³யெய்ய, ஜானெய்யாஸி த்வங் – ‘அயங் மே புரதோ அக்³கி³ நிப்³பு³தோ’’’தி? ‘‘ஸசே மே, போ⁴ கோ³தம, புரதோ ஸோ அக்³கி³ நிப்³பா³யெய்ய, ஜானெய்யாஹங் – ‘அயங் மே புரதோ அக்³கி³ நிப்³பு³தோ’’’தி.
‘‘Sace te, vaccha, purato so aggi nibbāyeyya, jāneyyāsi tvaṃ – ‘ayaṃ me purato aggi nibbuto’’’ti? ‘‘Sace me, bho gotama, purato so aggi nibbāyeyya, jāneyyāhaṃ – ‘ayaṃ me purato aggi nibbuto’’’ti.
‘‘ஸசே பன தங், வச்ச², ஏவங் புச்செ²ய்ய – ‘யோ தே அயங் புரதோ அக்³கி³ நிப்³பு³தோ ஸோ அக்³கி³ இதோ கதமங் தி³ஸங் க³தோ – புரத்தி²மங் வா த³க்கி²ணங் வா பச்சி²மங் வா உத்தரங் வா’தி, ஏவங் புட்டோ² த்வங், வச்ச², கிந்தி ப்³யாகரெய்யாஸீ’’தி? ‘‘ந உபேதி, போ⁴ கோ³தம, யஞ்ஹி ஸோ, போ⁴ கோ³தம, அக்³கி³ திணகட்டு²பாதா³னங் படிச்ச அஜலி 11 தஸ்ஸ ச பரியாதா³னா அஞ்ஞஸ்ஸ ச அனுபஹாரா அனாஹாரோ நிப்³பு³தோ த்வேவ ஸங்க்²யங் க³ச்ச²தீ’’தி.
‘‘Sace pana taṃ, vaccha, evaṃ puccheyya – ‘yo te ayaṃ purato aggi nibbuto so aggi ito katamaṃ disaṃ gato – puratthimaṃ vā dakkhiṇaṃ vā pacchimaṃ vā uttaraṃ vā’ti, evaṃ puṭṭho tvaṃ, vaccha, kinti byākareyyāsī’’ti? ‘‘Na upeti, bho gotama, yañhi so, bho gotama, aggi tiṇakaṭṭhupādānaṃ paṭicca ajali 12 tassa ca pariyādānā aññassa ca anupahārā anāhāro nibbuto tveva saṅkhyaṃ gacchatī’’ti.
192. ‘‘ஏவமேவ கோ², வச்ச², யேன ரூபேன ததா²க³தங் பஞ்ஞாபயமானோ பஞ்ஞாபெய்ய தங் ரூபங் ததா²க³தஸ்ஸ பஹீனங் உச்சி²ன்னமூலங் தாலாவத்து²கதங் அனபா⁴வங்கதங் ஆயதிங் அனுப்பாத³த⁴ம்மங். ரூபஸங்க²யவிமுத்தோ 13 கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
192. ‘‘Evameva kho, vaccha, yena rūpena tathāgataṃ paññāpayamāno paññāpeyya taṃ rūpaṃ tathāgatassa pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃ anuppādadhammaṃ. Rūpasaṅkhayavimutto 14 kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘யாய வேத³னாய ததா²க³தங் பஞ்ஞாபயமானோ பஞ்ஞாபெய்ய ஸா வேத³னா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. வேத³னாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘Yāya vedanāya tathāgataṃ paññāpayamāno paññāpeyya sā vedanā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Vedanāsaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘யாய ஸஞ்ஞாய ததா²க³தங் பஞ்ஞாபயமானோ பஞ்ஞாபெய்ய ஸா ஸஞ்ஞா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. ஸஞ்ஞாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘Yāya saññāya tathāgataṃ paññāpayamāno paññāpeyya sā saññā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Saññāsaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘யேஹி ஸங்கா²ரேஹி ததா²க³தங் பஞ்ஞாபயமானோ பஞ்ஞாபெய்ய தே ஸங்கா²ரா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. ஸங்கா²ரஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி , ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘Yehi saṅkhārehi tathāgataṃ paññāpayamāno paññāpeyya te saṅkhārā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Saṅkhārasaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti , na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘யேன விஞ்ஞாணேன ததா²க³தங் பஞ்ஞாபயமானோ பஞ்ஞாபெய்ய தங் விஞ்ஞாணங் ததா²க³தஸ்ஸ பஹீனங் உச்சி²ன்னமூலங் தாலாவத்து²கதங் அனபா⁴வங்கதங் ஆயதிங் அனுப்பாத³த⁴ம்மங். விஞ்ஞாணஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி’’.
‘‘Yena viññāṇena tathāgataṃ paññāpayamāno paññāpeyya taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃ anuppādadhammaṃ. Viññāṇasaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti’’.
ஏவங் வுத்தே, வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘ஸெய்யதா²பி, போ⁴ கோ³தம, கா³மஸ்ஸ வா நிக³மஸ்ஸ வா அவிதூ³ரே மஹாஸாலருக்கோ². தஸ்ஸ அனிச்சதா ஸாகா²பலாஸா பலுஜ்ஜெய்யுங் 15, தசபபடிகா பலுஜ்ஜெய்யுங், பெ²க்³கூ³ பலுஜ்ஜெய்யுங் 16; ஸோ அபரேன ஸமயேன அபக³தஸாகா²பலாஸோ அபக³ததசபபடிகோ அபக³தபெ²க்³கு³கோ ஸுத்³தோ⁴ அஸ்ஸ, ஸாரே பதிட்டி²தோ; ஏவமேவ போ⁴தோ கோ³தமஸ்ஸ பாவசனங் அபக³தஸாகா²பலாஸங் அபக³ததசபபடிகங் அபக³தபெ²க்³கு³கங் ஸுத்³த⁴ங், ஸாரே பதிட்டி²தங். அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
Evaṃ vutte, vacchagotto paribbājako bhagavantaṃ etadavoca – ‘‘seyyathāpi, bho gotama, gāmassa vā nigamassa vā avidūre mahāsālarukkho. Tassa aniccatā sākhāpalāsā palujjeyyuṃ 17, tacapapaṭikā palujjeyyuṃ, pheggū palujjeyyuṃ 18; so aparena samayena apagatasākhāpalāso apagatatacapapaṭiko apagataphegguko suddho assa, sāre patiṭṭhito; evameva bhoto gotamassa pāvacanaṃ apagatasākhāpalāsaṃ apagatatacapapaṭikaṃ apagatapheggukaṃ suddhaṃ, sāre patiṭṭhitaṃ. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
அக்³கி³வச்ச²ஸுத்தங் நிட்டி²தங் து³தியங்.
Aggivacchasuttaṃ niṭṭhitaṃ dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 2. அக்³கி³வச்ச²ஸுத்தவண்ணனா • 2. Aggivacchasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 2. அக்³கி³வச்ச²ஸுத்தவண்ணனா • 2. Aggivacchasuttavaṇṇanā
