| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
2. அக்³கி³வச்ச²ஸுத்தவண்ணனா
2. Aggivacchasuttavaṇṇanā
187. ஏவங் மே ஸுதந்தி அக்³கி³வச்ச²ஸுத்தங். தத்த² ந கோ² அஹந்தி பட²மவாரே நாஹங் ஸஸ்ஸததி³ட்டி²கோதி வத³தி, து³தியே நாஹங் உச்சே²த³தி³ட்டி²கோதி. ஏவங் அந்தானந்திகாதி³வஸேன ஸப்³ப³வாரேஸு படிக்கே²போ வேதி³தப்³போ³. ஹோதி ச ந ச ஹோதீதி அயங் பனெத்த² ஏகச்சஸஸ்ஸதவாதோ³. நேவ ஹோதி ந ந ஹோதீதி அயங் அமராவிக்கே²போதி வேதி³தப்³போ³.
187.Evaṃme sutanti aggivacchasuttaṃ. Tattha na kho ahanti paṭhamavāre nāhaṃ sassatadiṭṭhikoti vadati, dutiye nāhaṃ ucchedadiṭṭhikoti. Evaṃ antānantikādivasena sabbavāresu paṭikkhepo veditabbo. Hoti ca na ca hotīti ayaṃ panettha ekaccasassatavādo. Neva hoti na na hotīti ayaṃ amarāvikkhepoti veditabbo.
189. ஸது³க்க²ந்தி கிலேஸது³க்கே²ன சேவ விபாகது³க்கே²ன ச ஸது³க்க²ங். ஸவிகா⁴தந்தி தேஸங்யேவ த்³வின்னங் வஸேன ஸஉபகா⁴தகங். ஸஉபாயாஸந்தி தேஸங்யேவ வஸேன ஸஉபாயாஸங். ஸபரிளாஹந்தி தேஸங்யேவ வஸேன ஸபரிளாஹங்.
189.Sadukkhanti kilesadukkhena ceva vipākadukkhena ca sadukkhaṃ. Savighātanti tesaṃyeva dvinnaṃ vasena saupaghātakaṃ. Saupāyāsanti tesaṃyeva vasena saupāyāsaṃ. Sapariḷāhanti tesaṃyeva vasena sapariḷāhaṃ.
கிஞ்சி தி³ட்டி²க³தந்தி காசி ஏகா தி³ட்டி²பி ருச்சித்வா க²மாபெத்வா க³ஹிதா அத்தீ²தி புச்ச²தி. அபனீதந்தி நீஹடங் அபவித்³த⁴ங். தி³ட்ட²ந்தி பஞ்ஞாய தி³ட்ட²ங். தஸ்மாதி யஸ்மா பஞ்சன்னங் க²ந்தா⁴னங் உத³யவயங் அத்³த³ஸ, தஸ்மா. ஸப்³ப³மஞ்ஞிதானந்தி ஸப்³பே³ஸங் திண்ணம்பி தண்ஹாதி³ட்டி²மானமஞ்ஞிதானங். மதி²தானந்தி தேஸங்யேவ வேவசனங். இதா³னி தானி விப⁴ஜித்வா த³ஸ்ஸெந்தோ ஸப்³ப³அஹங்கார-மமங்கார-மானானுஸயானந்தி ஆஹ. எத்த² ஹி அஹங்காரோ தி³ட்டி², மமங்காரோ தண்ஹா, மானானுஸயோ மானோ. அனுபாதா³ விமுத்தோதி சதூஹி உபாதா³னேஹி கஞ்சி த⁴ம்மங் அனுபாதி³யித்வா விமுத்தோ.
Kiñci diṭṭhigatanti kāci ekā diṭṭhipi ruccitvā khamāpetvā gahitā atthīti pucchati. Apanītanti nīhaṭaṃ apaviddhaṃ. Diṭṭhanti paññāya diṭṭhaṃ. Tasmāti yasmā pañcannaṃ khandhānaṃ udayavayaṃ addasa, tasmā. Sabbamaññitānanti sabbesaṃ tiṇṇampi taṇhādiṭṭhimānamaññitānaṃ. Mathitānanti tesaṃyeva vevacanaṃ. Idāni tāni vibhajitvā dassento sabbaahaṃkāra-mamaṃkāra-mānānusayānanti āha. Ettha hi ahaṃkāro diṭṭhi, mamaṃkāro taṇhā, mānānusayo māno. Anupādā vimuttoti catūhi upādānehi kañci dhammaṃ anupādiyitvā vimutto.
190. ந உபேதீதி ந யுஜ்ஜதி. எத்த² ச ‘‘ந உபபஜ்ஜதீ’’தி இத³ங் அனுஜானிதப்³ப³ங் ஸியா. யஸ்மா பன ஏவங் வுத்தே ஸோ பரிப்³பா³ஜகோ உச்சே²த³ங் க³ண்ஹெய்ய, உபபஜ்ஜதீதி பன ஸஸ்ஸதமேவ, உபபஜ்ஜதி ச ந ச உபபஜ்ஜதீதி ஏகச்சஸஸ்ஸதங், நேவ உபபஜ்ஜதி ந ந உபபஜ்ஜதீதி அமராவிக்கே²பங், தஸ்மா ப⁴க³வா – ‘‘அயங் அப்பதிட்டோ² அனாலம்போ³ ஹோது, ஸுக²பவேஸனட்டா²னங் மா லப⁴தூ’’தி அனநுஞ்ஞாய ட²த்வா அனுஞ்ஞம்பி படிக்கி²பி. அலந்தி ஸமத்த²ங் பரியத்தங் . த⁴ம்மோதி பச்சயாகாரத⁴ம்மோ. அஞ்ஞத்ரயோகே³னாதி அஞ்ஞத்த² பயோகே³ன. அஞ்ஞத்ராசரியகேனாதி பச்சயாகாரங் அஜானந்தானங் அஞ்ஞேஸங் ஆசரியானங் ஸந்திகே வஸந்தேன.
190.Na upetīti na yujjati. Ettha ca ‘‘na upapajjatī’’ti idaṃ anujānitabbaṃ siyā. Yasmā pana evaṃ vutte so paribbājako ucchedaṃ gaṇheyya, upapajjatīti pana sassatameva, upapajjati ca na ca upapajjatīti ekaccasassataṃ, neva upapajjati na na upapajjatīti amarāvikkhepaṃ, tasmā bhagavā – ‘‘ayaṃ appatiṭṭho anālambo hotu, sukhapavesanaṭṭhānaṃ mā labhatū’’ti ananuññāya ṭhatvā anuññampi paṭikkhipi. Alanti samatthaṃ pariyattaṃ . Dhammoti paccayākāradhammo. Aññatrayogenāti aññattha payogena. Aññatrācariyakenāti paccayākāraṃ ajānantānaṃ aññesaṃ ācariyānaṃ santike vasantena.
191. தேன ஹி வச்சா²தி யஸ்மா த்வங் ஸம்மோஹமாபாதி³ந்தி வத³ஸி, தஸ்மா தங்யேவெத்த² படிபுச்சி²ஸ்ஸாமி. அனாஹாரோ நிப்³பு³தோதி அப்பச்சயோ நிப்³பு³தோ.
191.Tena hi vacchāti yasmā tvaṃ sammohamāpādinti vadasi, tasmā taṃyevettha paṭipucchissāmi. Anāhāronibbutoti appaccayo nibbuto.
192. யேன ரூபேனாதி யேன ரூபேன ஸத்தஸங்கா²தங் ததா²க³தங் ரூபீதி பஞ்ஞாபெய்ய. க³ம்பீ⁴ரோதி கு³ணக³ம்பீ⁴ரோ. அப்பமெய்யோதி பமாணங் க³ண்ஹிதுங் ந ஸக்குணெய்யோ. து³ப்பரியோகா³ள்ஹோதி து³ஓகா³ஹோ து³ஜ்ஜானோ. ஸெய்யதா²பி மஹாஸமுத்³தோ³தி யதா² மஹாஸமுத்³தோ³ க³ம்பீ⁴ரோ அப்பமெய்யோ து³ஜ்ஜானோ, ஏவமேவ கீ²ணாஸவோபி. தங் ஆரப்³ப⁴ உபபஜ்ஜதீதிஆதி³ ஸப்³ப³ங் ந யுஜ்ஜதி. கத²ங்? யதா² பரினிப்³பு³தங் அக்³கி³ங் ஆரப்³ப⁴ புரத்தி²மங் தி³ஸங் க³தோதிஆதி³ ஸப்³ப³ங் ந யுஜ்ஜதி, ஏவங்.
192.Yena rūpenāti yena rūpena sattasaṅkhātaṃ tathāgataṃ rūpīti paññāpeyya. Gambhīroti guṇagambhīro. Appameyyoti pamāṇaṃ gaṇhituṃ na sakkuṇeyyo. Duppariyogāḷhoti duogāho dujjāno. Seyyathāpi mahāsamuddoti yathā mahāsamuddo gambhīro appameyyo dujjāno, evameva khīṇāsavopi. Taṃ ārabbha upapajjatītiādi sabbaṃ na yujjati. Kathaṃ? Yathā parinibbutaṃ aggiṃ ārabbha puratthimaṃ disaṃ gatotiādi sabbaṃ na yujjati, evaṃ.
அனிச்சதாதி அனிச்சதாய. ஸாரே பதிட்டி²தந்தி லோகுத்தரத⁴ம்மஸாரே பதிட்டி²தங். ஸேஸங் ஸப்³ப³த்த² உத்தானமேவாதி.
Aniccatāti aniccatāya. Sāre patiṭṭhitanti lokuttaradhammasāre patiṭṭhitaṃ. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அக்³கி³வச்ச²ஸுத்தவண்ணனா நிட்டி²தா.
Aggivacchasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. அக்³கி³வச்ச²ஸுத்தங் • 2. Aggivacchasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 2. அக்³கி³வச்ச²ஸுத்தவண்ணனா • 2. Aggivacchasuttavaṇṇanā
