1. ஆஹாரஸுத்தவண்ணனா

1. Āhārasuttavaṇṇanā

11. ஆஹரந்தீதி ஆனெந்தி உப்பாதெ³ந்தி, உபத்த²ம்பெ⁴ந்தீதி அத்தோ². நிப்³ப³த்தாதி பஸுதா. பூ⁴தா நாம யஸ்மா ததோ பட்டா²ய லோகே ஜாதவோஹாரோ படிஸந்தி⁴க்³க³ஹணதோ பன பட்டா²ய யாவ மாதுகுச்சி²தோ நிக்க²ந்தோ, தாவ ஸம்ப⁴வேஸினோ, ஏஸ தாவ க³ப்³ப⁴ஸெய்யகேஸு பூ⁴தஸம்ப⁴வேஸிவிபா⁴கோ³, இதரேஸு பன பட²மசித்தாதி³வஸேன வுத்தோ. ஸம்ப⁴வ-ஸத்³தோ³ செத்த² க³ப்³ப⁴ஸெய்யகானங் வஸேன பஸூதிபரியாயோ, இதரேஸங் வஸேன உப்பத்திபரியாயோ. பட²மசித்தபட²மஇரியாபத²க்க²ணேஸு ஹி தே ஸம்ப⁴வங் உப்பத்திங் ஏஸந்தி உபக³ச்ச²ந்தி நாம, ந தாவ பூ⁴தா உபபத்தியா ந ஸுப்பதிட்டி²தத்தா, பூ⁴தா ஏவ ஸப்³ப³ஸோ ப⁴வேஸனாய ஸமுச்சி²ன்னத்தா. ந புன ப⁴விஸ்ஸந்தீதி அவதா⁴ரணேன நிவத்திதமத்த²ங் த³ஸ்ஸேதி. யோ ச ‘‘காலக⁴ஸோ பூ⁴தோ’’திஆதீ³ஸு பூ⁴த-ஸத்³த³ஸ்ஸ கீ²ணாஸவவாசிதா த³ட்ட²ப்³பா³. வா-ஸத்³தோ³ செத்த² ஸம்பிண்ட³னத்தோ² ‘‘அக்³கி³னா வா உத³கேன வா’’திஆதீ³ஸு விய.

11.Āharantīti ānenti uppādenti, upatthambhentīti attho. Nibbattāti pasutā. Bhūtā nāma yasmā tato paṭṭhāya loke jātavohāro paṭisandhiggahaṇato pana paṭṭhāya yāva mātukucchito nikkhanto, tāva sambhavesino, esa tāva gabbhaseyyakesu bhūtasambhavesivibhāgo, itaresu pana paṭhamacittādivasena vutto. Sambhava-saddo cettha gabbhaseyyakānaṃ vasena pasūtipariyāyo, itaresaṃ vasena uppattipariyāyo. Paṭhamacittapaṭhamairiyāpathakkhaṇesu hi te sambhavaṃ uppattiṃ esanti upagacchanti nāma, na tāva bhūtā upapattiyā na suppatiṭṭhitattā, bhūtā eva sabbaso bhavesanāya samucchinnattā. Na puna bhavissantīti avadhāraṇena nivattitamatthaṃ dasseti. Yo ca ‘‘kālaghaso bhūto’’tiādīsu bhūta-saddassa khīṇāsavavācitā daṭṭhabbā. Vā-saddo cettha sampiṇḍanattho ‘‘agginā vā udakena vā’’tiādīsu viya.

யதா²ஸகங் பச்சயபா⁴வேன அத்தபா⁴வஸ்ஸ பட²பனமேவெத்த² ஆஹாரேஹி காதப்³ப³அனுக்³க³ஹோ ஹோதீதி அதி⁴ப்பாயேனாஹ ‘‘வசனபே⁴தோ³…பே॰… ஏகோ யேவா’’தி. ஸத்தஸ்ஸ உப்பன்னத⁴ம்மானந்தி ஸத்தஸ்ஸ ஸந்தானே உப்பன்னத⁴ம்மானங். யதா² ‘‘வஸ்ஸஸதங் திட்ட²தீ’’தி வுத்தே அனுப்பப³ந்த⁴வஸேன பவத்ததீதி வுத்தங் ஹோதி, ஏவங் டி²தியாதி அனுப்பப³ந்த⁴வஸேன பவத்தியாதி அத்தோ², ஸா பன அவிச்சே²தோ³தி ஆஹ ‘‘அவிச்சே²தா³யா’’தி. அனுப்பப³ந்த⁴த⁴ம்முப்பத்தியா ஸத்தஸந்தானோ அனுக்³க³ஹிதோ நாம ஹோதீதி ஆஹ ‘‘அனுப்பன்னானங் உப்பாதா³யா’’தி. ஏதானீதி டி²திஅனுக்³க³ஹபதா³னி. உப⁴யத்த² த³ட்ட²ப்³பா³னி ந யதா²ஸம்ப³ந்த⁴தோ.

Yathāsakaṃ paccayabhāvena attabhāvassa paṭhapanamevettha āhārehi kātabbaanuggaho hotīti adhippāyenāha ‘‘vacanabhedo…pe… eko yevā’’ti. Sattassa uppannadhammānanti sattassa santāne uppannadhammānaṃ. Yathā ‘‘vassasataṃ tiṭṭhatī’’ti vutte anuppabandhavasena pavattatīti vuttaṃ hoti, evaṃ ṭhitiyāti anuppabandhavasena pavattiyāti attho, sā pana avicchedoti āha ‘‘avicchedāyā’’ti. Anuppabandhadhammuppattiyā sattasantāno anuggahito nāma hotīti āha ‘‘anuppannānaṃ uppādāyā’’ti. Etānīti ṭhitianuggahapadāni. Ubhayattha daṭṭhabbāni na yathāsambandhato.

வத்து²க³தா ஓஜா வத்து² விய தேன ஸத்³தி⁴ங் அஜ்ஜோ²ஹரிதப்³ப³தங் க³ச்ச²தீதி வுத்தங் ‘‘அஜ்ஜோ²ஹரிதப்³ப³கோ ஆஹாரோ’’தி, நிப்³ப³த்திதஓஜங் பன ஸந்தா⁴ய ‘‘கப³ளீகாரோ ஆஹாரோ ஓஜட்ட²மகரூபானி ஆஹரதீ’’தி வக்க²தி. ஓளாரிகதா அப்போஜதாய ந வத்து²னோ தூ²லதாய கதி²னதாய வா, தஸ்மா யஸ்மிங் வத்து²ஸ்மிங் பரித்தா ஓஜா ஹோதி, தங் ஓளாரிகங். ஸப்பாத³யோ து³க்கு²ப்பாத³கதாய ஓளாரிகா வேதி³தப்³பா³. விஸாணாதீ³னங் திவஸ்ஸச²ட்³டி³தானங் பூதிபூ⁴தத்தா முது³கதாதி வத³ந்தி. தரச்ச²கே²ளதேமிததாய பன ததா²பூ⁴தானங் தேஸங் முது³கதா. த⁴ம்மஸபா⁴வோ ஹேஸ. ஸஸானங் ஆஹாரோ ஸுகு²மோ தருணதிணஸஸ்ஸகா²த³னதோ. ஸகுணானங் ஆஹாரோ ஸுகு²மோ திணபீ³ஜாதி³கா²த³னதோ. பச்சந்தவாஸீனங் ஆஹாரோ ஸுகு²மோ மாஸமுக்³க³குராதி³போ⁴ஜனத்தா. தேஸந்தி பரனிம்மிதவஸவத்தீனங். ஸுகு²மொத்வேவாதி ந கிஞ்சி உபாதா³ய, அத² கோ² ஸுகு²மோஇச்சேவ நிட்ட²ங் பத்தோ ததோ பரமஸுகு²மஸ்ஸ அபா⁴வதோ.

Vatthugatā ojā vatthu viya tena saddhiṃ ajjhoharitabbataṃ gacchatīti vuttaṃ ‘‘ajjhoharitabbako āhāro’’ti, nibbattitaojaṃ pana sandhāya ‘‘kabaḷīkāro āhāro ojaṭṭhamakarūpāni āharatī’’ti vakkhati. Oḷārikatā appojatāya na vatthuno thūlatāya kathinatāya vā, tasmā yasmiṃ vatthusmiṃ parittā ojā hoti, taṃ oḷārikaṃ. Sappādayo dukkhuppādakatāya oḷārikā veditabbā. Visāṇādīnaṃ tivassachaḍḍitānaṃ pūtibhūtattā mudukatāti vadanti. Taracchakheḷatemitatāya pana tathābhūtānaṃ tesaṃ mudukatā. Dhammasabhāvo hesa. Sasānaṃ āhāro sukhumo taruṇatiṇasassakhādanato. Sakuṇānaṃ āhāro sukhumo tiṇabījādikhādanato. Paccantavāsīnaṃ āhāro sukhumo māsamuggakurādibhojanattā. Tesanti paranimmitavasavattīnaṃ. Sukhumotvevāti na kiñci upādāya, atha kho sukhumoicceva niṭṭhaṃ patto tato paramasukhumassa abhāvato.

வத்து²வஸேன பனெத்த² ஆஹாரஸ்ஸ ஓளாரிகஸுகு²மதா வுத்தா, ஸா சஸ்ஸ அப்போஜமஹோஜதாஹி வேதி³தப்³பா³தி த³ஸ்ஸேதுங் ‘‘எத்த² சா’’திஆதி³மாஹ. பரிஸ்ஸயந்தி கு²தா³வஸேன உப்பன்னங் விஹிங்ஸங் ஸரீரத³ரத²ங். வினோதே³தீதி வத்து² தஸ்ஸ வினோத³னமத்தங் கரோதி. ந பன ஸக்கோதி பாலேதுந்தி ஸரீரங் யாபேதுங் நப்பஹோதி நிரோஜத்தா. ந ஸக்கோதி பரிஸ்ஸயங் வினோதே³துங் ஆமாஸயஸ்ஸ அபூரணதோ.

Vatthuvasena panettha āhārassa oḷārikasukhumatā vuttā, sā cassa appojamahojatāhi veditabbāti dassetuṃ ‘‘ettha cā’’tiādimāha. Parissayanti khudāvasena uppannaṃ vihiṃsaṃ sarīradarathaṃ. Vinodetīti vatthu tassa vinodanamattaṃ karoti. Na pana sakkoti pāletunti sarīraṃ yāpetuṃ nappahoti nirojattā. Na sakkoti parissayaṃ vinodetuṃ āmāsayassa apūraṇato.

ச²ப்³பி³தோ⁴பீதி இமினா கஸ்ஸசி ப²ஸ்ஸஸ்ஸ அனவஸேஸிதப்³ப³தமாஹ. தே³ஸனக்கமேனேவெத்த² ப²ஸ்ஸாதீ³னங் து³தியாதி³தா, ந அஞ்ஞேன காரணேனாதி ஆஹ ‘‘தே³ஸனானயோ ஏவ சேஸா’’திஆதி³. மனஸோ ஸஞ்சேதனா ந ஸத்தஸ்ஸாதி த³ஸ்ஸனத்த²ங் மனோக³ஹணங் யதா² ‘‘சித்தஸ்ஸ டி²தி, சேதோவிமுத்தி சா’’தி ஆஹ ‘‘மனோஸஞ்சேதனாதி சேதனாவா’’தி. சித்தந்தி யங் கிஞ்சி சித்தமேவ. ஏகராஸிங் கத்வாதி ஏகஜ்ஜ²ங் க³ஹெத்வா விபா⁴க³ங் அகத்வா, ஸாமஞ்ஞேன க³ஹிதாதி அத்தோ². தத்த² லப்³ப⁴மானங் உபாதி³ண்ணகாதி³விபா⁴க³ங் த³ஸ்ஸேதுங் ‘‘கப³ளீகாரோ ஆஹாரோ’’திஆதி³ வுத்தங். ஆஹாரத்த²ங் ந ஸாதெ⁴ந்தீதி தாதி³ஸஸ்ஸ ஆஹாரஸ்ஸ அனாஹரணதோ. ததா³பீதி பி⁴ஜ்ஜித்வா விக³தகாலேபி. உபாதி³ண்ணகாஹாரோதி வுச்சந்தீதி கேசி. இத³ங் பன ஆசரியானங் ந ருச்சதி ததா³ உபாதி³ண்ணகரூபஸ்ஸேவ அபா⁴வதோ. படிஸந்தி⁴சித்தேனேவ ஸஹஜாதாதி லக்க²ணவசனமேதங், ஸப்³பா³யபி கம்மஜரூபபரியாபன்னாய ஓஜாய அத்தி²பா⁴வஸ்ஸ அவிச்சே²த³ப்பவத்திஸம்ப⁴வத³ஸ்ஸனத்தோ². ஸத்தமாதி உப்பன்னதி³வஸதோ பட்டா²ய யாவ ஸத்தமதி³வஸாபி. ரூபஸந்ததிங் பாலேதி பவேணிக⁴டனவஸேன. அயமேவாதி கம்மஜஓஜா. கம்மஜஓஜங் பன படிச்ச உப்பன்னஓஜா அகம்மஜத்தா அனுபாதி³ண்ணஆஹாரொத்வேவ வேதி³தப்³போ³. அனுபாதி³ண்ணகா ப²ஸ்ஸாத³யோ வேதி³தப்³பா³தி ஆனெத்வா ஸம்ப³ந்தோ⁴. லோகுத்தரா ப²ஸ்ஸாத³யோ கத²ந்தி ஆஹ ‘‘லோகுத்தரா பன ருள்ஹீவஸேன கதி²தா’’தி. யஸ்மா தேஸங் குஸலானங் உபேதபரியாயோ நத்தி², தஸ்மா விபாகானங் உபாதி³ண்ணபரியாயோ நத்தே²வாதி அனுபாதி³ண்ணபரியாயோபி ருள்ஹீவஸேன வுத்தோதி வேதி³தப்³போ³.

Chabbidhopīti iminā kassaci phassassa anavasesitabbatamāha. Desanakkamenevettha phassādīnaṃ dutiyāditā, na aññena kāraṇenāti āha ‘‘desanānayo eva cesā’’tiādi. Manaso sañcetanā na sattassāti dassanatthaṃ manogahaṇaṃ yathā ‘‘cittassa ṭhiti, cetovimutti cā’’ti āha ‘‘manosañcetanāti cetanāvā’’ti. Cittanti yaṃ kiñci cittameva. Ekarāsiṃ katvāti ekajjhaṃ gahetvā vibhāgaṃ akatvā, sāmaññena gahitāti attho. Tattha labbhamānaṃ upādiṇṇakādivibhāgaṃ dassetuṃ ‘‘kabaḷīkāro āhāro’’tiādi vuttaṃ. Āhāratthaṃ na sādhentīti tādisassa āhārassa anāharaṇato. Tadāpīti bhijjitvā vigatakālepi. Upādiṇṇakāhāroti vuccantīti keci. Idaṃ pana ācariyānaṃ na ruccati tadā upādiṇṇakarūpasseva abhāvato. Paṭisandhicitteneva sahajātāti lakkhaṇavacanametaṃ, sabbāyapi kammajarūpapariyāpannāya ojāya atthibhāvassa avicchedappavattisambhavadassanattho. Sattamāti uppannadivasato paṭṭhāya yāva sattamadivasāpi. Rūpasantatiṃ pāleti paveṇighaṭanavasena. Ayamevāti kammajaojā. Kammajaojaṃ pana paṭicca uppannaojā akammajattā anupādiṇṇaāhārotveva veditabbo. Anupādiṇṇakā phassādayo veditabbāti ānetvā sambandho. Lokuttarā phassādayo kathanti āha ‘‘lokuttarā pana ruḷhīvasena kathitā’’ti. Yasmā tesaṃ kusalānaṃ upetapariyāyo natthi, tasmā vipākānaṃ upādiṇṇapariyāyo natthevāti anupādiṇṇapariyāyopi ruḷhīvasena vuttoti veditabbo.

புப்³பே³ ‘‘ஆஹாராதி பச்சயா’’தி வுத்தத்தா யதி³ பச்சயட்டோ² ஆஹாரட்டோ²திஆதி³னா சோதே³தி, அத² கஸ்மா இமே ஏவ சத்தாரோ வுத்தாதி அத² கஸ்மா சத்தாரோவ வுத்தா. இமே ஏவ ச வுத்தாதி யோஜனா. விஸேஸப்பச்சயத்தாதி ஏதேன யதா² அஞ்ஞே பச்சயத⁴ம்மா அத்தனோ பச்சயுப்பன்னஸ்ஸ பச்சயாவ ஹொந்தி, இமே பன ததா² ச ஹோதி அஞ்ஞதா² சாதி ஸமானேபி பச்சயத்தே அதிரேகபச்சயா ஹொந்தி, தஸ்மா ‘‘ஆஹாராதி வுத்தா’’தி இமமத்த²ங் த³ஸ்ஸேதி. இதா³னி தங் அதிரேகபச்சயதங் த³ஸ்ஸேதுங் ‘‘விஸேஸபச்சயோ ஹீ’’திஆதி³ வுத்தங். விஸேஸப்பச்சயோ ரூபகாயஸ்ஸ கப³ளீகாரோ ஆஹாரோ உபத²ம்ப⁴கபா⁴வதோ. தேனாஹ அட்ட²கதா²யங் ‘‘ரூபாரூபானங் உபத²ம்ப⁴கத்தேன உபகாரகா சத்தாரோ ஆஹாரா ஆஹாரபச்சயோ’’தி (விஸுத்³தி⁴॰ 2.608; பட்டா²॰ அட்ட²॰ பச்சயுத்³தே³ஸவண்ணனா). உபத²ம்ப⁴கத்தஞ்ஹி ஸதீபி ஜனகத்தே அரூபீனங் ஆஹாரானங் ஆஹாரஜரூபஸமுட்டா²னகரூபாஹாரஸ்ஸ ச ஹோதி, அஸதி பன உபத²ம்ப⁴கத்தே ஆஹாரானங் ஜனகத்தங் நத்தீ²தி உபத²ம்ப⁴கத்தங் பதா⁴னங். ஜனயமானோபி ஹி ஆஹாரோ அவிச்சே²த³வஸேன உபத²ம்ப⁴யமானோ ஏவ ஜனேதீதி உபத²ம்ப⁴கபா⁴வோ ஏவ ஆஹாரபா⁴வோ. வேத³னாய ப²ஸ்ஸோ விஸேஸபச்சயோ. ‘‘ப²ஸ்ஸபச்சயா வேத³னா’’தி ஹி வுத்தங். ‘‘ஸங்கா²ரபச்சயா விஞ்ஞாண’’ந்தி வசனதோ விஞ்ஞாணஸ்ஸ மனோஸஞ்சேதனா. ‘‘சேதனா திவித⁴ங் ப⁴வங் ஜனேதீ’’தி ஹி வுத்தங். ‘‘விஞ்ஞாணபச்சயா நாமரூப’’ந்தி பன வசனதோ நாமரூபஸ்ஸ விஞ்ஞாணங் விஸேஸபச்சயோ. ந ஹி ஓக்கந்தவிஞ்ஞாணாபா⁴வே நாமரூபஸ்ஸ அத்தி² ஸம்ப⁴வோ. யதா²ஹ ‘‘விஞ்ஞாணஞ்ச ஹி, ஆனந்த³, மாதுகுச்சி²ஸ்மிங் ந ஓக்கமிஸ்ஸத², அபி நு கோ² நாமரூபங் மாதுகுச்சி²ஸ்மிங் ஸமுச்சிஸ்ஸதா²’’திஆதி³ (தீ³॰ நி॰ 2.115). வுத்தமேவத்த²ங் ஸுத்தேன ஸாதே⁴துங் ‘‘யதா²ஹா’’திஆதி³ வுத்தங்.

Pubbe ‘‘āhārāti paccayā’’ti vuttattā yadi paccayaṭṭho āhāraṭṭhotiādinā codeti, atha kasmā ime eva cattāro vuttāti atha kasmā cattārova vuttā. Ime eva ca vuttāti yojanā. Visesappaccayattāti etena yathā aññe paccayadhammā attano paccayuppannassa paccayāva honti, ime pana tathā ca hoti aññathā cāti samānepi paccayatte atirekapaccayā honti, tasmā ‘‘āhārāti vuttā’’ti imamatthaṃ dasseti. Idāni taṃ atirekapaccayataṃ dassetuṃ ‘‘visesapaccayo hī’’tiādi vuttaṃ. Visesappaccayo rūpakāyassa kabaḷīkāro āhāro upathambhakabhāvato. Tenāha aṭṭhakathāyaṃ ‘‘rūpārūpānaṃ upathambhakattena upakārakā cattāro āhārā āhārapaccayo’’ti (visuddhi. 2.608; paṭṭhā. aṭṭha. paccayuddesavaṇṇanā). Upathambhakattañhi satīpi janakatte arūpīnaṃ āhārānaṃ āhārajarūpasamuṭṭhānakarūpāhārassa ca hoti, asati pana upathambhakatte āhārānaṃ janakattaṃ natthīti upathambhakattaṃ padhānaṃ. Janayamānopi hi āhāro avicchedavasena upathambhayamāno eva janetīti upathambhakabhāvo eva āhārabhāvo. Vedanāya phasso visesapaccayo. ‘‘Phassapaccayā vedanā’’ti hi vuttaṃ. ‘‘Saṅkhārapaccayā viññāṇa’’nti vacanato viññāṇassa manosañcetanā. ‘‘Cetanā tividhaṃ bhavaṃ janetī’’ti hi vuttaṃ. ‘‘Viññāṇapaccayā nāmarūpa’’nti pana vacanato nāmarūpassa viññāṇaṃ visesapaccayo. Na hi okkantaviññāṇābhāve nāmarūpassa atthi sambhavo. Yathāha ‘‘viññāṇañca hi, ānanda, mātukucchismiṃ na okkamissatha, api nu kho nāmarūpaṃ mātukucchismiṃ samuccissathā’’tiādi (dī. ni. 2.115). Vuttamevatthaṃ suttena sādhetuṃ ‘‘yathāhā’’tiādi vuttaṃ.

ஏவங் யதி³பி பச்சயத்தோ² ஆஹாரத்தோ², விஸேஸபச்சயத்தா பன இமேவ ஆஹாராதி வுத்தாதி தங் நேஸங் விஸேஸபச்சயதங் அவிபா⁴க³தோ த³ஸ்ஸெத்வா இதா³னி விபா⁴க³தோ த³ஸ்ஸேதுங் ‘‘கோ பனெத்தா²’’திஆதி³ ஆரத்³த⁴ங். முகே² ட²பிதமத்தோ ஏவ அஸங்கா²தி³தோ, தத்தகேனாபி அப்³ப⁴ந்தரஸ்ஸ ஆஹாரஸ்ஸ பச்சயோ ஹோதி ஏவ. தேனாஹ ‘‘அட்ட² ரூபானி ஸமுட்டா²பேதீ’’தி. ஸுக²வேத³னாய ஹிதோ ஸுக²வேத³னீயோ. ஸப்³ப³தா²பீதி சக்கு²ஸம்ப²ஸ்ஸாதி³வஸேன. யத்தகா ப²ஸ்ஸஸ்ஸ பகாரபே⁴தா³, தேஸங் வஸேன ஸப்³ப³ப்பகாரோபி ப²ஸ்ஸாஹாரோ யதா²ரஹங் திஸ்ஸோ வேத³னா ஆஹரதி, அனாஹாரகோ நத்தி².

Evaṃ yadipi paccayattho āhārattho, visesapaccayattā pana imeva āhārāti vuttāti taṃ nesaṃ visesapaccayataṃ avibhāgato dassetvā idāni vibhāgato dassetuṃ ‘‘ko panetthā’’tiādi āraddhaṃ. Mukhe ṭhapitamatto eva asaṅkhādito, tattakenāpi abbhantarassa āhārassa paccayo hoti eva. Tenāha ‘‘aṭṭha rūpāni samuṭṭhāpetī’’ti. Sukhavedanāya hito sukhavedanīyo. Sabbathāpīti cakkhusamphassādivasena. Yattakā phassassa pakārabhedā, tesaṃ vasena sabbappakāropi phassāhāro yathārahaṃ tisso vedanā āharati, anāhārako natthi.

ஸப்³ப³தா²பீதி இதா⁴பி ப²ஸ்ஸாஹாரே வுத்தனயானுஸாரேன அத்தோ² வேதி³தப்³போ³. திஸந்ததிவஸேனாதி காயத³ஸகங் பா⁴வத³ஸகங் வத்து²த³ஸகந்தி திவித⁴ஸந்ததிவஸேன. ஸஹஜாதாதி³பச்சயனயேனாதி ஸஹஜாதாதி³பச்சயவிதி⁴னா. படிஸந்தி⁴விஞ்ஞாணஞ்ஹி அத்தனா ஸஹஜாதனாமஸ்ஸ ஸஹஜாதஅஞ்ஞமஞ்ஞவிபாகிந்த்³ரியஸம்பயுத்தஅத்தி²அவிக³தபச்சயேஹி பச்சயோ ஹொந்தோயேவ ஆஹாரபச்சயதாய தங் ஆஹாரேதி வுத்தங், ஸஹஜாதரூபேஸு பன வத்து²னோ ஸம்பயுத்தபச்சயங் ட²பெத்வா விப்பயுத்தபச்சயேன, ஸேஸரூபானங் அஞ்ஞமஞ்ஞபச்சயஞ்ச ட²பெத்வா இதரேஸங் பச்சயானங் வஸேன யோஜனா காதப்³பா³. தானீதி நபுங்ஸகனித்³தே³ஸோ அனபுங்ஸகானம்பி நபுங்ஸகேஹி ஸஹ வசனதோ. ஸாஸவகுஸலாகுஸலசேதனாவ வுத்தா விஸேஸபச்சயபா⁴வத³ஸ்ஸனங் ஹேதந்தி, தேனாஹ ‘‘அவிஸேஸேன பனா’’திஆதி³. படிஸந்தி⁴விஞ்ஞாணமேவ வுத்தந்தி எத்தா²பி ஏஸேவ நயோ. யதா² தஸ்ஸ தஸ்ஸ ப²லஸ்ஸ விஸேஸதோ பச்சயதாய ஏதேஸங் ஆஹாரத்தோ², ஏவங் அவிஸேஸதோபீதி த³ஸ்ஸேதுங் ‘‘அவிஸேஸேனா’’திஆதி³ வுத்தங். தத்த² தங்ஸம்பயுத்ததங்ஸமுட்டா²னத⁴ம்மானந்தி தேஹி ப²ஸ்ஸாதீ³ஹி ஸம்பயுத்தத⁴ம்மானஞ்சேவ தங்ஸமுட்டா²னரூபத⁴ம்மானஞ்ச. தத்த² ஸம்பயுத்தக்³க³ஹணங் யதா²ரஹதோ த³ட்ட²ப்³ப³ங், ஸமுட்டா²னக்³க³ஹணங் பன அவிஸேஸதோ.

Sabbathāpīti idhāpi phassāhāre vuttanayānusārena attho veditabbo. Tisantativasenāti kāyadasakaṃ bhāvadasakaṃ vatthudasakanti tividhasantativasena. Sahajātādipaccayanayenāti sahajātādipaccayavidhinā. Paṭisandhiviññāṇañhi attanā sahajātanāmassa sahajātaaññamaññavipākindriyasampayuttaatthiavigatapaccayehi paccayo hontoyeva āhārapaccayatāya taṃ āhāreti vuttaṃ, sahajātarūpesu pana vatthuno sampayuttapaccayaṃ ṭhapetvā vippayuttapaccayena, sesarūpānaṃ aññamaññapaccayañca ṭhapetvā itaresaṃ paccayānaṃ vasena yojanā kātabbā. Tānīti napuṃsakaniddeso anapuṃsakānampi napuṃsakehi saha vacanato. Sāsavakusalākusalacetanāva vuttā visesapaccayabhāvadassanaṃ hetanti, tenāha ‘‘avisesena panā’’tiādi. Paṭisandhiviññāṇameva vuttanti etthāpi eseva nayo. Yathā tassa tassa phalassa visesato paccayatāya etesaṃ āhārattho, evaṃ avisesatopīti dassetuṃ ‘‘avisesenā’’tiādi vuttaṃ. Tattha taṃsampayuttataṃsamuṭṭhānadhammānanti tehi phassādīhi sampayuttadhammānañceva taṃsamuṭṭhānarūpadhammānañca. Tattha sampayuttaggahaṇaṃ yathārahato daṭṭhabbaṃ, samuṭṭhānaggahaṇaṃ pana avisesato.

உபத்த²ம்பெ⁴ந்தோ ஆஹாரகிச்சங் ஸாதே⁴தீதி உபத்த²ம்பெ⁴ந்தோ ஏவ ரூபங் ஸமுட்டா²பேதி, ஓஜட்ட²மகஸமுட்டா²பனேனேவ பனஸ்ஸ உபத²ம்ப⁴னகிச்சஸித்³தி⁴. பு²ஸந்தோயேவாதி பு²ஸனகிச்சங் கரொந்தோ ஏவ. ஆயூஹமானாவாதி சேதயமானா ஏவ அபி⁴ஸந்த³ஹந்தீ ஏவ. விஜானந்தமேவாதி உபபத்திபரிகப்பனவஸேன விஜானந்தமேவ ஆஹாரகிச்சங் ஸாதே⁴தீதி யோஜனா. ஸப்³ப³த்த² ஆஹாரகிச்சஸாத⁴னஞ்ச தேஸங் வேத³னாதி³உப்பத்திஹேதுதாய அத்தபா⁴வஸ்ஸ பவத்தனமேவ. காயட்ட²பனேனாதி கஸ்மா வுத்தங், நனு கம்மஜாதி³ரூபங் கம்மாதி³னாவ பவத்ததீதி சோத³னங் ஸந்தா⁴யாஹ ‘‘கம்மஜனிதோபீ’’திஆதி³.

Upatthambhento āhārakiccaṃ sādhetīti upatthambhento eva rūpaṃ samuṭṭhāpeti, ojaṭṭhamakasamuṭṭhāpaneneva panassa upathambhanakiccasiddhi. Phusantoyevāti phusanakiccaṃ karonto eva. Āyūhamānāvāti cetayamānā eva abhisandahantī eva. Vijānantamevāti upapattiparikappanavasena vijānantameva āhārakiccaṃ sādhetīti yojanā. Sabbattha āhārakiccasādhanañca tesaṃ vedanādiuppattihetutāya attabhāvassa pavattanameva. Kāyaṭṭhapanenāti kasmā vuttaṃ, nanu kammajādirūpaṃ kammādināva pavattatīti codanaṃ sandhāyāha ‘‘kammajanitopī’’tiādi.

உபாதி³ண்ணரூபஸந்ததியா உபத்த²ம்ப⁴னேனேவ உதுசித்தஜரூபஸந்ததீனம்பி உபத்த²ம்ப⁴னஸித்³தி⁴ ஹோதீதி ‘‘த்³வின்னங் ரூபஸந்ததீன’’ந்தி வுத்தங். உபத்த²ம்ப⁴னமேவ ஸந்தா⁴ய ‘‘அனுபாலகோ ஹுத்வா’’தி ச வுத்தங். ரூபகாயஸ்ஸ டி²திஹேதுதா ஹி யாபனா அனுபாலனா. ஸுகா²தி³வத்து²பூ⁴தந்தி ஸுகா²தீ³னங் பவத்திட்டா²னபூ⁴தங். ஆரம்மணம்பி ஹி வஸதி எத்த² ஆரம்மணகரணவஸேன ததா³ரம்மணா த⁴ம்மாதி வத்தூ²தி வுச்சதி. பு²ஸந்தோயேவாதி இத³ங் ப²ஸ்ஸஸ்ஸ பு²ஸனஸபா⁴வத்தா வுத்தங். ந ஹி த⁴ம்மானங் ஸபா⁴வேன வினா பவத்தி அத்தி², வேத³னாபவத்தியா வினா ஸத்தானங் ஸந்தா⁴வனதா நத்தீ²தி ஆஹ ‘‘ஸுகா²தி³…பே॰… ஹோதீ’’தி. ந செத்த² ஸஞ்ஞீப⁴வகதா²யங் அஸஞ்ஞீப⁴வோ த³ஸ்ஸேதப்³போ³, தஸ்ஸாபி வா காரணபூ⁴தவேத³னாபவத்திவஸேனேவ டி²தியா ஹேதுனோ அப்³யாபிதத்தா, ததா² ஹி ‘‘மனோஸஞ்சேதனா…பே॰… ப⁴வமூலனிப்பா²த³னதோ ஸத்தானங் டி²தியா ஹோதீ’’தி வுத்தா. ததோ ஏவ விஞ்ஞாணங் விஜானந்தமேவாதி உபபத்திபரிகப்பனவஸேன விஜானந்தமேவாதி வுத்தோவாயமத்தோ².

Upādiṇṇarūpasantatiyā upatthambhaneneva utucittajarūpasantatīnampi upatthambhanasiddhi hotīti ‘‘dvinnaṃ rūpasantatīna’’nti vuttaṃ. Upatthambhanameva sandhāya ‘‘anupālako hutvā’’ti ca vuttaṃ. Rūpakāyassa ṭhitihetutā hi yāpanā anupālanā. Sukhādivatthubhūtanti sukhādīnaṃ pavattiṭṭhānabhūtaṃ. Ārammaṇampi hi vasati ettha ārammaṇakaraṇavasena tadārammaṇā dhammāti vatthūti vuccati. Phusantoyevāti idaṃ phassassa phusanasabhāvattā vuttaṃ. Na hi dhammānaṃ sabhāvena vinā pavatti atthi, vedanāpavattiyā vinā sattānaṃ sandhāvanatā natthīti āha ‘‘sukhādi…pe… hotī’’ti. Na cettha saññībhavakathāyaṃ asaññībhavo dassetabbo, tassāpi vā kāraṇabhūtavedanāpavattivaseneva ṭhitiyā hetuno abyāpitattā, tathā hi ‘‘manosañcetanā…pe… bhavamūlanipphādanato sattānaṃ ṭhitiyā hotī’’ti vuttā. Tato eva viññāṇaṃ vijānantamevāti upapattiparikappanavasena vijānantamevāti vuttovāyamattho.

சத்தாரி ப⁴யானி த³ட்ட²ப்³பா³னி ஆதீ³னவவிபா⁴வனதோ. நிகந்தீதி நிகாமனா, ரஸதண்ஹங் ஸந்தா⁴ய வத³தி. ஸா ஹி கப³ளீகாரே ஆஹாரே ப³லவதீ, தேனேவெத்த² அவதா⁴ரணங் கதங். பா⁴யதி ஏதஸ்மாதி ப⁴யங், நிகந்தியேவ ப⁴யங் மஹானத்த²ஹேதுதோ. உபக³மனங் விஸயிந்த்³ரியவிஞ்ஞாணேஸு விஸயவிஞ்ஞாணேஸு ச ஸங்க³திவஸேன பவத்தி, தங் வேத³னாதி³உப்பத்திஹேதுதாய ‘‘ப⁴ய’’ந்தி வுத்தங். அவதா⁴ரணே பயோஜனங் வுத்தனயமேவ. ஸேஸத்³வயேபி ஏஸேவ நயோ. ஆயூஹனங் அபி⁴ஸந்த³ஹனங், ஸங்விதா⁴னந்திபி வத³ந்தி. தங் ப⁴வூபபத்திஹேதுதாய ‘‘ப⁴ய’’ந்தி வுத்தங். அபி⁴னிபாதோ தத்த² தத்த² ப⁴வே படிஸந்தி⁴க்³க³ஹணவஸேன விஞ்ஞாணஸ்ஸ நிப்³ப³த்தி. ஸோ ப⁴வூபபத்திஹேதுகானங் ஸப்³பே³ஸங் அனத்தா²னங் மூலகாரணதாய ‘‘ப⁴ய’’ந்தி வுத்தங். இதா³னி நிகந்திஆதீ³னங் ஸப்படிப⁴யதங் வித்தா²ரதோ த³ஸ்ஸேதுங் ‘‘கிங் காரணா’’திஆதி³ ஆரத்³த⁴ங். தத்த² நிகந்திங் கத்வாதி ஆலயங் ஜனெத்வா, தண்ஹங் உப்பாதெ³த்வாதி அத்தோ². ஸீதாதீ³னங் புரக்க²தாதி ஸீதாதீ³னங் புரதோ டி²தா, ஸீதாதீ³ஹி பா³தி⁴யமானாதி அத்தோ².

Cattāri bhayāni daṭṭhabbāni ādīnavavibhāvanato. Nikantīti nikāmanā, rasataṇhaṃ sandhāya vadati. Sā hi kabaḷīkāre āhāre balavatī, tenevettha avadhāraṇaṃ kataṃ. Bhāyati etasmāti bhayaṃ, nikantiyevabhayaṃ mahānatthahetuto. Upagamanaṃ visayindriyaviññāṇesu visayaviññāṇesu ca saṅgativasena pavatti, taṃ vedanādiuppattihetutāya ‘‘bhaya’’nti vuttaṃ. Avadhāraṇe payojanaṃ vuttanayameva. Sesadvayepi eseva nayo. Āyūhanaṃ abhisandahanaṃ, saṃvidhānantipi vadanti. Taṃ bhavūpapattihetutāya ‘‘bhaya’’nti vuttaṃ. Abhinipāto tattha tattha bhave paṭisandhiggahaṇavasena viññāṇassa nibbatti. So bhavūpapattihetukānaṃ sabbesaṃ anatthānaṃ mūlakāraṇatāya ‘‘bhaya’’nti vuttaṃ. Idāni nikantiādīnaṃ sappaṭibhayataṃ vitthārato dassetuṃ ‘‘kiṃ kāraṇā’’tiādi āraddhaṃ. Tattha nikantiṃ katvāti ālayaṃ janetvā, taṇhaṃ uppādetvāti attho. Sītādīnaṃ purakkhatāti sītādīnaṃ purato ṭhitā, sītādīhi bādhiyamānāti attho.

ப²ஸ்ஸங் உபக³ச்ச²ந்தாதி சக்கு²ஸம்ப²ஸ்ஸாதி³பே⁴த³ங் ப²ஸ்ஸங் பவத்தெந்தா. ப²ஸ்ஸஸ்ஸாதி³னோதி காயஸம்ப²ஸ்ஸவஸேன பொ²ட்ட²ப்³ப³ஸங்கா²தஸ்ஸ அஸ்ஸாத³னஸீலா. காயஸம்ப²ஸ்ஸவஸேன ஹி ஸத்தானங் பொ²ட்ட²ப்³ப³தண்ஹா பவத்ததீதி த³ஸ்ஸேதுங் ப²ஸ்ஸாஹாராதீ³னவத³ஸ்ஸனே பொ²ட்ட²ப்³பா³ரம்மணங் உத்³த⁴டங் ‘‘பரேஸங் ரக்கி²தகோ³பிதேஸூ’’திஆதி³னா. ப²ஸ்ஸஸ்ஸாதி³னோதி வா ப²ஸ்ஸாஹாரஸ்ஸாதி³னோதி அத்தோ². ஸதி ஹி ப²ஸ்ஸாஹாரே ஸத்தானங் ப²ஸ்ஸாரம்மணே அஸ்ஸாதோ³, நாஸதி, தேனாஹ ‘‘ப²ஸ்ஸஸ்ஸாத³மூலக’’ந்திஆதி³.

Phassaṃ upagacchantāti cakkhusamphassādibhedaṃ phassaṃ pavattentā. Phassassādinoti kāyasamphassavasena phoṭṭhabbasaṅkhātassa assādanasīlā. Kāyasamphassavasena hi sattānaṃ phoṭṭhabbataṇhā pavattatīti dassetuṃ phassāhārādīnavadassane phoṭṭhabbārammaṇaṃ uddhaṭaṃ ‘‘paresaṃ rakkhitagopitesū’’tiādinā. Phassassādinoti vā phassāhārassādinoti attho. Sati hi phassāhāre sattānaṃ phassārammaṇe assādo, nāsati, tenāha ‘‘phassassādamūlaka’’ntiādi.

ஜாதினிமித்தஸ்ஸ ப⁴யஸ்ஸ அபி⁴னிபாதஸபா⁴வேன க³ஹிதத்தா ‘‘தம்மூலக’’ந்தி வுத்தங். கம்மாயூஹனநிமித்தந்தி அத்தோ². ப⁴யங் ஸப்³ப³ந்தி பஞ்சவீஸதி, திவித⁴மஹாப⁴யங், அஞ்ஞஞ்ச ஸப்³ப³ப⁴யங் ஆக³தமேவ ஹோதி ப⁴யாதி⁴ட்டா²னஸ்ஸ அத்தபா⁴வஸ்ஸ நிப்பா²த³னதோ.

Jātinimittassa bhayassa abhinipātasabhāvena gahitattā ‘‘tammūlaka’’nti vuttaṃ. Kammāyūhananimittanti attho. Bhayaṃ sabbanti pañcavīsati, tividhamahābhayaṃ, aññañca sabbabhayaṃ āgatameva hoti bhayādhiṭṭhānassa attabhāvassa nipphādanato.

அபி⁴னிபததீதி அபி⁴னிப்³ப³த்ததி. பட²மாபி⁴னிப்³ப³த்தி ஹி ஸத்தானங் தத்த² தத்த² அங்கா³ரகாஸுஸதி³ஸே ப⁴வே அபி⁴னிபாதஸதி³ஸீ. தம்மூலகத்தாதி நாமரூபனிப்³ப³த்திமூலகத்தா. ஸப்³ப³ப⁴யானங் அபி⁴னிபாதோயேவ ப⁴யங் பா⁴யதி ஏதஸ்மாதி கத்வா.

Abhinipatatīti abhinibbattati. Paṭhamābhinibbatti hi sattānaṃ tattha tattha aṅgārakāsusadise bhave abhinipātasadisī. Tammūlakattāti nāmarūpanibbattimūlakattā. Sabbabhayānaṃ abhinipātoyeva bhayaṃ bhāyati etasmāti katvā.

அப்பேதி வியாதி ப²லஸ்ஸ அத்தலாப⁴ஹேதுபா⁴வதோ காரணங், தங் நிய்யாதே³தி விய. தந்தி ப²லங். ததோதி காரணதோ. ஏதேஸந்தி ஆஹாரானங் . யதா²வுத்தேனாதி ‘‘ப²லங் நிதே³தீ’’திஆதி³னா வுத்தப்பகாரேன அத்தே²ன. ஸப்³ப³பதே³ஸூதி ‘‘வேத³னானிரோதே⁴னா’’திஆதீ³ஸு ஸப்³பே³ஸு பதே³ஸு.

Appeti viyāti phalassa attalābhahetubhāvato kāraṇaṃ, taṃ niyyādeti viya. Tanti phalaṃ. Tatoti kāraṇato. Etesanti āhārānaṃ . Yathāvuttenāti ‘‘phalaṃ nidetī’’tiādinā vuttappakārena atthena. Sabbapadesūti ‘‘vedanānirodhenā’’tiādīsu sabbesu padesu.

படிஸந்தி⁴ங் ஆதி³ங் கத்வாதி படிஸந்தி⁴க்க²ணங் ஆதி³ங் கத்வா. உபாதி³ண்ணகஆஹாரே ஸந்தா⁴ய ‘‘அத்தபா⁴வஸங்கா²தானங் ஆஹாரான’’ந்தி வுத்தங். தே ஹி நிப்பரியாயதோ தண்ஹானிதா³னா. பரிபுண்ணாயதனானங் ஸத்தானங் ஸத்தஸந்ததிவஸேனாதி பரிபுண்ணாயதனானங் ஸபா⁴வகானங் சக்கு² ஸோதங் கா⁴னங் ஜிவ்ஹா காயோ பா⁴வோ வத்தூ²தி இமேஸங் ஸத்தன்னங் ஸந்ததீனங் வஸேன. ஸேஸானங் அபரிபுண்ணாயதனானங் அந்த⁴ப³தி⁴ரஅபா⁴வகானங். ஊனஊனஸந்ததிவஸேனாதி சக்கு²னா, ஸோதேன, தது³ப⁴யேன, பா⁴வேன ச ஊனஊனஸந்ததிவஸேன. படிஸந்தி⁴யங் ஜாதா படிஸந்தி⁴கா. பட²மப⁴வங்க³சித்தக்க²ணாதீ³தி ஆதி³-ஸத்³தே³ன ததா³ரம்மணசித்தஸ்ஸ ஸங்க³ஹோ த³ட்ட²ப்³போ³.

Paṭisandhiṃ ādiṃ katvāti paṭisandhikkhaṇaṃ ādiṃ katvā. Upādiṇṇakaāhāre sandhāya ‘‘attabhāvasaṅkhātānaṃ āhārāna’’nti vuttaṃ. Te hi nippariyāyato taṇhānidānā. Paripuṇṇāyatanānaṃ sattānaṃ sattasantativasenāti paripuṇṇāyatanānaṃ sabhāvakānaṃ cakkhu sotaṃ ghānaṃ jivhā kāyo bhāvo vatthūti imesaṃ sattannaṃ santatīnaṃ vasena. Sesānaṃ aparipuṇṇāyatanānaṃ andhabadhiraabhāvakānaṃ. Ūnaūnasantativasenāti cakkhunā, sotena, tadubhayena, bhāvena ca ūnaūnasantativasena. Paṭisandhiyaṃ jātā paṭisandhikā. Paṭhamabhavaṅgacittakkhaṇādīti ādi-saddena tadārammaṇacittassa saṅgaho daṭṭhabbo.

தண்ஹாயபி நிதா³னங் ஜானாதீதி யோஜனா. தண்ஹானிதா³னந்திபி பாடோ². வட்டங் த³ஸ்ஸெத்வாதி ஸரூபதோ நயதோ ச ஸகலமேவ வட்டங் த³ஸ்ஸெத்வா. இதா³னி தமத்த²ங் வித்தா²ரதோ விபா⁴வேதுங் ‘‘இமஸ்மிஞ்ச பன டா²னே’’திஆதி³மாஹ. அதீதாபி⁴முக²ங் தே³ஸனங் கத்வாதி பச்சுப்பன்னப⁴வதோ பட்டா²ய அதீதத⁴ம்மாபி⁴முக²ங் தப்³பி³ஸயங் தே³ஸனங் கத்வா ததா²காரணேன. அதீதேன வட்டங் த³ஸ்ஸேதீதி அதீதப⁴வேன கம்மகிலேஸவிபாகவட்டங் த³ஸ்ஸேதி. அத்தபா⁴வோதி பச்சுப்பன்னோ அத்தபா⁴வோ. யதி³ ஏவங் கஸ்மா ‘‘அதீதேன வட்டங் த³ஸ்ஸேதீ’’தி வுத்தந்தி? நாயங் தோ³ஸோ ‘‘அதீதேனேவா’’தி அனவதா⁴ரணதோ, ஏவஞ்ச கத்வா அதீதாபி⁴முக²க்³க³ஹணங் ஜனககம்மங் க³ஹிதங், தண்ஹாஸீஸேன நானந்தரியபா⁴வதோ. ந ஹி கம்முனா வினா தண்ஹா ப⁴வனெத்தி யுஜ்ஜதி.

Taṇhāyapi nidānaṃ jānātīti yojanā. Taṇhānidānantipi pāṭho. Vaṭṭaṃ dassetvāti sarūpato nayato ca sakalameva vaṭṭaṃ dassetvā. Idāni tamatthaṃ vitthārato vibhāvetuṃ ‘‘imasmiñca pana ṭhāne’’tiādimāha. Atītābhimukhaṃ desanaṃ katvāti paccuppannabhavato paṭṭhāya atītadhammābhimukhaṃ tabbisayaṃ desanaṃ katvā tathākāraṇena. Atītena vaṭṭaṃ dassetīti atītabhavena kammakilesavipākavaṭṭaṃ dasseti. Attabhāvoti paccuppanno attabhāvo. Yadi evaṃ kasmā ‘‘atītena vaṭṭaṃ dassetī’’ti vuttanti? Nāyaṃ doso ‘‘atītenevā’’ti anavadhāraṇato, evañca katvā atītābhimukhaggahaṇaṃ janakakammaṃ gahitaṃ, taṇhāsīsena nānantariyabhāvato. Na hi kammunā vinā taṇhā bhavanetti yujjati.

தங் கம்மந்தி தண்ஹாஸீஸேன வுத்தகம்மங். த³ஸ்ஸேதுந்தி தங் அதீதங் அத்தபா⁴வங் த³ஸ்ஸேதுங். தஸ்ஸத்தபா⁴வஸ்ஸ ஜனகங் கம்மந்தி தஸ்ஸ யதா²வுத்தஸ்ஸ அத்தபா⁴வஸ்ஸ ஜனகங். ததோ பரம்பி அத்தபா⁴வங் ஆயூஹிதங் கம்மங் த³ஸ்ஸேதுங் வுத்தங். அவிஜ்ஜா ச நாம தண்ஹா விய கம்மத்தாதி கம்மஸ்ஸேவ க³ஹணங். த்³வீஸு டா²னேஸூதி ஆஹாரக்³க³ஹணேன வேத³னாதி³க்³க³ஹணேனாதி த்³வீஸு டா²னேஸு. அத்தபா⁴வோதி பச்சுப்பன்னகாலிகோ அதீதகாலிகோ ச அத்தபா⁴வோ. புன த்³வீஸூதி தண்ஹாக்³க³ஹணே அவிஜ்ஜாஸங்கா²ரக்³க³ஹணேதி த்³வீஸு டா²னேஸு. தஸ்ஸ ஜனகந்தி பச்சுப்பன்னஸ்ஸ சேவ அதீதஸ்ஸ ச அத்தபா⁴வஸ்ஸ ஜனகங் கம்மங் வுத்தந்தி யோஜனா . கம்மக்³க³ஹணேன செத்த² யத்த² தங் கம்மங் ஆயூஹிதங், ஸா அதீதா ஜாதி அத்த²தோ த³ஸ்ஸிதா ஹோதி. தேன ஸங்ஸாரவட்டஸ்ஸ அனமதக்³க³தங் தீ³பேதி. ஸங்கே²பேனாதி ஸங்கே²பேன ஹேதுபஞ்சகப²லபஞ்சகக்³க³ஹணம்பி ஹி ஸங்கே²போ ஏவ ஹேதுப²லபா⁴வேன ஸங்க³ஹேதப்³ப³த⁴ம்மானங் அனேகவித⁴த்தா.

Taṃ kammanti taṇhāsīsena vuttakammaṃ. Dassetunti taṃ atītaṃ attabhāvaṃ dassetuṃ. Tassattabhāvassa janakaṃ kammanti tassa yathāvuttassa attabhāvassa janakaṃ. Tato parampi attabhāvaṃ āyūhitaṃ kammaṃ dassetuṃ vuttaṃ. Avijjā ca nāma taṇhā viya kammattāti kammasseva gahaṇaṃ. Dvīsu ṭhānesūti āhāraggahaṇena vedanādiggahaṇenāti dvīsu ṭhānesu. Attabhāvoti paccuppannakāliko atītakāliko ca attabhāvo. Puna dvīsūti taṇhāggahaṇe avijjāsaṅkhāraggahaṇeti dvīsu ṭhānesu. Tassa janakanti paccuppannassa ceva atītassa ca attabhāvassa janakaṃ kammaṃ vuttanti yojanā . Kammaggahaṇena cettha yattha taṃ kammaṃ āyūhitaṃ, sā atītā jāti atthato dassitā hoti. Tena saṃsāravaṭṭassa anamataggataṃ dīpeti. Saṅkhepenāti saṅkhepena hetupañcakaphalapañcakaggahaṇampi hi saṅkhepo eva hetuphalabhāvena saṅgahetabbadhammānaṃ anekavidhattā.

யதி³ அதீதேன வட்டங் த³ஸ்ஸிதங், ஏவங் ஸதி ஸப்பதே³ஸா படிச்சஸமுப்பாத³த⁴ம்மதே³ஸனா ஹோதீதி த³ஸ்ஸெந்தோ ‘‘தத்ராய’’ந்திஆதி³மாஹ. தேன ஹி யதி³பி ஸரூபதோ அனாக³தேன வட்டங் இத⁴ ந த³ஸ்ஸிதங், நயதோ பன தஸ்ஸபி த³ஸ்ஸிதத்தா நிப்பதே³ஸா ஏவ படிச்சஸமுப்பாத³தே³ஸனாதி த³ஸ்ஸேதி. இதா³னி தமத்த²ங் உபமாய விபா⁴வேதுங் ‘‘யதா² ஹீ’’திஆதி³ வுத்தங். உத³கபிட்டே² நிபன்னந்தி உத³கங் பரிப்லவவஸேன நிபன்னங். பரபா⁴க³ந்தி பரஉத்தமங்க³பா⁴க³ங். ஓரதோதி ததோ அபரபா⁴க³தோ ஓலோகெந்தோ. அபரிபுண்ணோதி விகலாவயவோ. ஏவங்ஸம்பத³ந்திஆதி³ உபமாய ஸங்ஸந்த³னங்.

Yadi atītena vaṭṭaṃ dassitaṃ, evaṃ sati sappadesā paṭiccasamuppādadhammadesanā hotīti dassento ‘‘tatrāya’’ntiādimāha. Tena hi yadipi sarūpato anāgatena vaṭṭaṃ idha na dassitaṃ, nayato pana tassapi dassitattā nippadesā eva paṭiccasamuppādadesanāti dasseti. Idāni tamatthaṃ upamāya vibhāvetuṃ ‘‘yathā hī’’tiādi vuttaṃ. Udakapiṭṭhe nipannanti udakaṃ pariplavavasena nipannaṃ. Parabhāganti parauttamaṅgabhāgaṃ. Oratoti tato aparabhāgato olokento. Aparipuṇṇoti vikalāvayavo. Evaṃsampadantiādi upamāya saṃsandanaṃ.

யதா² ஹி கீ³வா ஸரீரஸந்தா⁴ரககண்ட³ரானங் மூலட்டா²னபூ⁴தா, ஏவங் அத்தபா⁴வஸந்தா⁴ரகானங் ஸங்கா²ரானங் மூலபூ⁴தா தண்ஹாதி வுத்தங் ‘‘கீ³வாய தி³ட்ட²காலோ’’தி. யதா² வேத³னாதி³அனேகாவயவஸமுதா³யபூ⁴தோ அத்தபா⁴வோ, ஏவங் பா²ஸுகபிட்டி²கண்ட³காதி³அனேகாவயவஸமுதா³யபூ⁴தா பிட்டீ²தி ‘‘பிட்டி²யா…பே॰… தஸ்ஸ தி³ட்ட²காலோ’’தி வுத்தங். தண்ஹாஸங்கா²தந்தி தண்ஹாய கதி²தங். இத⁴ தே³ஸனாய பச்சயா அவிஜ்ஜாஸங்கா²ரா வேதி³தப்³பா³தி ‘‘நங்கு³ட்ட²மூலஸ்ஸ தி³ட்ட²காலோ வியா’’தி வுத்தங். ததா² ஹி பரியோஸானே ‘‘நங்கு³ட்ட²மூலங் பஸ்ஸெய்யா’’தி உபமாத³ஸ்ஸனங் கதங். நயதோ பரிபுண்ணபா⁴வக்³க³ஹணங் வேதி³தப்³ப³ங். பாளியங் அனாக³தஸ்ஸாபி பச்சயவட்டஸ்ஸ ஹேதுவஸேன ப²லவஸேன வா பரிபுண்ணபா⁴வஸ்ஸ முக²மத்தத³ஸ்ஸனீயத்தா ஆதி³தோ ப²லஹேதுஸந்தி⁴, மஜ்ஜே² ஹேதுப²லஸந்தி⁴, அந்தேபி ப²லஹேதுஸந்தீ⁴தி ஏவங் திஸந்தி⁴கத்தா சதுஸங்கே²பமேவ வட்டங் த³ஸ்ஸிதந்தி.

Yathā hi gīvā sarīrasandhārakakaṇḍarānaṃ mūlaṭṭhānabhūtā, evaṃ attabhāvasandhārakānaṃ saṅkhārānaṃ mūlabhūtā taṇhāti vuttaṃ ‘‘gīvāya diṭṭhakālo’’ti. Yathā vedanādianekāvayavasamudāyabhūto attabhāvo, evaṃ phāsukapiṭṭhikaṇḍakādianekāvayavasamudāyabhūtā piṭṭhīti ‘‘piṭṭhiyā…pe… tassa diṭṭhakālo’’ti vuttaṃ. Taṇhāsaṅkhātanti taṇhāya kathitaṃ. Idha desanāya paccayā avijjāsaṅkhārā veditabbāti ‘‘naṅguṭṭhamūlassa diṭṭhakālo viyā’’ti vuttaṃ. Tathā hi pariyosāne ‘‘naṅguṭṭhamūlaṃ passeyyā’’ti upamādassanaṃ kataṃ. Nayato paripuṇṇabhāvaggahaṇaṃ veditabbaṃ. Pāḷiyaṃ anāgatassāpi paccayavaṭṭassa hetuvasena phalavasena vā paripuṇṇabhāvassa mukhamattadassanīyattā ādito phalahetusandhi, majjhe hetuphalasandhi, antepi phalahetusandhīti evaṃ tisandhikattā catusaṅkhepameva vaṭṭaṃ dassitanti.

ஆஹாரஸுத்தவண்ணனா நிட்டி²தா.

Āhārasuttavaṇṇanā niṭṭhitā.

Next: 2. மோளியப²க்³கு³னஸுத்தவண்ணனா • 2. Moḷiyaphaggunasuttavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஆஹாரஸுத்தங் • 1. Āhārasuttaṃ

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஆஹாரஸுத்தவண்ணனா • 1. Āhārasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact