| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. அஜாதஸுத்தவண்ணனா
6. Ajātasuttavaṇṇanā
43. ச²ட்டே² அத்தி², பி⁴க்க²வேதி கா உப்பத்தி? ஏகதி³வஸங் கிர ப⁴க³வதா அனேகபரியாயேன ஸங்ஸாரே ஆதீ³னவங் பகாஸெத்வா தது³பஸமனாதி³வஸேன நிப்³பா³னபடிஸங்யுத்தாய த⁴ம்மதே³ஸனாய கதாய பி⁴க்கூ²னங் ஏதத³ஹோஸி ‘‘அயங் ஸங்ஸாரோ ப⁴க³வதா அவிஜ்ஜாதீ³ஹி காரணேஹி ஸஹேதுகோ வுத்தோ, நிப்³பா³னஸ்ஸ பன தது³பஸமஸ்ஸ ந கிஞ்சி காரணங் வுத்தங், தயித³ங் அஹேதுகங் கத²ங் ஸச்சிகட்ட²பரமத்தே²ன உபலப்³ப⁴தீ’’தி. அத² ப⁴க³வா தேஸங் பி⁴க்கூ²னங் விமதிவித⁴மனத்த²ஞ்சேவ, ‘‘இத⁴ ஸமணப்³ராஹ்மணானங் ‘நிப்³பா³னங் நிப்³பா³ன’ந்தி வாசாவத்து²மத்தமேவ, நத்தி² ஹி பரமத்த²தோ நிப்³பா³னங் நாம அனுபலப்³ப⁴மானஸபா⁴வத்தா’’தி லோகாயதிகாத³யோ விய விப்படிபன்னானங் ப³ஹித்³தா⁴ ச புது²தி³ட்டி²க³திகானங் மிச்சா²வாத³ப⁴ஞ்ஜனத்த²ஞ்ச, அமதமஹானிப்³பா³னஸ்ஸ பரமத்த²தோ அத்தி²பா⁴வதீ³பனத்த²ங் தஸ்ஸ ச நிஸ்ஸரணபா⁴வாதி³ஆனுபா⁴வவந்ததாதீ³பனத்த²ங் பீதிவேகே³ன உதா³னவஸேன இத³ங் ஸுத்தங் அபா⁴ஸி. ததா² ஹி இத³ங் ஸுத்தங் உதா³னேபி (உதா³॰ 72-74) ஸங்கீ³தங்.
43. Chaṭṭhe atthi, bhikkhaveti kā uppatti? Ekadivasaṃ kira bhagavatā anekapariyāyena saṃsāre ādīnavaṃ pakāsetvā tadupasamanādivasena nibbānapaṭisaṃyuttāya dhammadesanāya katāya bhikkhūnaṃ etadahosi ‘‘ayaṃ saṃsāro bhagavatā avijjādīhi kāraṇehi sahetuko vutto, nibbānassa pana tadupasamassa na kiñci kāraṇaṃ vuttaṃ, tayidaṃ ahetukaṃ kathaṃ saccikaṭṭhaparamatthena upalabbhatī’’ti. Atha bhagavā tesaṃ bhikkhūnaṃ vimatividhamanatthañceva, ‘‘idha samaṇabrāhmaṇānaṃ ‘nibbānaṃ nibbāna’nti vācāvatthumattameva, natthi hi paramatthato nibbānaṃ nāma anupalabbhamānasabhāvattā’’ti lokāyatikādayo viya vippaṭipannānaṃ bahiddhā ca puthudiṭṭhigatikānaṃ micchāvādabhañjanatthañca, amatamahānibbānassa paramatthato atthibhāvadīpanatthaṃ tassa ca nissaraṇabhāvādiānubhāvavantatādīpanatthaṃ pītivegena udānavasena idaṃ suttaṃ abhāsi. Tathā hi idaṃ suttaṃ udānepi (udā. 72-74) saṅgītaṃ.
தத்த² அத்தீ²தி விஜ்ஜதி பரமத்த²தோ உபலப்³ப⁴தி. அஜாதங் அபூ⁴தங் அகதங் அஸங்க²தந்தி ஸப்³பா³னிபி பதா³னி அஞ்ஞமஞ்ஞவேவசனானி. அத² வா வேத³னாத³யோ விய ஹேதுபச்சயஸமவாயஸங்கா²தாய காரணஸாமக்³கி³யா ந ஜாதங் ந நிப்³ப³த்தந்தி அஜாதங். காரணேன வினா ஸயமேவ ந பூ⁴தங் ந பாதுபூ⁴தங் ந உப்பன்னந்தி அபூ⁴தங். ஏவங் அஜாதத்தா அபூ⁴தத்தா ச யேன கேனசி காரணேன ந கதந்தி அகதங். ஜாதபூ⁴தகதஸபா⁴வோ ச நாமரூபாதீ³னங் ஸங்க²தத⁴ம்மானங் ஹோதி, ந அஸங்க²தஸபா⁴வஸ்ஸ நிப்³பா³னஸ்ஸாதி த³ஸ்ஸனத்த²ங் அஸங்க²தந்தி வுத்தங். படிலோமதோ வா ஸமேச்ச ஸம்பு⁴ய்ய பச்சயேஹி கதந்தி ஸங்க²தங், ததா² ந ஸங்க²தங், ஸங்க²தலக்க²ணரஹிதந்தி ச அஸங்க²தந்தி ஏவங் அனேகேஹி காரணேஹி நிப்³ப³த்திதபா⁴வே படிஸித்³தே⁴ ‘‘ஸியா நு கோ² ஏகேனேவ காரணேன கத’’ந்தி ஆஸங்காயங் ‘‘ந கேனசி கத’’ந்தி த³ஸ்ஸனத்த²ங் ‘‘அகத’’ந்தி வுத்தங். ஏவங் அப்பச்சயம்பி ஸமானங் ‘‘ஸயமேவ நு கோ² இத³ங் பூ⁴தங் பாதுபூ⁴த’’ந்தி ஆஸங்காயங் தன்னிவத்தனத்த²ங் ‘‘அபூ⁴த’’ந்தி வுத்தங். அயஞ்ச ஏதஸ்ஸ அஸங்க²தாகதாபூ⁴தபா⁴வோ ஸப்³பே³ன ஸப்³ப³ங் அஜாதித⁴ம்மத்தாதி த³ஸ்ஸேதுங் ‘‘அஜாத’’ந்தி வுத்தந்தி. ஏவமேதேஸங் சதுன்னம்பி பதா³னங் ஸாத்த²கபா⁴வோ வேதி³தப்³போ³.
Tattha atthīti vijjati paramatthato upalabbhati. Ajātaṃ abhūtaṃ akataṃ asaṅkhatanti sabbānipi padāni aññamaññavevacanāni. Atha vā vedanādayo viya hetupaccayasamavāyasaṅkhātāya kāraṇasāmaggiyā na jātaṃ na nibbattanti ajātaṃ. Kāraṇena vinā sayameva na bhūtaṃ na pātubhūtaṃ na uppannanti abhūtaṃ. Evaṃ ajātattā abhūtattā ca yena kenaci kāraṇena na katanti akataṃ. Jātabhūtakatasabhāvo ca nāmarūpādīnaṃ saṅkhatadhammānaṃ hoti, na asaṅkhatasabhāvassa nibbānassāti dassanatthaṃ asaṅkhatanti vuttaṃ. Paṭilomato vā samecca sambhuyya paccayehi katanti saṅkhataṃ, tathā na saṅkhataṃ, saṅkhatalakkhaṇarahitanti ca asaṅkhatanti evaṃ anekehi kāraṇehi nibbattitabhāve paṭisiddhe ‘‘siyā nu kho ekeneva kāraṇena kata’’nti āsaṅkāyaṃ ‘‘na kenaci kata’’nti dassanatthaṃ ‘‘akata’’nti vuttaṃ. Evaṃ appaccayampi samānaṃ ‘‘sayameva nu kho idaṃ bhūtaṃ pātubhūta’’nti āsaṅkāyaṃ tannivattanatthaṃ ‘‘abhūta’’nti vuttaṃ. Ayañca etassa asaṅkhatākatābhūtabhāvo sabbena sabbaṃ ajātidhammattāti dassetuṃ ‘‘ajāta’’nti vuttanti. Evametesaṃ catunnampi padānaṃ sātthakabhāvo veditabbo.
இதி ப⁴க³வா ‘‘அத்தி², பி⁴க்க²வே, அஜாதங் அபூ⁴தங் அகதங் அஸங்க²த’’ந்தி பரமத்த²தோ நிப்³பா³னஸ்ஸ அத்தி²பா⁴வங் வத்வா தத்த² ஹேதுங் த³ஸ்ஸெந்தோ ‘‘நோ சேதங், பி⁴க்க²வே’’திஆதி³மாஹ. தஸ்ஸாயங் ஸங்கே²போ – பி⁴க்க²வே, யதி³ அஜாதாதி³ஸபா⁴வா அஸங்க²தா தா⁴து ந அப⁴விஸ்ஸ ந ஸியா, இத⁴ லோகே ஜாதாதி³ஸபா⁴வஸ்ஸ ரூபாதி³க்க²ந்த⁴பஞ்சகஸங்கா²தஸ்ஸ ஸங்கா²ரக³தஸ்ஸ நிஸ்ஸரணங் அனவஸேஸவட்டுபஸமோ ந பஞ்ஞாயெய்ய ந உபலப்³பெ⁴ய்ய ந ஸம்ப⁴வெய்ய. நிப்³பா³னஞ்ஹி ஆரம்மணங் கத்வா பவத்தமானா ஸம்மாதி³ட்டி²ஆத³யோ அரியமக்³க³த⁴ம்மா அனவஸேஸதோ கிலேஸே ஸமுச்சி²ந்த³ந்தி, தேனெத்த² ஸப்³ப³ஸ்ஸபி வட்டது³க்க²ஸ்ஸ அப்பவத்தி அபக³மோ நிஸ்ஸரணங் பஞ்ஞாயதி.
Iti bhagavā ‘‘atthi, bhikkhave, ajātaṃ abhūtaṃ akataṃ asaṅkhata’’nti paramatthato nibbānassa atthibhāvaṃ vatvā tattha hetuṃ dassento ‘‘no cetaṃ, bhikkhave’’tiādimāha. Tassāyaṃ saṅkhepo – bhikkhave, yadi ajātādisabhāvā asaṅkhatā dhātu na abhavissa na siyā, idha loke jātādisabhāvassa rūpādikkhandhapañcakasaṅkhātassa saṅkhāragatassa nissaraṇaṃ anavasesavaṭṭupasamo na paññāyeyya na upalabbheyya na sambhaveyya. Nibbānañhi ārammaṇaṃ katvā pavattamānā sammādiṭṭhiādayo ariyamaggadhammā anavasesato kilese samucchindanti, tenettha sabbassapi vaṭṭadukkhassa appavatti apagamo nissaraṇaṃ paññāyati.
ஏவங் ப்³யதிரேகவஸேன நிப்³பா³னஸ்ஸ அத்தி²பா⁴வங் த³ஸ்ஸெத்வா இதா³னி அன்வயவஸேனபி தங் த³ஸ்ஸேதுங் ‘‘யஸ்மா ச கோ²’’திஆதி³ வுத்தங், தங் வுத்தத்த²மேவ. எத்த² ச யஸ்மா ‘‘அபச்சயா த⁴ம்மா, அஸங்க²தா த⁴ம்மா (த⁴॰ ஸ॰ து³கமாதிகா 7, 8). அத்தி², பி⁴க்க²வே, ததா³யதனங், யத்த² நேவ பத²வீ (உதா³॰ 71). இத³ம்பி கோ² டா²னங் து³த்³த³ஸங் யதி³த³ங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ (மஹாவ॰ 7; ம॰ நி॰ 1.281). அஸங்க²தஞ்ச வோ, பி⁴க்க²வே, த⁴ம்மங் தே³ஸெஸ்ஸாமி அஸங்க²தகா³மினிஞ்ச படிபத³’’ந்திஆதீ³ஹி (ஸங்॰ நி॰ 4.366) அனேகேஹி ஸுத்தபதே³ஹி ‘‘அத்தி², பி⁴க்க²வே, அஜாத’’ந்தி இமினாபி ஸுத்தேன நிப்³பா³னதா⁴துயா பரமத்த²தோ ஸப்³பா⁴வோ ஸப்³ப³லோகங் அனுகம்பமானேன ஸம்மாஸம்பு³த்³தே⁴ன தே³ஸிதோ, தஸ்மா ந படிக்கி²பிதப்³ப³ங். தத்த² அப்பச்சக்க²காரீனம்பி விஞ்ஞூனங் கங்கா² வா விமதி வா நத்தி² ஏவ. யே பன அபு³த்³தி⁴புக்³க³லா, தேஸங் விமதிவினோத³னத்த²ங் அயமெத்த² அதி⁴ப்பாயனித்³தா⁴ரணமுகே²ன யுத்திவிசாரணா – யதா² பரிஞ்ஞெய்யதாய ஸஉத்தரானங் காமானங் ரூபானஞ்ச படிபக்க²பூ⁴தங் தப்³பி³து⁴ரஸபா⁴வங் நிஸ்ஸரணங் பஞ்ஞாயதி, ஏவங் தங்ஸபா⁴வானங் ஸப்³பே³ஸங் ஸங்க²தத⁴ம்மானங் படிபக்க²பூ⁴தேன தப்³பி³து⁴ரஸபா⁴வேன நிஸ்ஸரணேன ப⁴விதப்³ப³ங். யஞ்சேதங் நிஸ்ஸரணங், ஸா அஸங்க²தா தா⁴து. கிஞ்ச பி⁴ய்யோ, ஸங்க²தத⁴ம்மாரம்மணங் விபஸ்ஸனாஞாணங் அபி அனுலோமஞாணங் கிலேஸே ஸமுச்சே²த³வஸேன பஜஹிதுங் ந ஸக்கோதி, ததா² ஸம்முதிஸச்சாரம்மணங் பட²மஜ்ஜா²னாதீ³ஸு ஞாணங் விக்க²ம்ப⁴னவஸேனேவ கிலேஸே பஜஹதி, ந ஸமுச்சே²த³வஸேன. இதி ஸங்க²தத⁴ம்மாரம்மணஸ்ஸ ஸம்முதிஸச்சாரம்மணஸ்ஸ ச ஞாணஸ்ஸ கிலேஸானங் ஸமுச்சே²த³ப்பஹானே அஸமத்த²பா⁴வதோ தேஸங் ஸமுச்சே²த³ப்பஹானகரஸ்ஸ அரியமக்³க³ஞாணஸ்ஸ தது³ப⁴யவிபரீதஸபா⁴வேன ஆரம்மணேன ப⁴விதப்³ப³ங் , ஸா அஸங்க²தா தா⁴து. ததா² ‘‘அத்தி², பி⁴க்க²வே, அஜாதங் அபூ⁴தங் அகதங் அஸங்க²த’’ந்தி இத³ங் நிப்³பா³னஸ்ஸ பரமத்த²தோ அத்தி²பா⁴வஜோதகவசனங் அவிபரீதத்த²ங் ப⁴க³வதா பா⁴ஸிதத்தா. யஞ்ஹி ப⁴க³வதா பா⁴ஸிதங், தங் அவிபரீதத்த²ங் பரமத்த²ந்தி யதா² தங் ‘‘ஸப்³பே³ ஸங்கா²ரா அனிச்சா, ஸப்³பே³ ஸங்கா²ரா து³க்கா², ஸப்³பே³ த⁴ம்மா அனத்தா’’தி (த⁴॰ ப॰ 277-279; சூளனி॰ ஹேமகமாணவபுச்சா²னித்³தே³ஸ 56). ததா² நிப்³பா³னஸத்³தோ³ கத்த²சி விஸயே யதா²பூ⁴தபரமத்த²விஸயோ உபசாரவுத்திஸப்³பா⁴வதோ ஸெய்யதா²பி ஸீஹஸத்³தோ³. அத² வா அத்தே²வ பரமத்த²தோ அஸங்க²தாதா⁴து இதரதப்³பி³பரீதவினிமுத்தஸபா⁴வத்தா ஸெய்யதா²பி பத²வீதா⁴து வேத³னாதி. ஏவமாதீ³ஹி நயேஹி யுத்திதோபி அஸங்க²தாய தா⁴துயா பரமத்த²தோ அத்தி²பா⁴வோ வேதி³தப்³போ³.
Evaṃ byatirekavasena nibbānassa atthibhāvaṃ dassetvā idāni anvayavasenapi taṃ dassetuṃ ‘‘yasmā ca kho’’tiādi vuttaṃ, taṃ vuttatthameva. Ettha ca yasmā ‘‘apaccayā dhammā, asaṅkhatā dhammā (dha. sa. dukamātikā 7, 8). Atthi, bhikkhave, tadāyatanaṃ, yattha neva pathavī (udā. 71). Idampi kho ṭhānaṃ duddasaṃ yadidaṃ sabbasaṅkhārasamatho sabbūpadhipaṭinissaggo (mahāva. 7; ma. ni. 1.281). Asaṅkhatañca vo, bhikkhave, dhammaṃ desessāmi asaṅkhatagāminiñca paṭipada’’ntiādīhi (saṃ. ni. 4.366) anekehi suttapadehi ‘‘atthi, bhikkhave, ajāta’’nti imināpi suttena nibbānadhātuyā paramatthato sabbhāvo sabbalokaṃ anukampamānena sammāsambuddhena desito, tasmā na paṭikkhipitabbaṃ. Tattha appaccakkhakārīnampi viññūnaṃ kaṅkhā vā vimati vā natthi eva. Ye pana abuddhipuggalā, tesaṃ vimativinodanatthaṃ ayamettha adhippāyaniddhāraṇamukhena yuttivicāraṇā – yathā pariññeyyatāya sauttarānaṃ kāmānaṃ rūpānañca paṭipakkhabhūtaṃ tabbidhurasabhāvaṃ nissaraṇaṃ paññāyati, evaṃ taṃsabhāvānaṃ sabbesaṃ saṅkhatadhammānaṃ paṭipakkhabhūtena tabbidhurasabhāvena nissaraṇena bhavitabbaṃ. Yañcetaṃ nissaraṇaṃ, sā asaṅkhatā dhātu. Kiñca bhiyyo, saṅkhatadhammārammaṇaṃ vipassanāñāṇaṃ api anulomañāṇaṃ kilese samucchedavasena pajahituṃ na sakkoti, tathā sammutisaccārammaṇaṃ paṭhamajjhānādīsu ñāṇaṃ vikkhambhanavaseneva kilese pajahati, na samucchedavasena. Iti saṅkhatadhammārammaṇassa sammutisaccārammaṇassa ca ñāṇassa kilesānaṃ samucchedappahāne asamatthabhāvato tesaṃ samucchedappahānakarassa ariyamaggañāṇassa tadubhayaviparītasabhāvena ārammaṇena bhavitabbaṃ , sā asaṅkhatā dhātu. Tathā ‘‘atthi, bhikkhave, ajātaṃ abhūtaṃ akataṃ asaṅkhata’’nti idaṃ nibbānassa paramatthato atthibhāvajotakavacanaṃ aviparītatthaṃ bhagavatā bhāsitattā. Yañhi bhagavatā bhāsitaṃ, taṃ aviparītatthaṃ paramatthanti yathā taṃ ‘‘sabbe saṅkhārā aniccā, sabbe saṅkhārā dukkhā, sabbe dhammā anattā’’ti (dha. pa. 277-279; cūḷani. hemakamāṇavapucchāniddesa 56). Tathā nibbānasaddo katthaci visaye yathābhūtaparamatthavisayo upacāravuttisabbhāvato seyyathāpi sīhasaddo. Atha vā attheva paramatthato asaṅkhatādhātu itaratabbiparītavinimuttasabhāvattā seyyathāpi pathavīdhātu vedanāti. Evamādīhi nayehi yuttitopi asaṅkhatāya dhātuyā paramatthato atthibhāvo veditabbo.
கா³தா²ஸு ஜாதந்தி ஜாயனட்டே²ன ஜாதங், ஜாதிலக்க²ணப்பத்தந்தி அத்தோ². பூ⁴தந்தி ப⁴வனட்டே²ன பூ⁴தங், அஹுத்வா ஸம்பூ⁴தந்தி அத்தோ². ஸமுப்பன்னந்தி ஸஹிதபா⁴வேன உப்பன்னங், ஸஹிதேஹி த⁴ம்மேஹி ச உப்பன்னந்தி அத்தோ². கதந்தி காரணபூ⁴தேஹி பச்சயேஹி நிப்³ப³த்திதங். ஸங்க²தந்தி தேஹியேவ ஸமேச்ச ஸம்பு⁴ய்ய கதந்தி ஸங்க²தங், ஸப்³ப³மேதங் பச்சயனிப்³ப³த்தஸ்ஸ அதி⁴வசனங். நிச்சஸாராதி³விரஹிததோ அத்³து⁴வங். ஜராய மரணேன ச ஏகந்தேனேவ ஸங்க⁴டிதங் ஸங்ஸட்ட²ந்தி ஜராமரணஸங்கா⁴தங். ‘‘ஜராமரணஸங்க⁴ட்ட’’ந்திபி பட²ந்தி, ஜராய மரணேன ச உபத்³து³தங் பீளிதந்தி அத்தோ². அக்கி²ரோகா³தீ³னங் அனேகேஸங் ரோகா³னங் நீளங் குலாவகந்தி ரோக³னீளங். ஸரஸதோ உபக்கமதோ ச பப⁴ங்கு³பரமஸீலதாய பப⁴ங்கு³ரங்.
Gāthāsu jātanti jāyanaṭṭhena jātaṃ, jātilakkhaṇappattanti attho. Bhūtanti bhavanaṭṭhena bhūtaṃ, ahutvā sambhūtanti attho. Samuppannanti sahitabhāvena uppannaṃ, sahitehi dhammehi ca uppannanti attho. Katanti kāraṇabhūtehi paccayehi nibbattitaṃ. Saṅkhatanti tehiyeva samecca sambhuyya katanti saṅkhataṃ, sabbametaṃ paccayanibbattassa adhivacanaṃ. Niccasārādivirahitato addhuvaṃ. Jarāya maraṇena ca ekanteneva saṅghaṭitaṃ saṃsaṭṭhanti jarāmaraṇasaṅghātaṃ. ‘‘Jarāmaraṇasaṅghaṭṭa’’ntipi paṭhanti, jarāya maraṇena ca upaddutaṃ pīḷitanti attho. Akkhirogādīnaṃ anekesaṃ rogānaṃ nīḷaṃ kulāvakanti roganīḷaṃ. Sarasato upakkamato ca pabhaṅguparamasīlatāya pabhaṅguraṃ.
சதுப்³பி³தோ⁴ ஆஹாரோ ச தண்ஹாஸங்கா²தா நெத்தி ச பப⁴வோ ஸமுட்டா²னங் ஏதஸ்ஸாதி ஆஹாரனெத்திப்பப⁴வங். ஸப்³போ³பி வா பச்சயோ ஆஹாரோ. இத⁴ பன தண்ஹாய நெத்திக்³க³ஹணேன க³ஹிதத்தா தண்ஹாவஜ்ஜா வேதி³தப்³பா³. தஸ்மா ஆஹாரோ ச நெத்தி ச பப⁴வோ ஏதஸ்ஸாதி ஆஹாரனெத்திப்பப⁴வங். ஆஹாரோ ஏவ வா நயனட்டே²ன பவத்தனட்டே²ன நெத்தீதி ஏவம்பி ஆஹாரனெத்திப்பப⁴வங். நாலங் தத³பி⁴னந்தி³துந்தி தங் உபாதா³னக்க²ந்த⁴பஞ்சகங் ஏவங் பச்சயாதீ⁴னவுத்திகங், ததோ ஏவ அனிச்சங், து³க்க²ஞ்ச தண்ஹாதி³ட்டீ²ஹி அபி⁴னந்தி³துங் அஸ்ஸாதே³துங் ந யுத்தங்.
Catubbidho āhāro ca taṇhāsaṅkhātā netti ca pabhavo samuṭṭhānaṃ etassāti āhāranettippabhavaṃ. Sabbopi vā paccayo āhāro. Idha pana taṇhāya nettiggahaṇena gahitattā taṇhāvajjā veditabbā. Tasmā āhāro ca netti ca pabhavo etassāti āhāranettippabhavaṃ. Āhāro eva vā nayanaṭṭhena pavattanaṭṭhena nettīti evampi āhāranettippabhavaṃ. Nālaṃ tadabhinanditunti taṃ upādānakkhandhapañcakaṃ evaṃ paccayādhīnavuttikaṃ, tato eva aniccaṃ, dukkhañca taṇhādiṭṭhīhi abhinandituṃ assādetuṃ na yuttaṃ.
தஸ்ஸ நிஸ்ஸரணந்தி ‘‘ஜாதங் பூ⁴த’’ந்திஆதி³னா வுத்தஸ்ஸ தஸ்ஸ ஸக்காயஸ்ஸ நிஸ்ஸரணங் நிக்கமோ அனுபஸந்தஸபா⁴வஸ்ஸ ராகா³தி³கிலேஸஸ்ஸ ஸப்³ப³ஸங்கா²ரஸ்ஸ ச அபா⁴வேன தது³பஸமபா⁴வேன பஸத்த²பா⁴வேன ச ஸந்தங், தக்கஞாணஸ்ஸ அகோ³சரபா⁴வதோ அதக்காவசரங், நிச்சட்டே²ன து⁴வங், ததோ ஏவ அஜாதங் அஸமுப்பன்னங், ஸோகஹேதூனங் அபா⁴வதோ அஸோகங், விக³தராகா³தி³ரஜத்தா விரஜங், ஸங்ஸாரது³க்க²ட்டிதேஹி படிபஜ்ஜிதப்³ப³த்தா பத³ங், ஜாதிஆதி³து³க்க²த⁴ம்மானங் நிரோத⁴ஹேதுதாய நிரோதோ⁴ து³க்க²த⁴ம்மானங், ஸப்³ப³ஸங்கா²ரானங் உபஸமஹேதுதாய ஸங்கா²ரூபஸமோ, ததோ ஏவ அச்சந்தஸுக²தாய ஸுகோ²தி ஸப்³ப³பதே³ஹி அமதமஹானிப்³பா³னமேவ தோ²மேதி. ஏவங் ப⁴க³வா பட²மகா³தா²ய ப்³யதிரேகவஸேன, து³தியகா³தா²ய அன்வயவஸேன ச நிப்³பா³னங் விபா⁴வேஸி.
Tassanissaraṇanti ‘‘jātaṃ bhūta’’ntiādinā vuttassa tassa sakkāyassa nissaraṇaṃ nikkamo anupasantasabhāvassa rāgādikilesassa sabbasaṅkhārassa ca abhāvena tadupasamabhāvena pasatthabhāvena ca santaṃ, takkañāṇassa agocarabhāvato atakkāvacaraṃ, niccaṭṭhena dhuvaṃ, tato eva ajātaṃ asamuppannaṃ, sokahetūnaṃ abhāvato asokaṃ, vigatarāgādirajattā virajaṃ, saṃsāradukkhaṭṭitehi paṭipajjitabbattā padaṃ, jātiādidukkhadhammānaṃ nirodhahetutāya nirodho dukkhadhammānaṃ, sabbasaṅkhārānaṃ upasamahetutāya saṅkhārūpasamo, tato eva accantasukhatāya sukhoti sabbapadehi amatamahānibbānameva thometi. Evaṃ bhagavā paṭhamagāthāya byatirekavasena, dutiyagāthāya anvayavasena ca nibbānaṃ vibhāvesi.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. அஜாதஸுத்தங் • 6. Ajātasuttaṃ
