| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. ஆஜீவகஸுத்தங்
2. Ājīvakasuttaṃ
73. ஏகங் ஸமயங் ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே. அத² கோ² அஞ்ஞதரோ ஆஜீவகஸாவகோ க³ஹபதி யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ ஆஜீவகஸாவகோ க³ஹபதி ஆயஸ்மந்தங் ஆனந்த³ங் ஏதத³வோச –
73. Ekaṃ samayaṃ āyasmā ānando kosambiyaṃ viharati ghositārāme. Atha kho aññataro ājīvakasāvako gahapati yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinno kho so ājīvakasāvako gahapati āyasmantaṃ ānandaṃ etadavoca –
‘‘கேஸங் நோ, ப⁴ந்தே ஆனந்த³, த⁴ம்மோ ஸ்வாக்கா²தோ? கே லோகே ஸுப்படிபன்னா? கே லோகே ஸுகதா’’தி 1? ‘‘தேன ஹி, க³ஹபதி, தஞ்ஞேவெத்த² படிபுச்சி²ஸ்ஸாமி, யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, க³ஹபதி, யே ராக³ஸ்ஸ பஹானாய த⁴ம்மங் தே³ஸெந்தி, தோ³ஸஸ்ஸ பஹானாய த⁴ம்மங் தே³ஸெந்தி, மோஹஸ்ஸ பஹானாய த⁴ம்மங் தே³ஸெந்தி, தேஸங் த⁴ம்மோ ஸ்வாக்கா²தோ நோ வா? கத²ங் வா தே எத்த² ஹோதீ’’தி? ‘‘யே , ப⁴ந்தே, ராக³ஸ்ஸ பஹானாய த⁴ம்மங் தே³ஸெந்தி, தோ³ஸஸ்ஸ பஹானாய த⁴ம்மங் தே³ஸெந்தி, மோஹஸ்ஸ பஹானாய த⁴ம்மங் தே³ஸெந்தி, தேஸங் த⁴ம்மோ ஸ்வாக்கா²தோ. ஏவங் மே எத்த² ஹோதீ’’தி.
‘‘Kesaṃ no, bhante ānanda, dhammo svākkhāto? Ke loke suppaṭipannā? Ke loke sukatā’’ti 2? ‘‘Tena hi, gahapati, taññevettha paṭipucchissāmi, yathā te khameyya tathā naṃ byākareyyāsi. Taṃ kiṃ maññasi, gahapati, ye rāgassa pahānāya dhammaṃ desenti, dosassa pahānāya dhammaṃ desenti, mohassa pahānāya dhammaṃ desenti, tesaṃ dhammo svākkhāto no vā? Kathaṃ vā te ettha hotī’’ti? ‘‘Ye , bhante, rāgassa pahānāya dhammaṃ desenti, dosassa pahānāya dhammaṃ desenti, mohassa pahānāya dhammaṃ desenti, tesaṃ dhammo svākkhāto. Evaṃ me ettha hotī’’ti.
‘‘தங் கிங் மஞ்ஞஸி, க³ஹபதி, யே ராக³ஸ்ஸ பஹானாய படிபன்னா, தோ³ஸஸ்ஸ பஹானாய படிபன்னா, மோஹஸ்ஸ பஹானாய படிபன்னா, தே லோகே ஸுப்படிபன்னா நோ வா? கத²ங் வா தே எத்த² ஹோதீ’’தி? ‘‘யே, ப⁴ந்தே, ராக³ஸ்ஸ பஹானாய படிபன்னா, தோ³ஸஸ்ஸ பஹானாய படிபன்னா, மோஹஸ்ஸ பஹானாய படிபன்னா, தே லோகே ஸுப்படிபன்னா. ஏவங் மே எத்த² ஹோதீ’’தி.
‘‘Taṃ kiṃ maññasi, gahapati, ye rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā no vā? Kathaṃ vā te ettha hotī’’ti? ‘‘Ye, bhante, rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā. Evaṃ me ettha hotī’’ti.
‘‘தங் கிங் மஞ்ஞஸி, க³ஹபதி, யேஸங் ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, யேஸங் தோ³ஸோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, யேஸங் மோஹோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, தே லோகே ஸுகதா நோ வா? கத²ங் வா தே எத்த² ஹோதீ’’தி? ‘‘யேஸங், ப⁴ந்தே, ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, யேஸங் தோ³ஸோ பஹீனோ…பே॰… யேஸங் மோஹோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, தே லோகே ஸுகதா. ஏவங் மே எத்த² ஹோதீ’’தி.
‘‘Taṃ kiṃ maññasi, gahapati, yesaṃ rāgo pahīno ucchinnamūlo tālāvatthukato anabhāvaṃkato āyatiṃ anuppādadhammo, yesaṃ doso pahīno ucchinnamūlo tālāvatthukato anabhāvaṅkato āyatiṃ anuppādadhammo, yesaṃ moho pahīno ucchinnamūlo tālāvatthukato anabhāvaṃkato āyatiṃ anuppādadhammo, te loke sukatā no vā? Kathaṃ vā te ettha hotī’’ti? ‘‘Yesaṃ, bhante, rāgo pahīno ucchinnamūlo tālāvatthukato anabhāvaṃkato āyatiṃ anuppādadhammo, yesaṃ doso pahīno…pe… yesaṃ moho pahīno ucchinnamūlo tālāvatthukato anabhāvaṃkato āyatiṃ anuppādadhammo, te loke sukatā. Evaṃ me ettha hotī’’ti.
‘‘இதி கோ², க³ஹபதி, தயாவேதங் 3 ப்³யாகதங் – ‘யே, ப⁴ந்தே, ராக³ஸ்ஸ பஹானாய த⁴ம்மங் தே³ஸெந்தி, தோ³ஸஸ்ஸ பஹானாய த⁴ம்மங் தே³ஸெந்தி, மோஹஸ்ஸ பஹானாய த⁴ம்மங் தே³ஸெந்தி, தேஸங் த⁴ம்மோ ஸ்வாக்கா²தோ’தி. தயாவேதங் ப்³யாகதங் – ‘யே, ப⁴ந்தே, ராக³ஸ்ஸ பஹானாய படிபன்னா, தோ³ஸஸ்ஸ பஹானாய படிபன்னா, மோஹஸ்ஸ பஹானாய படிபன்னா, தே லோகே ஸுப்படிபன்னா’தி. தயாவேதங் ப்³யாகதங் – ‘யேஸங், ப⁴ந்தே, ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, யேஸங் தோ³ஸோ பஹீனோ…பே॰… யேஸங் மோஹோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, தே லோகே ஸுகதா’’’தி.
‘‘Iti kho, gahapati, tayāvetaṃ 4 byākataṃ – ‘ye, bhante, rāgassa pahānāya dhammaṃ desenti, dosassa pahānāya dhammaṃ desenti, mohassa pahānāya dhammaṃ desenti, tesaṃ dhammo svākkhāto’ti. Tayāvetaṃ byākataṃ – ‘ye, bhante, rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā’ti. Tayāvetaṃ byākataṃ – ‘yesaṃ, bhante, rāgo pahīno ucchinnamūlo tālāvatthukato anabhāvaṅkato āyatiṃ anuppādadhammo, yesaṃ doso pahīno…pe… yesaṃ moho pahīno ucchinnamūlo tālāvatthukato anabhāvaṅkato āyatiṃ anuppādadhammo, te loke sukatā’’’ti.
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! ந சேவ நாம ஸத⁴ம்முக்கங்ஸனா ப⁴விஸ்ஸதி, ந ச பரத⁴ம்மாபஸாத³னா 5. ஆயதனேவ 6 த⁴ம்மதே³ஸனா, அத்தோ² ச வுத்தோ, அத்தா ச அனுபனீதோ. தும்ஹே, ப⁴ந்தே ஆனந்த³, ராக³ஸ்ஸ பஹானாய த⁴ம்மங் தே³ஸேத², தோ³ஸஸ்ஸ…பே॰… மோஹஸ்ஸ பஹனாய த⁴ம்மங் தே³ஸேத². தும்ஹாகங், ப⁴ந்தே ஆனந்த³, த⁴ம்மோ ஸ்வாக்கா²தோ. தும்ஹே, ப⁴ந்தே ஆனந்த³, ராக³ஸ்ஸ பஹானாய படிபன்னா, தோ³ஸஸ்ஸ…பே॰… மோஹஸ்ஸ பஹானாய படிபன்னா. தும்ஹே, ப⁴ந்தே, லோகே ஸுப்படிபன்னா. தும்ஹாகங், ப⁴ந்தே ஆனந்த³, ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ, தும்ஹாகங் தோ³ஸோ பஹீனோ…பே॰… தும்ஹாகங் மோஹோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ. தும்ஹே லோகே ஸுகதா.
‘‘Acchariyaṃ, bhante, abbhutaṃ, bhante! Na ceva nāma sadhammukkaṃsanā bhavissati, na ca paradhammāpasādanā 7. Āyataneva 8 dhammadesanā, attho ca vutto, attā ca anupanīto. Tumhe, bhante ānanda, rāgassa pahānāya dhammaṃ desetha, dosassa…pe… mohassa pahanāya dhammaṃ desetha. Tumhākaṃ, bhante ānanda, dhammo svākkhāto. Tumhe, bhante ānanda, rāgassa pahānāya paṭipannā, dosassa…pe… mohassa pahānāya paṭipannā. Tumhe, bhante, loke suppaṭipannā. Tumhākaṃ, bhante ānanda, rāgo pahīno ucchinnamūlo tālāvatthukato anabhāvaṅkato āyatiṃ anuppādadhammo, tumhākaṃ doso pahīno…pe… tumhākaṃ moho pahīno ucchinnamūlo tālāvatthukato anabhāvaṅkato āyatiṃ anuppādadhammo. Tumhe loke sukatā.
‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே! ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – ‘சக்கு²மந்தோ ரூபானி த³க்க²ந்தீ’தி; ஏவமேவங் அய்யேன ஆனந்தே³ன அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே ஆனந்த³, தங் ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் அய்யோ ஆனந்தோ³ தா⁴ரேது, அஜ்ஜதக்³கே³ பாணுபேதங் ஸரணங் க³த’’ந்தி. து³தியங்.
‘‘Abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘cakkhumanto rūpāni dakkhantī’ti; evamevaṃ ayyena ānandena anekapariyāyena dhammo pakāsito. Esāhaṃ, bhante ānanda, taṃ bhagavantaṃ saraṇaṃ gacchāmi dhammañca bhikkhusaṅghañca. Upāsakaṃ maṃ ayyo ānando dhāretu, ajjatagge pāṇupetaṃ saraṇaṃ gata’’nti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ஆஜீவகஸுத்தவண்ணனா • 2. Ājīvakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ஆஜீவகஸுத்தவண்ணனா • 2. Ājīvakasuttavaṇṇanā
