| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
ஸங்யுத்தனிகாயே
Saṃyuttanikāye
ஸளாயதனவக்³க³டீகா
Saḷāyatanavaggaṭīkā
1. ஸளாயதனஸங்யுத்தங்
1. Saḷāyatanasaṃyuttaṃ
1. அனிச்சவக்³கோ³
1. Aniccavaggo
1. அஜ்ஜ²த்தானிச்சஸுத்தவண்ணனா
1. Ajjhattāniccasuttavaṇṇanā
1. சக்க²தீதி சக்கு², ஞாணங், யதா²ஸபா⁴வதோ ஆரம்மணஸ்ஸ ஜானநேன ஸமவிஸமங் ஆசிக்க²ந்தங் விய பவத்ததீதி அத்தோ². ததா² மங்ஸசக்கு². தம்பி ஹி ரூபத³ஸ்ஸனே சக்க²தீதி சக்கு². பு³த்³தா⁴னங்யேவ சக்கூ²தி பு³த்³த⁴சக்கு², அஸாதா⁴ரணதோ ஹி ஸத்தஸந்தானேஸு ஸஸ்ஸதுச்சே²த³தி³ட்டி² அனுலோமிகஞாணயதா²பூ⁴தஞாணானஞ்சேவ காமராகா³னுஸயாதீ³னஞ்ச யாதா²வதோ விபா⁴விதஞாணங் ஆஸயானுஸயஞாணங் இந்த்³ரியபரோபரியத்தஞாணஞ்ச. ஹெட்டி²மா தயோ மக்³கா³ சதுஸச்சத⁴ம்மேஸு வுத்தாகாரேன பவத்தியா த⁴ம்மே சக்கூ²தி த⁴ம்மசக்கு², ததா² தேஸங் ப²லானி தங்தங்படிபக்கே²ஸு படிப்பஸ்ஸத்³தி⁴பஹானவஸேன பவத்தனதோ. ஸமந்ததோ ஸப்³ப³த⁴ம்மேஸு சக்கு²கிச்சஸாத⁴னதோ ஸமந்தசக்கு², ஸப்³ப³ஞ்ஞுதஞ்ஞாணங். தி³ப்³ப³விஹாரஸன்னிஸ்ஸயேன லத்³த⁴ப்³ப³தோ தே³வானங் தி³ப்³ப³சக்கு² வியாதி தங் தி³ப்³ப³சக்கு², அபி⁴ஞ்ஞாவிஸேஸோ. ஆலோகங் வட்³டெ⁴த்வா ரூபத³ஸ்ஸனதோ ‘‘ஆலோகப²ரணேனா’’தி வுத்தங். ‘‘இத³ங் து³க்க²ங் அரியஸச்சந்தி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதீ³’’திஆதி³னா (ஸங்॰ நி॰ 5.1081; மஹாவ॰ 15) நயேன ஆக³தத்தா சதுஸச்சபரிச்சே²த³கஞாணங் ‘‘பஞ்ஞாசக்கூ²’’தி வுத்தங். ததி³த³ங் ‘‘விபஸ்ஸனாஞாண’’ந்தி வத³ந்தி, ‘‘விபஸ்ஸனாமக்³க³ப²லபச்சவெக்க²ணஞாணானீ’’தி அபரே.
1. Cakkhatīti cakkhu, ñāṇaṃ, yathāsabhāvato ārammaṇassa jānanena samavisamaṃ ācikkhantaṃ viya pavattatīti attho. Tathā maṃsacakkhu. Tampi hi rūpadassane cakkhatīti cakkhu. Buddhānaṃyeva cakkhūti buddhacakkhu, asādhāraṇato hi sattasantānesu sassatucchedadiṭṭhi anulomikañāṇayathābhūtañāṇānañceva kāmarāgānusayādīnañca yāthāvato vibhāvitañāṇaṃ āsayānusayañāṇaṃ indriyaparopariyattañāṇañca. Heṭṭhimā tayo maggā catusaccadhammesu vuttākārena pavattiyā dhamme cakkhūti dhammacakkhu, tathā tesaṃ phalāni taṃtaṃpaṭipakkhesu paṭippassaddhipahānavasena pavattanato. Samantato sabbadhammesu cakkhukiccasādhanato samantacakkhu, sabbaññutaññāṇaṃ. Dibbavihārasannissayena laddhabbato devānaṃ dibbacakkhu viyāti taṃ dibbacakkhu, abhiññāviseso. Ālokaṃ vaḍḍhetvā rūpadassanato ‘‘ālokapharaṇenā’’ti vuttaṃ. ‘‘Idaṃ dukkhaṃ ariyasaccanti me, bhikkhave, pubbe ananussutesu dhammesu cakkhuṃ udapādī’’tiādinā (saṃ. ni. 5.1081; mahāva. 15) nayena āgatattā catusaccaparicchedakañāṇaṃ ‘‘paññācakkhū’’ti vuttaṃ. Tadidaṃ ‘‘vipassanāñāṇa’’nti vadanti, ‘‘vipassanāmaggaphalapaccavekkhaṇañāṇānī’’ti apare.
பச்சயபூ⁴தேஹி ஏதேஹி அபி⁴ஸம்ப⁴ரீயந்தீதி ஸம்பா⁴ரா, உபத்த²ம்ப⁴பூ⁴தா சதுஸமுட்டா²னிகரூபா. ஸஹ ஸம்பா⁴ரேஹீதி ஸஸம்பா⁴ரங். மஹாபூ⁴தானங் உபாதா³ய பஸீத³தீதி பஸாதோ³. அக்கி²கூபகே அக்கி²படலேஹீதி உபோ⁴ஹி அக்கி²த³லேஹி. ஸம்ப⁴வோதி ஆபோதா⁴துமேவ ஸம்ப⁴வபூ⁴தமாஹ. இத⁴ ‘‘தேரஸ ஸம்பா⁴ரா’’தி வுத்தங். அட்ட²ஸாலினியங் (த⁴॰ ஸ॰ அட்ட²॰ 596) பன ஸண்டா²னேன ஸத்³தி⁴ங் ‘‘சுத்³த³ஸ ஸம்பா⁴ரா’’தி ஆக³தங். தத்த² ஸண்டா²னந்தி வண்ணாயதனமேவ பரிமண்ட³லாதி³ஸண்டா²னபூ⁴தங். விஸுங் வசனங் பன நேஸங் ததா²பூ⁴தானங் அததா²பூ⁴தானஞ்ச ஆபோதா⁴துவண்ணாயதனானங் யதா²வுத்தே மங்ஸபிண்டே³ விஜ்ஜமானத்தா. ஸம்ப⁴வஸ்ஸ சதுதா⁴துனிஸ்ஸிதேஹி ஸஹ வுத்தஸ்ஸ தா⁴துத்தயனிஸ்ஸிததா யோஜேதப்³பா³. தி³ட்டி²மண்ட³லேதி அபி⁴முக²ங் டி²தானங் படிபி³ம்ப³பஞ்ஞாயனட்டா²னபூ⁴தே சக்கு²ஸஞ்ஞிதாய தி³ட்டி²யா பவத்திட்டா²னபூ⁴தே மண்ட³லே. ஸன்னிவிட்ட²ந்தி ஏதேன சக்கு²பஸாத³ஸ்ஸ அனேககலாபக³தபா⁴வோ த³ஸ்ஸிதோ. ததா² ஹி ஸோ ஸத்த அக்கி²படலானி அபி⁴ப்³யாபெத்வா வத்ததி. யஸ்மா ஸோ ஸத்த அக்கி²படலானி ப்³யாபெத்வா டி²தேஹி அத்தனோ நிஸ்ஸயபூ⁴தேஹி கதூபகாரங் தங்னிஸ்ஸிதேஹேவ ஆயுவண்ணாதீ³ஹி அனுபாலிதபரிவாரிதங் திஸந்ததிரூபஸமுட்டா²பகேஹி உதுசித்தாஹாரேஹி உபத்த²ம்பி⁴யமானங் ஹுத்வா திட்ட²தி. ரூபத³ஸ்ஸனஸமத்த²ந்தி அத்தானங் நிஸ்ஸாய பவத்தவிஞ்ஞாணஸ்ஸ வஸேன ரூபாயதனத³ஸ்ஸனஸமத்த²ங். வித்தா²ரகதா²தி தஸ்ஸ சக்கு²னோ ஸோதாதீ³னஞ்ச ஹேதுபச்சயாதி³வஸேன சேவ லக்க²ணாதி³வஸேன ச வித்தா²ரகதா².
Paccayabhūtehi etehi abhisambharīyantīti sambhārā, upatthambhabhūtā catusamuṭṭhānikarūpā. Saha sambhārehīti sasambhāraṃ. Mahābhūtānaṃ upādāya pasīdatīti pasādo. Akkhikūpake akkhipaṭalehīti ubhohi akkhidalehi. Sambhavoti āpodhātumeva sambhavabhūtamāha. Idha ‘‘terasa sambhārā’’ti vuttaṃ. Aṭṭhasāliniyaṃ (dha. sa. aṭṭha. 596) pana saṇṭhānena saddhiṃ ‘‘cuddasa sambhārā’’ti āgataṃ. Tattha saṇṭhānanti vaṇṇāyatanameva parimaṇḍalādisaṇṭhānabhūtaṃ. Visuṃ vacanaṃ pana nesaṃ tathābhūtānaṃ atathābhūtānañca āpodhātuvaṇṇāyatanānaṃ yathāvutte maṃsapiṇḍe vijjamānattā. Sambhavassa catudhātunissitehi saha vuttassa dhātuttayanissitatā yojetabbā. Diṭṭhimaṇḍaleti abhimukhaṃ ṭhitānaṃ paṭibimbapaññāyanaṭṭhānabhūte cakkhusaññitāya diṭṭhiyā pavattiṭṭhānabhūte maṇḍale. Sanniviṭṭhanti etena cakkhupasādassa anekakalāpagatabhāvo dassito. Tathā hi so satta akkhipaṭalāni abhibyāpetvā vattati. Yasmā so satta akkhipaṭalāni byāpetvā ṭhitehi attano nissayabhūtehi katūpakāraṃ taṃnissiteheva āyuvaṇṇādīhi anupālitaparivāritaṃ tisantatirūpasamuṭṭhāpakehi utucittāhārehi upatthambhiyamānaṃ hutvā tiṭṭhati. Rūpadassanasamatthanti attānaṃ nissāya pavattaviññāṇassa vasena rūpāyatanadassanasamatthaṃ. Vitthārakathāti tassa cakkhuno sotādīnañca hetupaccayādivasena ceva lakkhaṇādivasena ca vitthārakathā.
ஸம்மஸனசாரசித்தந்தி விபஸ்ஸனாய பவத்திட்டா²னபூ⁴தங் விபஸ்ஸிதப்³ப³ங் சித்தங். கேசி ‘‘விபஸ்ஸனுபக³தகிரியமயசித்த’’ந்தி வத³ந்தி, தங் தேஸங் மதிமத்தங். தீணி லக்க²ணானி த³ஸ்ஸெத்வா விபஸ்ஸனங் உஸ்ஸுக்காபெத்வா அரஹத்தஸ்ஸ பாபனவஸேன தே³ஸனாய பவத்தத்தா.
Sammasanacāracittanti vipassanāya pavattiṭṭhānabhūtaṃ vipassitabbaṃ cittaṃ. Keci ‘‘vipassanupagatakiriyamayacitta’’nti vadanti, taṃ tesaṃ matimattaṃ. Tīṇi lakkhaṇāni dassetvā vipassanaṃ ussukkāpetvā arahattassa pāpanavasena desanāya pavattattā.
அஜ்ஜ²த்தானிச்சஸுத்தவண்ணனா நிட்டி²தா.
Ajjhattāniccasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அஜ்ஜ²த்தானிச்சஸுத்தங் • 1. Ajjhattāniccasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அஜ்ஜ²த்தானிச்சஸுத்தவண்ணனா • 1. Ajjhattāniccasuttavaṇṇanā
