සංයුත්ත නිකාය 46.49

5. චක්කවත්තිවග්ග

අජ්ඣත්තිකඞ්ගසුත්ත

“අජ්ඣත්තිකං, භික්ඛවේ, අඞ්ගන්ති කරිත්වා නාඤ්ඤං ඒකඞ්ගම්පි සමනුපස්සාමි සත්තන්නං බෝජ්ඣඞ්ගානං උප්පාදාය, යථයිදං—භික්ඛවේ, යෝනිසෝමනසිකාරෝ. යෝනිසෝමනසිකාරසම්පන්නස්සේතං, භික්ඛවේ, භික්ඛුනෝ පාටිකඞ්ඛං—සත්ත බෝජ්ඣඞ්ගේ භාවේස්සති, සත්ත බෝජ්ඣඞ්ගේ බහුලීකරිස්සති.

කථඤ්ච, භික්ඛවේ, භික්ඛු යෝනිසෝමනසිකාරසම්පන්නෝ සත්ත බෝජ්ඣඞ්ගේ භාවේති, සත්ත බෝජ්ඣඞ්ගේ බහුලීකරෝති? ඉධ, භික්ඛවේ, භික්ඛු සතිසම්බෝජ්ඣඞ්ගං භාවේති විවේකනිස්සිතං …පේ… උපේක්ඛාසම්බෝජ්ඣඞ්ගං භාවේති විවේකනිස්සිතං විරාගනිස්සිතං නිරෝධනිස්සිතං වෝස්සග්ගපරිණාමිං. ඒවං ඛෝ, භික්ඛවේ, භික්ඛු යෝනිසෝමනසිකාරසම්පන්නෝ සත්ත බෝජ්ඣඞ්ගේ භාවේති, සත්ත බෝජ්ඣඞ්ගේ බහුලීකරෝතී”ති.

නවමං.