| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. பி⁴க்கு²னீஸங்யுத்தங்
5. Bhikkhunīsaṃyuttaṃ
1. ஆளவிகாஸுத்தவண்ணனா
1. Āḷavikāsuttavaṇṇanā
162. ஆளவியங் ஜாதாதி ஆளவியங் விஜாயித்வா ஸங்வட்³ட⁴மானா. தேனாஹ ‘‘ஆளவினக³ரதோயேவ ச நிக்க²ம்ம பப்³ப³ஜிதா’’தி. த⁴னங் ஸமாத³பெத்வாதி சேதியஸ்ஸ ராஜா ஏகங் முக²ங், ராஜபுத்தோ ஏகங், அமச்சானங் ஜெட்ட²கோ ஹுத்வா ஸேனாபதி ஏகங், ஜனபதா³னங் ஜெட்ட²கோ ஹுத்வா ஸெட்டி² ஏகந்தி ஏவங் சதூஸு முகே²ஸு நவகம்மே கயிரமானே ஸெட்டி²னா க³ஹிதமுகே² கம்மே ஓலீயமானே ஏகோ உபாஸகோ அரியஸாவகோ பஞ்ச ஸகடஸதானி யோஜாபெத்வா ஜனபத³ங் க³ந்த்வா ‘‘யோ யங் தா³துங் உஸ்ஸஹதி ஹிரஞ்ஞங் வா ஸுவண்ணங் வா ஸத்தவித⁴ரதனங் வா ஹரிதாலங் வா மனோஸிலங் வா, ஸோ த⁴னங் தே³தூ’’தி ஸமாத³பெத்வா யதா²லத்³த⁴ங் பட²மங் கம்மட்டா²னங் பேஸெத்வா ‘‘நவகம்மங் நிட்டி²த’’ந்தி ஸுத்வா ஏககங் ஆக³ச்ச²ந்தங் அந்தராமக்³கே³ சோரா பலிபு³ந்தி⁴த்வா ததோ கிஞ்சிபி த⁴னங் அலப⁴ந்தா ‘‘ஸசே நங் முஞ்சிஸ்ஸாம, அனத்த²ங் நோ கரெய்யா’’தி ஜீவிதா வோரோபேஸுங். அனபராதே⁴ அரியஸாவகே அபராத⁴கா தே சோரா அந்தா⁴ ஜாதா, தஸ்மா தங் டா²னங் ‘‘அந்த⁴வன’’ந்தி பஞ்ஞாயித்தா²தி அட்ட²கதா²யங் வுத்தங். கீ²ணாஸவானங் யஸ்மா யத்த² கத்த²சி சித்தவிவேகோ ஹோதியேவ உபதி⁴விவேகஸ்ஸ ஸித்³த⁴த்தா. தஸ்மா ‘‘காயவிவேகத்தி²னீ’’தி வுத்தங்.
162.Āḷaviyaṃjātāti āḷaviyaṃ vijāyitvā saṃvaḍḍhamānā. Tenāha ‘‘āḷavinagaratoyeva ca nikkhamma pabbajitā’’ti. Dhanaṃ samādapetvāti cetiyassa rājā ekaṃ mukhaṃ, rājaputto ekaṃ, amaccānaṃ jeṭṭhako hutvā senāpati ekaṃ, janapadānaṃ jeṭṭhako hutvā seṭṭhi ekanti evaṃ catūsu mukhesu navakamme kayiramāne seṭṭhinā gahitamukhe kamme olīyamāne eko upāsako ariyasāvako pañca sakaṭasatāni yojāpetvā janapadaṃ gantvā ‘‘yo yaṃ dātuṃ ussahati hiraññaṃ vā suvaṇṇaṃ vā sattavidharatanaṃ vā haritālaṃ vā manosilaṃ vā, so dhanaṃ detū’’ti samādapetvā yathāladdhaṃ paṭhamaṃ kammaṭṭhānaṃ pesetvā ‘‘navakammaṃ niṭṭhita’’nti sutvā ekakaṃ āgacchantaṃ antarāmagge corā palibundhitvā tato kiñcipi dhanaṃ alabhantā ‘‘sace naṃ muñcissāma, anatthaṃ no kareyyā’’ti jīvitā voropesuṃ. Anaparādhe ariyasāvake aparādhakā te corā andhā jātā, tasmā taṃ ṭhānaṃ ‘‘andhavana’’nti paññāyitthāti aṭṭhakathāyaṃ vuttaṃ. Khīṇāsavānaṃ yasmā yattha katthaci cittaviveko hotiyeva upadhivivekassa siddhattā. Tasmā ‘‘kāyavivekatthinī’’ti vuttaṃ.
நிஸ்ஸரணந்தி நிப்³பா³னங் ஸப்³ப³ஸங்க²தஸ்ஸ நிஸ்ஸடத்தா. பச்சவெக்க²ணஞாணேனாதி பச்சவெக்க²ணஞாணேன, பகே³வ மக்³க³ப²லஞாணேஹீதி அதி⁴ப்பாயோ. நிப்³பா³னபத³ந்தி நிப்³பா³னஸங்கா²தங் த⁴ம்மகொட்டா²ஸங். வினிவிஜ்ஜ²னட்டே²னாதி ஹத³யங் வினிவித்³தே⁴ன ஹத³யம்ஹி விஜ்ஜி²த்வா து³க்கு²ப்பாத³னேன க²ந்தா⁴னங் ஏதே பஞ்ச காமா ஸத்திஸூலஸதி³ஸா. அதி⁴குட்டனப⁴ண்டி³காதி ஆகா⁴தனக⁴டிகா.
Nissaraṇanti nibbānaṃ sabbasaṅkhatassa nissaṭattā. Paccavekkhaṇañāṇenāti paccavekkhaṇañāṇena, pageva maggaphalañāṇehīti adhippāyo. Nibbānapadanti nibbānasaṅkhātaṃ dhammakoṭṭhāsaṃ. Vinivijjhanaṭṭhenāti hadayaṃ vinividdhena hadayamhi vijjhitvā dukkhuppādanena khandhānaṃ ete pañca kāmā sattisūlasadisā. Adhikuṭṭanabhaṇḍikāti āghātanaghaṭikā.
ஆளவிகாஸுத்தவண்ணனா நிட்டி²தா.
Āḷavikāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஆளவிகாஸுத்தங் • 1. Āḷavikāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஆளவிகாஸுத்தவண்ணனா • 1. Āḷavikāsuttavaṇṇanā
