| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૫. ભિક્ખુનીસંયુત્તં
5. Bhikkhunīsaṃyuttaṃ
૧. આળવિકાસુત્તવણ્ણના
1. Āḷavikāsuttavaṇṇanā
૧૬૨. ભિક્ખુનીસંયુત્તસ્સ પઠમે આળવિકાતિ આળવિયં જાતા આળવિનગરતોયેવ ચ નિક્ખમ્મ પબ્બજિતા. અન્ધવનન્તિ કસ્સપસમ્માસમ્બુદ્ધસ્સ ચેતિયે નવકમ્મત્થાય ધનં સમાદપેત્વા આગચ્છન્તસ્સ યસોધરસ્સ નામ ધમ્મભાણકસ્સ અરિયપુગ્ગલસ્સ અક્ખીનિ ઉપ્પાટેત્વા તત્થેવ અક્ખિભેદપ્પત્તેહિ પઞ્ચહિ ચોરસતેહિ નિવુત્થત્તા તતો પટ્ઠાય ‘‘અન્ધવન’’ન્તિ સઙ્ખં ગતં વનં. તં કિર સાવત્થિતો દક્ખિણપસ્સે ગાવુતમત્તે હોતિ રાજારક્ખાય ગુત્તં. તત્થ પવિવેકકામા ભિક્ખૂ ચ ભિક્ખુનિયો ચ ગચ્છન્તિ. તસ્મા અયમ્પિ કાયવિવેકત્થિની યેન તં વનં, તેનુપસઙ્કમિ. નિસ્સરણન્તિ નિબ્બાનં. પઞ્ઞાયાતિ પચ્ચવેક્ખણઞાણેન. ન ત્વં જાનાસિ તં પદન્તિ ત્વં એતં નિબ્બાનપદં વા નિબ્બાનગામિમગ્ગપદં વા ન જાનાસિ. સત્તિસૂલૂપમાતિ વિનિવિજ્ઝનત્થેન સત્તિસૂલસદિસા. ખન્ધાસં અધિકુટ્ટનાતિ ખન્ધા તેસં અધિકુટ્ટનભણ્ડિકા. પઠમં.
162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. આળવિકાસુત્તં • 1. Āḷavikāsuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. આળવિકાસુત્તવણ્ણના • 1. Āḷavikāsuttavaṇṇanā
