| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
2. பி⁴க்கு²வக்³கோ³
2. Bhikkhuvaggo
1. அம்ப³லட்டி²கராஹுலோவாத³ஸுத்தவண்ணனா
1. Ambalaṭṭhikarāhulovādasuttavaṇṇanā
107. ஏவங் மே ஸுதந்தி அம்ப³லட்டி²கராஹுலோவாத³ஸுத்தங். தத்த² அம்ப³லட்டி²காயங் விஹரதீதி வேளுவனவிஹாரஸ்ஸ பச்சந்தே பதா⁴னக⁴ரஸங்கே²பே விவேககாமானங் வஸனத்தா²ய கதே அம்ப³லட்டி²காதி ஏவங்னாமகே பாஸாதே³ பவிவேகங் ப்³ரூஹயந்தோ விஹரதி. கண்டகோ நாம ஜாதகாலதோ பட்டா²ய திகி²ணோவ ஹோதி, ஏவமேவங் அயம்பி ஆயஸ்மா ஸத்தவஸ்ஸிகஸாமணேரகாலேயேவ பவிவேகங் ப்³ரூஹயமானோ தத்த² விஹாஸி. படிஸல்லானா வுட்டி²தோதி ப²லஸமாபத்திதோ வுட்டா²ய. ஆஸனந்தி பகதிபஞ்ஞத்தமேவெத்த² ஆஸனங் அத்தி², தங் பப்போ²டெத்வா ட²பேஸி. உத³காதா⁴னேதி உத³கபா⁴ஜனே. ‘‘உத³கட்டா²னே’’திபி பாடோ².
107.Evaṃme sutanti ambalaṭṭhikarāhulovādasuttaṃ. Tattha ambalaṭṭhikāyaṃ viharatīti veḷuvanavihārassa paccante padhānagharasaṅkhepe vivekakāmānaṃ vasanatthāya kate ambalaṭṭhikāti evaṃnāmake pāsāde pavivekaṃ brūhayanto viharati. Kaṇṭako nāma jātakālato paṭṭhāya tikhiṇova hoti, evamevaṃ ayampi āyasmā sattavassikasāmaṇerakāleyeva pavivekaṃ brūhayamāno tattha vihāsi. Paṭisallānā vuṭṭhitoti phalasamāpattito vuṭṭhāya. Āsananti pakatipaññattamevettha āsanaṃ atthi, taṃ papphoṭetvā ṭhapesi. Udakādhāneti udakabhājane. ‘‘Udakaṭṭhāne’’tipi pāṭho.
ஆயஸ்மந்தங் ராஹுலங் ஆமந்தேஸீதி ஓவாத³தா³னத்த²ங் ஆமந்தேஸி. ப⁴க³வதா ஹி ராஹுலத்தே²ரஸ்ஸ ஸம்ப³ஹுலா த⁴ம்மதே³ஸனா கதா. ஸாமணேரபஞ்ஹங் தே²ரஸ்ஸேவ வுத்தங். ததா² ராஹுலஸங்யுத்தங் மஹாராஹுலோவாத³ஸுத்தங் சூளராஹுலோவாத³ஸுத்தமித³ங் அம்ப³லட்டி²கராஹுலோவாத³ஸுத்தந்தி.
Āyasmantaṃ rāhulaṃ āmantesīti ovādadānatthaṃ āmantesi. Bhagavatā hi rāhulattherassa sambahulā dhammadesanā katā. Sāmaṇerapañhaṃ therasseva vuttaṃ. Tathā rāhulasaṃyuttaṃ mahārāhulovādasuttaṃ cūḷarāhulovādasuttamidaṃ ambalaṭṭhikarāhulovādasuttanti.
அயஞ்ஹி ஆயஸ்மா ஸத்தவஸ்ஸிககாலே ப⁴க³வந்தங் சீவரகண்ணே க³ஹெத்வா ‘‘தா³யஜ்ஜங் மே ஸமண தே³ஹீ’’தி தா³யஜ்ஜங் யாசமானோ ப⁴க³வதா த⁴ம்மஸேனாபதிஸாரிபுத்தத்தே²ரஸ்ஸ நிய்யாதெ³த்வா பப்³பா³ஜிதோ. அத² ப⁴க³வா த³ஹரகுமாரா நாம யுத்தாயுத்தங் கத²ங் கதெ²ந்தி, ஓவாத³மஸ்ஸ தே³மீதி ராஹுலகுமாரங் ஆமந்தெத்வா ‘‘ஸாமணேரேன நாம, ராஹுல, திரச்சா²னகத²ங் கதே²துங் ந வட்டதி, த்வங் கத²யமானோ ஏவரூபங் கத²ங் கதெ²ய்யாஸீ’’தி ஸப்³ப³பு³த்³தே⁴ஹி அவிஜஹிதங் த³ஸபுச்ச²ங் பஞ்சபண்ணாஸவிஸ்ஸஜ்ஜனங் – ‘‘ஏகோ பஞ்ஹோ ஏகோ உத்³தே³ஸோ ஏகங் வெய்யாகரணங் த்³வே பஞ்ஹா…பே॰… த³ஸ பஞ்ஹா த³ஸ உத்³தே³ஸா த³ஸ வெய்யாகரணாதி. ஏகங் நாம கிங்? ஸப்³பே³ ஸத்தா ஆஹாரட்டி²திகா…பே॰… த³ஸ நாம கிங்? த³ஸஹங்கே³ஹி ஸமன்னாக³தோ அரஹாதி வுச்சதீ’’தி (கு²॰ பா॰ 4.10) இமங் ஸாமணேரபஞ்ஹங் கதே²ஸி. புன சிந்தேஸி ‘‘த³ஹரகுமாரா நாம பியமுஸாவாதா³ ஹொந்தி, அதி³ட்ட²மேவ தி³ட்ட²ங் அம்ஹேஹி, தி³ட்ட²மேவ ந தி³ட்ட²ங் அம்ஹேஹீதி வத³ந்தி ஓவாத³மஸ்ஸ தே³மீ’’தி அக்கீ²ஹி ஓலோகெத்வாபி ஸுக²ஸஞ்ஜானநத்த²ங் பட²மமேவ சதஸ்ஸோ உத³காதா⁴னூபமாயோ , ததோ த்³வே ஹத்தி²உபமாயோ ஏகங் ஆதா³ஸூபமஞ்ச த³ஸ்ஸெத்வா இமங் ஸுத்தங் கதே²ஸி. சதூஸு பன பச்சயேஸு தண்ஹாவிவட்டனங் பஞ்சஸு காமகு³ணேஸு ச²ந்த³ராக³ப்பஹானங் கல்யாணமித்துபனிஸ்ஸயஸ்ஸ மஹந்தபா⁴வஞ்ச த³ஸ்ஸெத்வா ராஹுலஸுத்தங் (ஸு॰ நி॰ ராஹுலஸுத்த) கதே²ஸி. ஆக³தாக³தட்டா²னே ப⁴வேஸு ச²ந்த³ராகோ³ ந கத்தப்³போ³தி த³ஸ்ஸேதுங் ராஹுலஸங்யுத்தங் (ஸங்॰ நி॰ 2.188 ஆத³யோ) கதே²ஸி. ‘‘அஹங் ஸோபா⁴மி, மம வண்ணாயதனங் பஸன்ன’’ந்தி அத்தபா⁴வங் நிஸ்ஸாய கே³ஹஸ்ஸிதச²ந்த³ராகோ³ ந கத்தப்³போ³தி மஹாராஹுலோவாத³ஸுத்தங் கதே²ஸி.
Ayañhi āyasmā sattavassikakāle bhagavantaṃ cīvarakaṇṇe gahetvā ‘‘dāyajjaṃ me samaṇa dehī’’ti dāyajjaṃ yācamāno bhagavatā dhammasenāpatisāriputtattherassa niyyādetvā pabbājito. Atha bhagavā daharakumārā nāma yuttāyuttaṃ kathaṃ kathenti, ovādamassa demīti rāhulakumāraṃ āmantetvā ‘‘sāmaṇerena nāma, rāhula, tiracchānakathaṃ kathetuṃ na vaṭṭati, tvaṃ kathayamāno evarūpaṃ kathaṃ katheyyāsī’’ti sabbabuddhehi avijahitaṃ dasapucchaṃ pañcapaṇṇāsavissajjanaṃ – ‘‘eko pañho eko uddeso ekaṃ veyyākaraṇaṃ dve pañhā…pe… dasa pañhā dasa uddesā dasa veyyākaraṇāti. Ekaṃ nāma kiṃ? Sabbe sattā āhāraṭṭhitikā…pe… dasa nāma kiṃ? Dasahaṅgehi samannāgato arahāti vuccatī’’ti (khu. pā. 4.10) imaṃ sāmaṇerapañhaṃ kathesi. Puna cintesi ‘‘daharakumārā nāma piyamusāvādā honti, adiṭṭhameva diṭṭhaṃ amhehi, diṭṭhameva na diṭṭhaṃ amhehīti vadanti ovādamassa demī’’ti akkhīhi oloketvāpi sukhasañjānanatthaṃ paṭhamameva catasso udakādhānūpamāyo , tato dve hatthiupamāyo ekaṃ ādāsūpamañca dassetvā imaṃ suttaṃ kathesi. Catūsu pana paccayesu taṇhāvivaṭṭanaṃ pañcasu kāmaguṇesu chandarāgappahānaṃ kalyāṇamittupanissayassa mahantabhāvañca dassetvā rāhulasuttaṃ (su. ni. rāhulasutta) kathesi. Āgatāgataṭṭhāne bhavesu chandarāgo na kattabboti dassetuṃ rāhulasaṃyuttaṃ (saṃ. ni. 2.188 ādayo) kathesi. ‘‘Ahaṃ sobhāmi, mama vaṇṇāyatanaṃ pasanna’’nti attabhāvaṃ nissāya gehassitachandarāgo na kattabboti mahārāhulovādasuttaṃ kathesi.
தத்த² ராஹுலஸுத்தங் இமஸ்மிங் நாம காலே வுத்தந்தி ந வத்தப்³ப³ங். தஞ்ஹி அபி⁴ண்ஹோவாத³வஸேன வுத்தங். ராஹுலஸங்யுத்தங் ஸத்தவஸ்ஸிககாலதோ பட்டா²ய யாவ அவஸ்ஸிகபி⁴க்கு²காலா வுத்தங். மஹாராஹுலோவாத³ஸுத்தங் அட்டா²ரஸ வஸ்ஸஸாமணேரகாலே வுத்தங். சூளராஹுலோவாத³ஸுத்தங் அவஸ்ஸிகபி⁴க்கு²காலே வுத்தங். குமாரகபஞ்ஹஞ்ச இத³ஞ்ச அம்ப³லட்டி²கராஹுலோவாத³ஸுத்தங் ஸத்தவஸ்ஸிகஸாமணேரகாலே வுத்தங். தேஸு ராஹுலஸுத்தங் அபி⁴ண்ஹோவாத³த்த²ங், ராஹுலஸங்யுத்தங், தே²ரஸ்ஸ விபஸ்ஸனாக³ப்³ப⁴க³ஹணத்த²ங், மஹாராஹுலோவாத³ங் கே³ஹஸ்ஸிதச²ந்த³ராக³வினோத³னத்த²ங், சூளராஹுலோவாத³ங் தே²ரஸ்ஸ பஞ்சத³ஸ-விமுத்திபரிபாசனீய-த⁴ம்மபரிபாககாலே அரஹத்தகா³ஹாபனத்த²ங் வுத்தங். இத³ஞ்ச பன ஸந்தா⁴ய ராஹுலத்தே²ரோ பி⁴க்கு²ஸங்க⁴மஜ்ஜே² ததா²க³தஸ்ஸ கு³ணங் கதெ²ந்தோ இத³மாஹ –
Tattha rāhulasuttaṃ imasmiṃ nāma kāle vuttanti na vattabbaṃ. Tañhi abhiṇhovādavasena vuttaṃ. Rāhulasaṃyuttaṃ sattavassikakālato paṭṭhāya yāva avassikabhikkhukālā vuttaṃ. Mahārāhulovādasuttaṃ aṭṭhārasa vassasāmaṇerakāle vuttaṃ. Cūḷarāhulovādasuttaṃ avassikabhikkhukāle vuttaṃ. Kumārakapañhañca idañca ambalaṭṭhikarāhulovādasuttaṃ sattavassikasāmaṇerakāle vuttaṃ. Tesu rāhulasuttaṃ abhiṇhovādatthaṃ, rāhulasaṃyuttaṃ, therassa vipassanāgabbhagahaṇatthaṃ, mahārāhulovādaṃ gehassitachandarāgavinodanatthaṃ, cūḷarāhulovādaṃ therassa pañcadasa-vimuttiparipācanīya-dhammaparipākakāle arahattagāhāpanatthaṃ vuttaṃ. Idañca pana sandhāya rāhulatthero bhikkhusaṅghamajjhe tathāgatassa guṇaṃ kathento idamāha –
‘‘கிகீவ பீ³ஜங் ரக்கெ²ய்ய, சாமரீ வாலமுத்தமங்;
‘‘Kikīva bījaṃ rakkheyya, cāmarī vālamuttamaṃ;
நிபகோ ஸீலஸம்பன்னோ, மமங் ரக்கி² ததா²க³தோ’’தி. (அப॰ 1.2.83);
Nipako sīlasampanno, mamaṃ rakkhi tathāgato’’ti. (apa. 1.2.83);
ஸாமணேரபஞ்ஹங் அயுத்தவசனபஹானத்த²ங், இத³ங் அம்ப³லட்டி²கராஹுலோவாத³ஸுத்தங் ஸம்பஜானமுஸாவாத³ஸ்ஸ அகரணத்த²ங் வுத்தங்.
Sāmaṇerapañhaṃ ayuttavacanapahānatthaṃ, idaṃ ambalaṭṭhikarāhulovādasuttaṃ sampajānamusāvādassa akaraṇatthaṃ vuttaṃ.
தத்த² பஸ்ஸஸி நோதி பஸ்ஸஸி நு. பரித்தந்தி தோ²கங். ஸாமஞ்ஞந்தி ஸமணத⁴ம்மோ. நிக்குஜ்ஜித்வாதி அதோ⁴முக²ங் கத்வா. உக்குஜ்ஜித்வாதி உத்தானங் கத்வா.
Tattha passasi noti passasi nu. Parittanti thokaṃ. Sāmaññanti samaṇadhammo. Nikkujjitvāti adhomukhaṃ katvā. Ukkujjitvāti uttānaṃ katvā.
108. ஸெய்யதா²பி, ராஹுல, ரஞ்ஞோ நாகோ³தி அயங் உபமா ஸம்பஜானமுஸாவாதே³ ஸங்வரரஹிதஸ்ஸ ஓபம்மத³ஸ்ஸனத்த²ங் வுத்தா. தத்த² ஈஸாத³ந்தோதி ரதீ²ஸாஸதி³ஸத³ந்தோ . உருள்ஹவாதி அபி⁴வட்³டி⁴தோ ஆரோஹஸம்பன்னோ. அபி⁴ஜாதோதி ஸுஜாதோ ஜாதிஸம்பன்னோ. ஸங்கா³மாவசரோதி ஸங்கா³மங் ஓதிண்ணபுப்³போ³. கம்மங் கரோதீதி ஆக³தாக³தே பவட்டெந்தோ கா⁴தேதி. புரத்தி²மகாயாதீ³ஸு பன புரத்தி²மகாயேன தாவ படிஸேனாய ப²லககொட்ட²கமுண்ட³பாகாராத³யோ பாதேதி, ததா² பச்சி²மகாயேன. ஸீஸேன கம்மங் நாம நியமெத்வா ஏதங் பதே³ஸங் மத்³தி³ஸ்ஸாமீதி நிவத்தித்வா ஓலோகேதி, எத்தகேன ஸதம்பி ஸஹஸ்ஸம்பி த்³வேதா⁴ பி⁴ஜ்ஜதி. கண்ணேஹி கம்மங் நாம ஆக³தாக³தே ஸரே கண்ணேஹி பஹரித்வா பாதனங். த³ந்தேஹி கம்மங் நாம படிஹத்தி²அஸ்ஸஹத்தா²ரோஹஅஸ்ஸாரோஹபதா³தீ³னங் விஜ்ஜ²னங். நங்கு³ட்டே²ன கம்மங் நாம நங்கு³ட்டே² ப³ந்தா⁴ய தீ³கா⁴ஸிலட்டி²யா வா அயமுஸலேன வா சே²த³னபே⁴த³னங். ரக்க²தேவ ஸொண்ட³ந்தி ஸொண்ட³ங் பன முகே² பக்கி²பித்வா ரக்க²தி.
108.Seyyathāpi, rāhula, rañño nāgoti ayaṃ upamā sampajānamusāvāde saṃvararahitassa opammadassanatthaṃ vuttā. Tattha īsādantoti rathīsāsadisadanto . Uruḷhavāti abhivaḍḍhito ārohasampanno. Abhijātoti sujāto jātisampanno. Saṅgāmāvacaroti saṅgāmaṃ otiṇṇapubbo. Kammaṃ karotīti āgatāgate pavaṭṭento ghāteti. Puratthimakāyādīsu pana puratthimakāyena tāva paṭisenāya phalakakoṭṭhakamuṇḍapākārādayo pāteti, tathā pacchimakāyena. Sīsena kammaṃ nāma niyametvā etaṃ padesaṃ maddissāmīti nivattitvā oloketi, ettakena satampi sahassampi dvedhā bhijjati. Kaṇṇehi kammaṃ nāma āgatāgate sare kaṇṇehi paharitvā pātanaṃ. Dantehi kammaṃ nāma paṭihatthiassahatthārohaassārohapadādīnaṃ vijjhanaṃ. Naṅguṭṭhena kammaṃ nāma naṅguṭṭhe bandhāya dīghāsilaṭṭhiyā vā ayamusalena vā chedanabhedanaṃ. Rakkhateva soṇḍanti soṇḍaṃ pana mukhe pakkhipitvā rakkhati.
தத்தா²தி தஸ்மிங் தஸ்ஸ ஹத்தி²னோ கரணே. அபரிச்சத்தந்தி அனிஸ்ஸட்ட²ங், பரேஸங் ஜயங் அம்ஹாகஞ்ச பராஜயங் பஸ்ஸீதி மஞ்ஞதி. ஸொண்டா³யபி கம்மங் கரோதீதி அயமுக்³க³ரங் வா க²தி³ரமுஸலங் வா க³ஹெத்வா ஸமந்தா அட்டா²ரஸஹத்த²ட்டா²னங் மத்³த³தி. பரிச்சத்தந்தி விஸ்ஸட்ட²ங், இதா³னி ஹத்தி²யோதா⁴தீ³ஸு ந குதோசி பா⁴யதி, அம்ஹாகங் ஜயங் பரேஸஞ்ச பராஜயங் பஸ்ஸீதி மஞ்ஞதி. நாஹங் தஸ்ஸ கிஞ்சி பாபந்தி தஸ்ஸ து³க்கடாதி³ஆபத்திவீதிக்கமே வா மாதுகா⁴தகாதி³கம்மேஸு வா கிஞ்சி பாபங் அகத்தப்³ப³ங் நாம நத்தி². தஸ்மா திஹ தேதி யஸ்மா ஸம்பஜானமுஸாவாதி³னோ அகத்தப்³ப³ங் பாபங் நாம நத்தி², தஸ்மா தயா ஹஸாயபி த³வகம்யதாயபி முஸா ந ப⁴ணிஸ்ஸாமீதி ஸிக்கி²தப்³ப³ங். பச்சவெக்க²ணத்தோ²தி ஓலோகனத்தோ², யங் முகே² வஜ்ஜங் ஹோதி, தஸ்ஸ த³ஸ்ஸனத்தோ²தி வுத்தங் ஹோதி. பச்சவெக்கி²த்வா பச்சவெக்கி²த்வாதி ஓலோகெத்வா ஓலோகெத்வா.
Tatthāti tasmiṃ tassa hatthino karaṇe. Apariccattanti anissaṭṭhaṃ, paresaṃ jayaṃ amhākañca parājayaṃ passīti maññati. Soṇḍāyapi kammaṃ karotīti ayamuggaraṃ vā khadiramusalaṃ vā gahetvā samantā aṭṭhārasahatthaṭṭhānaṃ maddati. Pariccattanti vissaṭṭhaṃ, idāni hatthiyodhādīsu na kutoci bhāyati, amhākaṃ jayaṃ paresañca parājayaṃ passīti maññati. Nāhaṃ tassa kiñci pāpanti tassa dukkaṭādiāpattivītikkame vā mātughātakādikammesu vā kiñci pāpaṃ akattabbaṃ nāma natthi. Tasmā tiha teti yasmā sampajānamusāvādino akattabbaṃ pāpaṃ nāma natthi, tasmā tayā hasāyapi davakamyatāyapi musā na bhaṇissāmīti sikkhitabbaṃ. Paccavekkhaṇatthoti olokanattho, yaṃ mukhe vajjaṃ hoti, tassa dassanatthoti vuttaṃ hoti. Paccavekkhitvā paccavekkhitvāti oloketvā oloketvā.
109. ஸஸக்கங் ந கரணீயந்தி ஏகங்ஸேனேவ ந காதப்³ப³ங். படிஸங்ஹரெய்யாஸீதி நிவத்தெய்யாஸி மா கரெய்யாஸி. அனுபத³ஜ்ஜெய்யாஸீதி அனுபதெ³ய்யாஸி உபத்த²ம்பெ⁴ய்யாஸி புனப்புனங் கரெய்யாஸி. அஹோரத்தானுஸிக்கீ²தி ரத்திஞ்ச தி³வஞ்ச ஸிக்க²மானோ.
109.Sasakkaṃ na karaṇīyanti ekaṃseneva na kātabbaṃ. Paṭisaṃhareyyāsīti nivatteyyāsi mā kareyyāsi. Anupadajjeyyāsīti anupadeyyāsi upatthambheyyāsi punappunaṃ kareyyāsi. Ahorattānusikkhīti rattiñca divañca sikkhamāno.
111. அட்டீயிதப்³ப³ந்தி அட்டேன பீளிதேன ப⁴விதப்³ப³ங். ஹராயிதப்³ப³ந்தி லஜ்ஜிதப்³ப³ங். ஜிகு³ச்சி²தப்³ப³ந்தி கூ³த²ங் தி³ஸ்வா விய ஜிகு³ச்சா² உப்பாதே³தப்³பா³. மனோகம்மஸ்ஸ பன அதே³ஸனாவத்து²கத்தா இத⁴ தே³ஸேதப்³ப³ந்தி ந வுத்தங். கித்தகே பன டா²னே காயகம்மவசீகம்மானி ஸோதே⁴தப்³பா³னி, கித்தகே மனோகம்மந்தி. காயகம்மவசீகம்மானி தாவ ஏகஸ்மிங் புரேப⁴த்தேயேவ ஸோதே⁴தப்³பா³னி. ப⁴த்தகிச்சங் கத்வா தி³வாட்டா²னே நிஸின்னேன ஹி பச்சவெக்கி²தப்³ப³ங் ‘‘அருணுக்³க³மனதோ பட்டா²ய யாவ இமஸ்மிங் டா²னே நிஸஜ்ஜா அத்தி² நு கோ² மே இமஸ்மிங் அந்தரே பரேஸங் அப்பியங் காயகம்மங் வா வசீகம்மங் வா’’தி. ஸசே அத்தீ²தி ஜானாதி, தே³ஸனாயுத்தங் தே³ஸேதப்³ப³ங், ஆவிகரணயுத்தங் ஆவிகாதப்³ப³ங். ஸசே நத்தி², தேனேவ பீதிபாமோஜ்ஜேன விஹாதப்³ப³ங். மனோகம்மங் பன ஏதஸ்மிங் பிண்ட³பாதபரியேஸனட்டா²னே ஸோதே⁴தப்³ப³ங். கத²ங்? ‘‘அத்தி² நு கோ² மே அஜ்ஜ பிண்ட³பாதபரியேஸனட்டா²னே ரூபாதீ³ஸு ச²ந்தோ³ வா ராகோ³ வா படிக⁴ங் வா’’தி? ஸசே அத்தி², ‘‘புன ந ஏவங் கரிஸ்ஸாமீ’’தி சித்தேனேவ அதி⁴ட்டா²தப்³ப³ங். ஸசே நத்தி², தேனேவ பீதிபாமோஜ்ஜேன விஹாதப்³ப³ங்.
111.Aṭṭīyitabbanti aṭṭena pīḷitena bhavitabbaṃ. Harāyitabbanti lajjitabbaṃ. Jigucchitabbanti gūthaṃ disvā viya jigucchā uppādetabbā. Manokammassa pana adesanāvatthukattā idha desetabbanti na vuttaṃ. Kittake pana ṭhāne kāyakammavacīkammāni sodhetabbāni, kittake manokammanti. Kāyakammavacīkammāni tāva ekasmiṃ purebhatteyeva sodhetabbāni. Bhattakiccaṃ katvā divāṭṭhāne nisinnena hi paccavekkhitabbaṃ ‘‘aruṇuggamanato paṭṭhāya yāva imasmiṃ ṭhāne nisajjā atthi nu kho me imasmiṃ antare paresaṃ appiyaṃ kāyakammaṃ vā vacīkammaṃ vā’’ti. Sace atthīti jānāti, desanāyuttaṃ desetabbaṃ, āvikaraṇayuttaṃ āvikātabbaṃ. Sace natthi, teneva pītipāmojjena vihātabbaṃ. Manokammaṃ pana etasmiṃ piṇḍapātapariyesanaṭṭhāne sodhetabbaṃ. Kathaṃ? ‘‘Atthi nu kho me ajja piṇḍapātapariyesanaṭṭhāne rūpādīsu chando vā rāgo vā paṭighaṃ vā’’ti? Sace atthi, ‘‘puna na evaṃ karissāmī’’ti citteneva adhiṭṭhātabbaṃ. Sace natthi, teneva pītipāmojjena vihātabbaṃ.
112. ஸமணா வா ப்³ராஹ்மணா வாதி பு³த்³தா⁴ வா பச்சேகபு³த்³தா⁴ வா ததா²க³தஸாவகா வா. தஸ்மாதிஹாதி யஸ்மா அதீதேபி ஏவங் பரிஸோதே⁴ஸுங், அனாக³தேபி பரிஸோதெ⁴ஸ்ஸந்தி, ஏதரஹிபி பரிஸோதெ⁴ந்தி, தஸ்மா தும்ஹேஹிபி தேஸங் அனுஸிக்க²ந்தேஹி ஏவங் ஸிக்கி²தப்³ப³ந்தி அத்தோ². ஸேஸங் ஸப்³ப³த்த² உத்தானமேவ. இமங் பன தே³ஸனங் ப⁴க³வா யாவ ப⁴வக்³கா³ உஸ்ஸிதஸ்ஸ ரதனராஸினோ யோஜனியமணிக்க²ந்தே⁴ன கூடங் க³ண்ஹந்தோ விய நெய்யபுக்³க³லவஸேன பரினிட்டா²பேஸீதி.
112.Samaṇā vā brāhmaṇā vāti buddhā vā paccekabuddhā vā tathāgatasāvakā vā. Tasmātihāti yasmā atītepi evaṃ parisodhesuṃ, anāgatepi parisodhessanti, etarahipi parisodhenti, tasmā tumhehipi tesaṃ anusikkhantehi evaṃ sikkhitabbanti attho. Sesaṃ sabbattha uttānameva. Imaṃ pana desanaṃ bhagavā yāva bhavaggā ussitassa ratanarāsino yojaniyamaṇikkhandhena kūṭaṃ gaṇhanto viya neyyapuggalavasena pariniṭṭhāpesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அம்ப³லட்டி²கராஹுலோவாத³ஸுத்தவண்ணனா நிட்டி²தா.
Ambalaṭṭhikarāhulovādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. அம்ப³லட்டி²கராஹுலோவாத³ஸுத்தங் • 1. Ambalaṭṭhikarāhulovādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. அம்ப³லட்டி²கராஹுலோவாத³ஸுத்தவண்ணனா • 1. Ambalaṭṭhikarāhulovādasuttavaṇṇanā
