สํยุตฺต นิกาย ๒๒ฯ๑๕๙

๑๕ฯ ทิฏฺฐิวคฺค

อานนฺทสุตฺต

สาวตฺถินิทานํฯ

อถ โข อายสฺมา อานนฺโท เยน ภควา เตนุปสงฺกมิ; อุปสงฺกมิตฺวา …เป… ภควนฺตํ เอตทโวจ:

“สาธุ เม, ภนฺเต, ภควา สงฺขิตฺเตน ธมฺมํ เทเสตุ, ยมหํ ภควโต ธมฺมํ สุตฺวา เอโก วูปกฏฺโฐ อปฺปมตฺโต อาตาปี ปหิตตฺโต วิหเรยฺยนฺ”ติฯ

“ตํ กึ มญฺญสิ, อานนฺท, รูปํ นิจฺจํ วา อนิจฺจํ วา”ติ?

“อนิจฺจํ, ภนฺเต”ฯ

“ยํ ปนานิจฺจํ ทุกฺขํ วา ตํ สุขํ วา”ติ?

“ทุกฺขํ, ภนฺเต”ฯ

“ยํ ปนานิจฺจํ ทุกฺขํ วิปริณามธมฺมํ, กลฺลํ นุ ตํ สมนุปสฺสิตุํ: ‘เอตํ มม, เอโสหมสฺมิ, เอโส เม อตฺตา'”ติ?

“โน เหตํ, ภนฺเต”ฯ

“เวทนา … สญฺญา … สงฺขารา … วิญฺญาณํ นิจฺจํ วา อนิจฺจํ วา”ติ?

“อนิจฺจํ, ภนฺเต”ฯ

“ยํ ปนานิจฺจํ ทุกฺขํ วา ตํ สุขํ วา”ติ?

“ทุกฺขํ, ภนฺเต”ฯ

“ยํ ปนานิจฺจํ ทุกฺขํ วิปริณามธมฺมํ, กลฺลํ นุ ตํ สมนุปสฺสิตุํ: ‘เอตํ มม, เอโสหมสฺมิ, เอโส เม อตฺตา'”ติ?

“โน เหตํ, ภนฺเต”ฯ

“เอวํ ปสฺสํ …เป… นาปรํ อิตฺถตฺตายาติ ปชานาตี”ติฯ

ทสมํฯ

ทิฏฺฐิวคฺโค ปญฺจโมฯ

ตสฺสุทฺทานํ

อชฺฌตฺติกํ เอตํมม, โสอตฺตา โนจเมสิยา; มิจฺฉาสกฺกายตฺตานุ เทฺว, อภินิเวสา อานนฺเทนาติฯ

อุปริปณฺณาสโก สมตฺโตฯ

ตสฺส อุปริปณฺณาสกสฺส วคฺคุทฺทานํ

อนฺโต ธมฺมกถิกา วิชฺชา, กุกฺกุฬํ ทิฏฺฐิปญฺจมํ; ตติโย ปณฺณาสโก วุตฺโต, นิปาโตติ ปวุจฺจตีติฯ

ขนฺธสํยุตฺตํ สมตฺตํฯ