| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5-6. ஆனந்த³ஸுத்தாதி³வண்ணனா
5-6. Ānandasuttādivaṇṇanā
37-38. டி²தியா டி²திக்க²ணேன ஸஹிதங் டி²தங். டி²தஸ்ஸ அஞ்ஞத²த்தந்தி உப்பாத³க்க²ணதோ அஞ்ஞதா²பா⁴வோ. பஞ்ஞாயதீதி உபலப்³ப⁴தி. பச்சயவஸேன த⁴ரமானத்தா ஏவ ஜீவமானஸ்ஸ ஜீவிதிந்த்³ரியவஸேன ஜரா பஞ்ஞாயதி உப்பாத³க்க²ணதோ அஞ்ஞத²த்தப்பத்தியா. வுத்தமேவ அத்த²ங் பாகடதரங் காதுங் ‘‘டி²தீ’’திஆதி³ வுத்தங். ஜீவி…பே॰… நாமங். ததா² ஹி அபி⁴த⁴ம்மே (த⁴॰ ஸ॰ 19) ‘‘ஆயு டி²தீ’’தி நித்³தி³ட்ட²ங். அஞ்ஞத²த்தந்தி ஜராய நாமந்தி ஸம்ப³ந்தோ⁴.
37-38. Ṭhitiyā ṭhitikkhaṇena sahitaṃ ṭhitaṃ. Ṭhitassa aññathattanti uppādakkhaṇato aññathābhāvo. Paññāyatīti upalabbhati. Paccayavasena dharamānattā eva jīvamānassa jīvitindriyavasena jarā paññāyati uppādakkhaṇato aññathattappattiyā. Vuttameva atthaṃ pākaṭataraṃ kātuṃ ‘‘ṭhitī’’tiādi vuttaṃ. Jīvi…pe… nāmaṃ. Tathā hi abhidhamme (dha. sa. 19) ‘‘āyu ṭhitī’’ti niddiṭṭhaṃ. Aññathattanti jarāya nāmanti sambandho.
தீணி லக்க²ணானி ஹொந்தி ஸங்க²தஸபா⁴வலக்க²ணதோ. யோ கோசி ரூபத⁴ம்மோ வா அரூபத⁴ம்மோ வா லோகியோ வா லோகுத்தரோ வா ஸங்கா²ரோ. ஸங்கா²ரோ, ந லக்க²ணங் உப்பாதா³தி³ஸபா⁴வத்தா. லக்க²ணங், ந ஸங்கா²ரோ உப்பாதா³தி³ரஹிதத்தா. ந ச…பே॰… ஸக்கா ஸங்கா²ரத⁴ம்மத்தா லக்க²ணஸ்ஸ. நாபி லக்க²ணங் வினா ஸங்கா²ரோ பஞ்ஞாபேதுங் ஸக்கா ஸங்கா²ரபா⁴வேன. தேனாஹ ‘‘லக்க²ணேனா’’திஆதி³. இதா³னி யதா²வுத்தமத்த²ங் உபமாய விபா⁴வேதுங் ‘‘யதா²’’திஆதி³மாஹ. தத்த² லக்க²ணந்தி காளரத்தஸப³லாதி³பா⁴வலக்க²ணங் பாகடங் ஹோதி ‘‘அயங் அஸுகஸ்ஸ கா³வீ’’தி.
Tīṇi lakkhaṇāni honti saṅkhatasabhāvalakkhaṇato. Yo koci rūpadhammo vā arūpadhammo vā lokiyo vā lokuttaro vā saṅkhāro. Saṅkhāro, na lakkhaṇaṃ uppādādisabhāvattā. Lakkhaṇaṃ, na saṅkhāro uppādādirahitattā. Na ca…pe… sakkā saṅkhāradhammattā lakkhaṇassa. Nāpi lakkhaṇaṃ vinā saṅkhāro paññāpetuṃ sakkā saṅkhārabhāvena. Tenāha ‘‘lakkhaṇenā’’tiādi. Idāni yathāvuttamatthaṃ upamāya vibhāvetuṃ ‘‘yathā’’tiādimāha. Tattha lakkhaṇanti kāḷarattasabalādibhāvalakkhaṇaṃ pākaṭaṃ hoti ‘‘ayaṃ asukassa gāvī’’ti.
ஏவங் ஸங்கா²ரோபி பஞ்ஞாயதி ஸபா⁴வதோ உபதா⁴ரெந்தஸ்ஸ உப்பாத³லக்க²ணம்பி உப்பாதா³வத்தா²தி கத்வா. காலஸங்கா²தோதி உப்பஜ்ஜமானகாலஸங்கா²தோ. தஸ்ஸ ஸங்கா²ரஸ்ஸ. க²ணோபீதி உப்பாத³க்க²ணோபி பஞ்ஞாயதி. உப்பாதோ³பீதி உப்பாத³லக்க²ணோபி. ஜராலக்க²ணந்தி உப்பன்னஜீரணலக்க²ணங், தங் ‘‘டி²தஸ்ஸ அஞ்ஞத²த்த’’ந்தி வுத்தங். ‘‘ப⁴ங்க³க்க²ணே ஸங்கா²ரோபி தங்லக்க²ணம்பி காலஸங்கா²தோ தஸ்ஸ க²ணோபி பஞ்ஞாயதீ’’தி பாடோ². கேசி பன ‘‘ஜராபீ’’தி பத³ம்பெத்த² பக்கி²பந்தி. ஏவஞ்ச வத³ந்தி ‘‘ந ஹி தஸ்மிங் க²ணே தருணோ ஹுத்வா ஸங்கா²ரோ பி⁴ஜ்ஜதி, அத² கோ² ஜிய்யமானோ மஹல்லகோ விய ஜிண்ணோ ஏவ ஹுத்வா பி⁴ஜ்ஜதீ’’தி, ப⁴ங்கே³னேவ பன ஜரா அபி⁴பு⁴ய்யதி க²ணஸ்ஸ அதிஇத்தரபா⁴வதோ ந ஸக்கா பஞ்ஞாபேதுங் டி²தியாதி தேஸங் அதி⁴ப்பாயோ. தானீதி அரூபத⁴ம்மானங் தீணி லக்க²ணானி. அத்தி²க்க²ணந்தி அரூபத⁴ம்மவிஜ்ஜமானக்க²ணங், உப்பாத³க்க²ணந்தி அதி⁴ப்பாயோ. ஸப்³ப³த⁴ம்மானந்தி ஸப்³பே³ஸங் ரூபாரூபத⁴ம்மானங் டி²தியா ந ப⁴விதப்³ப³ங். தஸ்ஸேவாதி தஸ்ஸா ஏவ டி²தியா. தமத்த²ந்தி ஜராலக்க²ணஸ்ஸ பஞ்ஞாபேதுங் அஸக்குணெய்யபா⁴வங். அஞ்ஞே பன ‘‘ஸந்ததிவஸேன டா²னங் டி²தீ’’தி வத³ந்தி, தயித³ங் அகாரணங் அட்டா²னங். யஸ்மா ஸுத்தே ‘‘டி²தஸ்ஸ அஞ்ஞத²த்தங் பஞ்ஞாயதீ’’தி உப்பாத³வயேஹி நிப்³பி³ஸேஸேன டி²தியா ஜோதிதத்தா. யங் பனெத்த² வத்தப்³ப³ங், தங் ஹெட்டா² வுத்தமேவ. அபிச யதா² த⁴ம்மஸ்ஸ உப்பாதா³வத்தா²ய பி⁴ன்னா ப⁴ங்கா³வத்தா² இச்சி²தா, அஞ்ஞதா² உப்பஜ்ஜமானமேவ பி⁴ஜ்ஜதீதி ஆபஜ்ஜதி, ஏவங் ப⁴ங்கா³வத்தா²யபி பி⁴ன்னா ப⁴ங்கா³பி⁴முகா²வத்தா² இச்சி²தப்³பா³. ந ஹி அப⁴ங்கா³பி⁴முகோ² பி⁴ஜ்ஜதி. ந செத்த² ஸக்கா உப்பாதா³பி⁴முகா²வத்த²ங் பரிகப்பேதுங் ததா³ தஸ்ஸ அலத்³த⁴த்தலாப⁴த்தா. அயங் விஸேஸோதி டி²திக்க²ணோ நாம ரூபத⁴ம்மானங்யேவ, ந அரூபத⁴ம்மானந்தி அயங் ஈதி³ஸோ விஸேஸோ. ஆசரியமதி நாம தஸ்ஸேவ ஆசரியஸ்ஸ மதி, ஸா ஸப்³ப³து³ப்³ப³லாதி ஆஹ ‘‘தஸ்மா’’திஆதி³.
Evaṃ saṅkhāropi paññāyati sabhāvato upadhārentassa uppādalakkhaṇampi uppādāvatthāti katvā. Kālasaṅkhātoti uppajjamānakālasaṅkhāto. Tassa saṅkhārassa. Khaṇopīti uppādakkhaṇopi paññāyati. Uppādopīti uppādalakkhaṇopi. Jarālakkhaṇanti uppannajīraṇalakkhaṇaṃ, taṃ ‘‘ṭhitassa aññathatta’’nti vuttaṃ. ‘‘Bhaṅgakkhaṇe saṅkhāropi taṃlakkhaṇampi kālasaṅkhāto tassa khaṇopi paññāyatī’’ti pāṭho. Keci pana ‘‘jarāpī’’ti padampettha pakkhipanti. Evañca vadanti ‘‘na hi tasmiṃ khaṇe taruṇo hutvā saṅkhāro bhijjati, atha kho jiyyamāno mahallako viya jiṇṇo eva hutvā bhijjatī’’ti, bhaṅgeneva pana jarā abhibhuyyati khaṇassa atiittarabhāvato na sakkā paññāpetuṃ ṭhitiyāti tesaṃ adhippāyo. Tānīti arūpadhammānaṃ tīṇi lakkhaṇāni. Atthikkhaṇanti arūpadhammavijjamānakkhaṇaṃ, uppādakkhaṇanti adhippāyo. Sabbadhammānanti sabbesaṃ rūpārūpadhammānaṃ ṭhitiyā na bhavitabbaṃ. Tassevāti tassā eva ṭhitiyā. Tamatthanti jarālakkhaṇassa paññāpetuṃ asakkuṇeyyabhāvaṃ. Aññe pana ‘‘santativasena ṭhānaṃ ṭhitī’’ti vadanti, tayidaṃ akāraṇaṃ aṭṭhānaṃ. Yasmā sutte ‘‘ṭhitassa aññathattaṃ paññāyatī’’ti uppādavayehi nibbisesena ṭhitiyā jotitattā. Yaṃ panettha vattabbaṃ, taṃ heṭṭhā vuttameva. Apica yathā dhammassa uppādāvatthāya bhinnā bhaṅgāvatthā icchitā, aññathā uppajjamānameva bhijjatīti āpajjati, evaṃ bhaṅgāvatthāyapi bhinnā bhaṅgābhimukhāvatthā icchitabbā. Na hi abhaṅgābhimukho bhijjati. Na cettha sakkā uppādābhimukhāvatthaṃ parikappetuṃ tadā tassa aladdhattalābhattā. Ayaṃ visesoti ṭhitikkhaṇo nāma rūpadhammānaṃyeva, na arūpadhammānanti ayaṃ īdiso viseso. Ācariyamati nāma tasseva ācariyassa mati, sā sabbadubbalāti āha ‘‘tasmā’’tiādi.
ஆனந்த³ஸுத்தாதி³வண்ணனா நிட்டி²தா.
Ānandasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
5. ஆனந்த³ஸுத்தங் • 5. Ānandasuttaṃ
6. து³தியஆனந்த³ஸுத்தங் • 6. Dutiyaānandasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-6. ஆனந்த³ஸுத்தாதி³வண்ணனா • 5-6. Ānandasuttādivaṇṇanā
