| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ஆனந்த³ஸுத்தங்
9. Ānandasuttaṃ
51. அத² கோ² ஆயஸ்மா ஆனந்தோ³ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ஆயஸ்மந்தங் ஸாரிபுத்தங் ஏதத³வோச –
51. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca –
‘‘கித்தாவதா நு கோ², ஆவுஸோ ஸாரிபுத்த, பி⁴க்கு² அஸ்ஸுதஞ்சேவ த⁴ம்மங் ஸுணாதி, ஸுதா சஸ்ஸ த⁴ம்மா ந ஸம்மோஸங் க³ச்ச²ந்தி, யே சஸ்ஸ த⁴ம்மா புப்³பே³ சேதஸா ஸம்பு²ட்ட²புப்³பா³ தே ச ஸமுதா³சரந்தி, அவிஞ்ஞாதஞ்ச விஜானாதீ’’தி? ‘‘ஆயஸ்மா கோ² ஆனந்தோ³ ப³ஹுஸ்ஸுதோ. படிபா⁴து ஆயஸ்மந்தங்யேவ ஆனந்த³’’ந்தி. ‘‘தேனஹாவுஸோ ஸாரிபுத்த, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி . ‘‘ஏவமாவுஸோ’’தி கோ² ஆயஸ்மா ஸாரிபுத்தோ ஆயஸ்மதோ ஆனந்த³ஸ்ஸ பச்சஸ்ஸோஸி. ஆயஸ்மா ஆனந்தோ³ ஏதத³வோச –
‘‘Kittāvatā nu kho, āvuso sāriputta, bhikkhu assutañceva dhammaṃ suṇāti, sutā cassa dhammā na sammosaṃ gacchanti, ye cassa dhammā pubbe cetasā samphuṭṭhapubbā te ca samudācaranti, aviññātañca vijānātī’’ti? ‘‘Āyasmā kho ānando bahussuto. Paṭibhātu āyasmantaṃyeva ānanda’’nti. ‘‘Tenahāvuso sāriputta, suṇāhi, sādhukaṃ manasi karohi; bhāsissāmī’’ti . ‘‘Evamāvuso’’ti kho āyasmā sāriputto āyasmato ānandassa paccassosi. Āyasmā ānando etadavoca –
‘‘இதா⁴வுஸோ ஸாரிபுத்த, பி⁴க்கு² த⁴ம்மங் பரியாபுணாதி – ஸுத்தங் கெ³ய்யங் வெய்யாகரணங் கா³த²ங் உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லங். ஸோ யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் தே³ஸேதி, யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் வாசேதி, யதா²ஸுதங் யதா²பரியத்தங் த⁴ம்மங் வித்தா²ரேன ஸஜ்ஜா²யங் கரோதி, யதா²ஸுதங் யதா²பரியத்தங் த⁴ம்மங் சேதஸா அனுவிதக்கேதி அனுவிசாரேதி மனஸானுபெக்க²தி. யஸ்மிங் ஆவாஸே தே²ரா பி⁴க்கூ² விஹரந்தி ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா தஸ்மிங் ஆவாஸே வஸ்ஸங் உபேதி. தே காலேன காலங் உபஸங்கமித்வா பரிபுச்ச²தி பரிபஞ்ஹதி – ‘இத³ங், ப⁴ந்தே, கத²ங்; இமஸ்ஸ க்வத்தோ²’தி? தே தஸ்ஸ ஆயஸ்மதோ அவிவடஞ்சேவ விவரந்தி, அனுத்தானீகதஞ்ச உத்தானீகரொந்தி, அனேகவிஹிதேஸு ச கங்கா²டா²னியேஸு த⁴ம்மேஸு கங்க²ங் படிவினோதெ³ந்தி. எத்தாவதா கோ², ஆவுஸோ ஸாரிபுத்த, பி⁴க்கு² அஸ்ஸுதஞ்சேவ த⁴ம்மங் ஸுணாதி, ஸுதா சஸ்ஸ த⁴ம்மா ந ஸம்மோஸங் க³ச்ச²ந்தி, யே சஸ்ஸ த⁴ம்மா புப்³பே³ சேதஸா ஸம்பு²ட்ட²புப்³பா³ தே ச ஸமுதா³சரந்தி, அவிஞ்ஞாதஞ்ச விஜானாதீ’’தி.
‘‘Idhāvuso sāriputta, bhikkhu dhammaṃ pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So yathāsutaṃ yathāpariyattaṃ dhammaṃ vitthārena paresaṃ deseti, yathāsutaṃ yathāpariyattaṃ dhammaṃ vitthārena paresaṃ vāceti, yathāsutaṃ yathāpariyattaṃ dhammaṃ vitthārena sajjhāyaṃ karoti, yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Yasmiṃ āvāse therā bhikkhū viharanti bahussutā āgatāgamā dhammadharā vinayadharā mātikādharā tasmiṃ āvāse vassaṃ upeti. Te kālena kālaṃ upasaṅkamitvā paripucchati paripañhati – ‘idaṃ, bhante, kathaṃ; imassa kvattho’ti? Te tassa āyasmato avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Ettāvatā kho, āvuso sāriputta, bhikkhu assutañceva dhammaṃ suṇāti, sutā cassa dhammā na sammosaṃ gacchanti, ye cassa dhammā pubbe cetasā samphuṭṭhapubbā te ca samudācaranti, aviññātañca vijānātī’’ti.
‘‘அச்ச²ரியங் , ஆவுஸோ, அப்³பு⁴தங், ஆவுஸோ, யாவ ஸுபா⁴ஸிதங் சித³ங் ஆயஸ்மதா ஆனந்தே³ன. இமேஹி ச மயங் ச²ஹி த⁴ம்மேஹி ஸமன்னாக³தங் ஆயஸ்மந்தங் ஆனந்த³ங் தா⁴ரேம. ஆயஸ்மா ஹி ஆனந்தோ³ த⁴ம்மங் பரியாபுணாதி – ஸுத்தங் கெ³ய்யங் வெய்யாகரணங் கா³த²ங் உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லங் . ஆயஸ்மா ஆனந்தோ³ யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் தே³ஸேதி, ஆயஸ்மா ஆனந்தோ³ யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் வாசேதி, ஆயஸ்மா ஆனந்தோ³ யதா²ஸுதங் யதா²பரியத்தங் த⁴ம்மங் வித்தா²ரேன ஸஜ்ஜா²யங் கரோதி, ஆயஸ்மா ஆனந்தோ³ யதா²ஸுதங் யதா²பரியத்தங் த⁴ம்மங் சேதஸா அனுவிதக்கேதி அனுவிசாரேதி மனஸானுபெக்க²தி. ஆயஸ்மா ஆனந்தோ³ யஸ்மிங் ஆவாஸே தே²ரா பி⁴க்கூ² விஹரந்தி ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா தஸ்மிங் ஆவாஸே வஸ்ஸங் உபேதி. தே ஆயஸ்மா ஆனந்தோ³ காலேன காலங் உபஸங்கமித்வா பரிபுச்ச²தி பரிபஞ்ஹதி – ‘இத³ங், ப⁴ந்தே, கத²ங்; இமஸ்ஸ க்வத்தோ²’தி? தே ஆயஸ்மதோ ஆனந்த³ஸ்ஸ அவிவடஞ்சேவ விவரந்தி, அனுத்தானீகதஞ்ச உத்தானீகரொந்தி, அனேகவிஹிதேஸு ச கங்கா²டா²னியேஸு த⁴ம்மேஸு கங்க²ங் படிவினோதெ³ந்தீ’’தி. நவமங்.
‘‘Acchariyaṃ , āvuso, abbhutaṃ, āvuso, yāva subhāsitaṃ cidaṃ āyasmatā ānandena. Imehi ca mayaṃ chahi dhammehi samannāgataṃ āyasmantaṃ ānandaṃ dhārema. Āyasmā hi ānando dhammaṃ pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ . Āyasmā ānando yathāsutaṃ yathāpariyattaṃ dhammaṃ vitthārena paresaṃ deseti, āyasmā ānando yathāsutaṃ yathāpariyattaṃ dhammaṃ vitthārena paresaṃ vāceti, āyasmā ānando yathāsutaṃ yathāpariyattaṃ dhammaṃ vitthārena sajjhāyaṃ karoti, āyasmā ānando yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Āyasmā ānando yasmiṃ āvāse therā bhikkhū viharanti bahussutā āgatāgamā dhammadharā vinayadharā mātikādharā tasmiṃ āvāse vassaṃ upeti. Te āyasmā ānando kālena kālaṃ upasaṅkamitvā paripucchati paripañhati – ‘idaṃ, bhante, kathaṃ; imassa kvattho’ti? Te āyasmato ānandassa avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodentī’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ஆனந்த³ஸுத்தவண்ணனா • 9. Ānandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. ஆனந்த³ஸுத்தவண்ணனா • 9. Ānandasuttavaṇṇanā
