| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஆனந்த³ஸுத்தங்
6. Ānandasuttaṃ
37. ஏகங் ஸமயங் ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே. தத்ர கோ² ஆயஸ்மா ஆனந்தோ³ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸுங். ஆயஸ்மா ஆனந்தோ³ ஏதத³வோச –
37. Ekaṃ samayaṃ āyasmā ānando kosambiyaṃ viharati ghositārāme. Tatra kho āyasmā ānando bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato ānandassa paccassosuṃ. Āyasmā ānando etadavoca –
‘‘அச்ச²ரியங், ஆவுஸோ, அப்³பு⁴தங், ஆவுஸோ! யாவஞ்சித³ங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸம்பா³தே⁴ ஓகாஸாதி⁴க³மோ அனுபு³த்³தோ⁴ ஸத்தானங் விஸுத்³தி⁴யா ஸோகபரிதே³வானங் ஸமதிக்கமாய து³க்க²தோ³மனஸ்ஸானங் அத்த²ங்க³மாய ஞாயஸ்ஸ அதி⁴க³மாய நிப்³பா³னஸ்ஸ ஸச்சி²கிரியாய. ததே³வ நாம சக்கு²ங் ப⁴விஸ்ஸதி தே ரூபா தஞ்சாயதனங் நோ படிஸங்வேதி³ஸ்ஸதி 1. ததே³வ நாம ஸோதங் ப⁴விஸ்ஸதி தே ஸத்³தா³ தஞ்சாயதனங் நோ படிஸங்வேதி³ஸ்ஸதி. ததே³வ நாம கா⁴னங் ப⁴விஸ்ஸதி தே க³ந்தா⁴ தஞ்சாயதனங் நோ படிஸங்வேதி³ஸ்ஸதி. ஸாவ நாம ஜிவ்ஹா ப⁴விஸ்ஸதி தே ரஸா தஞ்சாயதனங் நோ படிஸங்வேதி³ஸ்ஸதி. ஸோவ நாம காயோ ப⁴விஸ்ஸதி தே பொ²ட்ட²ப்³பா³ தஞ்சாயதனங் நோ படிஸங்வேதி³ஸ்ஸதீ’’தி.
‘‘Acchariyaṃ, āvuso, abbhutaṃ, āvuso! Yāvañcidaṃ tena bhagavatā jānatā passatā arahatā sammāsambuddhena sambādhe okāsādhigamo anubuddho sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya. Tadeva nāma cakkhuṃ bhavissati te rūpā tañcāyatanaṃ no paṭisaṃvedissati 2. Tadeva nāma sotaṃ bhavissati te saddā tañcāyatanaṃ no paṭisaṃvedissati. Tadeva nāma ghānaṃ bhavissati te gandhā tañcāyatanaṃ no paṭisaṃvedissati. Sāva nāma jivhā bhavissati te rasā tañcāyatanaṃ no paṭisaṃvedissati. Sova nāma kāyo bhavissati te phoṭṭhabbā tañcāyatanaṃ no paṭisaṃvedissatī’’ti.
ஏவங் வுத்தே ஆயஸ்மா உதா³யீ ஆயஸ்மந்தங் ஆனந்த³ங் ஏதத³வோச – ‘‘ஸஞ்ஞீமேவ நு கோ², ஆவுஸோ ஆனந்த³, ததா³யதனங் நோ படிஸங்வேதே³தி உதா³ஹு அஸஞ்ஞீ’’தி? ‘‘ஸஞ்ஞீமேவ கோ², ஆவுஸோ, ததா³யதனங் நோ படிஸங்வேதே³தி, நோ அஸஞ்ஞீ’’தி.
Evaṃ vutte āyasmā udāyī āyasmantaṃ ānandaṃ etadavoca – ‘‘saññīmeva nu kho, āvuso ānanda, tadāyatanaṃ no paṭisaṃvedeti udāhu asaññī’’ti? ‘‘Saññīmeva kho, āvuso, tadāyatanaṃ no paṭisaṃvedeti, no asaññī’’ti.
‘‘கிங்ஸஞ்ஞீ பனாவுஸோ, ததா³யதனங் நோ படிஸங்வேதே³தீ’’தி? ‘‘இதா⁴வுஸோ, பி⁴க்கு², ஸப்³ப³ஸோ ரூபஸஞ்ஞானங் ஸமதிக்கமா படிக⁴ஸஞ்ஞானங் அத்த²ங்க³மா நானத்தஸஞ்ஞானங் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனங் உபஸம்பஜ்ஜ விஹரதி. ஏவங்ஸஞ்ஞீபி கோ², ஆவுஸோ, ததா³யதனங் நோ படிஸங்வேதே³தி.
‘‘Kiṃsaññī panāvuso, tadāyatanaṃ no paṭisaṃvedetī’’ti? ‘‘Idhāvuso, bhikkhu, sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. Evaṃsaññīpi kho, āvuso, tadāyatanaṃ no paṭisaṃvedeti.
‘‘புன சபரங், ஆவுஸோ, பி⁴க்கு² ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங் உபஸம்பஜ்ஜ விஹரதி. ஏவங்ஸஞ்ஞீபி கோ², ஆவுஸோ, ததா³யதனங் நோ படிஸங்வேதே³தி.
‘‘Puna caparaṃ, āvuso, bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati. Evaṃsaññīpi kho, āvuso, tadāyatanaṃ no paṭisaṃvedeti.
‘‘புன சபரங், ஆவுஸோ, பி⁴க்கு² ஸப்³ப³ஸோ விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹரதி. ஏவங்ஸஞ்ஞீபி கோ² , ஆவுஸோ, ததா³யதனங் நோ படிஸங்வேதே³தீ’’தி.
‘‘Puna caparaṃ, āvuso, bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati. Evaṃsaññīpi kho , āvuso, tadāyatanaṃ no paṭisaṃvedetī’’ti.
‘‘ஏகமிதா³ஹங், ஆவுஸோ, ஸமயங் ஸாகேதே விஹராமி அஞ்ஜனவனே மிக³தா³யே. அத² கோ², ஆவுஸோ, ஜடிலவாஸிகா 3 பி⁴க்கு²னீ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ², ஆவுஸோ, ஜடிலவாஸிகா பி⁴க்கு²னீ மங் ஏதத³வோச – ‘யாயங், ப⁴ந்தே ஆனந்த³, ஸமாதி⁴ ந சாபி⁴னதோ ந சாபனதோ ந ச ஸஸங்கா²ரனிக்³க³ய்ஹவாரிதக³தோ 4, விமுத்தத்தா டி²தோ, டி²தத்தா ஸந்துஸிதோ, ஸந்துஸிதத்தா நோ பரிதஸ்ஸதி. அயங், ப⁴ந்தே ஆனந்த³, ஸமாதி⁴ கிங்ப²லோ வுத்தோ ப⁴க³வதா’’’தி?
‘‘Ekamidāhaṃ, āvuso, samayaṃ sākete viharāmi añjanavane migadāye. Atha kho, āvuso, jaṭilavāsikā 5 bhikkhunī yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, āvuso, jaṭilavāsikā bhikkhunī maṃ etadavoca – ‘yāyaṃ, bhante ānanda, samādhi na cābhinato na cāpanato na ca sasaṅkhāraniggayhavāritagato 6, vimuttattā ṭhito, ṭhitattā santusito, santusitattā no paritassati. Ayaṃ, bhante ānanda, samādhi kiṃphalo vutto bhagavatā’’’ti?
‘‘ஏவங் வுத்தே, ஸோஹங், ஆவுஸோ, ஜடிலவாஸிகங் பி⁴க்கு²னிங் ஏதத³வோசங் – ‘யாயங், ப⁴கி³னி, ஸமாதி⁴ ந சாபி⁴னதோ ந சாபனதோ ந ச ஸஸங்கா²ரனிக்³க³ய்ஹவாரிதக³தோ, விமுத்தத்தா டி²தோ, டி²தத்தா ஸந்துஸிதோ, ஸந்துஸிதத்தா நோ பரிதஸ்ஸதி. அயங், ப⁴கி³னி, ஸமாதி⁴ அஞ்ஞாப²லோ வுத்தோ ப⁴க³வதா’தி. ஏவங்ஸஞ்ஞீபி கோ², ஆவுஸோ, ததா³யதனங் நோ படிஸங்வேதே³தீ’’தி. ச²ட்ட²ங்.
‘‘Evaṃ vutte, sohaṃ, āvuso, jaṭilavāsikaṃ bhikkhuniṃ etadavocaṃ – ‘yāyaṃ, bhagini, samādhi na cābhinato na cāpanato na ca sasaṅkhāraniggayhavāritagato, vimuttattā ṭhito, ṭhitattā santusito, santusitattā no paritassati. Ayaṃ, bhagini, samādhi aññāphalo vutto bhagavatā’ti. Evaṃsaññīpi kho, āvuso, tadāyatanaṃ no paṭisaṃvedetī’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஆனந்த³ஸுத்தவண்ணனா • 6. Ānandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஆனந்த³ஸுத்தவண்ணனா • 6. Ānandasuttavaṇṇanā
