| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૦. આનન્દસુત્તં
10. Ānandasuttaṃ
૨૧. સાવત્થિયં … આરામે. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા આનન્દો ભગવન્તં એતદવોચ – ‘‘‘નિરોધો નિરોધો’તિ, ભન્તે, વુચ્ચતિ. કતમેસાનં ખો, ભન્તે, ધમ્માનં નિરોધો 1 ‘નિરોધો’તિ વુચ્ચતી’’તિ? ‘‘રૂપં ખો, આનન્દ, અનિચ્ચં સઙ્ખતં પટિચ્ચસમુપ્પન્નં ખયધમ્મં વયધમ્મં વિરાગધમ્મં નિરોધધમ્મં. તસ્સ નિરોધો 2 ‘નિરોધો’તિ વુચ્ચતિ. વેદના અનિચ્ચા સઙ્ખતા પટિચ્ચસમુપ્પન્ના ખયધમ્મા વયધમ્મા વિરાગધમ્મા નિરોધધમ્મા. તસ્સા નિરોધો ‘નિરોધો’તિ વુચ્ચતિ. સઞ્ઞા… સઙ્ખારા અનિચ્ચા સઙ્ખતા પટિચ્ચસમુપ્પન્ના ખયધમ્મા વયધમ્મા વિરાગધમ્મા નિરોધધમ્મા. તેસં નિરોધો ‘નિરોધો’તિ વુચ્ચતિ. વિઞ્ઞાણં અનિચ્ચં સઙ્ખતં પટિચ્ચસમુપ્પન્નં ખયધમ્મં વયધમ્મં વિરાગધમ્મં નિરોધધમ્મં. તસ્સ નિરોધો ‘નિરોધો’તિ વુચ્ચતિ. ઇમેસં ખો, આનન્દ, ધમ્માનં નિરોધો ‘નિરોધો’તિ વુચ્ચતી’’તિ. દસમં.
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
અનિચ્ચવગ્ગો દુતિયો.
Aniccavaggo dutiyo.
તસ્સુદ્દાનં –
Tassuddānaṃ –
અનિચ્ચં દુક્ખં અનત્તા, યદનિચ્ચાપરે તયો;
Aniccaṃ dukkhaṃ anattā, yadaniccāpare tayo;
હેતુનાપિ તયો વુત્તા, આનન્દેન ચ તે દસાતિ.
Hetunāpi tayo vuttā, ānandena ca te dasāti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧-૧૦. અનિચ્ચસુત્તાદિવણ્ણના • 1-10. Aniccasuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧-૧૦. અનિચ્ચાદિસુત્તવણ્ણના • 1-10. Aniccādisuttavaṇṇanā
