| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૦. આનન્દસુત્તં
10. Ānandasuttaṃ
૪૧૯. અથ ખો વચ્છગોત્તો પરિબ્બાજકો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો વચ્છગોત્તો પરિબ્બાજકો ભગવન્તં એતદવોચ – ‘‘કિં નુ ખો, ભો ગોતમ, અત્થત્તા’’તિ? એવં વુત્તે, ભગવા તુણ્હી અહોસિ. ‘‘કિં પન, ભો ગોતમ, નત્થત્તા’’તિ? દુતિયમ્પિ ખો ભગવા તુણ્હી અહોસિ. અથ ખો વચ્છગોત્તો પરિબ્બાજકો ઉટ્ઠાયાસના પક્કામિ.
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
અથ ખો આયસ્મા આનન્દો અચિરપક્કન્તે વચ્છગોત્તે પરિબ્બાજકે ભગવન્તં એતદવોચ – ‘‘કિં નુ ખો, ભન્તે, ભગવા વચ્છગોત્તસ્સ પરિબ્બાજકસ્સ પઞ્હં પુટ્ઠો ન બ્યાકાસી’’તિ? ‘‘અહઞ્ચાનન્દ, વચ્છગોત્તસ્સ પરિબ્બાજકસ્સ ‘અત્થત્તા’તિ પુટ્ઠો સમાનો ‘અત્થત્તા’તિ બ્યાકરેય્યં, યે તે, આનન્દ, સમણબ્રાહ્મણા સસ્સતવાદા તેસમેતં સદ્ધિં 1 અભવિસ્સ. અહઞ્ચાનન્દ, વચ્છગોત્તસ્સ પરિબ્બાજકસ્સ ‘નત્થત્તા’તિ પુટ્ઠો સમાનો ‘નત્થત્તા’તિ બ્યાકરેય્યં, યે તે, આનન્દ, સમણબ્રાહ્મણા ઉચ્છેદવાદા તેસમેતં સદ્ધિં અભવિસ્સ. અહઞ્ચાનન્દ, વચ્છગોત્તસ્સ પરિબ્બાજકસ્સ ‘અત્થત્તા’તિ પુટ્ઠો સમાનો ‘અત્થત્તા’તિ બ્યાકરેય્યં, અપિ નુ મે તં, આનન્દ, અનુલોમં અભવિસ્સ ઞાણસ્સ ઉપ્પાદાય – ‘સબ્બે ધમ્મા અનત્તા’’’તિ? ‘‘નો હેતં, ભન્તે’’. ‘‘અહઞ્ચાનન્દ, વચ્છગોત્તસ્સ પરિબ્બાજકસ્સ ‘નત્થત્તા’તિ પુટ્ઠો સમાનો ‘નત્થત્તા’તિ બ્યાકરેય્યં , સમ્મૂળ્હસ્સ, આનન્દ, વચ્છગોત્તસ્સ પરિબ્બાજકસ્સ ભિય્યો સમ્મોહાય અભવિસ્સ – ‘અહુવા મે નૂન પુબ્બે અત્તા, સો એતરહિ નત્થી’’’તિ. દસમં.
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧૦. આનન્દસુત્તવણ્ણના • 10. Ānandasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧૦. આનન્દસુત્તવણ્ણના • 10. Ānandasuttavaṇṇanā
