| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஆனந்த³ஸுத்தவண்ணனா
4. Ānandasuttavaṇṇanā
212. ராகோ³தி எத்த² ஆயஸ்மதோ வங்கீ³ஸஸ்ஸ ராக³ஸ்ஸ உப்பத்தியா காரணங் விபா⁴வேதுங் ‘‘ஆயஸ்மா ஆனந்தோ³’’திஆதி³ வுத்தங். தந்தி ஆனந்த³த்தே²ரங். ஆரம்மணங் பரிக்³க³ஹேதுந்தி காயவேத³னாதி³பே⁴த³ங் ஆரம்மணங் ஸதிகோ³சரங். அஸுப⁴து³க்கா²தி³தோ, ரூபாதி³ஏகேகமேவ வா ச²ளாரம்மணங் அனிச்சது³க்கா²தி³தோ பரிக்³க³ண்ஹிதுங் பரிச்சி²ஜ்ஜ ஜானிதுங். இத்தி²ரூபாரம்மணேதி இத்தி²ஸந்தானே ரூபஸபா⁴வே ஆரம்மணே.
212.Rāgoti ettha āyasmato vaṅgīsassa rāgassa uppattiyā kāraṇaṃ vibhāvetuṃ ‘‘āyasmā ānando’’tiādi vuttaṃ. Tanti ānandattheraṃ. Ārammaṇaṃ pariggahetunti kāyavedanādibhedaṃ ārammaṇaṃ satigocaraṃ. Asubhadukkhādito, rūpādiekekameva vā chaḷārammaṇaṃ aniccadukkhādito pariggaṇhituṃ paricchijja jānituṃ. Itthirūpārammaṇeti itthisantāne rūpasabhāve ārammaṇe.
நிப்³பா³பனந்தி நிப்³பா³பயதி ஏதேனாதி நிப்³பா³பனங். விபல்லாஸேனாதி அஸுபே⁴ ‘‘ஸுப⁴’’ந்தி விபல்லாஸபா⁴வஹேது. ராக³ட்டா²னியந்தி ராகு³ப்பத்திஹேது. இட்டா²ரம்மணந்தி ஸுபா⁴ரம்மணங். எத்த² ச இட்டா²ரம்மணஸீஸேன தத்த² இட்டா²காரக்³க³ஹணங் வத³தி. தஞ்ஹி வஜ்ஜனீயங். பரதோதி அவஸவத்தனத்தே²ன அஞ்ஞதோ. ஸங்கா²ரா ஹி ‘‘மா பி⁴ஜ்ஜந்தூ’’தி இச்சி²தாபி பி⁴ஜ்ஜந்தேவ, தஸ்மா தே அவஸவத்தித்தா பரோ நாம, ஸா ச நேஸங் பரதா அனிச்சத³ஸ்ஸனேன பாகடா ஹோதீதி வுத்தங் ‘‘பரதோ பஸ்ஸாதி அனிச்சதோ பஸ்ஸா’’தி. காமங் விபஸ்ஸனா ஸங்கா²ரனிமித்தங் ந பரிச்சஜதி ஸங்கா²ரே ஆரப்³ப⁴ வத்தனதோ, யேஸங் பன நிமித்தானங் அக்³க³ஹணேன அனிமித்தாதி க³ஹிதுங் அரஹதி, தங் த³ஸ்ஸேதுங் ‘‘நிச்சாதீ³னங் நிமித்தான’’ந்திஆதி³ வுத்தங். ஸலக்க²ண-ஸாமஞ்ஞலக்க²ண-த³ஸ்ஸனவஸேன மானஸ்ஸ த³ஸ்ஸனாபி⁴ஸமயோ, விபஸ்ஸனாய பஹானாபி⁴ஸமயோ. ‘‘மக்³கே³னா’’தி வத³ந்தி, மக்³கே³னேவ பன அஸம்மோஹதோ பரிஞ்ஞாபடிவேத⁴வஸேன த³ஸ்ஸனாபி⁴ஸமயோ, பஹானபடிவேத⁴வஸேன பஹானாபி⁴ஸமயோ. ராகா³தி³ஸந்ததாயாதி ராகா³தீ³னங் ஸமுச்சே²த³வஸேன படிப்பஸ்ஸத்³தி⁴வஸேன வூபஸமேதப்³ப³தோ ஸந்தபா⁴வேன.
Nibbāpananti nibbāpayati etenāti nibbāpanaṃ. Vipallāsenāti asubhe ‘‘subha’’nti vipallāsabhāvahetu. Rāgaṭṭhāniyanti rāguppattihetu. Iṭṭhārammaṇanti subhārammaṇaṃ. Ettha ca iṭṭhārammaṇasīsena tattha iṭṭhākāraggahaṇaṃ vadati. Tañhi vajjanīyaṃ. Paratoti avasavattanatthena aññato. Saṅkhārā hi ‘‘mā bhijjantū’’ti icchitāpi bhijjanteva, tasmā te avasavattittā paro nāma, sā ca nesaṃ paratā aniccadassanena pākaṭā hotīti vuttaṃ ‘‘parato passāti aniccato passā’’ti. Kāmaṃ vipassanā saṅkhāranimittaṃ na pariccajati saṅkhāre ārabbha vattanato, yesaṃ pana nimittānaṃ aggahaṇena animittāti gahituṃ arahati, taṃ dassetuṃ ‘‘niccādīnaṃ nimittāna’’ntiādi vuttaṃ. Salakkhaṇa-sāmaññalakkhaṇa-dassanavasena mānassa dassanābhisamayo, vipassanāya pahānābhisamayo. ‘‘Maggenā’’ti vadanti, maggeneva pana asammohato pariññāpaṭivedhavasena dassanābhisamayo, pahānapaṭivedhavasena pahānābhisamayo. Rāgādisantatāyāti rāgādīnaṃ samucchedavasena paṭippassaddhivasena vūpasametabbato santabhāvena.
ஆனந்த³ஸுத்தவண்ணனா நிட்டி²தா.
Ānandasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஆனந்த³ஸுத்தங் • 4. Ānandasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ஆனந்த³ஸுத்தவண்ணனா • 4. Ānandasuttavaṇṇanā
