| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૪. આનન્દસુત્તવણ્ણના
4. Ānandasuttavaṇṇanā
૨૧૨. રાગોતિ એત્થ આયસ્મતો વઙ્ગીસસ્સ રાગસ્સ ઉપ્પત્તિયા કારણં વિભાવેતું ‘‘આયસ્મા આનન્દો’’તિઆદિ વુત્તં. તન્તિ આનન્દત્થેરં. આરમ્મણં પરિગ્ગહેતુન્તિ કાયવેદનાદિભેદં આરમ્મણં સતિગોચરં. અસુભદુક્ખાદિતો, રૂપાદિએકેકમેવ વા છળારમ્મણં અનિચ્ચદુક્ખાદિતો પરિગ્ગણ્હિતું પરિચ્છિજ્જ જાનિતું. ઇત્થિરૂપારમ્મણેતિ ઇત્થિસન્તાને રૂપસભાવે આરમ્મણે.
212.Rāgoti ettha āyasmato vaṅgīsassa rāgassa uppattiyā kāraṇaṃ vibhāvetuṃ ‘‘āyasmā ānando’’tiādi vuttaṃ. Tanti ānandattheraṃ. Ārammaṇaṃ pariggahetunti kāyavedanādibhedaṃ ārammaṇaṃ satigocaraṃ. Asubhadukkhādito, rūpādiekekameva vā chaḷārammaṇaṃ aniccadukkhādito pariggaṇhituṃ paricchijja jānituṃ. Itthirūpārammaṇeti itthisantāne rūpasabhāve ārammaṇe.
નિબ્બાપનન્તિ નિબ્બાપયતિ એતેનાતિ નિબ્બાપનં. વિપલ્લાસેનાતિ અસુભે ‘‘સુભ’’ન્તિ વિપલ્લાસભાવહેતુ. રાગટ્ઠાનિયન્તિ રાગુપ્પત્તિહેતુ. ઇટ્ઠારમ્મણન્તિ સુભારમ્મણં. એત્થ ચ ઇટ્ઠારમ્મણસીસેન તત્થ ઇટ્ઠાકારગ્ગહણં વદતિ. તઞ્હિ વજ્જનીયં. પરતોતિ અવસવત્તનત્થેન અઞ્ઞતો. સઙ્ખારા હિ ‘‘મા ભિજ્જન્તૂ’’તિ ઇચ્છિતાપિ ભિજ્જન્તેવ, તસ્મા તે અવસવત્તિત્તા પરો નામ, સા ચ નેસં પરતા અનિચ્ચદસ્સનેન પાકટા હોતીતિ વુત્તં ‘‘પરતો પસ્સાતિ અનિચ્ચતો પસ્સા’’તિ. કામં વિપસ્સના સઙ્ખારનિમિત્તં ન પરિચ્ચજતિ સઙ્ખારે આરબ્ભ વત્તનતો, યેસં પન નિમિત્તાનં અગ્ગહણેન અનિમિત્તાતિ ગહિતું અરહતિ, તં દસ્સેતું ‘‘નિચ્ચાદીનં નિમિત્તાન’’ન્તિઆદિ વુત્તં. સલક્ખણ-સામઞ્ઞલક્ખણ-દસ્સનવસેન માનસ્સ દસ્સનાભિસમયો, વિપસ્સનાય પહાનાભિસમયો. ‘‘મગ્ગેના’’તિ વદન્તિ, મગ્ગેનેવ પન અસમ્મોહતો પરિઞ્ઞાપટિવેધવસેન દસ્સનાભિસમયો, પહાનપટિવેધવસેન પહાનાભિસમયો. રાગાદિસન્તતાયાતિ રાગાદીનં સમુચ્છેદવસેન પટિપ્પસ્સદ્ધિવસેન વૂપસમેતબ્બતો સન્તભાવેન.
Nibbāpananti nibbāpayati etenāti nibbāpanaṃ. Vipallāsenāti asubhe ‘‘subha’’nti vipallāsabhāvahetu. Rāgaṭṭhāniyanti rāguppattihetu. Iṭṭhārammaṇanti subhārammaṇaṃ. Ettha ca iṭṭhārammaṇasīsena tattha iṭṭhākāraggahaṇaṃ vadati. Tañhi vajjanīyaṃ. Paratoti avasavattanatthena aññato. Saṅkhārā hi ‘‘mā bhijjantū’’ti icchitāpi bhijjanteva, tasmā te avasavattittā paro nāma, sā ca nesaṃ paratā aniccadassanena pākaṭā hotīti vuttaṃ ‘‘parato passāti aniccato passā’’ti. Kāmaṃ vipassanā saṅkhāranimittaṃ na pariccajati saṅkhāre ārabbha vattanato, yesaṃ pana nimittānaṃ aggahaṇena animittāti gahituṃ arahati, taṃ dassetuṃ ‘‘niccādīnaṃ nimittāna’’ntiādi vuttaṃ. Salakkhaṇa-sāmaññalakkhaṇa-dassanavasena mānassa dassanābhisamayo, vipassanāya pahānābhisamayo. ‘‘Maggenā’’ti vadanti, maggeneva pana asammohato pariññāpaṭivedhavasena dassanābhisamayo, pahānapaṭivedhavasena pahānābhisamayo. Rāgādisantatāyāti rāgādīnaṃ samucchedavasena paṭippassaddhivasena vūpasametabbato santabhāvena.
આનન્દસુત્તવણ્ણના નિટ્ઠિતા.
Ānandasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૪. આનન્દસુત્તં • 4. Ānandasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૪. આનન્દસુત્તવણ્ણના • 4. Ānandasuttavaṇṇanā
