| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૩. તેરસમવગ્ગો
13. Terasamavaggo
(૧૨૮) ૩. અનન્તરાપયુત્તકથા
(128) 3. Anantarāpayuttakathā
૬૬૦. અનન્તરાપયુત્તો પુગ્ગલો સમ્મત્તનિયામં ઓક્કમેય્યાતિ? આમન્તા. મિચ્છત્તનિયામઞ્ચ સમ્મત્તનિયામઞ્ચ ઉભો ઓક્કમેય્યાતિ? ન હેવં વત્તબ્બે…પે॰… અનન્તરાપયુત્તો પુગ્ગલો સમ્મત્તનિયામં ઓક્કમેય્યાતિ? આમન્તા. નનુ તં કમ્મં પયુત્તં કુક્કુચ્ચં ઉપ્પાદિતં વિપ્પટિસારિયં જનિતન્તિ? આમન્તા. હઞ્ચિ તં કમ્મં પયુત્તં કુક્કુચ્ચં ઉપ્પાદિતં વિપ્પટિસારિયં જનિતં, નો ચ વત રે વત્તબ્બે – ‘‘અનન્તરાપયુત્તો પુગ્ગલો સમ્મત્તનિયામં ઓક્કમેય્યા’’તિ.
660. Anantarāpayutto puggalo sammattaniyāmaṃ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṃ vattabbe…pe… anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payuttaṃ kukkuccaṃ uppāditaṃ vippaṭisāriyaṃ janitanti? Āmantā. Hañci taṃ kammaṃ payuttaṃ kukkuccaṃ uppāditaṃ vippaṭisāriyaṃ janitaṃ, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
૬૬૧. અનન્તરાપયુત્તો પુગ્ગલો અભબ્બો સમ્મત્તનિયામં ઓક્કમિતુન્તિ? આમન્તા. માતા જીવિતા વોરોપિતા… પિતા જીવિતા વોરોપિતો… અરહા જીવિતા વોરોપિતો… દુટ્ઠેન ચિત્તેન તથાગતસ્સ લોહિતં ઉપ્પાદિતં… સઙ્ઘો ભિન્નોતિ? ન હેવં વત્તબ્બે…પે॰….
661. Anantarāpayutto puggalo abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito… arahā jīvitā voropito… duṭṭhena cittena tathāgatassa lohitaṃ uppāditaṃ… saṅgho bhinnoti? Na hevaṃ vattabbe…pe….
અનન્તરાપયુત્તો પુગ્ગલો તં કમ્મં પટિસંહરિત્વા કુક્કુચ્ચં પટિવિનોદેત્વા વિપ્પટિસારિયં પટિવિનેત્વા 1 અભબ્બો સમ્મત્તનિયામં ઓક્કમિતુન્તિ? આમન્તા. માતા જીવિતા વોરોપિતા… પિતા જીવિતા વોરોપિતો…પે॰… સઙ્ઘો ભિન્નોતિ? ન હેવં વત્તબ્બે…પે॰….
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā 2 abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito…pe… saṅgho bhinnoti? Na hevaṃ vattabbe…pe….
અનન્તરાપયુત્તો પુગ્ગલો તં કમ્મં પટિસંહરિત્વા કુક્કુચ્ચં પટિવિનોદેત્વા વિપ્પટિસારિયં પટિવિનેત્વા અભબ્બો સમ્મત્તનિયામં ઓક્કમિતુન્તિ? આમન્તા. નનુ તં કમ્મં પટિસંહટં કુક્કુચ્ચં પટિવિનોદિતં વિપ્પટિસારિયં પટિવિનીતન્તિ? આમન્તા. હઞ્ચિ તં કમ્મં પટિસંહટં કુક્કુચ્ચં પટિવિનોદિતં વિપ્પટિસારિયં પટિવિનીતં, નો ચ વત રે વત્તબ્બે – ‘‘અનન્તરાપયુત્તો પુગ્ગલો તં કમ્મં પટિસંહરિત્વા કુક્કુચ્ચં પટિવિનોદેત્વા વિપ્પટિસારિયં પટિવિનેત્વા અભબ્બો સમ્મત્તનિયામં ઓક્કમિતુ’’ન્તિ.
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitunti? Āmantā. Nanu taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītanti? Āmantā. Hañci taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītaṃ, no ca vata re vattabbe – ‘‘anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitu’’nti.
૬૬૨. અનન્તરાપયુત્તો પુગ્ગલો સમ્મત્તનિયામં ઓક્કમેય્યાતિ? આમન્તા. નનુ તં કમ્મં પયુત્તો આસીતિ? આમન્તા. હઞ્ચિ તં કમ્મં પયુત્તો આસિ, નો ચ વત રે વત્તબ્બે – ‘‘અનન્તરાપયુત્તો પુગ્ગલો સમ્મત્તનિયામં ઓક્કમેય્યા’’તિ.
662. Anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payutto āsīti? Āmantā. Hañci taṃ kammaṃ payutto āsi, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
અનન્તરાપયુત્તકથા નિટ્ઠિતા.
Anantarāpayuttakathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૩. અનન્તરાપયુત્તકથાવણ્ણના • 3. Anantarāpayuttakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૩. અનન્તરાપયુત્તકથાવણ્ણના • 3. Anantarāpayuttakathāvaṇṇanā
