| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. ஆனாபானஸ்ஸதிஸுத்தவண்ணனா
8. Ānāpānassatisuttavaṇṇanā
144. ஏவங் மே ஸுதந்தி ஆனாபானஸ்ஸதிஸுத்தங். தத்த² அஞ்ஞேஹி சாதி ட²பெத்வா பாளியங் ஆக³தே த³ஸ தே²ரே அஞ்ஞேஹிபி அபி⁴ஞ்ஞாதேஹி ப³ஹூஹி ஸாவகேஹி ஸத்³தி⁴ங். ததா³ கிர மஹா பி⁴க்கு²ஸங்கோ⁴ அஹோஸி அபரிச்சி²ன்னக³ணனோ.
144.Evaṃme sutanti ānāpānassatisuttaṃ. Tattha aññehi cāti ṭhapetvā pāḷiyaṃ āgate dasa there aññehipi abhiññātehi bahūhi sāvakehi saddhiṃ. Tadā kira mahā bhikkhusaṅgho ahosi aparicchinnagaṇano.
ஓவத³ந்தி அனுஸாஸந்தீதி ஆமிஸஸங்க³ஹேன த⁴ம்மஸங்க³ஹேன சாதி த்³வீஹி ஸங்க³ஹேஹி ஸங்க³ண்ஹித்வா கம்மட்டா²னோவாதா³னுஸாஸனீஹி ஓவத³ந்தி ச அனுஸாஸந்தி ச. தே சாதி சகாரோ ஆக³மஸந்தி⁴மத்தங். உளாரங் புப்³பே³னாபரங் விஸேஸங் ஜானந்தீதி ஸீலபரிபூரணாதி³தோ புப்³ப³விஸேஸதோ உளாரதரங் அபரங் கஸிணபரிகம்மாதி³விஸேஸங் ஜானந்தீதி அத்தோ².
Ovadanti anusāsantīti āmisasaṅgahena dhammasaṅgahena cāti dvīhi saṅgahehi saṅgaṇhitvā kammaṭṭhānovādānusāsanīhi ovadanti ca anusāsanti ca. Te cāti cakāro āgamasandhimattaṃ. Uḷāraṃ pubbenāparaṃ visesaṃ jānantīti sīlaparipūraṇādito pubbavisesato uḷārataraṃ aparaṃ kasiṇaparikammādivisesaṃ jānantīti attho.
145. ஆரத்³தோ⁴தி துட்டோ². அப்பத்தஸ்ஸ பத்தியாதி அப்பத்தஸ்ஸ அரஹத்தஸ்ஸ பாபுணனத்த²ங். ஸேஸபத³த்³வயேபி அயமேவ அத்தோ². கோமுதி³ங் சாதுமாஸினிந்தி பச்சி²மகத்திகசாதுமாஸபுண்ணமங். ஸா ஹி குமுதா³னங் அத்தி²தாய கோமுதீ³, சதுன்னங் வஸ்ஸிகானங் மாஸானங் பரியோஸானத்தா சாதுமாஸினீதி வுச்சதி. ஆக³மெஸ்ஸாமீதி உதி³க்கி²ஸ்ஸாமி, அஜ்ஜ அபவாரெத்வா யாவ ஸா ஆக³ச்ச²தி, தாவ கத்த²சி அக³ந்த்வா இதே⁴வ வஸிஸ்ஸாமீதி அத்தோ². இதி பி⁴க்கூ²னங் பவாரணஸங்க³ஹங் அனுஜானந்தோ ஏவமாஹ.
145.Āraddhoti tuṭṭho. Appattassa pattiyāti appattassa arahattassa pāpuṇanatthaṃ. Sesapadadvayepi ayameva attho. Komudiṃ cātumāsininti pacchimakattikacātumāsapuṇṇamaṃ. Sā hi kumudānaṃ atthitāya komudī, catunnaṃ vassikānaṃ māsānaṃ pariyosānattā cātumāsinīti vuccati. Āgamessāmīti udikkhissāmi, ajja apavāretvā yāva sā āgacchati, tāva katthaci agantvā idheva vasissāmīti attho. Iti bhikkhūnaṃ pavāraṇasaṅgahaṃ anujānanto evamāha.
பவாரணஸங்க³ஹோ நாம ஞத்திது³தியேன கம்மேன தி³ய்யதி கஸ்ஸ பனேஸ தி³ய்யதி, கஸ்ஸ ந தி³ய்யதீதி. அகாரகஸ்ஸ தாவ பா³லபுது²ஜ்ஜனஸ்ஸ ந தி³ய்யதி, ததா² ஆரத்³த⁴விபஸ்ஸகஸ்ஸ சேவ அரியஸாவகஸ்ஸ ச. யஸ்ஸ பன ஸமதோ² வா தருணோ ஹோதி விபஸ்ஸனா வா, தஸ்ஸ தி³ய்யதி. ப⁴க³வாபி ததா³ பி⁴க்கூ²னங் சித்தாசாரங் பரிவீமங்ஸந்தோ ஸமத²விபஸ்ஸனானங் தருணபா⁴வங் ஞத்வா – ‘‘மயி அஜ்ஜ பவாரெந்தே தி³ஸாஸு வஸ்ஸங்வுட்டா² பி⁴க்கூ² இத⁴ ஓஸரிஸ்ஸந்தி. ததோ இமே பி⁴க்கூ² வுட்³ட⁴தரேஹி பி⁴க்கூ²ஹி ஸேனாஸனே க³ஹிதே விஸேஸங் நிப்³ப³த்தேதுங் ந ஸக்கி²ஸ்ஸந்தி. ஸசேபி சாரிகங் பக்கமிஸ்ஸாமி, இமேஸங் வஸனட்டா²னங் து³ல்லப⁴மேவ ப⁴விஸ்ஸதி. மயி பன அபவாரெந்தே பி⁴க்கூ²பி இமங் ஸாவத்தி²ங் ந ஓஸரிஸ்ஸந்தி, அஹம்பி சாரிகங் ந பக்கமிஸ்ஸாமி, ஏவங் இமேஸங் பி⁴க்கூ²னங் வஸனட்டா²னங் அபலிபு³த்³த⁴ங் ப⁴விஸ்ஸதி. தே அத்தனோ அத்தனோ வஸனட்டா²னே பா²ஸு விஹரந்தா ஸமத²விபஸ்ஸனா தா²மஜாதா கத்வா விஸேஸங் நிப்³ப³த்தேதுங் ஸக்கி²ஸ்ஸந்தீ’’தி ஸோ தங்தி³வஸங் அபவாரெத்வா கத்திகபுண்ணமாயங் பவாரெஸ்ஸாமீதி பி⁴க்கூ²னங் பவாரணஸங்க³ஹங் அனுஜானி. பவாரணஸங்க³ஹஸ்மிஞ்ஹி லத்³தே⁴ யஸ்ஸ நிஸ்ஸயபடிபன்னஸ்ஸ ஆசரியுபஜ்ஜா²யா பக்கமந்தி, ஸோபி ‘‘ஸசே பதிரூபோ நிஸ்ஸயதா³யகோ ஆக³மிஸ்ஸதி, தஸ்ஸ ஸந்திகே நிஸ்ஸயங் க³ண்ஹிஸ்ஸாமீ’’தி யாவ கி³ம்ஹானங் பச்சி²மமாஸா வஸிதுங் லப⁴தி. ஸசேபி ஸட்டி²வஸ்ஸா பி⁴க்கூ² ஆக³ச்ச²ந்தி, தஸ்ஸ ஸேனாஸனங் க³ஹேதுங் ந லப⁴ந்தி. அயஞ்ச பன பவாரணஸங்க³ஹோ ஏகஸ்ஸ தி³ன்னோபி ஸப்³பே³ஸங் தி³ன்னோயேவ ஹோதி.
Pavāraṇasaṅgaho nāma ñattidutiyena kammena diyyati kassa panesa diyyati, kassa na diyyatīti. Akārakassa tāva bālaputhujjanassa na diyyati, tathā āraddhavipassakassa ceva ariyasāvakassa ca. Yassa pana samatho vā taruṇo hoti vipassanā vā, tassa diyyati. Bhagavāpi tadā bhikkhūnaṃ cittācāraṃ parivīmaṃsanto samathavipassanānaṃ taruṇabhāvaṃ ñatvā – ‘‘mayi ajja pavārente disāsu vassaṃvuṭṭhā bhikkhū idha osarissanti. Tato ime bhikkhū vuḍḍhatarehi bhikkhūhi senāsane gahite visesaṃ nibbattetuṃ na sakkhissanti. Sacepi cārikaṃ pakkamissāmi, imesaṃ vasanaṭṭhānaṃ dullabhameva bhavissati. Mayi pana apavārente bhikkhūpi imaṃ sāvatthiṃ na osarissanti, ahampi cārikaṃ na pakkamissāmi, evaṃ imesaṃ bhikkhūnaṃ vasanaṭṭhānaṃ apalibuddhaṃ bhavissati. Te attano attano vasanaṭṭhāne phāsu viharantā samathavipassanā thāmajātā katvā visesaṃ nibbattetuṃ sakkhissantī’’ti so taṃdivasaṃ apavāretvā kattikapuṇṇamāyaṃ pavāressāmīti bhikkhūnaṃ pavāraṇasaṅgahaṃ anujāni. Pavāraṇasaṅgahasmiñhi laddhe yassa nissayapaṭipannassa ācariyupajjhāyā pakkamanti, sopi ‘‘sace patirūpo nissayadāyako āgamissati, tassa santike nissayaṃ gaṇhissāmī’’ti yāva gimhānaṃ pacchimamāsā vasituṃ labhati. Sacepi saṭṭhivassā bhikkhū āgacchanti, tassa senāsanaṃ gahetuṃ na labhanti. Ayañca pana pavāraṇasaṅgaho ekassa dinnopi sabbesaṃ dinnoyeva hoti.
ஸாவத்தி²ங் ஓஸரந்தீதி ப⁴க³வதா பவாரணஸங்க³ஹோ தி³ன்னோதி ஸுதஸுதட்டா²னேயேவ யதா²ஸபா⁴வேன ஏகங் மாஸங் வஸித்வா கத்திகபுண்ணமாய உபோஸத²ங் கத்வா ஓஸரந்தே ஸந்தா⁴ய இத³ங் வுத்தங். புப்³பே³னாபரந்தி இத⁴ தருணஸமத²விபஸ்ஸனாஸு கம்மங் கத்வா ஸமத²விபஸ்ஸனா தா²மஜாதா அகங்ஸு, அயங் புப்³பே³ விஸேஸோ நாம. ததோ ஸமாஹிதேன சித்தேன ஸங்கா²ரே ஸம்மஸித்வா கேசி ஸோதாபத்திப²லங்…பே॰… கேசி அரஹத்தங் ஸச்சி²கரிங்ஸு. அயங் அபரோ உளாரோ விஸேஸோ நாம.
Sāvatthiṃ osarantīti bhagavatā pavāraṇasaṅgaho dinnoti sutasutaṭṭhāneyeva yathāsabhāvena ekaṃ māsaṃ vasitvā kattikapuṇṇamāya uposathaṃ katvā osarante sandhāya idaṃ vuttaṃ. Pubbenāparanti idha taruṇasamathavipassanāsu kammaṃ katvā samathavipassanā thāmajātā akaṃsu, ayaṃ pubbe viseso nāma. Tato samāhitena cittena saṅkhāre sammasitvā keci sotāpattiphalaṃ…pe… keci arahattaṃ sacchikariṃsu. Ayaṃ aparo uḷāro viseso nāma.
146. அலந்தி யுத்தங். யோஜனக³ணனானீதி ஏகங் யோஜனங் யோஜனமேவ, த³ஸபி யோஜனானி யோஜனானேவ, ததோ உத்³த⁴ங் யோஜனக³ணனானீதி வுச்சந்தி. இத⁴ பன யோஜனஸதம்பி யோஜனஸஹஸ்ஸம்பி அதி⁴ப்பேதங். புடோஸேனாபீதி புடோஸங் வுச்சதி பாதெ²ய்யங். தங் பாதெ²ய்யங் க³ஹெத்வாபி உபஸங்கமிதுங் யுத்தமேவாதி அத்தோ². ‘‘புடங்ஸேனா’’திபி பாடோ², தஸ்ஸத்தோ² – புடோ அங்ஸே அஸ்ஸாதி புடங்ஸோ, தேன புடங்ஸேன, அங்ஸே பாதெ²ய்யபுடங் வஹந்தேனாபீதி வுத்தங் ஹோதி.
146.Alanti yuttaṃ. Yojanagaṇanānīti ekaṃ yojanaṃ yojanameva, dasapi yojanāni yojanāneva, tato uddhaṃ yojanagaṇanānīti vuccanti. Idha pana yojanasatampi yojanasahassampi adhippetaṃ. Puṭosenāpīti puṭosaṃ vuccati pātheyyaṃ. taṃ pātheyyaṃ gahetvāpi upasaṅkamituṃ yuttamevāti attho. ‘‘Puṭaṃsenā’’tipi pāṭho, tassattho – puṭo aṃse assāti puṭaṃso, tena puṭaṃsena, aṃse pātheyyapuṭaṃ vahantenāpīti vuttaṃ hoti.
147. இதா³னி ஏவரூபேஹி சரணேஹி ஸமன்னாக³தா எத்த² பி⁴க்கூ² அத்தீ²தி த³ஸ்ஸேதுங் ஸந்தி, பி⁴க்க²வேதிஆதி³மாஹ. தத்த² சதுன்னங் ஸதிபட்டா²னானந்திஆதீ³னி தேஸங் பி⁴க்கூ²னங் அபி⁴னிவிட்ட²கம்மட்டா²னத³ஸ்ஸனத்த²ங் வுத்தானி. தத்த² ஸத்ததிங்ஸ போ³தி⁴பக்கி²யத⁴ம்மா லோகியலோகுத்தரா கதி²தா. தத்ர ஹி யே பி⁴க்கூ² தஸ்மிங் க²ணே மக்³க³ங் பா⁴வெந்தி, தேஸங் லோகுத்தரா ஹொந்தி. ஆரத்³த⁴விபஸ்ஸகானங் லோகியா. அனிச்சஸஞ்ஞாபா⁴வனானுயோக³ந்தி எத்த² ஸஞ்ஞாஸீஸேன விபஸ்ஸனா கதி²தா . யஸ்மா பனெத்த² ஆனாபானகம்மட்டா²னவஸேன அபி⁴னிவிட்டா²வ ப³ஹூ பி⁴க்கூ², தஸ்மா ஸேஸகம்மட்டா²னானி ஸங்கே²பேன கதெ²த்வா ஆனாபானகம்மட்டா²னங் வித்தா²ரேன கதெ²ந்தோ ஆனாபானஸ்ஸதி, பி⁴க்க²வேதிஆதி³மாஹ. இத³ங் பன ஆனாபானகம்மட்டா²னங் ஸப்³பா³காரேன விஸுத்³தி⁴மக்³கே³ வித்தா²ரிதங், தஸ்மா தத்த² வுத்தனயேனேவஸ்ஸ பாளித்தோ² ச பா⁴வனானயோ ச வேதி³தப்³போ³.
147. Idāni evarūpehi caraṇehi samannāgatā ettha bhikkhū atthīti dassetuṃ santi, bhikkhavetiādimāha. Tattha catunnaṃ satipaṭṭhānānantiādīni tesaṃ bhikkhūnaṃ abhiniviṭṭhakammaṭṭhānadassanatthaṃ vuttāni. Tattha sattatiṃsa bodhipakkhiyadhammā lokiyalokuttarā kathitā. Tatra hi ye bhikkhū tasmiṃ khaṇe maggaṃ bhāventi, tesaṃ lokuttarā honti. Āraddhavipassakānaṃ lokiyā. Aniccasaññābhāvanānuyoganti ettha saññāsīsena vipassanā kathitā . Yasmā panettha ānāpānakammaṭṭhānavasena abhiniviṭṭhāva bahū bhikkhū, tasmā sesakammaṭṭhānāni saṅkhepena kathetvā ānāpānakammaṭṭhānaṃ vitthārena kathento ānāpānassati, bhikkhavetiādimāha. Idaṃ pana ānāpānakammaṭṭhānaṃ sabbākārena visuddhimagge vitthāritaṃ, tasmā tattha vuttanayenevassa pāḷittho ca bhāvanānayo ca veditabbo.
149. காயஞ்ஞதரந்தி பத²வீகாயாதீ³ஸு சதூஸு காயேஸு அஞ்ஞதரங் வதா³மி, வாயோ காயங் வதா³மீதி அத்தோ². அத² வா ரூபாயதனங்…பே॰… கப³ளீகாரோ ஆஹாரோதி பஞ்சவீஸதி ரூபகொட்டா²ஸா ரூபகாயோ நாம. தேஸு ஆனாபானங் பொ²ட்ட²ப்³பா³யதனே ஸங்க³ஹிதத்தா காயஞ்ஞதரங் ஹோதி, தஸ்மாபி ஏவமாஹ. தஸ்மாதிஹாதி யஸ்மா சதூஸு காயேஸு அஞ்ஞதரங் வாயோகாயங், பஞ்சவீஸதிரூபகொட்டா²ஸே வா ரூபகாயே அஞ்ஞதரங் ஆனாபானங் அனுபஸ்ஸதி, தஸ்மா காயே காயானுபஸ்ஸீதி அத்தோ². ஏவங் ஸப்³ப³த்த² அத்தோ² வேதி³தப்³போ³. வேத³னாஞ்ஞதரந்தி தீஸு வேத³னாஸு அஞ்ஞதரங், ஸுக²வேத³னங் ஸந்தா⁴யேதங் வுத்தங். ஸாது⁴கங் மனஸிகாரந்தி பீதிபடிஸங்வேதி³தாதி³வஸேன உப்பன்னங் ஸுந்த³ரமனஸிகாரங். கிங் பன மனஸிகாரோ ஸுக²வேத³னா ஹோதீதி. ந ஹோதி, தே³ஸனாஸீஸங் பனேதங். யதே²வ ஹி ‘‘அனிச்சஸஞ்ஞாபா⁴வனானுயோக³மனுயுத்தா’’தி எத்த² ஸஞ்ஞானாமேன பஞ்ஞா வுத்தா, ஏவமிதா⁴பி மனஸிகாரனாமேன வேத³னா வுத்தாதி வேதி³தப்³பா³. ஏதஸ்மிங் சதுக்கே பட²மபதே³ பீதிஸீஸேன வேத³னா வுத்தா, து³தியபதே³ ஸுக²ந்தி ஸரூபேனேவ வுத்தா. சித்தஸங்கா²ரபத³த்³வயே ‘‘ஸஞ்ஞா ச வேத³னா ச சேதஸிகா, ஏதே த⁴ம்மா சித்தபடிப³த்³தா⁴ சித்தஸங்கா²ரா’’தி (படி॰ ம॰ 1.174) வசனதோ ‘‘விதக்கவிசாரே ட²பெத்வா ஸப்³பே³பி சித்தஸம்பயுத்தகா த⁴ம்மா சித்தஸங்கா²ரே ஸங்க³ஹிதா’’தி வசனதோ சித்தஸங்கா²ரனாமேன வேத³னா வுத்தா. தங் ஸப்³ப³ங் மனஸிகாரனாமேன ஸங்க³ஹெத்வா இத⁴ ‘‘ஸாது⁴கங் மனஸிகார’’ந்தி ஆஹ.
149.Kāyaññataranti pathavīkāyādīsu catūsu kāyesu aññataraṃ vadāmi, vāyo kāyaṃ vadāmīti attho. Atha vā rūpāyatanaṃ…pe… kabaḷīkāro āhāroti pañcavīsati rūpakoṭṭhāsā rūpakāyo nāma. Tesu ānāpānaṃ phoṭṭhabbāyatane saṅgahitattā kāyaññataraṃ hoti, tasmāpi evamāha. Tasmātihāti yasmā catūsu kāyesu aññataraṃ vāyokāyaṃ, pañcavīsatirūpakoṭṭhāse vā rūpakāye aññataraṃ ānāpānaṃ anupassati, tasmā kāye kāyānupassīti attho. Evaṃ sabbattha attho veditabbo. Vedanāññataranti tīsu vedanāsu aññataraṃ, sukhavedanaṃ sandhāyetaṃ vuttaṃ. Sādhukaṃ manasikāranti pītipaṭisaṃveditādivasena uppannaṃ sundaramanasikāraṃ. Kiṃ pana manasikāro sukhavedanā hotīti. Na hoti, desanāsīsaṃ panetaṃ. Yatheva hi ‘‘aniccasaññābhāvanānuyogamanuyuttā’’ti ettha saññānāmena paññā vuttā, evamidhāpi manasikāranāmena vedanā vuttāti veditabbā. Etasmiṃ catukke paṭhamapade pītisīsena vedanā vuttā, dutiyapade sukhanti sarūpeneva vuttā. Cittasaṅkhārapadadvaye ‘‘saññā ca vedanā ca cetasikā, ete dhammā cittapaṭibaddhā cittasaṅkhārā’’ti (paṭi. ma. 1.174) vacanato ‘‘vitakkavicāre ṭhapetvā sabbepi cittasampayuttakā dhammā cittasaṅkhāre saṅgahitā’’ti vacanato cittasaṅkhāranāmena vedanā vuttā. Taṃ sabbaṃ manasikāranāmena saṅgahetvā idha ‘‘sādhukaṃ manasikāra’’nti āha.
ஏவங் ஸந்தேபி யஸ்மா ஏஸா வேத³னா ஆரம்மணங் ந ஹோதி, தஸ்மா வேத³னானுபஸ்ஸனா ந யுஜ்ஜதீதி. நோ ந யுஜ்ஜதி, ஸதிபட்டா²னவண்ணனாயம்பி ஹி ‘‘தங்தங்ஸுகா²தீ³னங் வத்து²ங் ஆரம்மணங் கத்வா வேத³னாவ வேத³யதி, தங் பன வேத³னாபவத்திங் உபாதா³ய ‘அஹங் வேத³யாமீ’தி வோஹாரமத்தங் ஹோதீ’’தி வுத்தங் . அபிச பீதிபடிஸங்வேதீ³திஆதீ³னங் அத்த²வண்ணனாயமேதஸ்ஸ பரிஹாரோ வுத்தோயேவ. வுத்தஞ்ஹேதங் விஸுத்³தி⁴மக்³கே³ –
Evaṃ santepi yasmā esā vedanā ārammaṇaṃ na hoti, tasmā vedanānupassanā na yujjatīti. No na yujjati, satipaṭṭhānavaṇṇanāyampi hi ‘‘taṃtaṃsukhādīnaṃ vatthuṃ ārammaṇaṃ katvā vedanāva vedayati, taṃ pana vedanāpavattiṃ upādāya ‘ahaṃ vedayāmī’ti vohāramattaṃ hotī’’ti vuttaṃ . Apica pītipaṭisaṃvedītiādīnaṃ atthavaṇṇanāyametassa parihāro vuttoyeva. Vuttañhetaṃ visuddhimagge –
‘‘த்³வீஹாகாரேஹி பீதி படிஸங்விதி³தா ஹோதி ஆரம்மணதோ ச அஸம்மோஹதோ ச. கத²ங் ஆரம்மணதோ பீதி படிஸங்விதி³தா ஹோதி? ஸப்பீதிகே த்³வே ஜா²னே ஸமாபஜ்ஜதி, தஸ்ஸ ஸமாபத்திக்க²ணே ஜா²னபடிலாபே⁴ன ஆரம்மணதோ பீதி படிஸங்விதி³தா ஹோதி ஆரம்மணஸ்ஸ படிஸங்விதி³தத்தா. கத²ங் அஸம்மோஹதோ (பீதி படிஸங்விதி³தா ஹோதி)? ஸப்பீதிகே த்³வே ஜா²னே ஸமாபஜ்ஜித்வா வுட்டா²ய ஜா²னஸம்பயுத்தங் பீதிங் க²யதோ வயதோ ஸம்மஸதி, தஸ்ஸ விபஸ்ஸனாக்க²ணே லக்க²ணபடிவேதா⁴ அஸம்மோஹதோ பீதி படிஸங்விதி³தா ஹோதி. வுத்தம்பி சேதங் படிஸம்பி⁴தா³யங் ‘தீ³க⁴ங் அஸ்ஸாஸவஸேன சித்தஸ்ஸ ஏகக்³க³தங் அவிக்கே²பங் பஜானதோ ஸதி உபட்டி²தா ஹோதி, தாய ஸதியா, தேன ஞாணேன ஸா பீதி படிஸங்விதி³தா ஹோதீ’தி. ஏதேனேவ நயேன அவஸேஸபதா³னிபி அத்த²தோ வேதி³தப்³பா³னீ’’தி.
‘‘Dvīhākārehi pīti paṭisaṃviditā hoti ārammaṇato ca asammohato ca. Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti ārammaṇassa paṭisaṃviditattā. Kathaṃ asammohato (pīti paṭisaṃviditā hoti)? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati, tassa vipassanākkhaṇe lakkhaṇapaṭivedhā asammohato pīti paṭisaṃviditā hoti. Vuttampi cetaṃ paṭisambhidāyaṃ ‘dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā, tena ñāṇena sā pīti paṭisaṃviditā hotī’ti. Eteneva nayena avasesapadānipi atthato veditabbānī’’ti.
இதி யதே²வ ஜா²னபடிலாபே⁴ன ஆரம்மணதோ பீதிஸுக²சித்தஸங்கா²ரா படிஸங்விதி³தா ஹொந்தி, ஏவங் இமினாபி ஜா²னஸம்பயுத்தேன வேத³னாஸங்கா²தமனஸிகாரபடிலாபே⁴ன ஆரம்மணதோ வேத³னா படிஸங்விதி³தா ஹோதி. தஸ்மா ஸுவுத்தமேதங் ஹோதி ‘‘வேத³னாஸு வேத³னானுபஸ்ஸீ தஸ்மிங் ஸமயே பி⁴க்கு² விஹரதீ’’தி.
Iti yatheva jhānapaṭilābhena ārammaṇato pītisukhacittasaṅkhārā paṭisaṃviditā honti, evaṃ imināpi jhānasampayuttena vedanāsaṅkhātamanasikārapaṭilābhena ārammaṇato vedanā paṭisaṃviditā hoti. Tasmā suvuttametaṃ hoti ‘‘vedanāsu vedanānupassī tasmiṃ samaye bhikkhu viharatī’’ti.
நாஹங், பி⁴க்க²வே, முட்ட²ஸ்ஸதிஸ்ஸ அஸம்பஜானஸ்ஸாதி எத்த² அயமதி⁴ப்பாயோ – யஸ்மா சித்தபடிஸங்வேதீ³ அஸ்ஸஸிஸ்ஸாமீதிஆதி³னா நயேன பவத்தோ பி⁴க்கு² கிஞ்சாபி அஸ்ஸாஸபஸ்ஸாஸனிமித்தங் ஆரம்மணங் கரோதி, தஸ்ஸ பன சித்தஸ்ஸ ஆரம்மணே ஸதிஞ்ச ஸம்பஜஞ்ஞஞ்ச உபட்ட²பெத்வா பவத்தனதோ சித்தே சித்தானுபஸ்ஸீயேவ நாமேஸ ஹோதி. ந ஹி முட்ட²ஸ்ஸதிஸ்ஸ அஸம்பஜானஸ்ஸ ஆனாபானஸ்ஸதிபா⁴வனா அத்தி². தஸ்மா ஆரம்மணதோ சித்தபடிஸங்விதி³தாதி³வஸேன சித்தே சித்தானுபஸ்ஸீ தஸ்மிங் ஸமயே பி⁴க்கு² விஹரதீதி. ஸோ யங் தங் அபி⁴ஜ்ஜா²தோ³மனஸ்ஸானங் பஹானங், தங் பஞ்ஞாய தி³ஸ்வா ஸாது⁴கங் அஜ்ஜு²பெக்கி²தா ஹோதீதி எத்த² அபி⁴ஜ்ஜா²ய காமச்ச²ந்த³னீவரணங், தோ³மனஸ்ஸவஸேன ப்³யாபாத³னீவரணங் த³ஸ்ஸிதங். இத³ஞ்ஹி சதுக்கங் விபஸ்ஸனாவஸேனேவ வுத்தங், த⁴ம்மானுபஸ்ஸனா ச நீவரணபப்³பா³தி³வஸேன ச²ப்³பி³தா⁴ ஹோதி, தஸ்ஸா நீவரணபப்³ப³ங் ஆதி³, தஸ்ஸபி இத³ங் நீவரணத்³வயங் ஆதி³, இதி த⁴ம்மானுபஸ்ஸனாய ஆதி³ங் த³ஸ்ஸேதுங் ‘‘அபி⁴ஜ்ஜா²தோ³மனஸ்ஸான’’ந்தி ஆஹ. பஹானந்தி அனிச்சானுபஸ்ஸனாய நிச்சஸஞ்ஞங் பஜஹதீதி ஏவங் பஹானகரஞாணங் அதி⁴ப்பேதங். தங் பஞ்ஞாய தி³ஸ்வாதி தங் அனிச்சவிராக³னிரோத⁴படினிஸ்ஸக்³கா³ஞாணஸங்கா²தங் பஹானஞாணங் அபராய விபஸ்ஸனாபஞ்ஞாய, தம்பி அபராயாதி ஏவங் விபஸ்ஸனாபரம்பரங் த³ஸ்ஸேதி. அஜ்ஜு²பெக்கி²தா ஹோதீதி யஞ்ச ஸமத²படிபன்னங் அஜ்ஜு²பெக்க²தி, யஞ்ச ஏகதோ உபட்டா²னங் அஜ்ஜு²பெக்க²தீதி த்³விதா⁴ அஜ்ஜு²பெக்க²தி நாம. தத்த² ஸஹஜாதானம்பி அஜ்ஜு²பெக்க²னா ஹோதி ஆரம்மணஸ்ஸபி அஜ்ஜு²பெக்க²னா, இத⁴ ஆரம்மணஅஜ்ஜு²பெக்க²னா அதி⁴ப்பேதா. தஸ்மாதிஹ, பி⁴க்க²வேதி யஸ்மா அனிச்சானுபஸ்ஸீ அஸ்ஸஸிஸ்ஸாமீதிஆதி³னா நயேன பவத்தோ ந கேவலங் நீவரணாதி³த⁴ம்மே, அபி⁴ஜ்ஜா²தோ³மனஸ்ஸஸீஸேன பன வுத்தானங் த⁴ம்மானங் பஹானஞாணம்பி பஞ்ஞாய தி³ஸ்வா அஜ்ஜு²பெக்கி²தா ஹோதி, தஸ்மா ‘‘த⁴ம்மேஸு த⁴ம்மானுபஸ்ஸீ தஸ்மிங் ஸமயே பி⁴க்கு² விஹரதீ’’தி வேதி³தப்³போ³.
Nāhaṃ, bhikkhave, muṭṭhassatissa asampajānassāti ettha ayamadhippāyo – yasmā cittapaṭisaṃvedī assasissāmītiādinā nayena pavatto bhikkhu kiñcāpi assāsapassāsanimittaṃ ārammaṇaṃ karoti, tassa pana cittassa ārammaṇe satiñca sampajaññañca upaṭṭhapetvā pavattanato citte cittānupassīyeva nāmesa hoti. Na hi muṭṭhassatissa asampajānassa ānāpānassatibhāvanā atthi. Tasmā ārammaṇato cittapaṭisaṃviditādivasena citte cittānupassī tasmiṃ samaye bhikkhu viharatīti. So yaṃ taṃ abhijjhādomanassānaṃ pahānaṃ, taṃ paññāya disvā sādhukaṃ ajjhupekkhitā hotīti ettha abhijjhāya kāmacchandanīvaraṇaṃ, domanassavasena byāpādanīvaraṇaṃ dassitaṃ. Idañhi catukkaṃ vipassanāvaseneva vuttaṃ, dhammānupassanā ca nīvaraṇapabbādivasena chabbidhā hoti, tassā nīvaraṇapabbaṃ ādi, tassapi idaṃ nīvaraṇadvayaṃ ādi, iti dhammānupassanāya ādiṃ dassetuṃ ‘‘abhijjhādomanassāna’’nti āha. Pahānanti aniccānupassanāya niccasaññaṃ pajahatīti evaṃ pahānakarañāṇaṃ adhippetaṃ. Taṃ paññāya disvāti taṃ aniccavirāganirodhapaṭinissaggāñāṇasaṅkhātaṃ pahānañāṇaṃ aparāya vipassanāpaññāya, tampi aparāyāti evaṃ vipassanāparamparaṃ dasseti. Ajjhupekkhitā hotīti yañca samathapaṭipannaṃ ajjhupekkhati, yañca ekato upaṭṭhānaṃ ajjhupekkhatīti dvidhā ajjhupekkhati nāma. Tattha sahajātānampi ajjhupekkhanā hoti ārammaṇassapi ajjhupekkhanā, idha ārammaṇaajjhupekkhanā adhippetā. Tasmātiha, bhikkhaveti yasmā aniccānupassī assasissāmītiādinā nayena pavatto na kevalaṃ nīvaraṇādidhamme, abhijjhādomanassasīsena pana vuttānaṃ dhammānaṃ pahānañāṇampi paññāya disvā ajjhupekkhitā hoti, tasmā ‘‘dhammesu dhammānupassī tasmiṃ samaye bhikkhu viharatī’’ti veditabbo.
150. பவிசினதீதி அனிச்சாதி³வஸேன பவிசினதி. இதரங் பத³த்³வயங் ஏதஸ்ஸேவ வேவசனங். நிராமிஸாதி நிக்கிலேஸா. பஸ்ஸம்ப⁴தீதி காயிகசேதஸிகத³ரத²படிப்பஸ்ஸத்³தி⁴யா காயோபி சித்தம்பி பஸ்ஸம்ப⁴தி. ஸமாதி⁴யதீதி ஸம்மா ட²பியதி, அப்பனாபத்தங் விய ஹோதி. அஜ்ஜு²பெக்கி²தா ஹோதீதி ஸஹஜாதஅஜ்ஜு²பெக்க²னாய அஜ்ஜு²பெக்கி²தா ஹோதி.
150.Pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā. Passambhatīti kāyikacetasikadarathapaṭippassaddhiyā kāyopi cittampi passambhati. Samādhiyatīti sammā ṭhapiyati, appanāpattaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
ஏவங் சுத்³த³ஸவிதே⁴ன காயபரிக்³கா³ஹகஸ்ஸ பி⁴க்கு²னோ தஸ்மிங் காயே ஸதி ஸதிஸம்பொ³ஜ்ஜ²ங்கோ³, ஸதியா ஸம்பயுத்தங் ஞாணங் த⁴ம்மவிசயஸம்பொ³ஜ்ஜ²ங்கோ³, தங்ஸம்பயுத்தமேவ காயிகசேதஸிகவீரியங் வீரியஸம்பொ³ஜ்ஜ²ங்கோ³, பீதி, பஸ்ஸத்³தி⁴, சித்தேகக்³க³தா ஸமாதி⁴ஸம்பொ³ஜ்ஜ²ங்கோ³, இமேஸங் ச²ன்னங் ஸம்பொ³ஜ்ஜ²ங்கா³னங் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபெக்கா²ஸம்பொ³ஜ்ஜ²ங்கோ³. யதே²வ ஹி ஸமப்பவத்தேஸு அஸ்ஸேஸு ஸாரதி²னோ ‘‘அயங் ஓலீயதீ’’தி துத³னங் வா, ‘‘அயங் அதிதா⁴வதீ’’தி ஆகட்³ட⁴னங் வா நத்தி², கேவலங் ஏவங் பஸ்ஸமானஸ்ஸ டி²தாகாரோவ ஹோதி, ஏவமேவ இமேஸங் ச²ன்னங் ஸம்பொ³ஜ்ஜ²ங்கா³னங் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபெக்கா²ஸம்பொ³ஜ்ஜ²ங்கோ³ நாம ஹோதி. எத்தாவதா கிங் கதி²தங்? ஏகசித்தக்க²ணிகா நானாரஸலக்க²ணா விபஸ்ஸனாஸம்பொ³ஜ்ஜ²ங்கா³ நாம கதி²தா.
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, satiyā sampayuttaṃ ñāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pīti, passaddhi, cittekaggatā samādhisambojjhaṅgo, imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānārasalakkhaṇā vipassanāsambojjhaṅgā nāma kathitā.
152. விவேகனிஸ்ஸிதந்திஆதீ³னி வுத்தத்தா²னேவ. எத்த² பன ஆனாபானபரிக்³கா³ஹிகா ஸதி லோகியா ஹோதி, லோகியா ஆனாபானா லோகியஸதிபட்டா²னங் பரிபூரெந்தி, லோகியா ஸதிபட்டா²னா லோகுத்தரபொ³ஜ்ஜ²ங்கே³ பரிபூரெந்தி, லோகுத்தரா பொ³ஜ்ஜ²ங்கா³ விஜ்ஜாவிமுத்திப²லனிப்³பா³னங் பரிபூரெந்தி. இதி லோகியஸ்ஸ ஆக³தட்டா²னே லோகியங் கதி²தங், லோகுத்தரஸ்ஸ ஆக³தட்டா²னே லோகுத்தரங் கதி²தந்தி. தே²ரோ பனாஹ ‘‘அஞ்ஞத்த² ஏவங் ஹோதி, இமஸ்மிங் பன ஸுத்தே லோகுத்தரங் உபரி ஆக³தங், லோகியா ஆனாபானா லோகியஸதிபட்டா²னே பரிபூரெந்தி, லோகியா ஸதிபட்டா²னா லோகியே பொ³ஜ்ஜ²ங்கே³ பரிபூரெந்தி, லோகியா பொ³ஜ்ஜ²ங்கா³ லோகுத்தரங் விஜ்ஜாவிமுத்திப²லனிப்³பா³னங் பரிபூரெந்தி, விஜ்ஜாவிமுத்திபதே³ன ஹி இத⁴ விஜ்ஜாவிமுத்திப²லனிப்³பா³னங் அதி⁴ப்பேத’’ந்தி.
152.Vivekanissitantiādīni vuttatthāneva. Ettha pana ānāpānapariggāhikā sati lokiyā hoti, lokiyā ānāpānā lokiyasatipaṭṭhānaṃ paripūrenti, lokiyā satipaṭṭhānā lokuttarabojjhaṅge paripūrenti, lokuttarā bojjhaṅgā vijjāvimuttiphalanibbānaṃ paripūrenti. Iti lokiyassa āgataṭṭhāne lokiyaṃ kathitaṃ, lokuttarassa āgataṭṭhāne lokuttaraṃ kathitanti. Thero panāha ‘‘aññattha evaṃ hoti, imasmiṃ pana sutte lokuttaraṃ upari āgataṃ, lokiyā ānāpānā lokiyasatipaṭṭhāne paripūrenti, lokiyā satipaṭṭhānā lokiye bojjhaṅge paripūrenti, lokiyā bojjhaṅgā lokuttaraṃ vijjāvimuttiphalanibbānaṃ paripūrenti, vijjāvimuttipadena hi idha vijjāvimuttiphalanibbānaṃ adhippeta’’nti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஆனாபானஸ்ஸதிஸுத்தவண்ணனா நிட்டி²தா.
Ānāpānassatisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. ஆனாபானஸ்ஸதிஸுத்தங் • 8. Ānāpānassatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. ஆனாபானஸ்ஸதிஸுத்தவண்ணனா • 8. Ānāpānassatisuttavaṇṇanā
