| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
અનાપત્તિપન્નરસકાદિકથાવણ્ણના
Anāpattipannarasakādikathāvaṇṇanā
૧૭૨. કેનચિ ૬૩ કરણીયેન ગન્ત્વાતિ સીમાપરિચ્છેદતો બહિભૂતં ગામં વા અરઞ્ઞં વા ગન્ત્વાતિ અત્થો. એતેનેવ ઉપોસથઞત્તિયા ઠપનકાલે સમગ્ગા એવ તે ઞત્તિં ઠપેસુન્તિ સિદ્ધં. તેનેવ પાળિયં ‘‘ઉદ્દિટ્ઠં સુઉદ્દિટ્ઠ’’ન્તિ સબ્બપન્નરસકેસુપિ વુત્તં. વગ્ગા સમગ્ગસઞ્ઞિનોતિઆદિ પન ઞત્તિયા નિટ્ઠિતાય ‘‘કિં સઙ્ઘસ્સ પુબ્બકિચ્ચ’’ન્તિઆદીનં (મહાવ॰ ૧૩૪) વચનક્ખણે બહિગતાનં ભિક્ખૂનં સીમાય પવિટ્ઠત્તા ભિક્ખૂ તસ્મિં ખણે વગ્ગા હોન્તીતિ વુત્તં. તેનાહ ‘‘તેસં સીમં ઓક્કન્તત્તા વગ્ગા’’તિઆદિ, એતેન પારાજિકુદ્દેસાદિક્ખણેપિ વગ્ગસઞ્ઞીનં ઉદ્દિસન્તાનં આપત્તિ એવ, ઞત્તિયા પન પુબ્બે નિટ્ઠિતત્તા કમ્મકોપો નત્થીતિ દસ્સિતમેવ હોતિ. એવં ઉપરિપિ સબ્બવારેસુ અધિપ્પાયો વેદિતબ્બો.
172.Kenaci 63 karaṇīyena gantvāti sīmāparicchedato bahibhūtaṃ gāmaṃ vā araññaṃ vā gantvāti attho. Eteneva uposathañattiyā ṭhapanakāle samaggā eva te ñattiṃ ṭhapesunti siddhaṃ. Teneva pāḷiyaṃ ‘‘uddiṭṭhaṃ suuddiṭṭha’’nti sabbapannarasakesupi vuttaṃ. Vaggā samaggasaññinotiādi pana ñattiyā niṭṭhitāya ‘‘kiṃ saṅghassa pubbakicca’’ntiādīnaṃ (mahāva. 134) vacanakkhaṇe bahigatānaṃ bhikkhūnaṃ sīmāya paviṭṭhattā bhikkhū tasmiṃ khaṇe vaggā hontīti vuttaṃ. Tenāha ‘‘tesaṃ sīmaṃ okkantattā vaggā’’tiādi, etena pārājikuddesādikkhaṇepi vaggasaññīnaṃ uddisantānaṃ āpatti eva, ñattiyā pana pubbe niṭṭhitattā kammakopo natthīti dassitameva hoti. Evaṃ uparipi sabbavāresu adhippāyo veditabbo.
એત્થ ચ પાળિયં ‘‘સબ્બાય વુટ્ઠિતાય…પે॰… તેસં સન્તિકે પારિસુદ્ધિ આરોચેતબ્બા’’તિ (મહાવ॰ ૧૭૪) વુત્તત્તા બહિસીમાગતાય પરિસાય તેસુ યસ્સ કસ્સચિ સન્તિકે અનધિટ્ઠિતેહિ પારિસુદ્ધિં આરોચેતું વટ્ટતીતિ વદન્તિ.
Ettha ca pāḷiyaṃ ‘‘sabbāya vuṭṭhitāya…pe… tesaṃ santike pārisuddhi ārocetabbā’’ti (mahāva. 174) vuttattā bahisīmāgatāya parisāya tesu yassa kassaci santike anadhiṭṭhitehi pārisuddhiṃ ārocetuṃ vaṭṭatīti vadanti.
અનાપત્તિપન્નરસકાદિકથાવણ્ણના નિટ્ઠિતા.
Anāpattipannarasakādikathāvaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવગ્ગપાળિ • Mahāvaggapāḷi / ૯૫. અનાપત્તિપન્નરસકં • 95. Anāpattipannarasakaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવગ્ગ-અટ્ઠકથા • Mahāvagga-aṭṭhakathā / અનાપત્તિપન્નરસકાદિકથા • Anāpattipannarasakādikathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / અનાપત્તિપન્નરસકાદિકથાવણ્ણના • Anāpattipannarasakādikathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૯૫. અનાપત્તિપન્નરસકાદિકથા • 95. Anāpattipannarasakādikathā
