| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
8. அந்த⁴கரணஸுத்தவண்ணனா
8. Andhakaraṇasuttavaṇṇanā
87. அட்ட²மே அகுஸலவிதக்காதி அகோஸல்லஸம்பூ⁴தா விதக்கா. அந்த⁴கரணாதிஆதீ³ஸு யஸ்ஸ ஸயங் உப்பஜ்ஜந்தி, தங் யதா²பூ⁴தத³ஸ்ஸனநிவாரணேன அந்த⁴ங் கரொந்தீதி அந்த⁴கரணா. ந பஞ்ஞாசக்கு²ங் கரொந்தீதி அசக்கு²கரணா. அஞ்ஞாணங் கரொந்தீதி அஞ்ஞாணகரணா. பஞ்ஞானிரோதி⁴காதி கம்மஸ்ஸகதாபஞ்ஞா, ஜா²னபஞ்ஞா, விபஸ்ஸனாபஞ்ஞாதி இமா திஸ்ஸோ பஞ்ஞா அப்பவத்திகரணேன நிரோதெ⁴ந்தீதி பஞ்ஞானிரோதி⁴கா. அனிட்ட²ப²லதா³யகத்தா து³க்க²ஸங்கா²தஸ்ஸ விகா⁴தஸ்ஸ பக்கே² வத்தந்தீதி விகா⁴தபக்கி²கா. கிலேஸனிப்³பா³னங் ந ஸங்வத்தயந்தீதி அனிப்³பா³னஸங்வத்தனிகா.
87. Aṭṭhame akusalavitakkāti akosallasambhūtā vitakkā. Andhakaraṇātiādīsu yassa sayaṃ uppajjanti, taṃ yathābhūtadassananivāraṇena andhaṃ karontīti andhakaraṇā. Na paññācakkhuṃ karontīti acakkhukaraṇā. Aññāṇaṃ karontīti aññāṇakaraṇā. Paññānirodhikāti kammassakatāpaññā, jhānapaññā, vipassanāpaññāti imā tisso paññā appavattikaraṇena nirodhentīti paññānirodhikā. Aniṭṭhaphaladāyakattā dukkhasaṅkhātassa vighātassa pakkhe vattantīti vighātapakkhikā. Kilesanibbānaṃ na saṃvattayantīti anibbānasaṃvattanikā.
காமவிதக்கோதி காமபடிஸங்யுத்தோ விதக்கோ. ஸோ ஹி கிலேஸகாமஸஹிதோ ஹுத்வா வத்து²காமேஸு பவத்ததி. ப்³யாபாத³படிஸங்யுத்தோ விதக்கோ ப்³யாபாத³விதக்கோ. விஹிங்ஸாபடிஸங்யுத்தோ விதக்கோ விஹிங்ஸாவிதக்கோ. இமே த்³வே ச ஸத்தேஸுபி ஸங்கா²ரேஸுபி உப்பஜ்ஜந்தி. காமவிதக்கோ ஹி பியமனாபே ஸத்தே வா ஸங்கா²ரே வா விதக்கெந்தஸ்ஸ உப்பஜ்ஜதி, ப்³யாபாத³விதக்கோ அப்பியே அமனாபே ஸத்தே வா ஸங்கா²ரே வா குஜ்ஜி²த்வா ஓலோகனகாலதோ பட்டா²ய யாவ நாஸனா உப்பஜ்ஜதி, விஹிங்ஸாவிதக்கோ ஸங்கா²ரேஸு ந உப்பஜ்ஜதி, ஸங்கா²ரா து³க்கா²பேதப்³பா³ நாம நத்தி², ‘‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸு’’ந்தி சிந்தனகாலே பன ஸத்தேஸு உப்பஜ்ஜதி.
Kāmavitakkoti kāmapaṭisaṃyutto vitakko. So hi kilesakāmasahito hutvā vatthukāmesu pavattati. Byāpādapaṭisaṃyutto vitakko byāpādavitakko. Vihiṃsāpaṭisaṃyutto vitakko vihiṃsāvitakko. Ime dve ca sattesupi saṅkhāresupi uppajjanti. Kāmavitakko hi piyamanāpe satte vā saṅkhāre vā vitakkentassa uppajjati, byāpādavitakko appiye amanāpe satte vā saṅkhāre vā kujjhitvā olokanakālato paṭṭhāya yāva nāsanā uppajjati, vihiṃsāvitakko saṅkhāresu na uppajjati, saṅkhārā dukkhāpetabbā nāma natthi, ‘‘ime sattā haññantu vā bajjhantu vā ucchijjantu vā vinassantu vā mā vā ahesu’’nti cintanakāle pana sattesu uppajjati.
இமேயேவ பன காமஸங்கப்பாத³யோ. அத்த²தோ ஹி காமவிதக்காதீ³னங் காமஸங்கப்பாதீ³னஞ்ச நானாகரணங் நத்தி², தங்ஸம்பயுத்தா பன ஸஞ்ஞாத³யோ காமஸஞ்ஞாத³யோ. காமதா⁴துஆதீ³னங் பன யஸ்மா பாளியங் –
Imeyeva pana kāmasaṅkappādayo. Atthato hi kāmavitakkādīnaṃ kāmasaṅkappādīnañca nānākaraṇaṃ natthi, taṃsampayuttā pana saññādayo kāmasaññādayo. Kāmadhātuādīnaṃ pana yasmā pāḷiyaṃ –
‘‘காமபடிஸங்யுத்தோ தக்கோ விதக்கோ…பே॰… மிச்சா²ஸங்கப்போ, அயங் வுச்சதி காமதா⁴து, ஸப்³பே³பி அகுஸலா த⁴ம்மா காமதா⁴து. ப்³யாபாத³படிஸங்யுத்தோ தக்கோ விதக்கோ…பே॰… மிச்சா²ஸங்கப்போ, அயங் வுச்சதி ப்³யாபாத³தா⁴து. த³ஸஸு ஆகா⁴தவத்தூ²ஸு சித்தஸ்ஸ ஆகா⁴தோ படிகா⁴தோ…பே॰… அனத்தமனதா சித்தஸ்ஸ, அயங் வுச்சதி ப்³யாபாத³தா⁴து. விஹிங்ஸாபடிஸங்யுத்தோ தக்கோ விதக்கோ மிச்சா²ஸங்கப்போ , அயங் வுச்சதி விஹிங்ஸாதா⁴து. இதே⁴கச்சோ பாணினா வா லெட்³டு³னா வா த³ண்டே³ன வா ஸத்தே²ன வா ரஜ்ஜுயா வா அஞ்ஞதரஞ்ஞதரேன ஸத்தே விஹேடே²தி, அயங் விஹிங்ஸாதா⁴தூ’’தி (விப⁴॰ 182, 910) –
‘‘Kāmapaṭisaṃyutto takko vitakko…pe… micchāsaṅkappo, ayaṃ vuccati kāmadhātu, sabbepi akusalā dhammā kāmadhātu. Byāpādapaṭisaṃyutto takko vitakko…pe… micchāsaṅkappo, ayaṃ vuccati byāpādadhātu. Dasasu āghātavatthūsu cittassa āghāto paṭighāto…pe… anattamanatā cittassa, ayaṃ vuccati byāpādadhātu. Vihiṃsāpaṭisaṃyutto takko vitakko micchāsaṅkappo , ayaṃ vuccati vihiṃsādhātu. Idhekacco pāṇinā vā leḍḍunā vā daṇḍena vā satthena vā rajjuyā vā aññataraññatarena satte viheṭheti, ayaṃ vihiṃsādhātū’’ti (vibha. 182, 910) –
ஆக³தத்தா விஸேஸோ லப்³ப⁴தி.
Āgatattā viseso labbhati.
தத்த² த்³வே கதா² ஸப்³ப³ஸங்கா³ஹிகா ச அஸம்பி⁴ன்னா ச. தத்த² காமதா⁴துயா க³ஹிதாய இதரா த்³வேபி க³ஹிதா நாம ஹொந்தி. ததோ பன நீஹரித்வா அயங் ப்³யாபாத³தா⁴து, அயங் விஹிங்ஸாதா⁴தூதி த³ஸ்ஸேதீதி அயங் ஸப்³ப³ஸங்கா³ஹிகா நாம. காமதா⁴துங் கதெ²ந்தோ பன ப⁴க³வா ப்³யாபாத³தா⁴துங் ப்³யாபாத³தா⁴துட்டா²னே , விஹிங்ஸாதா⁴துங் விஹிங்ஸாதா⁴துட்டா²னே ட²பெத்வாவ அவஸேஸங் காமதா⁴து நாமாதி கதே²ஸீதி அயங் அஸம்பி⁴ன்னகதா² நாம.
Tattha dve kathā sabbasaṅgāhikā ca asambhinnā ca. Tattha kāmadhātuyā gahitāya itarā dvepi gahitā nāma honti. Tato pana nīharitvā ayaṃ byāpādadhātu, ayaṃ vihiṃsādhātūti dassetīti ayaṃ sabbasaṅgāhikā nāma. Kāmadhātuṃ kathento pana bhagavā byāpādadhātuṃ byāpādadhātuṭṭhāne , vihiṃsādhātuṃ vihiṃsādhātuṭṭhāne ṭhapetvāva avasesaṃ kāmadhātu nāmāti kathesīti ayaṃ asambhinnakathā nāma.
ஸுக்கபக்கே² வுத்தவிபரியாயேன அத்தோ² வேதி³தப்³போ³. நெக்க²ம்மபடிஸங்யுத்தோ விதக்கோ நெக்க²ம்மவிதக்கோ. ஸோ அஸுப⁴புப்³ப³பா⁴கே³ காமாவசரோ ஹோதி, அஸுப⁴ஜ்ஜா²னே ரூபாவசரோ, தங் ஜா²னங் பாத³கங் கத்வா உப்பன்னமக்³க³ப²லகாலே லோகுத்தரோ. அப்³யாபாத³படிஸங்யுத்தோ விதக்கோ அப்³யாபாத³விதக்கோ. ஸோ மெத்தாபுப்³ப³பா⁴கே³ காமாவசரோ ஹோதி, மெத்தாஜா²னே ரூபாவசரோ, தங் ஜா²னங் பாத³கங் கத்வா உப்பன்னமக்³க³ப²லகாலே லோகுத்தரோ. அவிஹிங்ஸாபடிஸங்யுத்தோ விதக்கோ அவிஹிங்ஸாவிதக்கோ. ஸோ கருணாபுப்³ப³பா⁴கே³ காமாவசரோ, கருணாஜ்ஜா²னே ரூபாவசரோ, தங் ஜா²னங் பாத³கங் கத்வா உப்பன்னமக்³க³ப²லகாலே லோகுத்தரோ. யதா³ பன அலோபோ⁴ ஸீஸங் ஹோதி, ததா³ இதரே த்³வே தத³ன்வாயிகா ஹொந்தி. யதா³ மெத்தா ஸீஸங் ஹோதி, ததா³ இதரே த்³வே தத³ன்வாயிகா ஹொந்தி. யதா³ கருணா ஸீஸங் ஹோதி, ததா³ இதரே த்³வே தத³ன்வாயிகா ஹொந்தி.
Sukkapakkhe vuttavipariyāyena attho veditabbo. Nekkhammapaṭisaṃyutto vitakko nekkhammavitakko. So asubhapubbabhāge kāmāvacaro hoti, asubhajjhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Abyāpādapaṭisaṃyutto vitakko abyāpādavitakko. So mettāpubbabhāge kāmāvacaro hoti, mettājhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Avihiṃsāpaṭisaṃyutto vitakko avihiṃsāvitakko. So karuṇāpubbabhāge kāmāvacaro, karuṇājjhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Yadā pana alobho sīsaṃ hoti, tadā itare dve tadanvāyikā honti. Yadā mettā sīsaṃ hoti, tadā itare dve tadanvāyikā honti. Yadā karuṇā sīsaṃ hoti, tadā itare dve tadanvāyikā honti.
இமேயேவ பன நெக்க²ம்மஸங்கப்பாத³யோ. அத்த²தோ ஹி நெக்க²ம்மவிதக்காதீ³னங் நெக்க²ம்மஸங்கப்பாதீ³னஞ்ச நானாகரணங் நத்தி², தங்ஸம்பயுத்தா பன ஸஞ்ஞாத³யோ நெக்க²ம்மஸஞ்ஞாத³யோ. நெக்க²ம்மதா⁴துஆதீ³னங் பன யஸ்மா பாளியங் –
Imeyeva pana nekkhammasaṅkappādayo. Atthato hi nekkhammavitakkādīnaṃ nekkhammasaṅkappādīnañca nānākaraṇaṃ natthi, taṃsampayuttā pana saññādayo nekkhammasaññādayo. Nekkhammadhātuādīnaṃ pana yasmā pāḷiyaṃ –
‘‘நெக்க²ம்மபடிஸங்யுத்தோ தக்கோ விதக்கோ ஸங்கப்போ, அயங் வுச்சதி நெக்க²ம்மதா⁴து, ஸப்³பே³பி குஸலா த⁴ம்மா நெக்க²ம்மதா⁴து. அப்³யாபாத³படிஸங்யுத்தோ தக்கோ விதக்கோ ஸங்கப்போ, அயங் வுச்சதி அப்³யாபாத³தா⁴து. யா ஸத்தேஸு மெத்தி மெத்தாயனா மெத்தாசேதோவிமுத்தி , அயங் வுச்சதி அப்³யாபாத³தா⁴து. அவிஹிங்ஸாபடிஸங்யுத்தோ தக்கோ விதக்கோ ஸங்கப்போ – அயங் வுச்சதி அவிஹிங்ஸாதா⁴து. யா ஸத்தேஸு கருணா கருணாயனா கருணாசேதோவிமுத்தி – அயங் வுச்சதி அவிஹிங்ஸாதா⁴தூ’’தி. (விப⁴॰ 182) –
‘‘Nekkhammapaṭisaṃyutto takko vitakko saṅkappo, ayaṃ vuccati nekkhammadhātu, sabbepi kusalā dhammā nekkhammadhātu. Abyāpādapaṭisaṃyutto takko vitakko saṅkappo, ayaṃ vuccati abyāpādadhātu. Yā sattesu metti mettāyanā mettācetovimutti , ayaṃ vuccati abyāpādadhātu. Avihiṃsāpaṭisaṃyutto takko vitakko saṅkappo – ayaṃ vuccati avihiṃsādhātu. Yā sattesu karuṇā karuṇāyanā karuṇācetovimutti – ayaṃ vuccati avihiṃsādhātū’’ti. (Vibha. 182) –
ஆக³தத்தா விஸேஸோ லப்³ப⁴தி. இதா⁴பி ஸப்³ப³ஸங்கா³ஹிகா, அஸம்பி⁴ன்னாதி த்³வே கதா² வுத்தனயேனேவ வேதி³தப்³பா³. ஸேஸங் ஸுவிஞ்ஞெய்யமேவ.
Āgatattā viseso labbhati. Idhāpi sabbasaṅgāhikā, asambhinnāti dve kathā vuttanayeneva veditabbā. Sesaṃ suviññeyyameva.
கா³தா²ஸு விதக்கயேதி விதக்கெய்ய. நிராகரேதி அத்தனோ ஸந்தானதோ நீஹரெய்ய வினோதெ³ய்ய, பஜஹெய்யாதி அத்தோ². ஸவே விதக்கானி விசாரிதானி, ஸமேதி வுட்டீ²வ ரஜங் ஸமூஹதந்தி யதா² நாம கி³ம்ஹானங் பச்சி²மே மாஸே பத²வியங் ஸமூஹதங் ஸமந்ததோ உட்டி²தங் ரஜங் மஹதோ அகாலமேக⁴ஸ்ஸ வஸ்ஸதோ வுட்டி² டா²னஸோ வூபஸமேதி, ஏவமேவ ஸோ யோகா³வசரோ விதக்கானி மிச்சா²விதக்கே ச விசாரிதானி தங்ஸம்பயுத்தவிசாரே ச ஸமேதி வூபஸமேதி ஸமுச்சி²ந்த³தி. ததா²பூ⁴தோ ச விதக்கூபஸமேன சேதஸா ஸப்³பே³ஸங் மிச்சா²விதக்கானங் உபஸமனதோ விதக்கூபஸமேன அரியமக்³க³சித்தேன. இதே⁴வ தி³ட்டே²வ த⁴ம்மே, ஸந்திபத³ங் நிப்³பா³னங், ஸமஜ்ஜ²கா³ ஸமதி⁴க³தோ ஹோதீதி.
Gāthāsu vitakkayeti vitakkeyya. Nirākareti attano santānato nīhareyya vinodeyya, pajaheyyāti attho. Save vitakkāni vicāritāni, sameti vuṭṭhīva rajaṃ samūhatanti yathā nāma gimhānaṃ pacchime māse pathaviyaṃ samūhataṃ samantato uṭṭhitaṃ rajaṃ mahato akālameghassa vassato vuṭṭhi ṭhānaso vūpasameti, evameva so yogāvacaro vitakkāni micchāvitakke ca vicāritāni taṃsampayuttavicāre ca sameti vūpasameti samucchindati. Tathābhūto ca vitakkūpasamena cetasā sabbesaṃ micchāvitakkānaṃ upasamanato vitakkūpasamena ariyamaggacittena. Idheva diṭṭheva dhamme, santipadaṃ nibbānaṃ, samajjhagā samadhigato hotīti.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 8. அந்த⁴கரணஸுத்தங் • 8. Andhakaraṇasuttaṃ
