| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. அந்த⁴கவிந்த³ஸுத்தங்
4. Andhakavindasuttaṃ
114. ஏகங் ஸமயங் ப⁴க³வா மக³தே⁴ஸு விஹரதி அந்த⁴கவிந்தே³. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஆனந்த³ங் ப⁴க³வா ஏதத³வோச –
114. Ekaṃ samayaṃ bhagavā magadhesu viharati andhakavinde. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘யே தே, ஆனந்த³, பி⁴க்கூ² நவா அசிரபப்³ப³ஜிதா அது⁴னாக³தா இமங் த⁴ம்மவினயங், தே வோ, ஆனந்த³, பி⁴க்கூ² பஞ்சஸு த⁴ம்மேஸு ஸமாத³பேதப்³பா³ 1 நிவேஸேதப்³பா³ பதிட்டா²பேதப்³பா³ . கதமேஸு பஞ்சஸு? ‘ஏத² தும்ஹே, ஆவுஸோ, ஸீலவா ஹோத², பாதிமொக்க²ஸங்வரஸங்வுதா விஹரத² ஆசாரகோ³சரஸம்பன்னா அணுமத்தேஸு வஜ்ஜேஸு ப⁴யத³ஸ்ஸாவினோ, ஸமாதா³ய ஸிக்க²த² ஸிக்கா²பதே³ஸூ’தி – இதி பாதிமொக்க²ஸங்வரே ஸமாத³பேதப்³பா³ நிவேஸேதப்³பா³ பதிட்டா²பேதப்³பா³.
‘‘Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū pañcasu dhammesu samādapetabbā 2 nivesetabbā patiṭṭhāpetabbā . Katamesu pañcasu? ‘Etha tumhe, āvuso, sīlavā hotha, pātimokkhasaṃvarasaṃvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti – iti pātimokkhasaṃvare samādapetabbā nivesetabbā patiṭṭhāpetabbā.
‘‘‘ஏத² தும்ஹே, ஆவுஸோ, இந்த்³ரியேஸு கு³த்தத்³வாரா விஹரத² ஆரக்க²ஸதினோ நிபக்கஸதினோ 3, ஸாரக்கி²தமானஸா ஸதாரக்கே²ன சேதஸா ஸமன்னாக³தா’தி – இதி இந்த்³ரியஸங்வரே ஸமாத³பேதப்³பா³ நிவேஸேதப்³பா³ பதிட்டா²பேதப்³பா³.
‘‘‘Etha tumhe, āvuso, indriyesu guttadvārā viharatha ārakkhasatino nipakkasatino 4, sārakkhitamānasā satārakkhena cetasā samannāgatā’ti – iti indriyasaṃvare samādapetabbā nivesetabbā patiṭṭhāpetabbā.
‘‘‘ஏத² தும்ஹே, ஆவுஸோ, அப்பப⁴ஸ்ஸா ஹோத², ப⁴ஸ்ஸே பரியந்தகாரினோ’தி – இதி ப⁴ஸ்ஸபரியந்தே ஸமாத³பேதப்³பா³ நிவேஸேதப்³பா³ பதிட்டா²பேதப்³பா³.
‘‘‘Etha tumhe, āvuso, appabhassā hotha, bhasse pariyantakārino’ti – iti bhassapariyante samādapetabbā nivesetabbā patiṭṭhāpetabbā.
‘‘‘ஏத² தும்ஹே, ஆவுஸோ, ஆரஞ்ஞிகா ஹோத², அரஞ்ஞவனபத்தா²னி பந்தானி ஸேனாஸனானி படிஸேவதா²’தி – இதி காயவூபகாஸே ஸமாத³பேதப்³பா³ நிவேஸேதப்³பா³ பதிட்டா²பேதப்³பா³.
‘‘‘Etha tumhe, āvuso, āraññikā hotha, araññavanapatthāni pantāni senāsanāni paṭisevathā’ti – iti kāyavūpakāse samādapetabbā nivesetabbā patiṭṭhāpetabbā.
‘‘‘ஏத² தும்ஹே, ஆவுஸோ, ஸம்மாதி³ட்டி²கா ஹோத² ஸம்மாத³ஸ்ஸனேன ஸமன்னாக³தா’தி – இதி ஸம்மாத³ஸ்ஸனே ஸமாத³பேதப்³பா³ நிவேஸேதப்³பா³ பதிட்டா²பேதப்³பா³. யே தே, ஆனந்த³, பி⁴க்கூ² நவா அசிரபப்³ப³ஜிதா அது⁴னாக³தா இமங் த⁴ம்மவினயங், தே வோ, ஆனந்த³, பி⁴க்கூ² இமேஸு பஞ்சஸு த⁴ம்மேஸு ஸமாத³பேதப்³பா³ நிவேஸேதப்³பா³ பதிட்டா²பேதப்³பா³’’தி . சதுத்த²ங்.
‘‘‘Etha tumhe, āvuso, sammādiṭṭhikā hotha sammādassanena samannāgatā’ti – iti sammādassane samādapetabbā nivesetabbā patiṭṭhāpetabbā. Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū imesu pañcasu dhammesu samādapetabbā nivesetabbā patiṭṭhāpetabbā’’ti . Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. அந்த⁴கவிந்த³ஸுத்தவண்ணனா • 4. Andhakavindasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. குலூபகஸுத்தாதி³வண்ணனா • 1-4. Kulūpakasuttādivaṇṇanā
